Mo Pol Galesia wa nai Elim Ginofe Faini
Ohuna buk enaig esog
Afa yuwanam el Sisasim pahlugugba eba Ju el esini. Afa sumi yi mo Sisas Polim nigihiana eso ehe ikanam lahlag mo afwambanai elim sihinuwagena. Afa mahim mungwali el ambugog Sisas nai yi saho gonaba eso kinig amtakwalig puguna. Afa autunam enag el mas Mosesna nihe mo pahlukuna mo so Ju el enaig safif. Afa mahim ehegel Sisasim olug oniginibi ehengel enam etetig so Mosesna nihem pahlukui me awai awai me? Afa mingnag el eba ehengelim hekusihiagonig Ju elni nihem pahlukunam afa elig nihig lofug kukuhiawagi afa Mosesna mingnag nihem gaba pahlukui. Afa Pol enaig esog amo eba awai. Afa ehe enaig esog Sisas Kraisim olug onigignig mina eba naho Godna nofwaba bigel afsug kabag fegim eso big yawonai nofkigenagog fig. Afa eba enaig eseg mingnag Ju el ati Galesia gam ahugim afa Kristenim hekusihiagigim og soma Mosesna nihem mo pahlukui. Afa mahim enaig Galesia elim pugunigba eso Pol enam mo higinam so ohuna bukwaba ginofena og soma heafgelni olug onigig mi afa nihem mi soma numwehiagi. Afa Pol enaig esog, God ehe kam kanog wahiag el fegba eso ka enaig eseg. Afa ehe enaig esog. Afa aman el so Sisasim olug oniginig ena ho Godna nofwa afsug kabag opukog. Afa sumiyi ohuna buk wa ehe enaig esog, mahim Krais bigim esenigbi eso big sigag wa agfuhe. Afa Godna sungwag bigelim mina kagim gosinig eso bigel mingnag elim lahlag nihe esegonig.
1
1 Ka Pol, afa kaba Godna kanog wahiag el feg afa enag gafugagba el mang kam faig mo, amo eba God Humuan eso Sisasim piske ilafona ehe kam kanog wahiag afa Sisas Krais gaba eso eheningi enag gafugag wa kam ahwahiag. 2 Eso nilite so ka mungwali agfohe kagel nengelim Galesia sios wa nai elim lahlag onigim ka ginofe ningihig. 3 Ka membeg bigelni Humuan God afa Ainiyag Sisas Krais eheningi nem lahla ahfenaf. Eso olug fulufeg afa God ismunagim nem kweafuf eba nem enaig esenaf. 4 Afa so Krais bigelni Humuan Godna sawiegim pahluku afa bigelim wahanigim eso bigim amtakwalig mina nai wambug eso yawo bite nai amtakwalig onigig mas bigim kikehlai. 5 Eso big Godna unehlagim higeg fingi ogfufum. Eba inim feg.
Godna lahlag mo eba mungo go
6 Afa nengelim ka kukugfakanig nihe so na fig. Afa Kraisna nalig gafugag wa God so nengelim afafenig afa awamonig. Ahnaig esegba so na ikagna Kraisim masig fatinagim afa ming mom mo sawifenag? 7 Afa nengelim ka sihinig ming lahlag mo eba awai. Eso ka esog afa mingnag el nengelni onigigim gasafehiagig afa Kraisna lahlag mo wahgifi enmunam mo sihig. 8 Afa kagel lahlag mo nengelim ati sihigonug. Sa hig, kagel i afa ofwanai el i so ena mom wahiginam enmunam mo osihigonifibi nofeka enam higi. Afa aman el enaig esegba eba God so ma ehem suwi higeg lagig yi fafati. 9 Afa kati sihini afa yawo piske nengelim sihinig afa aman el enmunam mo sihinibi eso mas mungwalofeg mo eso yuwana ne fini eba God so ma enaig elim suwi higeg lagig yi fafati.
10 Afa ka mas enaig esog mo eso el kam lahlag onai amo ka membeg God mungo so ma kam lahlag onai. Afa kam kusig elim embeg mona sihinigim eso el kam lahlag onai. Afa ka elim enaig sihini ka fiba eba ka mas Kraisna gafugag el fei.
Pol Kraisna kanog wahiag el ahanaig pugufena
11 Afa kana nilite ka membeg ne anwanafi ohuna lahlag mo ka sihina eba mang elni onigig wa puguia mo. 12 Afa el mang ohuna mo kam faig mo afa mas aman el kam wagfunag mo. Amo, Sisas Krais ehe enag mo kam opugunag.
13 Afa ati ne kana mom higini ka autunam Ju elni nihe wa sahuna. Afa enanam ka Godna elim mas ka afafeni mo ka hugna kwagaiti fiahkafena eso ka membeg ka Godna siosim hugna amtakwalig aiti. 14 Afa Ju elni nof wa ka mingnag elim gosini eso ka mungona agfohiana afa ehengelba sum fini afa kikeba enag nihem goseg pahlukuna. Afa ka hugna onigig kiafna simbianigana nihem pahlukuna.
15 Afa autunam mia kam fukwa hwainig eso God ehe kam kanogim heafna gafugag el wahiag. Afa ehe kam ismunagim kweafug eso kam unenag.
16 Afa God heafna legim kam wagfunag eso ka afwambanai elim ehena lahlag mo sihig. Afa el mang kam onigig fai mo. 17 Afa ka mas Jerusalem gam ika gof wa nai Godna kanog hwati elim nangwagim amo ka ikagna Arebia provins gam ika puguna afa piske Damaskus kimbig gam bona. 18 Afa mahim sambaga mungo yia fenaba eso ka Pita nangum ikana. Numwehe mo fagim eso ka nanai yi sambaga wik ahwagana. 19 Ka mas ming elim kanogim nangu mo eba Ainiyagna suminigim mungo Jems.
20 Afa God ati kam anwanafenag ka mas mwakwale. Mang eso ka nem ginofenag eba inim.
21 Afa enanam ka Siria afa Silisia provins gam ka ikana. 22 Afa enanam Judia wa nai sios el kam mas anwanafini mo. 23 Afa ehengel mingnag mo higinim anwanafinim og el mungo eso bigim amtakwalig aiti fiahkafena yuwaba ehe lahlag mo sihig olug onigigna mo afa autunam ehe enam olug onigigna mo hugna amtakwalig aiti fena. 24 Afa ehengel kana lahlag nihem higigim mahim ka enaig esegba eso ehengel Godna unehlagim fingi fig.
THIS IS TEST VERSION 2011-07-25.
Please report any problems with this translation. Thank you!
Dispela buk i stap redi long sekim tasol. Sapos yu lukim sampela asua, plis toksave long mipela. Tenk yu!