Sifsif Yonr hefenrhu skrorkfot yak nyusakmotrt nd fasoh fasoh shrm mfnahhato nda bbinysofthu met yindarim thu kasi hmbremomm.”
4
(Sapta 4–11)
Bro Nkifrar yura hefenrn lotu hanymomr
1 Nd nanhu mongko mtohhato pthamo yimar kfoyuk mrokfom wanyni hanyhato tfit yura hefenr hti hanymoyanr hefenrhu yifhatikt tfanyett hti hanymoyant. Nd na barkof ptha hanymo yimar tfit yura hefenko mtoh hanyhato fumret yimam fumrwa kanjo inji wany hanymoyanr. Kfo hany memora, “Asha yuwa muhn. Yuwa muhkahtn yak nuhas bonuhas bugaruhann kto rhuruha nefm.” 2 Be inji htini hanyhato yudbat tfit Bro Nkifrarhu Yafothat toh hongmbakna-motta nyingam frkrekuthato hefenr hti hanymoyanr. Nyingam frkekutni-hato hefenr htimohat htimoyant kingm yorhwa gajis. Nd gajis htimoya tor wom Yimar korhrt nd gajis.* Nd gajis rhumo yimar Jonr dhtimor, ndr htimor Bro Nkifrarn. To ndashart nhai be yufat yuta marimor Bro Nkifrar korhrt nd gajis. Nhai. Kto sapta 7 ves 10 kfotn htirahn mrokfot kfo miraht, “Bro Nkifrar kingm yorhwa gajisn korh hasiwur.” Ndha mrokfot kfo ntremomt. To Jonr Bro Nkifrar htimohat nhai kfo marimor rorhu ruheft yima mifm kanjo korhr. Nhai. Be kfo nhombramor ror hatohmo funeft yo ror hatohmo wonk wonk nmboret nmboret fnhuyeft. Ndrpam kfomor. 3 Nd Yimar gunyinyimik fnhutwor kangme tahi jaspathu fnhuyeftn fnhutwor yo tahi konirianthu fnhuyeftn fnhutwor. Nd ror yorhwa gajis kkujift frhtfasmott. Nd kkujift htimoyant kangme tahi emerartn fnhutwot. 4 Nd kingm yorhwa gajis 24 gajim hta htfasmomt, nd gajim 24 bro nungothetm korhmm. Nd gajim yorhwa nungothetm ganyom hmbresharpam wondh hmbrihato korh hasiwum, yo kingm hmbrita gor kraunkfot mfham hatohwomm. 5 Nd gajis yorhwa tkittn wuhtiyakmoanm toh fnhum wuyohninehato famboh-ritnamoum. Tohr wuyohninamoahat nyungefm thuwok fnahmoum. Yo nd gajis yukatohwako 7-pela kshm funa hasiwum. Nd 7-pela kshm ndm Bro Nkifrarhu hingrneft hingrnaruha 7-pela yafothayem. 6 Yo nd sia kingt yukatohwako kangme tek baritn glase hingrnetmt, aiskfot kanjo fnhutwot.
Yo husfihus foh nunga kanjo ruhet shrm mano mano toh htfasmom. Nd shrm nyingatikko wom nyingam tohwom yo mongko wom nyingam tohwom. 7 Nd husfihus shrm barkofr laion mfheter. Womr bulmakau yiram mfheter. Yo womrne yima nyingati-keter. Wurohr dobi mfheter. Kangme dobirn yafuna hanyhato mfhat thu yuwof hanitrt. 8 Nd husfihus shrm birnet bugayetem. Rpa rpa shrm 6-pela birna bugayetem. Yo nyisofm nyingam rhu htfas bugewumm. Yiro birna yuhamio nyinget bugayetem. Yifung marm be Bro Nkifrar windoh tukna hasiwum. Windoh hanyhato kfo hany kangm,
“Tu Yura Myorhekwa Bro Nungothete,
Tu Hta Nngrajohet Bro Nkifra mife,
ni bingot ritohngotakmo arihato tohwo yo kto nierahn.”
9 Nd foh nunga kanjo ruhet shrm rom yindhorwomr nd Yimar turhu sia kingt rhuhato be inji toh nkifranitar. Yo rorhu yufat yuta hagrhahato kfo yindhorwomr. Nd neft nd tohwa husfihus shrm be inji nahasiwum. 10 Tfit nd 24 nungothetm rom nd sia kingt rhuyuk Yimarhu nyingatikko bangum myuknahato lotu hasiwumr. Nd Yimar be inji toh nkifranirahr. Nd rroh mfham hatohyuk gor kraunkfot yak tutakhato nd Yimar yorhwa sia kingtpno watuhato kfo yindhor brutt-newumr. 11 Kfo kangm,
“Nmoh Bro Nkifraye ninrpa tu yura myorhekwo.
Ninn nda nom htita tamoh tamoht hingrna hta buga-motnm korhm.
Ndnettn yimam be ninrpann kfo yindhorkfot
yo yufat yuta hagrhahato ninrpanhu yinhitn rhukfot.”
*4:2: Nd gajis rhumo yimar Jonr dhtimor, ndr htimor Bro Nkifrarn. To ndashart nhai be yufat yuta marimor Bro Nkifrar korhrt nd gajis. Nhai. Kto sapta 7 ves 10 kfotn htirahn mrokfot kfo miraht, “Bro Nkifrar kingm yorhwa gajisn korh hasiwur.” Ndha mrokfot kfo ntremomt. To Jonr Bro Nkifrar htimohat nhai kfo marimor rorhu ruheft yima mifm kanjo korhr. Nhai. Be kfo nhombramor ror hatohmo funeft yo ror hatohmo wonk wonk nmboret nmboret fnhuyeft. Ndrpam kfomor.