1 Morarame moro poko, imoihmãkõ tamorepakehse ahtao Jezu a, ynara tykase ynororo typoetory tomo a,

2 —Zuaro matose. Asakoro tõmehse ahtao otuhtoh konõto exĩko mana, Paxikoame. Mame Kapu ae Ayhtohpyry apoĩko mã toto. Wewe pokona exixihmapõko mã toto, tykase Jezu.

3 Morarame Ritonõpo maro oturuketõ tuisary tõ tõximõse juteu tõ tamuxiry tõ maro. Kaipa tapyi konõto nae kynexine. Morara exiryke moro taka tõximõse toto. Ritonõpo maro oturuketõ tamuxiryme Kaipa kynexine. 4 Mame tãtamorepase toto Jezu apoiry poko tyya xine. Tokare pyra Jezu apoiry se toh kynexine repe, etapapotohme tyya xine. 5 Ynara tykase toto,

—Setapapotone. Yrome otuhtoh konõto po ahtao popyra mana. Imoihmãkõ kyzehno xine exĩko mana, tykase toto.

6 Morarame Jezu Petania po kynexine, Ximão tapyĩ tao. Ximão ipũ imotahpyrỹpyry kynexine. 7 Mame mokyro tapyĩ tao Jezu ahtao nohpo toytose eya. Ixtaratu kurã tarose nohpo a Jezu popatohme. Topu kurã risẽ ao ixtaratu kynexine, arapaxturu risẽ ao. Ixtaratu ke pehme topu risẽ kynexine. Mame ixtaratu ẽ tuhkohse nohpo a Jezu zuhpokoxi tyritohme Jezu otukuruhtao. Moro ixtaratu tyrise eya Jezu zupuhpyry pona emero. 8 Mame moro eneryke tyya xine Jezu poetory tõ tohne toehse.

—Oty katoh ixtaratu ahnikãko rokẽ mose nae? tykase toto tõturupose. 9 —Moro ixtaratu tokamose ahtao osepekahtoh tao tuhke tineru apoiry ekarotohme ropa tymõkomokãkara a, tykase toto.

10 Mokaro a nohpo kerekeremary waro Jezu kynexine. Morara exiryke ynara tykase ynororo eya xine,

—Oty katoh mose nohpo kerekeremãko matou? Mose nyrihpyry juhpokoxi kure potu nase ya. 11 Tymõkomokãkara mã enahpyra amaro xine. Yrome okynã pyra ase amaro xine. Orihnõko ase. 12 Morara exiryke joko pomano orihpyra ro jahtao, toorihse jahtao jonẽtohpo jekepyry pomatoh kuhno. 13 Etatoko pahne, emero pata tõ poro jomiry poko imehnõ amoreparyhtao oya xine mose nyrihpyry mã mya otuotuhponamãko mana. Mame oesahpyo xine roropa morararo mana, otuotuhponamãko mana, wenikehpyra oehtohkõme jũme sẽ ritopõpyry poko ypokona, tykase Jezu eya xine.

14 Morarame moroto 12mãkõ kynexine. Toiro esety Juta Ixikariote kynexine. Mokyro toytose Ritonõpo maro oturuketõ tuisary tomo a. 15 Ynara tykase ynororo toto a,

—Otãto tineru pixo ekarõko matou ya Jezu ekaroryhtao oya xine? tykase ynororo.

Morara kary etaryke tyya xine tineru tokarose eya. 30me tineru tokarose eya. 16 Moromeĩpo Jezu ekarory se toehse Juta eya xine. Morara exiryke tãtamorepase ynororo Jezu ekarory poko Jezu ewokary se toexiryke.

17 Mame otuhtoh konõto toehse Paxikoame. Moro otuhtoh konõto esety akorõ wyi pipahmã ohtopo. Ynara tykase Jezu poetory tõ eya,

—Otoko otuhtoh ripõko mah yna a, Paxikoame? tykase toto eya.

18 Ynara tykase Jezu eya xine,

—Pata pona oytorykohtao orutua enẽko matose. Ynara kahtoko eya, “Yna amorepane ynara nykã oya, ‘Jytotohpo toehse nase. Morara exiryke ypoetory tõ maro Paxikoae otuhnõko ynanase atapyĩ tao,’ ” kaxiko eya, tykase Jezu typoetory tomo a.

19 Mame toytose toto Jezu omi poe otuhtoh ritohme Paxikoame.

20 Morarame tykohmãse ahtao typorohse Jezu typoetory tõ maro, 12mãkõ maro, otuhse. 21 Mame tõtukurukohtao ynara tykase Jezu eya xine,

—Etatoko pahne, taro toiro ohtaõkõ jewokãko mana, tykase ynororo typoetory tomo a.

22 Morara kary etaryke tyya xine toemynyhmase ipoetory tomo. Mame tõturupose toto, atatakomino.

—Onoky? Ywy? tykase toto tõturupose.

23 Ynara tykase Jezu eya xine,

—Mose jewokãko nase, ymaro paratu aka wyihpane, tykase ynororo. 24 —Etatoko pahne, Ritonõpo nymeropohpyryae ro orihnõko ase, Ritonõpo omi poe ro. Yrome jetuhxo exĩko mã jewokahpono a. Etuarimãkohxo mana jewokatamitume. Kurehxo eya exiry enurupyra tokurehse ynororo ahtao. Morara ahtao etuarimara exiry, tykase Jezu typoetory tomo a.

25 Mame ynara tykase Juta, Jezu ewokahpono,

—Ypoko moturu pãna? tykase, tõturupose.

—Ỹ, tykase Jezu eya.

26 Mame tõtukurukohtao ro wyi tapoise Jezu a.

—Kure mase Papa. Yna zuru seny onekarohpyry yna a, tykase. Mame wyi tytohtohkase eya typoetory tõ punero ekarotohme. Ynara tykase ynororo eya xine,

—Seny, apoitoko enahtohme oya xine. Upũ sero, tykase.

27 Morarame eukuru apoine roropa. Tõturuse ropa Ritonõpo a,

—Kure mase, tykase. Mame typoetory tomo a eukuru tokarose roropa.

—Seny, ẽtoko, emero porehme. 28 Umunurume sã nase sero. Umunuru kuãnõko ase tuhke iirypyrymãkõ kurãkatohme. Umunuru ekuamyryhtao tuhke Ritonõpo poetoryme exĩko mã toto jũmãme. 29 Etatoko pahne, uwa eukuru onẽzomopyra ase orihpyra ro jahtao. Tyoro ẽnõko ase euhkasenano Ritonõpo esao rokene, tykase Jezu eya xine.

30 Morarame toremiase toto Ritonõpo kure exiry poko. Mame toytose toto moro tae ypy pona, Oriwera pona.

31 Morarame ynara tykase Jezu typoetory tomo a,

—Sero kohmamyryae ro epãko matose. Jurumekãko matose. Ynara tymerose exiryke Ritonõpo omiryme sero poko, “Kaneru tõ esẽ etapapõko Ritonõpo mana, ekỹpyã atahpahnõko mana. Sapararahme exĩko mã toto,” me tymerose Ritonõpo omiryme. 32 Yrome tõsemãse ropa jahtao, Karirea pona ytõko ase osemazuhme. Moroto jenẽko ropa matose, tykase Jezu.

33 Ynara tykase Peturu Jezu a,

—Orumekara ase jũme. Imehnõ orumekãko mã repe emero. Yrome ywy orumekara ase jorikyry ponãmero, tykase Peturu eya.

34 Yrome ynara tykase Jezu Peturu a,

—Etako pahne, sero kohmamyry ae kuratiri etara ro ahtao, “Jezu waro pyra ase, Jezu waro pyra ase,” ãko mase oseruao, tykase Jezu eya.

35 Ynara tykase ropa Peturu Jezu a,

—“Awaro pyra ase,” kara ase jũme. Amaro ro jetapary se imehnõ ahtao morara kara ase. “Jezu waro pyra ase,” kara ase, tykase Peturu.

Morararo tykase imehnõ ipoetory tõ emero eya.

36 Morarame toytose Jezu typoetory tõ maro Ketysemane pona. Ynara tykase ynororo typoetory tomo a,

—Taro ehtoko aporo. Mõtona pixo ytoxi aporo Papa maro oturutã aporo, tykase ynororo. 37 Mame tymaro Peturu tarose eya Zepeteu mũkuru tõ maro asakoro. Morarame tomuhtapãse Jezu, toemynyhmase yronymyryme. 38 Ynara tykase ynororo typoetory tomo a,

—Emuhtapãnõko ase yronymyryme. Morara exiryke taro rokẽ ehtoko aporo, toto eneneme, tykase Jezu eya xine.

39 Mame mya pitiko toytose Jezu. Nono pona typorohse ynororo tõpotapoe. Mame ynara tykase ynororo Tumy a,

—Papa kapuaono, emero ritõme mase. Emero zuaro roropa mase. Jorikyry se pyra ase repe. Yrome jorikyry se awahtao õmipona se rokẽ ase, tykase.

40 Mame toytose ropa Jezu typoetory tomo a, oseruaõkomo a. Nyhnõko toh kynexine. Mame ynara tykase ynororo Peturu a,

—Owetũkõ oneanahtopyra matokene? 41 Nyhpyra ehtoko. Oturutoko Ritonõpo maro oenekunohpyra xine joroko tamuru ehtohme. Õnykyrykõ se pyra matose repe. Yrome jamihme pyra matose, tykase Jezu eya xine.

42 Morarame toytose ropa Jezu oturuse ropa Tumy maro,

—Jorikyry se awahtao õmipona se rokẽ ase, tykase ynororo. 43 Mame toeramase ropa ynororo typoetory tomo a. Nyhnõko rokẽ toh kynexine tuetũkõ oneanahtopyra toexirykõke.

44 Mame mya roropa toytose Jezu toiroro oturuse ropa Tumy maro. Osemazuhme tõturutopõpyry saaro tõturuse ropa ynororo. 45 Mame toeramase ropa ynororo typoetory tomo a. Ynara tykase ynororo,

—Nyhnõko ro matohu? Oseremãko matohu? Enetoko ke. Kapu ae Ayhtohpyry ewokatohpo toehse nase. Seromaroro iirypyrymãkomo a osekarõko mana. 46 Owõtoko. Ehmaropa, jewokane enetokose, tykase ynororo.

47 Mame Jezu otururuhtao ro Juta toytose eya, 12mãkõ maronõpo kynexine. Tymaro tuhkãkõ tarose, ajoajohpãkomo, tytapemake exiketomo, tykaparuke exiketõ roropa. Juteu tõ tuisary naropotyã tõ kynexine. Ritonõpo maro oturuketõ tuisary naropotyã roropa kynexine. 48 Mame eporehkara ro tahtao xine ynara tykase Jezu ewokary se exikety tymarõkomo a, “Etatoko pahne, Jezu maro rokẽ oturũko ase. Eahmãko sã ase, ipohnõko ase. Moro eneryhtao oya xine enetupuhnõko matose. Jezu mokyro. Apoitoko,” tykase Juta eya xine.

49 Morarame Jezu a toytose ynororo topohme. Ynara tykase ynororo Jezu a,

—Oehno kẽ tuisa, tykase taomirose eya. Toahmase roropa eya.

50 —Oty kase moehno jepe? Axĩ ke openetatoh poko exiko, tykase Jezu eya.

Mame Jezu tapoise eya xine arotohme. 51 Mame Jezu marono a imepỹ tysahkase tytapemã ke. Ritonõpo maro oturuketõ tuisary namoto tysahkase eya. Ipanary rokẽ tysahkase eya. 52 Yrome ynara tykase Jezu eya,

—Atapemã tyriko ropa ẽ aka. Imehnõ tuose oya xine ahtao owotorỹko roropa mã toto. 53 Tuaro pyra ro matohu? Jakorehmananõ se jahtao ekaropory Papa kapuaono a. Mame tuhke kuhse tynenyohtyã enehpory ya jewomananõme. 54 Yrome morara ahtao Ritonõpo omipona pyra exiry. Morohne urutõkõ nurutopõpyryae ro mana.

55 Mame ynara tykase Jezu imoihmãkomo a,

—Oty katohme tytapemake moehtou? Tykaparuke roropa moehtou? Japoiry se matose zehnoto apoiry samo. Yrome kokoro rokẽ yporotyasene Ritonõpo maro oturutoh tao. Kokoro rokẽ amorepato exiasene roropa. Oty katoh pake ro japoipyra mexiatose? 56 Yrome serohne exĩko mana urutõkõ omihpyryae ro, tykase Jezu eya xine.

Morarame ipoetory tõ toepase toto. Jezu turumekase eya xine.

57 Morarame Jezu tarose eya xine apoihpõkomo a Ritonõpo maro oturuketõ tuisary tapyĩ taka. Mokyro esety Kaipa kynexine. Kaipa tapyĩ tao tõximõse juteu tõ tamuxiry kynexine, Moeze omihpyry poko imehnõ amorepananõ maro. 58 Ameke rokẽ Peturu ytõko kynexine toto ekahmãko Ritonõpo maro oturuketõ tuisary tapyĩ taka. Jarao rokẽ Peturu kynexine aporo eraximãko rokene. Mame jarakapyhpyry aka tomõse ynororo. Soutatu tõ maro typorohse ynororo eraximase rokene, Jezu orikyry enese. 59 Mame Jezu hxironanõ tupise juteu tõ tamuxiry tomo a, Ritonõpo maro oturuketõ tuisary tomo a roropa. Jezu etapapory se toh kynexine repe. 60 Yrome Jezu hxironanõ nymyry pyra kynexine. Tuhkãkomo a tukuhse repe. Ihxirory se toh kynexine repe. Yrome ajohpe rokẽ toh kynexine. Morarame etyhpyryme orutua tooehse asakoro. 61 Ynara tykase toto Jezu poko,

—Ynara nase mose ynanetaryme, “Ritonõpo maro oturutoh kararapyry waro ase. Mame imyakã rĩko ropa ase oseruao rokẽ tõmehse ahtao,” nase mosero, tykase toto Jezu poko.

62 Mame mokaro omiry etaryke tyya ynara tykase Ritonõpo maro oturuketõ tuisary Jezu a,

—Moxiã ohxirõko nase. Otara ãko hmah moxiã ezuhnõko? tykase ynororo. 63 Yrome mynyhme rokẽ Jezu kynexine. Morara exiryke ynara tykase ropa Ritonõpo maro oturuketõ tuisary eya,

—Ritonõpo kapuaõ kuenetorỹko mana. Awãnohnõko mana zae pyra jezukuruhtao oya. Morara exiryke zae yna zuruko. Ritonõpo nymenekahpyry hmahno? Yna kurãkaneme? Ritonõpo mũkuru nymyry mahno, tykase ynororo tõturupose.

64 —Ywy ase, tykase Jezu. —Yrome etatoko pahne, moromeĩpo jenẽko ropa matose tuisamehxo jahtao, Papa kapuaõ maro. Akuru htoko joepyry ropa enẽko matose, tykase ynororo.

65 Morara kary etaryke tyya tupõ tyxihxihkase Ritonõpo maro oturuketõ tuisary a.

—Epo hnae, tykase ynororo. —Epyrypãko rokẽ mose mana. Ritonõpo mũkurume osekarõko mana. Popyra mose nase ipunaka. Imehnõ se pyra sytatose mose hxironeme. Seromaroro aomiry kahpyry metatou. 66 Otara ãko matou? tykase ynororo.

Ynara tykase toto,

—Iirypyryme mana. Taorihmaposẽme mana, tykase toto.

67 Mame ituh tykase toto Jezu ẽmyty pona. Typitypipohse roropa toto a. Mame tomarykõke Jezu totapase tyya xine ahtao, 68 ynara tykase toto,

—Yna zuruko Ritonõpo nymenekahpyryme awahtao. Onoky opipohno? tykase toto.

69 Jarao ro Peturu kynexine, tapyi mykae. Mame morotona toytose Ritonõpo maro oturuketõ tuisary namoto, nohpo. Ynara tykase ynororo Peturu a,

—Omoro roropa Jezu maro makene, Karireapõ maro, tykase.

70 —Arypyra, tykase Peturu toto netaryme. —Otara ãko hmahno? Zuaro pyra sãtã ase, tykase Peturu. 71 Mame toytose ropa Peturu jarakapyhpyry eutary aka ropa. Moroto tonese ropa ynororo imepỹ nohpo a. Ynara tykase ynororo orutua kõ netaryme,

—Mose roropa Jezu maro nexiase, Nazarepõ maro, tykase ynororo.

72 —Ajohpe mase, tykase ropa Peturu. —Mokyro waro pyra sãtã ase, tykase ropa ynororo.

73 Morarame okynã pitiko ahtao, orutua kõ roropa toytose Peturu a.

—Ajohpe pyra, mokyro marõme roropa mase, tykase toto. —Õmiry etaryke yna a oenetupuhnõko ynanase, tykase toto.

74 Mame ynara tykase Peturu eya xine,

—Juãnohnõko Ritonõpo mana ajohpe jahtao. Mokyro waro pyra sãtã ase, tykase.

Mame morara karyhtao ro kuratiri totase eya. 75 Mame tutuarõtase ropa ynororo Jezu omihpyry poko. Ynara katopõpyry poko, “Kuratiri onetara ro awahtao, ‘Jezu waro pyra ase. Jezu waro pyra ase,’ ãko mase oseruao,” katopõpyry poko.

Mame tutũtase ropa Peturu. Tyxitase ynororo yronymyryme.