1 Aqivq jaqbheq juq-ol, Miqyail gaoqhaq gaiq-a nail phaq bhaqda nee, ngal nuljuq bhai niailhai hal nail ngaol. Meeq nail haol nail laol bhiq nail phaq khi mail, Miqyail neema tsaq nail aqdoevq doevq nail laol bhiq nail phaq bhi pevq lal nail haqbhoil, nuljuq nail aqmaol Miqyail bhai av bhiq yaoq. Alhai av bhiq nail phaq neq, nuljuq nl heeq phaq-ail tsaq nail uqhuq thaoq nail aol ngaol. 2 Miltsaq yaq juq aqdoevq doevq nail khe-ai thaq doevq, neema aqsivq phal khi tsaol-aq aqsivq pevq lal yaoq. Alhai nl haq neq, Miqyail neema tsaq nail phaq bhai heeq nia lal khi tsel pav nia lal nail ngaol. Meeq nail phaq, bhee nail phaq khi mail, Miqyail neekhaol sil nail phaq bhai iqsanl, heeq nia lal nail ngaol.

3 Miqyail ngaq bhai bivq lavq-a nail geeqlaoq eeljaol bhaqda nee, nuljuq nail lavqkhoel bhai jaol nail yaoq gaq yaoq-ao nee bhai ngal niailhai ge nail ngaol: Yovqgavq nail ganl saol-nvq heeq phaq-ail tsaq nail nee ovqtavq al jaiq thaq saol-nvq jaiq. Miqyail teevq gaq nee teevq gaq bhai neema thaqtsaol nail phaq bhoil bhiq-ai thaq nail khe-ai, yovqgavq nail ganl saol-nvq heeq phaq-ail tsaq nail phaq bhai taivq-ail saol-nvq yaoq. 4 Khul khi mail dai ngal-aq neq, aqmaol teevq maol bhai alsail maodai covq nail ngaol. Al juq ganl nl nail maq dul lai-ail. 5 Alhai dul dai, ngadao tsaol-aq mao khi ngaol-aoq, Khali nail lavqkhoel bhai aqmaol teevq maol teevq-eel ngaol. Ngadao teevq gaq nee teevq gaq, aqmaol al nail lavqkhoel bhai covq cavq-ai thaq nail ngaol. 6 Miqyail ngadao bhai geeqlaoq eeljaol bivq lavq-a nail khe-ai, ngadao-i mail ya-ai thaq nail kovpavq juq maq dul lai-ail. Miqyail nail haqbhoil gedan nail kovpavq ya-a nail ngel haq neq, neema thaqtsaol nail phaq gaq kav nail khe-ai, gedan yaoq. 7 Tsaojao-ai nail gaq jiovq nail kovpavq ya-a nail ngel haq neq, tsaojao-ai bhiq yaoq. Cavq bhiq cov bhiq nail gaq jiovq nail kovpavq ya-a nail ngel haq neq, cavq bhiq cov bhiq yaoq. 8 Yu bhai gaq bivq nail kovpavq ya-a nail ngel haq neq, yu bhai gaq bivq yaoq. Yu bhai danq bhiq bhoil bhiq nail kovpavq ya-a nail ngel haq neq, maodai danq bhiq bhoil bhiq yaoq. Aqivq jiovq nail kovpavq ya-a nail ngel haq neq, laijai khi jiovq yaoq. Yu bhai gaoqhaq gaiq-a khi tsaojao-ai bhiq nail kovpavq ya-a nail ngel haq neq, lavqkhiq tsail nail lavqkhoel nee tsaojao-ai bhiq yaoq.

9 Goil nail gaiq-a nail phaq neq, maldil neema lavqkhoel nee gaiq-a nail phaq bhi pevq yaoq. Haqeiv nail phaq bhai bhe khi, aqmeeq phaq bhai neq, aqmeeq-ai nieivq thaiq-ai thaq yaoq. 10 Aqivq jaqbheq nail gaiqlaq bhai gaiq-a nail khe-ai, teevq gaq nee teevq gaq gaiq-a yaoq. Teevq gaq nee teevq gaq ev nail lavqkhoel, yu bhai thaqeeq nail laijai yaoq. 11 Aqdoil maq doil dai, laijai yaoq. Neema kev khi Miqyail nail ganl nl deedee yaoq. 12 Noeqthunq nail lavqkhoel lavqkhiq tsail yaoq. Haq nail aoq nail phaq ya daq-u phao, ol yaoq. Gaq maq bhaq dai, khaq mao iqsanl geeqlaoq hal yaoq. 13 Miqyail nail tsaol-aq juq loq nail khe-ai, aqyu juq bhai danq bhiq bhoil bhiq yaoq. Daq-i bhai aqmeeq meeq dai, hav bhiq yaoq.

14 Nuljuq bhai khoeq lal jiovq lal nail tsaol-aq juq bhai, geeqlaoq bivq yaoq. Iqkhail thaq yavq bhiq. Geeqlaoq taivq-ail bivq yaoq. 15 Lavqkhiq tsail nail tsaol-aq nee mail lavqkhiq tsao tsail bhiq yaoq. Nioil nail tsaol-aq nee mail nioil tsao bhiq yaoq. 16 Teevq gaq nee teevq gaq tsaq lai jil lai nail neema aol yaoq. Eeq movq heel movq nail neema thaq aol. Maivphaoq nal moel maq jiav nail tsaol-aq juq nee iqsanl aqtsaoq tsaoq yaoq. Ngal neq, neenoeq neekha aol naol dai, yovqgavq bhai yovqgavq thaq noeq.

17 Yu aqdoil phaq nl lal khi ngaol-aoq, aqdoil phaq teevq gaq bhai iqsanl thaq nl kovq bhiq. Tsaol-aq iqsanl nail sivtavq bhai aqmeeq phaq taivq-ail nl naol dai, noeq cov-ai thaq khi nl yaoq. 18 Nuljuq khal khi kivq nail khe-ai, tsaol-aq iqsanl bhai tsaq lai jil lai kivq dai, aqdoevq doevq yaoq. 19 Ngal mailma-ail gaiq-a nail aqtsaoq juq-ol. Yu nuljuq bhai nl laiq lavq-u phao, nuljuq thaq nl kovq bhiq. Miqyail nl kovq bhiq nail haqbhoil bhi jiav yaoq. Khul khi mail dai ngal-aq neq, Jalliq lavqkhoel bhai gevq-ai thaq nail khe-ai:

ge-ai thaq nail ngaol”.

gevq-ai thaq nail ngaol.

21 Haqeiv nail phaq-i mail nuljuq bhai thaq bhi gaq lal. Aqmeeq phaq bhai juq juq-ail, haqeiv nail phaq bhai bhi gaq lai yaoq.