Habakkuk
Ya meippanggep ni nunyan libluh nan Habakkuk
Huyyan libluh ey meippanggep ni nanhummanganan di Habakkuk nan Apu Dios. Nanlilih hi Habakkuk nan Apu Dios tep nehingla law ni lawah ni elaw idan edum tun iJudah ey heni etan ni kapemeggan Apu Dios hu eneeneng tep eleg tudda kastigua tep ya liwat da.
Hinumang Apu Dios hi Habakkuk et ehelen tun hi-gatu e peelli tudda hu sindalun Babilon ni nagtud ni tsimpuh et bahbahen dadda tutu-ud Judah tep ya liwat da. Ey nema-ma kumedek mewan ni eleg han-awat nan Habakkuk hu an pengi-ebbulutan Apu Dios idan iBabilon ni memahbah ni tutu-ud Judah tep nema-ma-ma liwat idan iBabilon nem hi-gadan iJudah. (1:13) Et ehelen Apu Dios nan Habakkuk e nanna-ud ni kastiguen tudda iBabilon tep ya liwat da, heniddan iJudah e nanna-ud ni mekastigudda dama tep ya liwat da. (2:2-20) Pinhed Apu Dios ni peamtan nan Habakkuk e nanengtun hi-gatu hu Ap-apun yimmudung di kabunyan niya hi-gatu hu ngenamung ni emin ni kameippenahding eyad puyek. (2:20)
Dingngel Habakkuk hu impanumang nan Apu Dios ey dineyaw tu tep hi-gatu hu Dios niya gapuh ni limpiyuh ni impahding tuddan tutu-u anin idan tutu-u tun nunman. Neamtaan tu law e limpiyuh hu impahding Apu Dios idan tutu-u tun nunman niya limpiyuh dama hu pehding tullin edum ni aggew. (3:1-19)
Ya neitudek eyad libluh:
1. Kamanlillih hi Habakkuk nan hi Apu Dios tep eleg tu kastiguadda iJudah ey nemahhig hu liwat da. (chapter 1:1-4)
2. Hinumang Apu Dios ey kantuy i-abulut tudda iBabilon ni mengastigun hi-gadan iJudah. (chapter 1:12–2:1)
3. Inhel Habakkuk e nema-ma-ma hu liwat idan iBabilon nem yadda iJudah. (chapter 1:12–2:1)
4. Inhel Apu Dios e mekastiguddalli dama hu iBabilon. Nem yadda etan mengiddinnel ni hi-gatu ey meidwatan idan gun-uden da. (chapter 3:1-19)
1
1 Yahhuy hu impeamtan Apu Dios nan Habakkuk e hakey ni prophet tu.
Ya lilih Habakkuk nan hi Apu Dios
2 Kan Habakkuk ey “Apu Dios, kele umbagabaga-ak anhan ni baddang mu ey eleg mu dedngela dasal ku? Pigan tu pengihwangan dakemid anggetakkut ni kameippenahding? 3 Kele muka i-abulut hu lawah ni an meippenahding di kebebbebley? Kaw henin nunyallin ingganah ang-ang-angek e ebuh liwat niya ligat ni kewa-wa-wa? Inwingik di pangil ni lawah ni peteg kamekenapkapya. Emin eya tutu-u ey pinpinhed dan mantututut ni nambabakal ida. 4 Endi law silbin linteg. Anin di korteh et endi limpiyuh. Daddakkel idan peteg hu lawah nemnem tu nem ya kayyaggud ni tutu-u, et mukun ida kamebeyyadi hu kamengippennuh ni kasuh et eleg law meippahding hu limpiyuh.”
5 Himmumang hi Apu Dios ey kantuy “Ang-ang yudda kedi edum ni bebley. Makulug ni metnga kayullin pehding ku eyan ketaggu yu et anin ni wadalli menghel ni hi-gayu et eleg yulli kulluga.
6 Nakka pan-iddaddan ida iBabilon ma-lat mambalin hu bebley dan et-eteng kabaelan tu. Anggetakkut ida niya mangkabunget ida ey sekkupen dalli kebebbebley. 7 Nandingngel ni makabbunget idan daka petekkut hu katuutuu. Emin pinhed da ey humman kameunnud niya endi hu hakey ni dammutun mengippesikked ni hi-gada. 8 Na-na-let ni umbesik kebayyu da nem ya leopard. Niya nemahhig ni anggetakkut ida nem ya neupan immeyew ni ahhu. Yadda sindalu dan nampantakkay di kebayyun nalpud edawwin bebley ey henidda tulduh ni an manhehkeb ni kennen da. 9 Nemahhig hu takut idan tutu-u idan nunman e sindalun kamengelli tep himmalla hu daka pehding. Niya dakel hu tutu-un ellan dan balud, henin kadinakkel ni palnah. 10 Ngengngehayen dalli papatul niya aap-apu. Niya ngi-ngi-ngian dalli hu nehammad ni luhud ni bebley tep pu-ulen dalli puyek di hengeg tu ni neba-hil idad bebley. 11 Um-aliddallin henidda pewek e bahbahen dan emin ni nanglaw ida la. Humman idan lawah ni tutu-u ey daka iddinel elet da e heni humman dios da.”
12 Apu e Dios ku e wadan ingganah niya kayyaggud ni peteg, kaw neipalpu dedan eman ni laputu ey implanuh mu e endien dakemi? Inamtak et eleg mu pehding humman, tep hi-gam hu heni et-eteng ni batun mika keihhikkugi. Inamtak e pinilim ida iBabilon et idwatam idan kabaelan da ma-lat hi-gada hu mengastigun hi-gami tep ya nemahhig ni liwat mi. 13 Limpiyuh huyyan impahding mu. Nem kaw hi-gam e eleg tu i-abulut hu liwat ey pemeggam ang-ang-ang ni hi-gami, anin ni heni dakemi ekmunen idan buhul mi? Kaw ia-abbulut mu hu lawah ni tutu-un memahbah idan nelimlimpiyuh nem hi-gada?
14 Ya muka pehding ni hi-gamin tutu-um ey heni kami deleg di baybay, niya heni kami mategud baybay ni endi mengipappangngulun hi-gada. 15 Kaw i-abulut mun heni dakemi pambenwiten idan iBabilon ey nantabukul dakemi ni nan-an-anladda? 16 Et hedin negibbuh ey dinaydayaw da hu tabukul da ni in-appitan da et kanday “Huyyaddan tabukul hu dios ni nengidwat ni kinedangyan tayu!” 17 Kaw i-abulut mun tagan da bahbah ni tutu-ud kebebbebley e endin hekey hemek da?