EXTARA
Esdras
Ekarotopo
Sero Extara ekarõko juteu tõ oepyry ropa poko 2 Koronika mykapo, Papironia poe namotome toto ehxĩpo. Tõsesarise toh kynexine Jerusarẽ po. Ritonõpo toahmase eya xine Itapyĩ tao. Ekarõko: 1) Izyraeu tõ apitorymãkõ oepyry ropa Papironia poe Xiro, Perexia tuisary omi poe. 2) Ritonõpo Tapyĩ tyrise ropa Jerusarẽ po, typopase Tapyĩ Kurãme. Mame moro tao Ritonõpo toahmase ropa Jerusarẽ põkomo a. 3) Imeĩpo, imehnõ juteu tõ toehse ropa Jerusarẽ pona Extara maro. Atamorepaketyme Ritonõpo Omiry poko Extara kynexine. Ahno takorehmase eya Ritonõpo omipona toto ehtoh poko te, imehnõ maro zae toto ehtoh poko roropa.
Sero pape ao
Aehpitory ropa Papironia poe 1.1—2.70
Ritonõpo Tapyĩ Kurã tyrise ropa 3.1—6.22
Extara tõ oepyry ropa 7.1—10.44
1
Tuisa Xiro nyripohpyry
(2 Koronika 36.22-23)
1 Jeimamyry apitorymã po, tuisame toehse Xiro ahtao, Perexia esemy, moro tyrise Ritonõpo a tõmihpyry ae ro Jeremia a. Osenetupuhtoh tyrise eya Xiro kurohtaka sero ripotoh aropotohme pata tõ pona porehme, emero ahno neneryme. Ynara tykase ynororo:
2 — Ywy, Xiro, Perexia esemy ynara ãko ase: “Ritonõpo, Kapu Esẽ omi poe, sero nono põkõ kowenatume ase, emero porehme. Tõmihpyry tokarose ya Tytapyĩ ritohme Jerusarẽ po, Juta nonory po. 3 Kure Ritonõpo exiry se ase amaro xine emero, ipoetoryme awahtao xine! Ytotoko Jerusarẽ pona Ritonõpo maro Oturutoh ritohme ropa. Izyraeu tõ Esẽme mana. Moroto Jerusarẽ po Ritonõpo eahmatohme mana. 4 Amarokõ roropa, tehme exiketõ oesarykõ po, mokaro ytoketõ akorehmatoko parata ke te, uuru ke te, tonahsẽ ke te, okyno tõkehko ke te, onekarorykõ ke roropa aropotohme Ritonõpo Tapyĩ taka, Jerusarẽ pona.”
Izyraeu tõ ytory ropa Jerusarẽ pona
5 Mame oxiekyry tõ tamuximãkõ Juta tomo te, Pẽjamĩ tõ maro te, oturuketõ maro, Rewi tõ maro te, imehnõ maro, emero toahmase exiketõ Ritonõpo a ikurohtao xine, tãtakimapitose toto, toytotohkõme Jerusarẽ pona, Ritonõpo Tapyĩ ritohme ropa. 6 Tykatonomorykomo a takorehmase toto emero. Mõkomo tokarose eya xine, parata risemy te, uuru roropa te, tonahsemy te, pui tomo te, tineru te, tynekarorykõ roropa tarose eya xine Ritonõpo Tapyĩ taka.
7 Tijera tõ te, eukuru ẽtoh tonõ maro, Napukotonozo narotyã Ritonõpo Tapyĩ tae Jerusarẽ poe tyneponãmarykõ eahmatoh taka, tokarose ropa tuisa Xiro a. 8 Morohne tokarose tuisa Xiro a, Mitiretate, mõkomo erase a. Morohne tymerose emero eya pape pokona. Mame tokarose emero Sesepazaa a kowenatu, Juta esemy a. 9-10 Ynara tymerose eya: tijera uuru risemy 30me, tijera parata risemy 1.000me, tijera imehnomo 29me, tasa uuru risemy 30me, tasa parata risemy 410me, imehnõ oripo tõkehko 1.000me tokarose, enara.
11 Atapona uuru risẽ, parata risẽ maro 5.400me kynexine. Morohne emero tarose Sesepazaa a Jerusarẽ pona, toytory ropa tahtao Papironia poe Izyraeu tõ maro, Papironia pona arotyamo moro põkõ poetoryme.