1 Immehel hi Jeremiah ey kantuy “Nanhelheltappak ni peteg tep ya bunget Apu Dios. 2 Heni tuwak dinegyun et pandalan tuwak di engeenget. 3 E-eggel ni kinastigu tuwak e heni tuwak binenakdungan ni kewa-wa-wa.

4 Ey nanliputan tu annel ku niya nanhepung tudda genit ku. 5 Heni tuwak mewan ingkalebut di nanhelheltapak et nemahhig lemyung ku. 6 Heni tuwak pinilit ni manha-ad di engeenget e heniddan nangketey lan nunman.

7 Endi man anhan namnamah kun umbebsik tep heni tuwak binangkiling. 8 Nemahhig hu nakka pandasal e nampehemmehemmekkak ni hi-gatu nem eleg tuwak hengnguda. 9 Hina-ninan tu dellanek ni eta-gey ni binattun luhud niya impangulu tuwak di dakel ni nampangapangan nelikaw ni dalan.

10 Ey heni layon winu bear hi Apu Dios ni nambetak ni hi-gak. 11 Ey heni tuwak lina-nih di keltad et iguyud tuwak di edawwi et pamba-nuten tuwak et hi-yanen tuwak diman.

12 Indengdeng tu panan hi-gak, 13 et pampanaen tuwak et maipunet idad annel ku hu papan ni pana. 14 Et ngi-ngi-ngian da-ak niya hineneghegnudan da-ak idan tutu-uk di a-appeh dan han-aggew. 15 Heni impakan tu niya impainum tun hi-gak hu nemahhig ni ligat.

16 Ey heni tuwak impanhungbub et maplag ngipen kun intuktuk tud batu. 17 Endi law linggep ku ey eggak law amta kandan an-anla. 18 Kangkud nemnem kuy ‘Anggehemmekkak katteg ngu! Endi law namnamah kun wada kayyaggud ni pehding Apu Dios ni hi-gak.’

19 Hedin ninemnem kudda nakka panligligasi niya keendin nehammad ni nakka panha-adi, ey makaggeh nemnem ku. 20 Eggak liwwanadda huyyan neipahding ni hi-gak niya nakka umlelemyung ni peteg. 21 Nem hin-addum mewan ni newada namnamah ku hedin heninnuy immalid nemnem ku e 22 kamannananeng e eleg melumman hu impeminhed Apu Dios. Ey eleg daitsu pekabbahbahen tep ya hemek tu. 23 Ey kameiddinnel ni ingganah hu kamannananeng ni hemek Apu Dios ni hi-gatsun kewa-wa-wa. 24 Kangkud nemnem kuy ‘Hi Apu Dios ni ebuh mahapul ku, et humman hu, hi-gatun ebuh pandinnelak!’ ”

25 Kabbabbal hi Apu Dios idan emin ni kamengiddinnel niya kamanheppul ni hi-gatu. 26 Et humman hu, ya kayyaggud ey man-ennus itsun mengiddinnel ni hi-gatun mengihwang ni hi-gatsu. 27 Ey kayyaggud hedin illapun keu-ungngan man-ennus. 28 Hedin wada impaelin Apu Dios ni ligat tayu, ey ennusan tayu niya peinneng tayu nemnem tayu. 29 Nealay indinel tayun hi-gatu et ngenamung tu, wada na-mu pay namnamah tayun hi-gatu. 30 Ey anin ni panhelheltap daitsun buhul tayu niya pennel-itan daitsu et anusi tayu.

31 Tep eleg pannananeng nan Apu Dios ni daitsu iwwalleng ni tutu-u tu. 32 Daitsu kaiddawsin ligat nem daitsu kahehmeka niya nakappinhed daitsu, 33 tep eleg tu pan-amlengi hu daitsu pengippeligligatan.

34 Inamta tu hu nemahhig ni tayu kapanhelheltapid kallabbuttan. 35 Ey inamta tu hedin eleg meidwat ni hi-gatsu hu kelebbengan tayun nalpun hi-gatu. 36 Ey inamta tu mewan hedin beken ni meandeng hu impahding ni huwet ni hi-gatsud korteh.

37 Yaddan ebuh kai-abulut Apu Dios hu dammutun meippahding. 38 Yadda kayyaggud niya lawah ey mahapul ni meippahding hedin humman in-olden tu. 39 Kele itsu manlillih hedin nekastigu itsu tep ya liwat tayu?

40 Attu kuma et nemnemen tayu elaw tayu et ibangngad tayun mengu-unnud nan Apu Dios ey? 41 Ehel tayun emin ni hi-gatu hu wadad nemnem tayud pandasalan tayu ey kan tayuy 42 ‘Apu Dios, nanliwat kami niya nginhay daka ey eleg mu liwwanen impahding mi. 43 Et gapuh ni bunget mu ey pindug dakemi et pampatyen dakemi e endi hemek mu.

44 Hineniam hu annel mun mahdel ni kulput et eleg umdateng dasal min hi-gam. 45 In-abulut mun heni kami lugit ni impahding idan buhul min hi-gami.

46 Tep pinenadngelan dakemi ey binenabba-ingan dakemiddan buhul mi. 47 Nanligligat kami niya nebahbah bebley mi ey kami kaumtatakut.’

48 Iyyadyan nemahhig nanginangih ku tep nebahbah ida tutu-uk. 49 Heni hebwak hu lewak e eleg metduk 50 ingganah ni pengippeang-angan Apu Dios e wadad kabunyan ni hemek tun hi-gatsu. 51 Nemahhig lemyung ku hedin inang-ang ku hu impahding idan buhul mi idan bibi-i eyad bebley mid Jerusalem.

52 Heni-ak sisit ni kinnaddan buhul ku anin ni endi himmulun. 53 Imbeng da-ak di neku-kuan et pande-hilan da-ak ni batu. 54 Entanniy kamangkelbeng hu nengibbengan dan hi-gak et kangku nem metteyyak law diman.’

55 Nem yan nunman ni wada-ak diman ey nandasallak ni hi-gam e Apu Dios, 56 et dengelem hu dasal ku e kangkuy ‘Dengel mu anhan et baddangan muwak!’ 57 Ey hinumang muwak et kammuy ‘Entan takut mu.’

58 ‘Apu, binaddangan muwak et ihwang muwak di katey. 59 Inang-ang mu e Apu Dios hu lawah ni peteg ni impenahding dan hi-gak. Hi-gam anhan hu pangihudut e hi-gak neiptek. 60 Ey inang-ang mu hu nemahhig ni lawah ni impahding idan buhul kun hi-gak niya inamtam ida lawah ni implanuh dan pehding ni hi-gak.

61 Dingngel mu nampemel-itan dan hi-gak e Apu Dios niya inamtam ni emin hu planuh da. 62 Kewa-wa-wa ey ya lawah ni planuh dan hi-gak hu daka ene-ehhela. 63 Ang-ang mudda kedi! Anin ni hipa daka pehpehding et daka i-ena-appeh peneghegnuddan hi-gak.

64 Kastigum ida anhan e Apu Dios tep ya lawah ni impenahding da. 65 Pambalin mu puhu dan manghay ey inidutam ida. 66 Pan-unud muddan bunget mu et bahbahen muddan emin et endi an metdaan ni hi-gada eyad ta-pew ni puyek e Apu Dios.’ ”