1 Yeiqsul gaoq ge nail: “Saqdil meenq bhai jaol nail Khail yaq munl nail gaqkhoel bhai niailhai ge bhiq yaoq:

Miqyail nail aqhaqlal sivq gaq jaol khi, aqgil sivq heeq nieivq thaiq-ai thaq nail gaq, niailhai ge nail ngaol:

‘Naoq-i mail nl nail hal nail juq bhai ngal heeq kivq naol. Naol aqdoevq doevq nail ngaol dai, yu ge khi ngaol-aoq, naol sil-aoq nail ngaol. 2 Noeq lal yaoq. Naoq nail lavqkhoel bhai khal jail nail aqmeeq phaq maq bhi sil ceiv dai, gaq bivq yaoq. Khul khi mail dai ngal-aq, naoq-i mail nl-a hal-a nail phaq neq, ngaq nail Miqyail nail sivtavq bhai maq bhee maq lovq-ai haq-al dai, ngal heldaiq moel-a nail ngaol. 3 Alheel ngel-i mail, naoq-i mail ya gaiq khi ya hav bhoel-a nail daoq juq bhai, thaq nioilpeivq dei-eiq. Al juq bhai naldaiq khi oeqbal noeq pov yaoq. Naol aqgeel geel dai maq jaol haq neq, khoiqbhaoq bhaoq lee nail khe-ai, ngal lee naol. Ngal khul yanq bhai kev lee nail dai, naol maq heeq nia-ail.

4 Thailhai ngaol-aoq, yovqgavq nail aqgaq aqdoi bhai aqjiivq aqcavq maq lav cavq nail tsaol-aq teevq pav ganav juq, Saqdil meenq bhai jaol-ai haq nail ngaol. Aqyu juq neq, geel-nvq nail ngel-i mail, aqgaq aqdoi aqphul doi khi, ngaq-ai nee ya tsao nail ngaol. 5 Gaq lai-a nail tsaol-aq, alheel nail aqgaq aqdoi aqphul ya doi nail ngaol. Aqdoevq bhiq doevq nail haoqgavq phaldoiq lavqkhoel ngal aqyu juq nail aqmil bhai maq siv peiv-ail. Ngaq nail Aqbhu nail sivtavq bhai maqkhaiq, aivq nail nqtavq gaqkhoel nail sivtavq bhai maqkhaiq, thoil gaq ngaq nail tsaol-aq ngaol dai, ngal ge dov naol. 6 Naqkhaol khal covq nail tsaol-aq, Aqhaqlal Miqyail Khali yaq munl juq bhai ge bhiq nail daoq bhai, aqmeeq-ai naldaiq yaoq’ ” dai, ge bhiq-a nail ngaol.

7 Yeiqsul gaoq ge nail: “Phillaqdeiqphil meenq bhai jaol nil Khali yaq munl nail gaqkhoel bhai niailhai gevq bhiq yaoq:

‘Daqbhil nail ilkhaol khe taovq taovqphoil nieivq thaiq-ai thaq nail gaq neq, meeq nail haol nail tsaq nail gaq ngaol. Aivq-i mail phao-ai thaq haq neq, teevq gaq-ail, maq pheeqthaiq nia-ail. Aivq-i mail pheeqthaiq haq neq, teevq gaq-ail maq phao nia-ail. Aivq niailhai ge nail ngaol:

8 Naoq-i mail nl nail hal nail juq bhai ngal heeq kivq naol. Heldaiq. Tsaol-aq teevq gaq-ail maq pheeqthaiq nia nail lolgov teevq gov ngal naoq nail sivtavq bhai phao-ai thaq nail ngaol. Naol gaq micil taivq-ail aol khi ngaol-aoq, naol ngaq nail daoq naldaiq nail nee ovqtavq, ngaq nail aqmil bhai maq khaonq ha-al. 9 Neivq Saqdaq nail munl lavqkhoel bhai aol nail tsaol-aq juq, ngal naoq nail aqlavq lavqkhoel bhai av bhiq naol. Nvjuq neq, Yuldav nail tsaol-aq ngaol dai, aqyu juq ge khi ngaol-aoq, yuldav tsaol-aq maq ngel-ail. Aqyu juq goiqbhaoq bhaoq nail ngaol. Ngal aqyu juq bhai naoq nail aqkhil daoqthaoq bhai uqhuq bhi thaoq naol. Aq-u phao, ngal naoq bhai gaiq-a ail nial dai, aqyu juq heeq nia lal nail ngaol. 10 Ol ol-ail jaol yaoq dai, ngaq-i mail naoq bhai ge bhiq-a nail daoq bhai naldaiq nail ngel-i mail, miltsaq yaq bhai laonqdaiq nail dai, miltsaq kovtavq bhai yaoq dao yaoq-ao nee laonq nail aqyanq kev lee-u phao, ngal naoq bhai bhi jel-ail naol.

11 Ngal lavqtsail mail yavq kha lee naol dei-eiq. Naoq-i mail yaqhao khe ya nail heel uqtsaoq bhai teevq gaq-ail maq ya luv dov dai, naol khal jaol khal jiav nail yaoq phaq yaoq-ao nee bhai, ivqdao dai nieivq thaiq-ai thaq yaoq. 12 Gaq lai-a nail tsaol-aq, ngaq nail Miqyail nail uqhuq thaoq nail ilkhaol il ma nail lavqkhoel khe ilkhel pevq lal dai, ngal nl naol. Aqyu juq khaq mao iqsanl a bhai jaol nail ngaol. Aqyu juq nail kovtavq bhai ngaq nail Miqyail nail aqmil, ngaq nail Miqyail nail meenq nail aqmil khi, ngaq nail aqmil aqsivq, ngal gevq-ai thaq nail ngaol. Miqyail nail meenq al meenq neq, ngaq nail Miqyail jaol nail nqtavq nee yavq kha lee-a nail Yeiqlulsaqlaiq meenq aqsivq ngaol. 13 Naqkhaol khal covq nail tsaol-aq, Aqhaqlal Miqyail Khali yaq munl juq bhai ge bhiq nail daoq bhai, aqmeeq-ai naldaiq yaoq’ ” dai, ge bhiq-a nail ngaol.

14 Yeiqsul gaoq ge nail: “Laoqdiqciv meenq bhai jaol nail Khali yaq munl nail gaqkhoel bhai niailhai gevq bhiq yaoq:

Saljial ivq khi tsaq nail phaq aol nail lavqkhoel salkhil khanq nail gaq pevq nail, Miqyail-i mail teivq-ai thaq nail yaoq phaq yaoq-ao nee nail kovtavq bhai uvthaiq nail, ‘Aqmiq’ dai, khul nail gaq niailhai ge nail ngaol.

15 ‘Naoq-i mail nl nail hal nail phaq bhai ngal heeq kivq naol. Naol neq, aqcoevq iqsanl maq ngel, aqlaol iqsanl maq ngel. Naol aqcoevq maq ngel haq neq, aqlaol pevq nail bhai ngal oil movq-ail nial. 16 Thailhai ngaol-aoq, aqlaol iqsanl maq ngel, aqcoevq iqsanl naq ngel dai, aqloil loil dai taivq-ail pevq nail ngel-i mail, ngal naoq bhai peivq ha naol. 17 Naol neq, yovqgavq bhai yovqgavq, Ngal neq, hulmeeq hulbhao ngaol. Nlmaoq yalkav maodai halpov jil-ai thaq naol. Ngal khul teevq phaq iqsanl maq loq yaoq-aol dai, ge khi ngaol-aoq, naol khadai haq aoq nl heeq phaq-ail jiav nail bhai maqkhaiq, khadai gaoqhaq lal heeq phaq-ail pevq nail bhai maqkhaiq, khaq dai haq nail bhai maqkhaiq, naol maq heeq nia-ail. Naol maivpeivq peivq nail nee ovqtavq, naoq nail aqmaol neq, maoldeq lavqnel dai jaol nail bhai iqsanl, naol maq heeq nia-il laq. 18 Alheel ngel-i mail, ngal naoq bhai niailhai tsiqtsoe lavq bhel. Naol hulmeeq hulbhao bhao lal dai, poiv haol-ai thaq nail heel ngal jaol nail bha ul lal yaoq. Naol maoldeq lavqnel-ail jaol nail bhai yu maq ya moel dai, naol maq ya haqsil nail khe-ai, aqgaq aqdoi aqphul ul doi lal yaoq. Naol maivneev moel lal dai, maivneev moel lal nail jagaq ul lal yaoq.

19 Ngal khal gaiq-a nail tsaol-aq bhai, ngal khaq khaq-ail khi aqmeeq-ai cavq bhiq cov bhiq nail ngaol. Alheel ngel-i mail, oeqbal noeq pov nail lavqkhoel nee laijai dal laivq yaoq. 20 Heldaiq dei-eiq, ngal lolgov bhai thulphaol khi kov thailthaiq nail ngaol. Ngaq nail daoq gaiq khi lolgov phao lavq nail khul gaq bhai maqkhaiq, ngal aivq jaol nail bha aol lai khi, aivq nee mail jaq tavq daol tavq nail ngaol. Aivq iqsanl, ngaq-ai nee jaq tavq daol tavq nail ngaol.

21 Ngal neq, gaq lai-a nail gaq pevq khi, ngaq nail Aqbhu nail joiqjaq doiqbev bev ma bhai ngaq nail Aqbhu nee jaoldeel-nvq thaq nail khe-ai, gaq lai-a nail tsaol-aq bhai iqsanl, ngaq nail joiqjaq doiqbev bev ma bhai ngaq-ai nee mail bhi jaoldeel nail ngaol. 22 Naqkhaol khal covq nail tsaol-aq, Aqhaqlal Miqyail Khali yaq munl juq bhai ge bhiq nail daoq bhai, aqmeeq-ai naldaiq yaoq’ ” dai, ge bhiq-a nail ngaol.