55
God, wawaya kanigho rugawoworidi yiyonedi
Yawe God iwona bo,
1 “Tami iiyawogha kanighomi sirugawowora,
na tupami kopiika rarima konaniuna,
bi tami iiyawogha mane gegha,
na kopiika, kam konagimona da konakam!
Kopiika, wain da milk gemanema konagimona,
bi miisanidi gegha!
2 Geyami mane konikawawanana awaki gekanikanina kiiravina,
gegha kam meko kunakani da geinanunurim
bi kiiravine kunabagibagina!
Gamogu konawaiyaneni, na tami awaki miisena na konakani,
tami kam metevina parapa koninuwamiiseyeni.
3 Acts 13:34Yagu sisiya kowaiyana, kopiika tagu biidi,
tagu konawaiyanegu na yawa wiisuwonina konakabi!
Tagu wiiwaghasina maragasina makawaghawaghasina tami biiyadi anabera,
aninuwayuyunemi bi miisena anabera tami biiyadi
ware kiiwawo Deivid biidi avisuwonana naboni.”
God yana peroveta iwona bo,
6 “Yawe God kata kovinoyeni, tami patana mmko raghanine na konabanani,
touna biidi kata korupari, touna patana riirimiye.
7 Tami berabero wawayimi, yami keda berodi kokuyowana,
da yami noghota berodi kowamira.
Yawe God biidi komiiri wamira, touna ininuwanuwaghanemi,
yada God biidi korupari, da yami bera beroberodi tupadi inanoghotatavedi.”
8 Yawe God iwona bo, “Yagu nuwagiura na getami yami nuwagiura naboni,
bi yagu bera na getami yami bera naboni.
9 Abama na parapa igee kirakii, kubura ikuyovena kirakiiyeni,
na noko naboni yagu bera na parapa igee kirakii, getami naboni
bi kate yagu nuwagiura na parapa igee kirakii, getami naboni.
10 Wonagu na ware kiyara da youra duduvina
abamama yayowoyowoghana naboni,
gesiyaveraveramagha yaininagha,
dagudagune na yadi bagibagi sabera,
tanawa rarima savereni,
na kii sakarapumpumka sagogo,
na pei wawaya saveredi da sawawa bi kam sakam.
11 Yagu sisiya na wasina noko naboni,
geiyaveraveramagha wapawapa tagu biidina,
dagudagune na yana bagibagi yabera,
touna sawara tupadi akayokayowana da iyabera na inadibera,
da uwana inatore meko akayoveni da iyuwayenina.”