1 Entanni ey dingngel Jetro e padid Midian e aman ahwan Moses hu meippanggep idan kayyaggud ni impahding Apu Dios nan Moses niyadda edum tun helag Israel et ya nengipa-kalan tun hi-gadad Egypt. 2-4 Ninemnem tun ikkuyug etan u-ungnga tu e hi Sipporah e ahwan Moses et yadda u-ungnga da e di Gersom nan Elieser. Yan nunman la ey impaenamut nin Moses hi Sipporah et yadda u-ungnga da et ida makiha-ad di kad-an Jetro. Yan neiungngaan idan nunman ni u-ungnga tu ey nginedanan tu etan pengulwan ni Gersom tep kantuy “Hi-gak ey immali-ak ni ebuh ni nekibebley di deya.” Ey ya etan meikkadwa ey nginadnan tun Elieser tep binaddangan Apu Dios hi-gatu. Et kantuy “Hi Apu Dios e kadaydayawaddan ammed ku ey binaddangan tuwak et eleg tuwak pateyen etan ni patul di Egypt.”

5 Ingkuyug idan Jetro et lumaw idad nangkampuan di Moses etan di duntug ni eleg mebebleyi e yadman nampeang-angan Apu Dios lan nunman. 6 Hi Moses ey amta tu e um-alidda tep impamengulu lan Jetro e aman ahwatun impeamtan hi-gatu hu lawwan dadman.

7 Ida kamenetteng ey an dinammun Moses et manyuung et akwalen tu. Et ikuyug Moses idad kampu tu. 8 Ine-ehhel nan Moses nan hi Jetro emin hu impahpahding Apu Dios etan ni patul di Egypt et yadda tuu tu niya impahding tun nemappeg ni daka pengippeligligasiddan edum tun helag Israel. Ine-ehhel tu pay hu nanhelheltapan da neipalpun neni-yanan dan Egypt ingganah ni dintengan da etan di nangkampuan da, et ya nemaddangan Apu Dios ni hi-gadan nunman ni nanligligatan da.

9 Immamleng hi Jetro ni nangngelan tun nunman 10 et kantuy “Dayaw tayu hi Apu Dios tep inhewang dakeyud lawah ni impahpahding idan iEgypt et ya etan patul da. 11 Yan nunya ey inamtak law e hi Apu Dios hu keta-ta-geyyan nem yadda dios ni kadeyyawaddan edum ni tuu tep impaptek dakeyun tuu tu. Et ihwang dakeyud pehding idan iEgypt ni nekababbah hu daka penang-ang ni hi-gayun helag Israel e tuu tu.” 12 Entanni ey in-appit Jetro hu kagihheba et yadda edum ni iappit tun Apu Dios. Immalid Aaron et yadda etan aap-apun helag Israel ni menammun hi-gatu et manhahamul idan emin ni pengidaydayaw dan Apu Dios.

13 Newa-wa et ituluy Moses hu ngunu tun mengipennuh ni kapandidiklamuhiddan tuu. Tep meippalpun kakkabbuhhan ingganah ni mahmahdem, ey kamanhulluhullul ida tuun kaum-alin mandiklamuh. 14 Inang-ang Jetro huyyan neligat ni peteg ni ngunun Moses ey kantuy “Kele muka hahhakkeyi huttan ni ngunu e endi hu kaumbaddang ni hi-gam? Nakka ang-ang-anga ey neligat ni peteg hu ngunum, tep dakel ni neyun hu kaum-alin tuun kamampebaddang ni hi-gam.”

15-16 Hinumang nan Moses et kantuy “Mahapul ni ippahding ku huyyan ngunuk tep yan nakka pengippennuhin diklamuh idan tuu ey nak keituttuddun hi-gada tugun Apu Dios niyadda etan pinhed tun meunnud.” 17 Kan Jetro ni hi-gatuy “Beken ni kayyaggud hu henin nuntan! 18 Tep neligat ni peteg huttan ni ngunum ey muka hahhakkeyi! Lektattulliy peinglay mu et anin idalli eyan tuum. 19 Et humman hu, kayyaggud hedin iddedngel mu eya tugun ku, yaggud daka kabaddangin Apu Dios. Ma-nu tep lebbeng tun i-ehneng mudda tuud hinanggan Apu Dios. Ey mampebaddang kan hi-gatu meippanggep di daka panhahallai, 20 niya ituttuddum ni hi-gada hu tugun tu, ya kayyaggud ni elaw et yadda etan lebbeng tun pehding da, 21 nem mahapul mu umbaddang ni hi-gam. Et humman hu pili kaddan kayyaggud elaw tu et hi-gada putuken mun mengi-ehneng idan tuu. Wadadda man-ap-apun hanlibu, hanggatut, nelima niya hampulu. Et humman idan man-ap-apu ey mahapul ni peka-u-unnuden da hi Apu Dios, ey ida kameiddinnel e eleg da ebbulutan metangdanan ni pengippahdingan dan lawah. 22 Ey hi-gada ngenamung ni mengippennuh ni diklamuh idan tuun inehnengan da. Nem yadda etan neligat ey humman i-ali dan hi-gam ni ippanuh mu. Nem yadda etan nelakah ni diklamuh ey ngenamung ida, ma-lat mee-ekkalan hu ngunum. 23 Hedin u-unnuden mu huyya ey hedin kamei-unnud di pinhed Apu Dios ey eleg ka mekalliggatan di ngunum ey melinggep ida tuun um-anemut e neipenuh hu daka panhahallai.”

24 Inu-unnud Moses humman ni tugun Jetro. 25 Et pilien tudda etan kabaelan dan man-ap-apu. Impan-ap-apu tuddan hanlibu, hanggatut, nelima niya hampulu. 26 Et humman idan nepili hu ngenamung ni mengippennuh ni diklamuh idan tuu. Et yadda etan neligat ni meippennuh ey humman illaw dan Moses.

27 Negibbuh ni nanhummangan idan Moses et han umenamut hi Jetro di bebley tu.