1 Jaol n jel-ail khi* 16.1 Yuldav nail tsaol-aq neq, nlma ga bhoel-ail haq neq, aqn aqsivq teevq n dai, saol-nvq nail ngaol. Maqgaqdaqlal meenq bhai jaol nail Maqlil, Yaqkov nail aqma Maqlil khi mail Saqloqmeiq, aqyu juq Yeiqsul nail aqmaol bhai hoeldav bhiq nail dai khi, huqbhiq nil nail phaq ul ail-a nail ngaol. 2 Yaoq n yaoq, nqhao navqmav-ail nl ma dov lal-u phao, aqyu juq luqdaol bhai ail-a nail ngaol. 3 “Ngadao juq nail haqbhoil luqdaol moeqkhoeq bhai ngaoq tsoiq-ai thaq nail lovmav al heeq bhai, khaq sil gaq bhi ngaoq phao heeq” dai, aqyu juq nail gaiqlaq bhai ge pheeljaq nail ngaol.

4 Thailhai ngaol-aoq, aqyu juq heldaiq gai-aivq-u phao neq, lovmav al heeq ngaoq ha-ai thaq nail bhai ya moel-a nail ngaol. Lovmav al heeq neq, eeq deedee nail ngaol. 5 A bhai nee ngal-aq, aqyu juq luqdaol lavqkhoel bhai aol lai-u phao, phulleq dai phailkhaoq heelma doi-nq thaq nail yaqyov-aq yaqnoil teevq gaq lavqmal phao jaoldeel-nvq thaq nail bhai ya moel khi, geesil deedee lal bhiq-a nail ngaol.

6 Aq-u phao, aivq aqyu juq bhai ge bhiq-a nail: “Thaq geesil. Lavqyavq kovtavq bhai tavq heivq-a nail, Naqsaqlail meenq yaq Yeiqsul bhai nuljuq heldaiq lee thaq nail nial. Aivq doevq kovq lal-aoq nail ngaol. Aivq niilniai maq jaol yaoq-aol. Aivq bhai bavq thaq-a nail aqduq bhai heldaiq lee yaoq. 7 Nuljuq kovq lai khi, aivq nail yaqlaol khi mail Bheiqtuvluv bhai niailhai ge bhiq lai yaoq: ‘Aivq nuljuq nail iqmoeq nee Gaqliqlail milkhaoq bhai ail thailthaiq nail ngaol. Aivq nuljuq bhai ge thaq-ail ceevq-a nail khe-ai, a bhai nuljuq aivq bhai ya moel naol’ dai, ge bhiq lai dei-eiq” dai, aqyu juq bhai ge bhiq-a nail ngaol.

8 Aq-u phao, yaqmai-aq al juq luqdaol nee mail dov ail-a nail ngaol. Aqyu juq geesil khi aqjuq juq deedee nail nee ovqtavq, noeq-u maq dov dai pevq-ail khi, tsaoq kol-aivq-a nail ngaol. Aqyu juq geesil deedee nail ngel-i mail, teevq gaq bhai iqsanl maq ge bhiq-al.

9 [Yeiqsul neq, jaol n jel-ail khi iqmoeq-u n-gaol, nqhao navqmav-ail doevq kovq lal-a nail ngaol. A bhai nee ngal-aq, aivq nail aqmaol Maqgaqdaqlal meenq bhai jaol nail Maqlil bhai iqmoeq bhi moel-a nail ngaol. Yaqmai-aq al gaq neq, jel lal-u phao, neivq sivq maol aol nail bhai, Yeiqsul-i mail the dov bhiq-a nail al gaq ngaol. 10 Yeiqsul nee mail teevq gaq khe-ai jaol-a nail juq, noeqhaq nail lavqkhoel nioil thailthaiq-u phao, Maqlil ganl al aqyu juq bhai ge gaiq lai bhiq-a nail ngaol. 11 “Yeiqsul aqdoevq doevq-ai haq nail ngaol. Ngal aivq bhai ya moel-a nail ngaol” dai, Maqlil aqyu juq bhai ge bhiq khi ngaol-aoq, aqyu juq neq, “Maq pevq lal nia-ail” dai, ge kovq bhiq-a nail ngaol.

12 A bhai nee ngal-aq, aqyu juq nail lavqkhoel khe nvq gaq julgu bhai kovq ail thailthaiq-u phao, Yeiqsul aivq nail aqmaol micil bhi phal-ail khi aqyu nvq gaq bhai bhi moel-a nail ngaol. 13 Aqyu nvq gaq kovq lal khi jaol-ail ceevq-a nail juq bhai ge bhiq khi ngaol-aoq, aqyu juq neema maq thaqtsaol-ail.

14 A bhai nee ngal-aq, yaqlaol tsel teevq gaq jaoljaoq khi aoq jaq thailthaiq-u phao, Yeiqsul aivq nail aqmaol aqyu juq bhai bhi moel-a nail ngaol. Aqyu juq neema maq thaqtsaol nail nee ovqtavq, neema gaol nail ngel-i mail, Yeiqsul aqyu juq bhai khaq-a nail ngaol. Khul khi mail dai ngal-aq neq, Yeiqsul gaoq doevq kovq lal-a nail bhai ya moel-a nail tsaol-aq nail daoq bhai, aqyu juq neema maq thaqtsaol-ail.

15 A bhai nee ngal-aq, Yeiqsul aqyu juq bhai ge bhiq-a nail: “Miltsaq doi dai ail khi, tsaol-aq iqsanl bhai lavqkhiq tsail nail geeqlaoq daoq cavq bhiq ail yaoq. 16 Neema thaqtsaol khi ulcuvq saol nail tsaol-aq hevqkovq nail phaq ya nail ngaol. Neema maq thaqtsaol nail tsaol-aq neq, yalkhaq dal nail bhai ya daq nail ngaol. 17 Neema thaqtsaol nail tsaol-aq juq neq, bhi heeq bhi moel nail phaq niil juq nl nail ngaol. Aqyu juq ngaq nail aqmil bhai juq juq-ail, neivq bhai the dov nail ngaol. Aqyu juq mee nia phaq nail daoq ge nail ngaol. 18 Aqyu juq eellel bhai nieivq nia nail ngaol. Aqyu juq jaldovq jaq khi daol khi ngaol-aoq, khul maq pevq lal-ail. Nal nail goel nail tsaol-aq nail kovtavq bhai aqlavq bavq dav-u phao, tsaol-aq al juq meeq lai nail ngaol” dai, Yeiqsul aqyu juq bhai ge bhiq-a nail ngaol.

19 Heeqphaq Yeiqsul aqyu juq bhai alhai ge bhiq gaq-u phao, aivq bhai nqtavq kovtavq bha tsiqdal laivq-a nail ngaol. Aivq a bhai Miqyail nail lavqmal phao jaoldeel-nvq thaq nail ngaol. 20 Yaqlaol juq iqsanl dov ail khi, yaoq dao yaoq-ao nee mail geeqlaoq daoq cavq bhiq ail-a nail ngaol. Heeqphaq Yeiqsul aqyu juq nee mail ganl tsao nl nail ngaol. Aqyu juq-i mail cavq nail geeqlaoq daoq al duq jaiq lal dai Yeiqsul bhi heeq bhi moel nail phaq nl dov bhiq-a nail ngaol.]