1 Morotoino juteu tõ atamorepatoh taka Jezu toytose ropa. Moroto aosemahmirihmahpyry kynexine. 2 Morarame parixeu tõ Jezu enẽko toh kynexine aehxirotohme repe.

—Otarãme kurãkara kurãkãko ropa mana oserematohae, tykase toto. 3 Mame Jezu tõturuse aosemahmirihmahpyry a. Ynara tykase ynororo eya,

4 —Aimo, osehko irãnaka, tykase eya. Mame tonenanomo a ynara tykase ynororo,

—Oty kurehxo oya xine oserematohae nae? Kure ehtopo? Popyra ehtopo? Oty oya xine kurehxo oserematohae nae? Kurãkara kurãkatoh ropa? Imepỹ etapatopo? Oty pake tyripose oserematohae Moeze a Ritonõpo omi poe? tykase Jezu, tõturupose eya xine.

Yrome onezuhpyra toh kynexine. 5 Mame tãkye pyra Jezu tõsenuhmase. Tomyẽkõ tonese eya. Tohne roropa kynexine toehse otato pyra toto exiryke. Mame kurãkara a ynara tykase ynororo,

—Oemary anỹko, tykase eya ynororo. Mame tãtaporamase ynororo. Emary osepune toehse ropa. 6 Morarame parixeu tõ tutũtase ropa moro tae. Morarame tõximõse toto, Erote epe tõ maro, Jezu poko tõturutohkõme, Jezu etapary se toexirykõke.

7 Morotoino toytose ropa Jezu typoetory tõ maro ikuhpo pona, Karirea pona. Mame tokahmase ynororo imoihmãkomo a Karireapõkomo a, Juteapõkomo a, 8 Jerusarẽpõkomo a, Itumeapõkomo a, Joatão moinõkomo a, Tiropõkomo a, Xitõpõkomo a, enara. Tokahmase ynororo imoihmãkomo a. 9 Inukurãkatary enery se toexirykõke toytose toto, tuhke tukurãkase kurãkõkara eya exiryke. 10 Morara exiryke epuepurohmãko toh kynexine kurãkõkara Jezu apotohme tyya xine. Mame kanawa tohpikẽ tonehpose typoetory tomo a tõtyritohme, tykorõmaryino imoihmãkomo a. 11 Morarame jorokohpãkõ Jezu eneryhtao, toepukase toto ẽpataka,

—Ritonõpo mũkuru nymyry mase, tykase toto. Kui tykase roropa toto.

12 Mame turuse toto Jezu a.

—Jekaropyra ehtoko, tykase ynororo eya xine.

13 Morarame toytose ynororo ypy pona. Tỹpenery tõ rokẽ tarose eya. 14 Moroto tymenekase toto eya 12me tymaro toto ytotohme.

—Amarokõ tymenekase ya ymaro oytotohkõme, tykase ynororo eya xine. —Ynenyokyryme roropa matose exĩko Ritonõpo omiry ekarotohme imehnomo a. 15 Yjamitunuru ekarõko ase oya xine joroko to tũtanohpotohme oya xine imehnõ ae, tykase ynororo eya xine.

16 Ynara toh kynexine, Ximão. Mokyro tosehpase ropa Peturume Jezu a. 17 Zepeteu poenõ kynexine. Tiaku, João, enara toh kynexine. Konomerume tosehpase roropa toto Jezu a. 18 Imehnõ roropa moroto kynexine, Ãtare, Firipe, Patoromeu, Mateu, Tome, Tiaku. Aupeu mũkuru kynexine ynororo, Tateu maro, imepỹ Ximão roropa. Juteu tõ esary pynoto kynexine ynororo te, 19 Juta Ixikariote. Tosẽ ewokahpõ ynoro kynexine. Enara tymenekase toh kynexine Jezu a typoetoryme.

20 Morarame Jezu toytose ropa ahtao tytapyĩ taka tuhke ahno moroto kynexine tõximõse. Morara exiryke otuhpyra kynexine ynororo. 21 Mame morara aexiry totase epe tomo a. Morara exiryke tooehse toto morotona Jezu poko.

—Otarãme rowotãko mana, tykase toto ipoko repe.

22 Morarame Moeze omihpyry warõkõ, Jerusarẽ poe aehtyã ynara tykase toto ipoko,

—Jorokohpe mana, Peuzepuhpe, tykase toto Jezu poko. (Peuzepu joroko tamuru esety akorony.)

—Joroko tamuru poe joroko tõ tũtanohpõko mana ahno ae, tykase imehnõ roropa ipoko.

23 Morarame Jezu a imoihmãkõ tykohmase tyya, toto amorepatohme. Ynara tykase ynororo eya xine,

—Otãtohxo joroko tõ na etũtanohpõko ropa nah oxime? Imepỹ joroko onutũtanohposaromepyra imepỹ joroko mana ynarohnõme toexirykõke. 24 Morararo pata tamurupõkõ oseosetaparyhtao, osenahkãko rokẽ mã toto. 25 Tapyitaõkõ roropa osetaparyhtao, osenahkãko rokẽ toto. 26 Morararo joroko tamuru joroko tõ maro osetaparyhtao okynã pyra osenahkãko mã toto oxime toexirykõke.

27 —Etatoko pahne, jamitu tapyĩ taka omõsaromepyra imepỹ mana ematonase, esẽ jamihme exiryke. Yrome tapyi esẽ tymyhse ahtao rokẽ, imõkomory ematonanohnõko mana esẽ tymyhse exiryke sã rokene. (Morararo joroko tamuru tymyhse ahtao rokẽ joroko tõ tũtãko ropa sã mana.)

28 —Ynara kary se ase oya xine, emero oorypyrykõ korokãko Ritonõpo mana. 29 Tykerekerematopõpyry korokãko roropa mana. Toiro rokẽ onykorokara ekurehnõko mana. Tuzenu kerekerematopõpyry onykorokara mana jũme. Ehxirokehpyra Zuzenu kerekeremahpõkõ mana. Etuarimakehpyra roropa toh mana jũme.

30 Morara tykase Jezu typoko, “Jorokohpe nase,” tykase mokaro exiryke.

31 Morarame Jezu ẽ tooehse zakorõ tõ maro. Jezu maro tõtururu se toh kynexine repe. Yrome omõpyra toh kynexine tapyi taka. Jarãnao rokẽ toh kynexine. 32 Jezu zomye ahno typorohse kynexine imoihme. Ynara tykase toto eya,

—Asa oya kynako. Moky reh oeraximãko jarãnao, ãkorõ tõ maro, tykase toto eya.

33 Yrome ynara tykase Jezu eya xine,

—Onoky aja mokyro? Onokã jakorõ tõ mokaro? tykase. 34 Tomyẽkõ eneryme ynara tykase ynororo,

—Tarõkõ ajame toh mana, jakorõ tõme roropa mã toto. 35 Ynara exiryke, Ritonõpo omipona exiketõ wekyryme mã toto, jakorõme, woryxiryme, ajame, enara, tykase ynororo eya xine.