Sephaniah
Ya meippanggep ni nunyan libluh nan Sephaniah
Hi Sephaniah hu hakey ni prophet nan Apu Dios eman ni nampatulan nan Josiah di Judah. Yan nunman ni tsimpuh ey kedangyan ida tutu-ud Judah. Ma-nu tep inu-unnud da hi Apu Dios, (2 Kings 22-23) nem nekemtang ni ebuh, tep anggegannu ey inwalleng da et yadda beken ni makulug ni dios kumedek hu inu-unnud da. Et peamtan Apu Dios e kastiguen tudda tutu-ud Judah niyad Jerusalem tep ya liwat da, nem kapyatun eleg da pinhed ni mantuttuyyu. Et humman hu, yan eman ni 586 B.C. ey binahbah idan iBabilon hu Jerusalem.
Ma-nut impeamtan Apu Dios e bahbahen tudda hu iJerusalem, nem insapatah tu mewan ni hi-gada e yan edum alin aggew ey ihhehwang tudda hu tutu-u tun neiwehit di edum ni bebley niya ibbangngad tuddad Israel et bendisyonan tudda.
Ya neitudek eyad libluh
1. Kastiguen alin Apu Dios hu tutu-ud Judah tep ya liwat da. (chapters 1:1–2:3)
2. Kastiguen ali daman Apu Dios hu tutu-ud edum ni bebley. (chapters 2:4–3:8)
3. Hinammad Apu Dios ni inhel e emmungen tuddalli mewan hu Jews ni neiwehit di edum ni bebley et ibangngad tudda et mambebley ida mewan di Israel niyad Judah e bebley da dedan. (chapter 3:9-20)
1
1 Huyya impeamtan Apu Dios nan Sephaniah, e u-ungngan Kushi e u-ungngan Gedaliah e u-ungngan Amariah e u-ungngan Hesekiah, eman ni hi Josiah e u-ungngan Amon hu patul di Judah.
Ya inhel Apu Dios ni pehding tuddallin iJudah
2 Immehel hi Apu Dios ey kantuy “Bahbahen kun emin hu wada eyad ta-pew ni puyek. 3 Bahbahen kudda tutu-u, yadda animal, yadda sisit niyadda deleg. Bahbahen kudda hu lawah ni tutu-u. Em, bahbahen kuddan emin hu tutu-u et endi an metdaan. Hi-gak e Ap-Apu hu nanghel nunya.
4 Kastiguek idan emin iJerusalem niyadda iJudah. Niya endiek ni emin hu hipan daka penginemnemnemin Baal, anin idan papaddin kaman-appit ni hi-gatu et endilli an mannemnem ni hi-gada. 5 Bahbahek ida dama tutu-un kamenaydayaw ni aggew niya bulan di atep ni baballey da, yadda kamenaydayaw niya kamansapatah di ngadan ku, nem ay ida mewan kamansapatah nan Molek e dios da, 6 yadda nengiwalleng ni hi-gak niyadda etan eleg mampebaddang ni hi-gak ma-lat itugun kun hi-gada hu kayyaggud ni pehding da.”
7 I-ineng kayun tutu-ud hinanggan Apu Dios e Eta-gey ni peteg, tep kamangkedettengi hu aggew ni penuwetan tun emin ni tutu-u. Indaddan tu tutu-u e heni tudda i-appit, tep inaygan tudda buhul dan memettey ni hi-gada.
8 Kan Apu Dios ey “Yallin nunman ni aggew ey kastiguek ida kamengipappangngulun bebley, yadda u-ungngan patul ni lalakki niya emin hu kamengu-unnud idan kaippenahding ni eleg mengullug ni hi-gak. 9 Niya kastiguen kuddan emin hu kameki-emmung di kapandeyyawiddan eleg mengullug ni hi-gak, yadda matekew niyadda mapetey ma-lat penuen da hu tempol ni dios dan piniliw dan kinedangyan ni edum dan tuu.
10 Hi-gak e Ap-Apu ey issapatah ku e yan nunman alin aggew ey wadalli medngel ni nangih di Eheb ni Deleg niyad baluh ni bebley di Jerusalem. Niya wadalli medngel ni heni kamangkegday ni duntug. 11 Pantete-ul kayun nampambebley di kad-an ni mulkaduh, tep mettey idallin emin hu kamampanggettang ditan.
12 Yan nunman alin tsimpuh ey ussalek hu kengkeh et hinapek hu Jerusalem et nak panhamaken ida hu tutu-un kamakaddinnel ni kamengippenahding ni liwat e kandad nemnem day ‘Endi damengu kapehding Apu Dios ni hipan lawah winu kayyaggud ni hi-gatsu.’ 13 Meendilli kinedangyan da niya mangkebahbah ali baballey da. Memehwat idallin baballey da, nem eleg ida mambelley diman. Mantennem idallin grapes, nem beken ni hi-gada hu menginnum ni meinnum ni kapyaen da.”
14 Anggegannu law kedettengan ni aggew ni keippahdingan ni inhel Apu Dios ni meippahding. Yan nunman alin aggew ey nemahhig hu ligat et anin alin netuled ni sindalu et umnangih, tep meendi namnamah tu. 15 Yan nunman alin aggew ey heni meidduyyag idan tutu-u hu nemahhig ni bunget Apu Dios. Nemahhig alin peteg hu ligat niya panhelheltapan ni tutu-u. Mangkebahbah alin emin et henilli kamangkukulput niya kaman-eengnget. 16 Medngel ali hu tenul ni tangguyup ni mengippeamtaddan sindalun mandaddan idan mekiggubbat. Medngel ali tekuk idan sindalun kamenggep di nehammad ni luhud ni bebley niyaddad etata-gey ni kapangguwalyai.
17 Kan Apu Dios ey “Peellik hu ligat yun tutu-u, tep nanliwat kayun hi-gak e Ap-Apu, et mambalin kayullin heni nekulap ni tuka dapdapdapa dellanen tu. Mangkeidduyyag ali kuheyaw yud dep-ul niya mangkebwel ali annel yud puyek.”
18 Yan nunman alin aggew ni pengippeang-angan Apu Dios ni bunget tun heni apuy ey mebahbah alin emin hu wadad ta-pew ni puyek, et pinhakkey ey mepappeg hu biyag ni emin ni mategu. Anin alin kekeddangyan et eleg ida meihwang tep eleg kabaelin balituk da niya silber dan mengihwang ni hi-gada.