1 Jesus angkew ikwerenh-rnemew, “Ingwer-rnemelan arrenhantherrenh arrkernem intem-antey, apmwangkwarr alhaynteyew. Akngeyelan renh-rnem artewentyel irrwampenh-antheyenh. 2 Artwa ingwerel arrkerney-angker renh antwerrkemer, ahenty-they arertnemer rwepel apwert ilkwewarl, kwaty alay-warl iwemel. Ra alakenh apek irrey-angenh, Akngeyan ahelerrem inngey arrkerney-angker ikwer. 3 Kel mwanty anayntenh-arey, arrantherr ingwer-rnem arrkernewerr, apmwangkwarr alhaynteyew.

Ingwer ayenharl apenteyel apmwelhelenty ngkweng-angkwarr, ntwa renh ilemer, ra ipmelheyew. Ra nyerrerremel ngkweng angkem, ‘Ya wenh, ayeng apmwelhelew ngkweng-warl. Atha ngkweng apmwa mpwarey-angenh arrpemarl.’ Kel ntwa renh ipmemel arrpemarl, rarl apmwelhelew-penh. Nga anyenterreyew-anem ikwerel-arleng. 4 Kel arlta anyent ikwerel rap intem arrpemarl apmwa mpwarayntem ngkweng. Rap angkepelarreng-anem nyerrerremel angkeyam-alpayntem ngkweng. Kel ntwap mentyarl renh intem awayntem iylpelerremel ipmemel. Nga angkemer ikwer alakenh, ‘Mwerr-anem ayeng ahelerrey-angenh ngkweng. Mwerrant-atherr-anem anaynteyew aylanth.’ ”

5 Kwertengerl Jesus-wenh-rnem angkew ikwer, “Rlterrk anewantherr. Anenhantherrenh akalty-antha, ingwer-rnem apmwepenh ipmemel tyarlew-aynteyew.”

6 Rap angkew ikwer-rnem, “Arrantherr angkem, ‘Rlterrk anewantherr.’ Kel arrantherran apek alyep iterrentyan irrpeltherrey-angenh, arrantherrap arwerl yanhew angkem alakenh, ‘Arwerlay! Tyerrelha ahern-they! Kwaty alayel-anem ampepel rtney-alha!’ Rap ngenh inngarl iylparethel awem.” Alakenh-anyem Jesus angkenh kwertengerl ikwerenh-rnemew.

7 Jesus-el angka ilenh ikwer-rnem artwa warrkenh-akert. “Artwa warrkenhel apek katenel angernem atyetyart ikwerew-arteyew. Yep-yep apek ra arntarnt-arem atyetyart-wenh. Ingkeny aylperl-alhem, rap apey-alpem atyetyart ikwerew-artey-wenh apmer-warl. Ikwerew-artey ikwer angkey-angenh alakenh, ‘Apetya, aneyew nhel, amern nhenh arlkweyew.’ Arrangkw, alakenh-weny. 8 Ikwerew-artey ikwer angkem alakenh, ‘Amperna amern-then aker-then atyeng. Akngetyanem atyeng-warl. Kwaty atyeng thela, atha antyweyew. Atharl ywerrelhelem, amperna amern ngkwengant-anem.’ 9 Warrkenh rarl awelhem, atyetyart ikwerew-arteyelarl ilanthem, rap renh nakey-angenh, arrangkw. Ran warrkerrem iylparetharl. 10 Alakenh-anyem warrkenh rapeny arrantherran warrkerreyel Akngeyew. Arrantherran awelhew-penh Akngeyew, arrenhantherrenh ilanthew-angkwarr, nthakenh alakenh iterrey-angenh, ‘Akngeyel anenhantherrenh nakemer, anantherrarl ikwer mwerr-angkerarl warrkerrenh.’ Arrangkw. Arrantherran alakenh iterremer, ‘Anantherran arwa warrkenh Akngey-wenh-rnem. Akngey rarl ileyel-angkwarr, anantherr apmelerr-angkwarr warrkerreyel.’ ”

11 Jesus-an alhenh-antey iwerrel Jerusalem-warl kwertengerl ikwerenh-rnem-akert. Jesus alhew akwerterrp-antey Jerusalem-warl apmer Galilee-they apmer Samaria-angkwarr antekerr-antey. 12 Rernemap arrer-anem apmer akely-warl alhenh, artwernem 10-anem arnareynenh, Jesus-warl apetyenharl. Rernem tywen-angketyarr, nthekwern arrer alhey-angenh, arntety anthelp-anthewerr. 13 Rernemap arleng-antey rtney-alhew, arlkemel artewentyel, “Jesus-ay! Atyetyartay! Amperrngerra anewantherr!”

14 Rarl renh-rnem arey-alhew-penh, rap angkew, “Arrantherr tyaty-warl alhenh-arey. Lwewarrernelhenh-arey artwa rltwa tyatyew-artey ikwer, ra arrenhantherrenh areyew mwerr-anem.” Rernemap anperl-alhew. Rernemarl alperlewenh-angkwarr-antey, arntetyan arlkethey ywerrenhew ikwer-rnem-they.

15-16 Artwa anyentan Samaria-areny ikwer-rnem-itwel alhenh, ingwer-rneman Jew-rnemarl. Artwa Samaria-areny arelhew, arlkarl alyelkerrenh, rap angkep alpew Jesus-warl, atayel nakemel Akngey. Rap kwenerrey-alpew, Jesus-arl rtnenh-itwew, “Jesus, ntwan ayenh mwerrelew! Mwerr-angker inngarl ngan Akngey!”

17 Jesus angkew kwertengerl ikwerenh-rnemew, “Artwernem 10 mwerrerrew, ngay? Artwernem 9 weth-rnem-alew? 18 Anyent nhanyemant angkep iterrewan, inkwerelhemel angkeyew Akngeyew. Alethangarlap ran, apmer Samaria-areny!” 19 Rap artwa arntety-penhew angkew, “Rtnerl-alha alpemel-anem. Ntwan iterl-arew, athan ngenh mwerreley-angker arawerrng Akngey-wenh-akertel, ngap mwerrerrew.”

20 Artwa Pharisee-rnem apetyew, Jesus ayerneyew, “Ilenger Akngeyan atyetyart aneyenh ingkerrew?” Jesus-el tyernew, “Arrantherr Pharisee-rnem ywarn arntarnt-arelheyenh areyew, Akngey atyetyart ingkerrew aneyenh. Nthakenh ingwerentyak angkey-angenh, ‘Arenherr-arey arrantherr! Akngeyan apetyew, atyetyart nhenh-areny-rnemew aneyew!’ 21 Nthakenh ingwerentyak angkey-angenharl, ‘Arenherr-arey arrantherr! Akngeyan apetyew, atyetyart yanh-areny-rnemew aneyew!’ Alakenh-wenyarlap ran. Akngeyan kel atyetyart aneyel ikwerenh-rnemew, rernemarl rlterrk iterreyel ikwer. Arrantherr nthakenh renh arey-angenh anngel, arrangkw.”

22 Kwertengerl ikwerenh-rnemew-anem ra angkew, “Ayengan Artwa Inngarl Akngey-wenh, aneyelarl arrewantherr-itwel aley. Ingwer-ingwer arrantherr alakenh angkerreyenh, ‘Aleyan anewantherr arlertek innga. Jesus anamerl-antey apey-alpemer!’ Ywarn-antey arrantherr arntarnt-arelherl-aneyenh, ayeng apey-alpentyew. 23 Ayeng apey-alpeyew-alenty, ingwer-rneman irrtywerremel angkeyenh arrewantherr, ‘Jesus-an nhak! Alhey anantherr ikwer-warl!’ Ingwer-rnemarl irrtywerremel angkeyenh arrewantherr, ‘Jesus-an nhenh! Apetyenh-arey arrantherr!’ Iylpareth awelhey-angenh ikwer-rnem. 24 Ayengarl apey-alpeyenh, ingkerrenhel iterl-areyenh. Ayengan arwapeny aremerreyelpeyenh, awely-awely rtneyel-apeny alkerel. Alakenh-anyem apmer arrpanenh-they ingkerrel ayenh areyenh. 25 Kel aleyan ayeng aneyel-antey ahern nhenh-itwew. Ingwer-rnemel ayenh atweyenh-tangkwel, pwarrk ilkwa anthemel ikwerew-alenty. Akngerr-anem rlengk aneyel ahern nhenh-itwew rernem arlkarerreyenh atyeng-wety.

26 Ayengan Artwa Inngarl Akngey-wenh. Ayengarl apey-alpeyenheng-areyan, apal akngerran arnernkey anerl-aneyenh, Akngey iterl-arey-angenh. Rap alakenh aynteyenh awank-akerr-apeny, Noah-arl iteth anenheng-arey. Kwaty ilkwa apetyeyew-alenty, apal akngerran arnernkey anew-anenh, Akngey iterl-arey-angenh. 27 Rernem ikwer-rnem-wenh-angkwarr anenh; amernant arlkwerrenh, kwaty antywerrenh, itengerrenh apmelerr-angkwarr, Akngey iterl-arey-angenh. Rernem alakenh anenheng-arey-antey, Noah-el rtnwa ilkwa mpwarenh. Akngeyel kwaty ilkwanem thwenew, Noah-an aylpenhew ikwerenh-rnem-akert rtnwewarl kwen. Kwaty atnyerr ilkwa ra ingwer-rnem ilwerl-athenew.

28 Rap alakenh aynteyenh awank-akerr-apeny. Ingweran Lot-arl iteth anenheng-arey. Ra apmer Sodom-they anterrey-alpeyew-alenty, apal akngerran arnernkey anew-anenh, Akngey iterl-arey-angenh. Rernem ikwer-rnem-wenh-angkwarr anenh; amernant arlkwerrenh, kwaty antywerrenh, ilek-ilek payemelerrenh, ilek-ilek tharlemelerrenh, amern lyapelhelerrenh, warl-rnem arterrenh apmelerr-angkwarr, Akngey iterl-arey-angenh. 29 Lot rarl apmer Sodom-they anterrew ikwerenh-rnem-akert, Akngeyel thwenew rwa ilkwa lherrm ikwakeng irrwerl-they. Ra Sodom-areny-rnem ingkerrenh ilwerl-athenew.

30 Yew-yew, ayengan Artwa Inngarl Akngey-wenh. Ayengarl ahern nhenh-warl apey-alpeyenh, apal akngerr ingwer-rneman arnernkey anerl-aneyenh awank-akerr-apeny, Akngey iterl-arey-angenh. 31 Arlta ikwerel-antey, artwa anyentan rtnerl-aneyenh akethel-antey warl ikwerenh-itwew. Rap anamerl-antey anterremer atyeng-warl, ilek-ilek mwerr-angker ikwerenhew iterrey-angenh, arrangkw. Arlta ikwerel-antey, artwa ingwerel-anem katen angernerl-aneyenh, amern lyapelheleyew. Rap anamerl-antey anterremer atyeng-warl, ilek-ilek mwerr-angker ikwerenhew iterrey-angenh, arrangkw. 32 Arrantherr iterl-areyel angka weth Lot-akert, wetharl anterrew tawen Sodom-they. Akelty ikwerenhew iterrenh-arey. Akngeyelarl tawen renh arrtyew, akelty rap artepang arew, ‘Ayengan angkep alpeyew, ilek-ilek mwerr-angker inerleweyew.’ Rap anamerl-antey apwert-anem irrew. 33 Akngerran iterrey-angenh Akngeyew, apwertew ilek-ilekew-then iterrem. Alakenhan apmwel-ayetharl iterreyel. Rernemap ahaperrem arrpemarl, nthakenh Akngey-itwel intem-antey aney-alpey-angenh, arrangkw. Ingwer-rneman iterreyel alakenh apek, ‘Ayeng arraty aneyew Jesus-ew. Ampwal akngerr apek atha atnyenem, arrangkw apek. Mwerrarlap alakenhan.’

34 Ingwel apek ayeng apey-alpeyenh. Atherr apek aynterl-aneyenh pantyel warl kwen-itwew. Antyerl-rnemelan anyentant inerl-alheyenh, ingweran iwerlelpeyenharl. 35 Atherr apek anerl-aneyenh, ntang atherl-anemel. Antyerl-rnemelan anyentant inerl-alheyenh, ingweran iwerlelpeyenharl. 36 [Atherrel apek katen mpwarerl-aneyenh. Antyerl-rnemelan anyentant inerl-alheyenh, ingweran iwerlelpeyenharl.”]

37 Kwertengerl-rnemel renh ayernew-anem, “Apmer nthenh-itwewarlap ran alakenh aynteyenh?”

Jesus-el tyernew, “Arlta ikwerel ingkerrenhel iterl-areyenh. Aker ipma ayntem artnel wethey, irrety-rnem anamerl-antey akarrerrenhey-alhem ikwer. Alakenh-anyem ingkerrenh atyeng-warl akarrerreyenh, ayengarl apey-alpeyenh.”