1-4 Hakey ni aggew ey limmaw ida hu bibi-in u-ungngan Selophehad e hi Mahlah, hi Noah, hi Hoglah, hi Milkah et hi Tirsah di heggeppan ni Tabernacle di kad-an di Moses, hi Eleasar e padi, yadda kamengipappangngulu niyadda edum dan bimmebley et kanday “Netey hi amemi di eleg mebebleyi ey endi helag tun laki. Netey tep ya liwat tu, e beken ni ya neki-duman tun Korah ni nangngehayan dan Apu Dios hu himmulun. Et humman hu, kele an metellak ngadan amemi tep ya keendin u-ungnga tun laki? Idwasi dakemi kuma anhan ni puyek ni indawat yuddan aaggin amemi.” Hedin hi Selophehad man u-ungngan Hepher e u-ungngan Gilead e u-ungngan Makir e u-ungngan Manasseh e u-ungngan Joseph.

5 Nekihummangan hi Moses nan Apu Dios meippanggep ni nunman 6 ey kan Apu Dios ni hi-gatuy 7 “Neiptek ida numan hu u-ungngan Selophehad. Idwasim idan puyek ni henin neidwat idan aaggin ameda. Itudum ni hi-gada hu lebbeng tun beltanen ameda. 8 Ehel muddan helag Israel e hedin netey hu hakey ni laki ey endi u-ungnga tun laki ey mahapul ni meidwat hu beltanen tuddad bibi-in u-ungnga tu. 9 Hedin endin hekey u-ungnga tu ey meidwat hu beltanen tun lakin agitu. 10 Hedin endi lakin agi tu ey meidwat hu beltanen tun lakin agin ametu. 11 Hedin endi lalakkin agin ametu ey meidwat hu beltanen tuddan kumpulmih ni neka-ihnup ni aaggi tu. Mahapul ni u-unnuden idan helag Israel huyyan Tugun ni indawat kun hi-gam e Moses.”

12 Hakey ni aggew ey kan Apu Dios nan Moses ey “Panteyed kad ta-pew ni Duntug e Abarim di appit ni kasimmilin aggew, et ang-angen mu hu bebley ni iddawat kuddan helag Israel. 13 Hedin negibbuh ni inang-ang mu ey mettey ka e henin nan agim hi Aaron. 14 Tep nginhay yu dama hu tugun ku eman ni nanlilihan idan tuun hi-gak di Meribah di eleg mebebleyid Sin, tep eleg mu peang-ang ni hi-gada hu et-eteng ni kabaelan ku.” (Hedin ya Meribah ey humman hu hebwak di Kades.)

15 Nandasal hi Moses nan Apu Dios e kantuy 16 “Apu Dios e Dios ni kakelpuin biyag ni emin ni mategu, putuk ka anhan ni hakey ni kabaelan tun mengippengnguludda eyan tuum. 17 Em, putuk ka anhan ni mengippengngulun hi-gadan mekiggubbat et beken idan heni kalneroh ni endi mampattul ni hi-gada.”

18 Kan Apu Dios nan Moses ey “Hi Joshua e u-ungngan Nun hu wada kabaelan tun mengipappangnguluddan tuu. Ayagim et ita-pew mu ngamay mud ulu tu. 19 Peehneng mud hinanggan Eleasar e padi niyad emin idad edum yun helag Israel et ehelen mun hi-gada e hi-gatu meihhullul ni hi-gam ni mengippengngulun hi-gada. 20 Pebeltan mun hi-gatu kabaelam et mengu-unnud idan emin hu helag Israel ni hi-gatu. 21 Hedin wada pinhed dan ibbagan hi-gak ey um-ehneng hi Joshua di hinanggan Eleasar e padi et amtaen tu hedin hipa inhumang ku meippuun ni binnunut e ussalen da Urim niya Thummim. Henin nunya pengamtaan nan Eleasar ni e-helen tun Joshua niyadda etan tuu hedin hipa pinhed kun pehding da.”

22 Inu-unnud Moses huyyan intugun Apu Dios et peehneng tu hi Joshua di hinanggan Eleasar e padi niyaddad emin etan ni tuu, 23 Et ita-pew tu hu ngamay tud ulun Joshua et ehelen tu e hi-gatu meihhullul ni mengippengnguluddan helag Israel meippuun di tugun Apu Dios.