1 Afa Sisas ena mo sihi fwahanim afa ofim nangunam sa enaig esona og, “Api, kam lahag was ati pugug sa ne nimbeafna Legim fingi fe asa ma nimbeafna Leg nem fingi fei.

2 Ne kam kanog og sa ma elni misog el fei asa amban el kana ninga la lasanig eba ka ehengelim nufunam nofkenagag faifi.

3 Afa nufunam nofkenagag eba enaig eseg asa ehengel nem ati anwenafig ne nufunam God mungu feg afa ka Sisas Krais ne kam ningihiag.

4 Afa ena gafugag ne kam faina eba ati ka augig asa ka enaig fegba ka neana unehlagim hwa bite la fingi feg.

5 O Api, afa bite mahim fiahfenaba afa big ahwagfenaba enanam kana unehlag eba kwania fena. Afa glawo ka membeg nimbeafna nof la enag kwania unehlag ne kam pese fai.

6 “Afa enag bitenai el ne kam faina ka ehengelim sihinig afa nem ati anwenafig. Ehengelbi neana fena afa ne kana ninga la fwatig afa ehengel neana mo higigim patalfug.

7 Afa mungwali kike mungu fegba ehengel ati anwenafig enag ne kam faig eba neana blog.

8 Afa mungwali mo ne kam faig enag ka ehengelim faig asa ati flig. Afa ehengel anwenafig enag mo eba nufunam afa olug onigig ne kam ningihiagba na ka nem fwahigim ka blog.

9 “Ka mas bitenai elim betenenig mo amo el asa ne kana ninga la fwatig eba neana feg na ka ehengelim betenenig.

10 Mungwali el kana feg eba neana afa neana asa feg eba kana. Afa enag el ogfug kana unehlag eba kwania feg.

11 Afa glawo ka hwa bite fwahanam nem nangwagim blofe afa ehengel sa bite la auguia. O Api, neba afsug nemug afa nimbeafna wasneig unehlag sa ne kam faig ena unehlag la sa ne ehengelim nangwaghiage fegofum sa ma ehengel mungu afofi asa big mungu nemug ahfeg.

12 Afa maia ka ehengelim wangohfnaba ka ehengelim kagfufehiage gofna enag neana wasneigni ne kam fainaba asa ka enaig esena. Mungwali suialagofena mas amban awaiena mo afa el mungu awaiena. Autunam neana mo enaig sihi fefwahana enag el mungu awaiefe afa enaba nufunam pugufe.

13 Afa ati muhla ofe ka neanangum blofe afa ka bite la gohba hwa mo ka esona asa kana sifakal sa ma ehengel nai yi ihlafeni.

14 Afa ka neana mo ehengelim faig enag fligim asa mas enaig bitenai el apukeg mo asa ka gafa mango bitenai el mo. Asa bitenai el ehengelim olug kakag fegonug.

15 Ka mas nem esonai enag elim lambiba sa ma hwa bite la fwahi amo, ka nem enaig sahna fenag sa ne kagfufe hiage gofiba eba Satan mas ehengelim amtakwale klaiti.

16 Afa ka mango bitenai el feg mo asa ehengel gafa gwenaig.

17 Afa neana mo eba nufunam nemug feg. Ka membeg hwa nufunam mo sa ma ehengelni onigig la gohfi asa neana el nemug apukufe.

18 Afa ne kam bite gam ningihiag afa ka gafa ehengelim hwa bite la ningitigife.

19 Ka kefum nem mungwali faig asa ehengel gafa gwenaig neana nemug fig.

20 “Ka mango enag patalfuiag el mungu beteneni mo amo afa mungwali el asa patalfuiag elni mo higigim afa kam olug oniginig na ka ehengelim gafa ka betenenig.

21 Afa ehengel sa ma mungu afohiefi asa big ahsafeg ne ka i ahgohug afa ka ne i ahgohug. Sa ma ehengel eba biningi nai yi afofi afa mungwali bitenai el sa ma onigi ne kam ningihiag na ka blog.

22 Afa ne kam kwania unehlag faig afa ka ehengelim enaig unehlag faig asa ma ehengel mungu afohiefi asa big mungu ahfeg.

23 Ka ehengelim wangohug afa ne ka i ahgohug sa ma ehengel mungu nemug fi. Asa bitenai el anwenafi ne kam ningihiagim afa ne kam fwina membenag afa ehengelim gafa ne gwenaig esenig.

24 “Afa hwa bite puguia fwainig fiahfenaba ne kam fwina membenam asa ne kwania unehlag kam faina. O Api, ka membeg mungwali el ne kam faig ma ka nai yi ohi afofiba sa ma kana wasneig nangui.

25 Api ne suialag nemug feg, afa bitenai el mas nem anwenafenig mo. Afa ka nem ati anwenafeg afa el ne kam faina ehengel ati anwenafig ne kam ningihiag na ka blog.

26 Ka ehengelim neana unehlag ogfunig afa nem ati ambala anwenafenig afa ka gwenaig siakafiba afa membug sa ne kam fenag sa ma ehengel nai yi gofi. Afa kike gafa ehengel nai yi gofife.”