Hipɨlu
Olo Iyoswo loso Aꞌamu Hipɨlu somneꞌno Mtɨꞌmokumentohofoho.
Olo Hungkuno Sɨmoꞌmjofoho.
Jisas ahwomomneꞌno nto sɨmentiso sohonta soswo mofonepo teti-sefen (37) nto uyakoloꞌmentisopo olo iyoswo Hipɨlu loso tɨhwo mtɨꞌmokumentisotɨkeno. Iyoswo mtɨꞌmokomayo sopo aꞌamu mtɨꞌmokumentohofo sohwamneꞌno yofeso mamtɨꞌmokiyofoho. Aꞌamu fiso hofɨkoe hunoso olenoho. Poul mtɨꞌmokumentisofoho. Aꞌamu fiso hofɨkoe huno olenoho. Mponopas, Apoulous, Luk, Makɨja sohwa mtɨꞌmokumentohofofoho. I osoꞌno olo iyoswo losoꞌno huno itoꞌnoꞌmaho. Oꞌo, tɨhwo mtɨꞌmokumentisotɨkeno. Aꞌamu olo iyoswo hilo mtɨꞌmokumentiso sohwo olo iyoswo hiloso aꞌamu Juta Jisasɨmo inɨngkunyo somneꞌno mtɨꞌmokumentisofoho. Oso aꞌamu hiso ntɨpo humentanɨngkofitɨkeno. Oso hisoꞌno nakwo huno monayofoho. Angopone yofeso majofoho. Olo iyoswo hwapɨngo mtɨꞌmokiyoso olenoho. Oso aꞌamu Juta Jisasɨmo inɨngkunyo sofe sɨmeho hiꞌntnnonohino somo tango ifawe sohonta yokumpohnꞌnyo lohofoꞌne yokumpohnꞌnyo umokumonto mtɨꞌmokumentisofoho. Osoꞌno nakwo olo iyoswo homo lomo nakwo atofo lɨhwasi tɨfi unɨngkohwano.
1
Anɨtuye Hwomu sohwo hungkuno nejapmmentisofoho.
1 Hohonta sɨkuno piꞌnɨngo somo Anɨtu kako kakoe hungkuno neyakwosamo uyɨmentisofoho. Sɨkuno fehohnjoso kako aꞌamu sohwamo uyahonɨngki hofɨko nalɨmotofofoho. Sɨkuno nomꞌnemo Anɨtu kakoe hungkuno ahwomomjo aꞌamu somo uyahonɨngki nalɨmentisofoho. 2 I nakwo aꞌamu olohontajo hnꞌnɨmo Anɨtu kakoe hwomumo kako hungkuno uyahonɨngki Jisas nalɨmentisofoho. Oso hwomu huhwo sohumo Anɨtu ulɨmento, Kɨko hwahoꞌnji ahwomoꞌnji mtɨꞌmojo. Ose ulahonɨngki Jisas kako hwahoꞌnji ahwomoꞌnji yoꞌmayoso mtɨꞌmokumentisofoho. Oso mtɨꞌmokumentiso soꞌno Anɨtu kako Jisasɨmo ulɨmento, Kɨkoꞌnefoho ulɨmentisofoho. 3 Nakwo Anɨtuye Hwomu huhwo sohumo uhwonontani nakwo Anɨtu ne sohwoe yokumpohnꞌnyoꞌnji Anɨtuye yofe engoꞌnji uhwonɨwoꞌnɨngkuhwonefoho. Kako Anɨtuye yahino ne somo nakumo netɨhwayoꞌne hweho. Jisas kako hungkuno yokumpohnꞌnyo lonteso kako hwahoꞌnji aꞌamuꞌnji yoꞌmayo soꞌnji hulɨꞌmokumemokosyohumaho. Kako aꞌamufe wonyoso wae yaofoꞌne honɨngkanoso imoꞌmentisofoho. Imofɨkwato lohofonto kako ahwomomo sonto kanɨngkwohwo Anɨtuye aho angahohntaꞌni nohumanto yoꞌmayo somo mokosyohumaho.
Anɨtuye hwomu Jisas sohwo kako aꞌamu ahwomomjo somo hwofiloꞌnnyo hweho.
4 Oso yofe engo Anɨtu kakoe hwomumo mulɨmentisoso aꞌamu ahwomomjo hopiꞌnonohino sofe yofemo yakoloꞌnnyo hweho. Yofe engo loso ole, Anɨtuye Hwomufoho. 5 Hwapɨngoso ole, Olo hungkuno loso Anɨtu hohonta aꞌamu ahwomomjo somo ulɨmentisotaho. Oꞌo, kakoe hwomumnohini ole ulɨmento,
Kɨko nje Hwomu hwosoho.
Olohonta ngko jɨje Mpohwoꞌnyoho.
Nomꞌne honta ole lɨmento,
Ngko kanɨngkwohwoꞌni humaleno.
Kako nje hwomu hweho.
Oso hungkunoso Jisasɨmnohini ulɨmentisofoho. 6 Anɨtu kakoe Hwomu angaꞌnohino Jisas osohumo hwahopo uhwatɨmonto yonto Anɨtu kako aꞌamu ahwomomjo somo ulɨmento,
Aꞌamu ahwomomjo soku sekwo nje hwomufe yofe fohoꞌnomapmno.
Ose ulɨmentisofoho. 7 Anɨtu kakoe aꞌamu ahwomomjo somneꞌno ole nalohi,
Ngko nje aꞌamu ahwomomjo somo mtɨꞌmokahonɨngko nje syohomneꞌno hofɨko emtaꞌmɨngo ifofoꞌnji oso hopa iwoꞌnɨngkohofofoho.
Ose nalɨmentisofoho. 8 I Anɨtu kakoe Hwomumo ole ulɨmento,
Kɨko Anɨtu sohwosi, aꞌamu hopiꞌnonohino somo yokumpohnꞌnyo neꞌno mokosyohumantitnne hwosoho.
Jɨje aꞌamufe honɨngkano ntoꞌnohino mɨhwajontihnne hwosoho.
Oso yahino ntoꞌnohino mɨhwajiyo somo aꞌamu hiso nuhwonɨngkuji ntoꞌnohinoho kilɨfitnnefoho.
9 Kɨko yahino itoꞌnohino soꞌno kumoꞌnɨwoꞌnɨngkohoho. Yahino wonyoso ngkilaho lɨwoꞌnɨngkino hwosoho.
Osoꞌno ngko jɨje Anɨtu sohwoꞌni ngko yofe engo mayoꞌne kuhwosopoꞌmentohefoho.
Osoꞌno jɨje sɨmeho wopɨngo kumokuwoꞌnɨngkoheso jɨje aꞌamufe sɨmeho wopɨngo somo yakoloꞌnnyofoho.
Ose ulɨmentisofoho. 10 Nomꞌne honta kakoe hwomumo ole ulɨmento,
Hwe Engo sohwosi, sɨmoꞌmo neꞌmo kɨko hwahoꞌnji ahwomoꞌnji jɨje ahoꞌnji mtɨꞌmokumentohino.
11 Olo hwaho loꞌnji ahwomo loꞌnji moiꞌwo imoꞌnonefoho.
I kɨko oseꞌneꞌmaho. Oꞌo, kɨko neꞌno nohumantohotnne hwosoho.
Hwahoꞌnji ahwomoꞌnji hwapɨfe yofoho imoꞌnɨngkiso oso hopa imoꞌnonefoho.
12 Aꞌamu sohwa hwapɨfe kuꞌmokasyontɨfi nomꞌne songo iwoꞌnɨngkohofo hopaso kɨko hwahoꞌnji ahwomoꞌnji nokuꞌmokasyohoji kɨko nomꞌne songo wohoꞌnahumonnoho.
I osoꞌno kɨko huno mɨkwesyafɨhutnnehino. Oꞌo, neꞌno nohumantohotnne hwosoho.
Anɨtu ose ulɨmentisofoho. 13 Hohonta Anɨtu kakoe hwomumo ole ulɨmento,
Kɨko nje aho anga sohohntaꞌni fosyohumaho.
Osopo kɨko nohumahoji ngko jɨje mango sohwa jɨje sɨfɨkiꞌnyoꞌmo enjwaꞌmo wakuhumotɨꞌmonnoho.
Oso hungkuno ulɨmentisoso Anɨtu kakoe aꞌamu ahwomomjo somo ulɨmentisotaho. Oꞌo, kakoe hwomumneꞌnohini ulɨmentisofoho. 14 Aꞌamu ahwomomjoso hofɨko Anɨtu kakoe syoho ulohofiyofoho. Oso aꞌamu homo somo Anɨtu kako asomo utɨmaꞌmne somo ufoꞌmapɨfento uhwajɨwoꞌnɨngkisofoho.