16
1 Mame esaka Ritonõpo omihpyry ẽ tyrise eya xine tapyi taka, Tawi nyrihpyry taka. Mame tynekarorykõ Ritonõpo a okyno tõ tyahkase tytororo eya xine, osepeme ehtoh tyahkase roropa eya xine. 2 Moromeĩpo okyno tõ tyahkakehse Tawi ahtao, kure imoihmãkõ tyripose eya Ritonõpo Imehxo Exikety a. 3 Mame wyi tokarose eya imoihmãkomo a, uwa tõkehko tasarahse exikety, tõsẽ tupuruse exikety maro, orutua komo a te, nohpo tomo a emero Izyraeu põkomo a tonahsẽ tokarose eya.
4 Mame toitoine rewita tõ tyrise Tawi a imoihmãkõ akorehmananõme, Ritonõpo, Izyraeu tõ Esẽ, eahmary poko, aomihpyry ẽ esemary ae osemazuhme toto ytotohme, eremiatohme, Ritonõpo eahmaryme. 5 Asape tymenekase, toto tuisaryme te, Zakaria tyrise eya mokyro akorehmaneme. Rira etonanõme ynara tymenekase: Jeieu te, Semiramote te, Jeieu te, Matitia te, Eriape te, Penaia te, Opete-Etõ te, Jeieu, enara. Paratu etoneme Asape tymenekase. 6 Rueimo etotohme kokoro rokene Ritonõpo omihpyry ẽ ẽpataka, Ritonõpo maro oturuketõ tymenekase: Penaia te, Jaazieu, enara. 7 Moro ẽmepyry ae Asape tõ tyripitose Tawi a, rewita tõ maro eremiaketõme, Ritonõpo, Izyraeu Esẽ, eahmatohme.
Ritonõpo eahmatoh sero
(Saumu 105.1-15; 96.1-13; 106.1,47-48)
8 “Kure mase” kahtoko Ritonõpo a,
imehxo aexiry ekarotoko;
imehnõ nonory põkõ zuruko inyrihpyrykõ poko.
9 Oeremiatoko Kuesẽkõ eahmaryme,
inyrityã kurã ekarotoko.
10 Tãkye ehtoko ipoetoryme kuexirykõ poko.
Kuesẽkõ poko oseahmaketomo emero,
atãkyematoko!
11 Ritonõpo zupitoko, ãkorehmatohkõme;
oneahmakehpyra ehtoko, kokoro rokene.
12-13 Ritonõpo poetory,
Jako pakomotyãme matose,
inymenekahpyry, Izyraeu, pakõme.
Wenikehpyra ehtoko inyrityã poko tyjamitunuru ke,
kuepekõkara wãnohtopõpyry poko eya.
14 Kuesẽkõme Ritonõpo mana,
inyripohpyry sero nono põkõ akorehmatohme mana, emero porehme.
15 Jũme wenikehpyra mã ynororo tõmihpyry poko,
miu motye zumakahpõkomo a aomiry enahpyra mana.
16 Tõmihpyry totapose Aparão a:
“Morara tyrĩko ase,” tykase Izake a.
17 Tõmihpyry totapose Jako a,
jũme enahpyra ehtopo.
18 Morara ahtao ynara tykase Ritonõpo:
“Kanaã nonory ekarõko ase oya xine,
jũme oesarykõme ehtohme.”
19 Tuhke pyra toh kynexine Ritonõpo poetory tomo,
katonõme sã rokẽ moro nono po,
“Oesarykõme sero nono exĩko mana,” katopõpyry po.
20 Imeimehnõ nonory poro toytose toto,
toiro tuisa konõto nonory poe imepỹ pona.
21 Yrome typoetory tõ onyporemãkapopyra Ritonõpo kynexine.
Typoetory tõ ewomatohme ynara tykase ynororo tuisa tomo a:
22 “Ynymenekatyã ypoetory tõme onerekohmara ehtoko;
urutõ kõ onyryhmara ehtoko.”
23 Eremiatoko Ritonõpo netaryme,
sero nono põkõ emero!
Kokoro rokẽ imehnõ zurutoko,
typynanohse eya kuexirykõ poko.
24 “Ritonõpo imehxo ehtoh poko,”
ekarotoko imehnõ nonory põkomo a;
inyrihpyry poko tyjamitunuru ke zurutoko emero pata tõ põkomo a.
25 Tuisame Ritonõpo mana eahmatohme kyya xine;
imehnõ motye emero, tuisamehxo mana.
26 Imehnõ nonory põkõ tyneponãmarykõ poko rokẽ mã toto,
yrome kapu rihpõme Ritonõpo mana.
27 Ritonõpo zomye saereh ãko mana,
tuisamehxo aexiry osenẽko;
ijamitunuru ke tãkye ehtoh ke roropa Itapyĩ pehme mana.
28 Kure Ritonõpo mana, eahmatoko, sero nono põkõ emero.
Tynyrihpyry motye aexiry poko eahmatoko, ijamitunuru poko roropa.
29 Kuesẽkõ esety kurã eahmatoko;
onekarory enehtoko omõtohme Itapyĩ taka.
Kuosekumurukõ po syporohtone Kure Exikety ẽpataka oseneporyhtao.
30 Tykytyky kahtoko ẽpataka, nono põkõ emero!
Sero nono esyryhmasaromepyra mana, esaka tyrise mana.
31 Tãkye ehtoko nono, kapu roropa!
Imehnõ nonory põkõ zurutoko:
“Ritonõpo tuisame mana!”
32 Panaikato mase, tuna konõto, onokyro tõ emero tuna kuao.
Atãkyematoko, ona tomo, ona põkõ roropa, Ritonõpo nyrityã emero.
33 Wewe tomo itu tõ kohtãko mã kehko tõseahmaryme, Ritonõpo Kuesẽkõ ẽpataka,
oehnõko ropa mana emero Esẽme ehtohme.
34 “Kure mase” kahtoko Ritonõpo a kure aexiryke,
kypyno xine exikehpyra mana.
35 Ynara kahtoko eya: “Yna ipynanohko, Ritonõpo, yna Esemy!
Yna enehko oximõme,
yna anỹko imehnõ awaro pyra exiketõ nonory poe.
Morara ahtao ‘Kure mase,’ ãko ynanase,
tãkye oeahmãko, Ritonõpo Kurano.”
36 Ritonõpo, kurã mase, Izyraeu tõ Esemy.
Eahmatoko seromaroro, jũme kakehpyra roropa.
Imoihmãkõ “Yje,” tykase;
Ritonõpo toahmase eya xine.
Ritonõpo eahmary Jerusarẽ po, Kipeão po roropa
37 Morarame Asape tyripose Tawi a, Ritonõpo eahmatoh esẽme rewita tõ maro, Ritonõpo omihpyry ẽ esao. Moroto Ritonõpo eahmary poko toerohse toto kokoro rokene. 38 Takorehmase toto Opete-Etõ, Jetutũ mũkuru a, jekyry tõ 68mãkõ maro. Mame mokyro Opete-Etõ te, Hosa maro omõtoh eraseme toh kynexine.
39 Yrome Ritonõpo eahmatoh tao Kipeão po, Zatoke, Ritonõpo maro oturukety, tuisame kynexine takorehmananõ maro, Ritonõpo eahmary poko. 40 Kokoro rokene pakeimo te, kokonie pukuro, tynekarorykõ tyahkase eya xine, okyno tytororo, zahkatoh po, Ritonõpo nyripohpyry ae ro, inymeropohpyry ae ro Moeze a, ekarotohme Izyraeu tomo a. 41 Mokaro maro Hemã kynexine Jetutũ maro, imehnõ maro tymenekase exiketõ eremiatohme Ritonõpo eahmatohme, kypyno xine exikehpyra exiryke. 42 Rueimo tõ te, paratu tõ, metau risẽ tõkehko, eraseme roropa Hemã tõ kynexine Jetutũ maro. Morohne totose eremiaketõ eremiaryhtao Ritonõpo eahmaryme. Jetutũ ekyry tõ omõtoh eraseme roropa toh kynexine.
43 Mame toytose ropa toto tytapyĩkõ taka ropa. Tawi roropa toytose tytapyĩ taka, tytapyĩ taõkõ maro ehtohme.