1 Morarame Samaria po Akape poenõ kynexine ipakõ roropa, 70mãkõ kynexine. Mame pape tymerose Jeu a pata esã neneryme, tamuximãkõ neneryme roropa, Akape ekyry tõ pyno exiketõ neneryme roropa. Ynara tykase ynororo:

2 — Tuisa mũkuru tõ eraseme matose. Kahu tõ nae matose te, kawaru tomo, typyreke roropa matose. Pata tõ tapuruse exiketõ nae roropa matose. Naeroro sero pape, ynymerohpyry tapoise oya xine ahtao, 3 tuisa ekyrỹpyry toiro imenekatoko, imehxo exikety, otuisarykõme ehtohme. Mame etonãko matose mokyro ewomatohme.

4 Yrome mokaro Samaria põkõ esã tõserehse. Ynara tykase toto:

— Otãto osetapãko sytatou? Jeu onyporemãkaposaromepyra sytatose. Tuisa Jorão typoremãkase eya, tuisa Akazia roropa, tykase toto.

5 Naeroro tõximõse toto; tuisa tapyĩ konõto erase te, pata tuisary maro te, tamuximãkõ maro, Akape ekyry pyno exiketõ maro. Oximaro omi taropose eya xine Jeu a ynara katohme: “Opoetoryme ynanase. Õmiry omipona se rokẽ ynanase. Yrome tuisa ekyry onymenekara ynanase tuisame tyritohme. Naeroro zae ehtoh oya tyriko,” tykase toto.

6 Morara exiryke imepỹ pape tymerose Jeu a toto neneryme. Ynara tykase:

— Ymaro awahtao xine, jomiry omipona se nymyry awahtao xine, tuisa Akape mũkuru tõ etapatoko emero, zupuhpyrykõ enehtohme ya, Jezereu pona kokoro serara ahtao, tykase.

Mokaro 70mãkõ, tuisa Akape mũkuru tõ ewomãko Samaria põkõ tamuxiry nexiase, toto wãtanohpõko toh nexiase. 7 Mame Jeu nymerohpyry tonese tyya xine ahtao, mokaro Akape mũkuru tõ 70mãkõ totapase Samaria põkõ tuisary tomo a. Zupuhpyrykõ tyrise ruto aka eya xine. Taropose toto Jezereu pona, Jeu a.

8 Mame Jeu turuse ahtao Akape mũkuru tõ zupuhpyry enehtopõpyry poko, asakoro oximõtoh tyripose eya, zupuhpyrykomo, pata omõtoh po. Moroto tynomose toto eya xine ẽmehtoh pona.

9 Tõmehse ahtao Jeu toytose pata omõtoh pona. Ynara tykase ynororo moroto ytoytoketomo a:

— Ywy roro tãtamorepase tuisa Jorão etapary poko. Oya xine pyra, ya mokyro totapase. Yrome moxiamo, onoky a totapase toto? 10 Morara exiryke tuaro ehtoko, Ritonõpo omihpyry Akape tõ poko, emero exĩko mana Ritonõpo omihpyry ae ro. Emero tyrise Ritonõpo a, Eria omihpyry ae ro.

11 Mame imehnõ Akape ekyry tõ totapase Jeu a, Jezereu po exiketomo, tuisa Akape akorehmananõ roropa, epẽpyry tõ maro, ineponãmarykõ eahmatoh poko erohketõ maro. Tonahkase toto eya emero porehme.

12 Morarame toytose Jeu Jezereu poe Samaria pona. Osema tao patãpo kynexine, esety Kaneru Esã Esaryme. 13 Moroto tõseporyse ynororo Akazia ekyrỹpyry tõ maro, Juta tõ esemỹpyry. Tõturupose ynororo:

— Onokãkõ matou? tykase.

— Akazia ekyryme ynanase, tykase toto. — Jezereu pona ytõko ynanase Jezapeu poenõ maro oseahmase, imehnõ tuisa ekyry tõ eahmase roropa, tykase toto.

14 — Moxiã apoitoko! Isene ro toto se ase! tykase Jeu typoetory tomo a.

Tapoise toto eya xine, mame toto totapase moroto, tuna eutary pũto. 42me toh kynexine atapona, emero totapase eya xine.

15 Morotoino toytose Jeu ahtao, tõseporyse ynororo Jonatape, Rekape mũkuru maro, aepyryhtao oturuse tymaro. Taomikase Jeu ahtao, ynara tykase:

— Oxisã osenetupuhnõko sytah? Jakorehmãko mah? tykase.

— Ỹ, ãkorehmãko ase, tykase Jonatape.

— Ahtao, oemary ekaroko ya! tykase Jeu.

Tomary tokarose eya. Mame Jonatape takorehmase Jeu a onuhtohme tykahu aka.

16 — Eropa ymaro, tykase Jeu. — Orẽpyra Ritonõpo omipona jehtoh enẽko mase.

Tarose ynororo tykahu ae Jeu a, Samaria pona. 17 Mame toeporehkase toto ahtao, Akape ekyry tõ totapase Jeu a, emero porehme. Morara toehse Ritonõpo omihpyry ae ro Eria a.

18 Morarame Samaria põkõ taoximõnohpose Jeu a. Ynara tykase ynororo:

— Paau toahmase Akape a pitiko rokene. Yrome ywy pitiko rokẽ pyra, itamurumehxo eahmãko ase. 19 Paau poko urutõ kõ enehpoko oximõme, eahmananõ maro, Paau poko erohketõ roropa. Ekurehpyra ehtoko. Ynekarory konõto zahkãko ase Paau eahmatohme. Oehpyra exiketõ orihmanohpõko ase, tykase.

Yrome morara tykase Jeu, Paau poko exiketõ enehtohme oximõme, toto etapatohme.

20 Mame ynara tykase Jeu:

— Toiro ẽmepyry imenekatoko Paau eahmatohme. Tymenekase eya xine.

21 Mame omi taropose Jeu a, emero pata tõ pona, Izyraeu nonory po. Paau eahmananõ tõximõse toto, emero porehme. Mame Paau eahmatoh taka tomõse toto. Tapyi typehkase eya xine. 22 Mame Jeu omi poe Paau poko erohketõ tuisary a upo tonehse Paau poko erohketõ zupony ekarotohme Paau eahmananomo a. 23 Moromeĩpo Jeu tomõse Paau tapyĩ taka Jonatape Rekape mũkuru maro. Ynara tykase ynororo moro taõkomo a:

— Tomeseke ehtoko Paau eahmananõ rokẽ taro ehtohme Ritonõpo eahmananõ omõpyra ehtohme xiaro, tykase.

24 Mame tomõse ynororo Jonatape maro tynekarory zahkatohme Paau eahmaryme. Yrome 80me soutatu tõ tyrise eya jarãnao. Ynara tykase eya xine:

— Moxiã etapãko matose emero porehme. Toiro tynamase oya xine ahtao aepatohme epehmãko matose oorihtohkõ ke, tykase.

25 Morarame tynekarory tyahkakehse ahtao Jeu a, ynara tykase ynororo soutatu tõ esamo a:

— Omõtoko toto etapatohme emero porehme epara toto ehtohme, tykase.

Naeroro tomõse toto typyrekõ maro, toto etapatohme. Ekepyrykõ tarose jarãnaka eya xine. Mame tomõse toto osa taka Paau tapyĩ taõ taka. 26 Moro tae Paau neponãmary tarose eya xine jahkatohme. 27 Naeroro Paau neponãmary tonahkase eya xine tapyi roropa. Mame moro tapyi Paau eahmatoh ahno suhtatohme toehse. Moroto ro mana seroae ro.

28 Moro ke Paau eahmary tonahkapose Jeu a Izyraeu tõ nonory po. 29 Yrome tuisa Jeropoão Nepate mũkuru nyrihpyry iirypyryme onurumekara kynexine. Mokyro Jeropoão a Izyraeu tõ takorehmase tyyrypyrykõ poko toto ehtohme. Pui mũkuru panõ uuru risẽ tyrise eya Peteu po te, Tã po roropa mokaro eahmatohme, enara. 30 Ynara tykase Ritonõpo Jeu a:

— Akape ekyry tonahkase oya jomihpyry omipona. Morara exiryke ynara ãko ase oya: “Omũkuru tuisame exĩko, apakõ roropa Izyraeu tõ esẽme exĩko mã toto 4me aemãsamo.”

31 Yrome Ritonõpo Izyraeu tõ Esẽ omihpyry omipona hkopyra Jeu toehse. Jeropoão ehtopõpyry typoenohse eya Izyraeu tõ akorehmary poko toto rypyry poko toto ehtoh poko roropa.

32 Morarame Izyraeu tõ nonory zumo hkopyra tyripitose Ritonõpo a. Tuisa Hazaeu Xiria esemy a Izyraeu tõ nonory typoremãkapose 33 Joatão poe xixi tũtatoh wino ikurenaka pata Aroea pona tuna Aranõ pona. Tapoise eya Kireate nonory roropa Pasã nonory roropa. Moroto Kate pakomotyã kynexine te, Rupẽ pakomotyamo te, Manase pakomotyã xixi tũtatoh wino.

34 Imehnõ Jeu nyrityã, orẽpyra aexihpyry tymerose pape pokona esety Izyraeu tõ Tuisary Ehtopõpyry. 35 Toorihse ynororo. Ekepyry tonẽse Samaria po. Imũkuru Jeoakaze tuisame toehse tumy myakãme. 36 28me jeimamyry taropose Jeu a Samaria po Izyraeu tõ esẽme toexiry poko, enara.