1 Huyyadda inhel Apu Dios ni ittugun Moses idan helag Israel: 2 “Eleg mebayyag ey umlaw kayud bebley di Kanaan e humman hu bebley ni iddawat kun hi-gayun beltanen yu ey huyyadda pappeg tu: 3 Ya pappeg tud appit ni south ey meippalpud Sin e eleg mebebleyi di pappeg ni Edom. Ya pappeg tud appit ni kasimmilin aggew ey meippalpud Netey ni Baybay. 4 Neliked di appit ni south e melebbahan hu Scorpion Pass et mampalaw di Sin ingganah di Kades Barnea. Mampellaw mewan di Hasar Addai ingganah di Asmon. 5 Meippalpud Asmon et maliked di wangwang di Egypt et meipappeg di Baybay e Mediterranean. 6 Ya pappeg tud appit ni kakelinnugin aggew ey yad gilig ni Baybay e Mediterranean. 7 Ya pappeg tud appit ni north ey meippalpud Baybay e Mediterranean, et mampalaw di appit ni kasimmilin aggew di Duntug e Hor 8 ingganah di Lebo Hamat et mampalaw di Sedad, 9 niyad Sipron ingganah di Hasar Enan. Huyyadda pappeg ni bebley yud appit ni north. 10 Ya pappeg tud appit ni kasimmilin aggew ey meippalpud Hasar Enan, et mampalaw di appit ni south di Sepham, 11 ey nampedayyud Riblah di appit ni kasimmilin aggew di Ain. Meippalpudman et mampedayyud gilig ni Baybay e Galilee di appit ni kasimmilin aggew, 12 ey inunud tu hu Wangwang e Jordan ingganah di Netey ni Baybay. Huttan emin hu pappeg ni bebley yu.”

13 Kan Moses idan helag Israel ey “Humman idan bebley hu panggegedwaan yun ibubunut yu. Yadda manggegedwan nunman ni bebley ey yadda etan heyam et kagedwah ni helag Israel e humman dedan la hu intudun Apu Dios ni hi-gada. 14 Hedin yadda helag Reuben, yadda helag Gad niyadda kagedwah ni helag Manasseh, ey neidwatan ida dedan law ni puyek da et genedwaen da meippuun di pamilyah da. 15 Yadda bebley ni nanggegedwaan da, ey yaddad gilig ni Wangwang e Jordan di appit ni kasimmilin aggew e demang ni Jericho.”

16 Entanni ey kan Apu Dios nan Moses ey 17 “Yadda mengedwa etan ni puyek ey di Eleasar e padi nan hi Joshua e u-ungngan Nun. 18 Ey ayagi yu hanhakkey idad helag Israel ni memaddang ni hi-gada. 19 Huyyadda ngadan da: hi Kaleb e u-ungngan Jephunneh di helag Judah, 20 hi Semuel e u-ungngan Ammihud di helag Simeon, 21 hi Elidad e u-ungngan Kislon di helag Benjamin, 22 hi Bukki e u-ungngan Jogli di helag Dan, 23 hi Hanniel e u-ungngan Ephod di helag Manasseh e u-ungngan Joseph, 24 hi Kemuel e u-ungngan Siptan e helag Epraim e u-ungngan Joseph, 25 hi Elisaphan e u-ungngan Parnak di helag Sebulun, 26 hi Paltiel e u-ungngan Ashan di helag Issakar, 27 hi Ahihud e u-ungngan Selomi di helag Asher 28 et hi Pedahel e u-ungngan Ammihud di helag Naptali.” 29 Huyyadda tuun pinilin Apu Dios ni menang-ang ni kegennedwaan ni Kanaan et ika-peng idan helag Israel.