1 Intu-man Job ni immehel ey kantuy 2-4 “Issapatah kud ngadan Apu Dios e Kabaelan tun emin e anin ni beken ni kayyaggud impahding tun hi-gak et deh e tuwak kapanhelheltap, ey eleggak man-itek niya eggak e-hela lawah ni hi-gatu ingganah kepappegan ni biyag ku. 5-6 Eleg mabalin ni nak ebbuluten e neiptek kayu. Pepillit ku dama e endi bahul ku ingganah mepappeg hu biyag ku. Tep yad nemnem ku ey endi ngu inamtak ni nambahulak.

7 Nakka iddasal e mekastigudda buhul ku e henin kakekastiguiddan lawah ni tuu. 8 Hipa namnamah idan eleg mengullug nan Apu Dios hedin medettengan hu pemappegan tun biyag da? 9 Kaw hedin wada ligat da man dedngelen tu pampehemmehemmekan da? 10 Kaw dammutun mekiddagyum idan Apu Dios e Kabaelan tun emin? Ey kaw ida kamandasal ni hi-gatu?

11 Imay kedi, et paka-ittuttudduk ni hi-gayu hu kapehding Apu Dios e Kabaelan tun emin. 12 Nem ku hiyya tu-wa, haggud hedin hi-gayu man inang-ang yun emin. Nem ay kele endi silbitu yuka e-e-hela?

13 Heninnuy hu kapengastigun Apu Dios e Kabaelan tun emin etan idan mapetey niyadda lawah ni tuu. 14 Anin ni dakel hu u-ungnga da et mangkettey idallid gubat winu mettey idan upa da. 15 Yadda metdaan ey mettey idan degeh, nem endi an umnangih ni ketteyyan da, anin idan aahwa da.

16 Ma-nu et kedangyan ida lawah ni tuu, e dakel ni peteg hu pihhuh da niya babalwasi da, 17 nem pan-ibbalwasillin kayyaggud ni tutu-u niya pan-ellan alin limpiyuh ni tuu hu pihhuh da. 18 Ya baley idan lawah ni tuu ey beken ni nehammad, heni baley ni kakkawwa winu heni hukyawwin kapanhiddumid payew.

19 Ma-nu na-mu tep kedangyan idan nunya, nem entannit ida umbangun ey attukaw hu kinedangyan da et mambalin ida law ni nekawwetwet. 20 Um-alin hi-gada hu anggetakkut ni helheltapen da henin kaelliin pewek ni hileng niya henin kakelbengin puyek. 21 Ittayab idan dibdib ni melpud kasimmilin aggew et meendidda. 22 Anin ni hipa pehding dan umbebsik niya anin ni hipa pehding da ma-lat meihwang ida, et endi damengu hemek ni pewek ni hi-gada. 23 Kamambungngug hu pewek et nemahhig takut dan kamemsik.