1 Jaol n jel-ail khi, jaol n teevq jao nail lavqkhoel iqmoeq-u n-gaol nqbhaq bhaq lal thao, Maqgaqdaqlal meenq bhai jaol nail Maqlil khi mail Maqlil yaoq gaq yaoq teevq gaq, aqyu nvq gaq luqdaol bhai heldaiq ail-a nail ngaol.

2 Aq-u phao thaiqphuq dai, milluv luv deedee nail ngaol. Khul khi mail dai ngal-aq neq, Heeqphaq Miqyail nail nqtavq gaqkhoel teevq gaq nqtavq nee mail yavq kha lee khi luqdaol govkhoiq bhai ngaoq tsoiq-ai thaq nail lovmav al heeq bhai ngaoq ha khi, al nail kovtavq bhai jaoldeel-nvq thaq nail ngaol. 3 Aivq nail aqmaol nqmeivq meivq nail khe-ai bhaq khi, aivq nail aqgaq aqdoi neq, aqphul phul deedee nail ngaol. 4 A bhai lovq nail genl dev nail tsaol-aq juq geesil deedee nail ngel-i mail, aqjuq juq deedee lal bhiq khi, sil heeq phaq-ail, pevq ail-a nail ngaol.

5 Nqtavq gaqkhoel al gaq, yaqmai-aq al nvq gaq bhai ge bhiq-a nail: “Thaq geesil. Lavqyavq kovtavq bhai tavq heivq-a nail Yeiqsul bhai nul-nq nvq gaq heldaiq lee-a nail ngaol dai, ngal heeq kivq nail ngaol. 6 Aivq niai maq jaol yaoq-aol. Khul khi mail dai ngal-aq neq, aivq-i mail ge-ai thaq nail khe-ai, aivq doevq kovq lal-a nail ngaol. Aivq bhai bavq thaq-a nail aqduq bhai heldaiq lee yaoq. 7 Lavqtsail mail kovq lai khi, ‘Aivq doevq kovq lal-aoq nail ngaol’ dai, aivq nail yaqlaol juq bhai ge gaiq bhiq lai yaoq. ‘Aivq nuljuq nail iqmoeq nee mail Gaqliqlail milkhaoq bhai ail thailthaiq nail ngaol. Nuljuq aivq bhai a bhai ya moel nail ngaol’ dai, ge bhiq lai yaoq. Ngal nul-nq nvq gaq bhai bhi heeq kivq movq nail ganl neq, niil juq ngaol” dai, ge bhiq-a nail ngaol.

8 Aq-u phao, aqyu nvq gaq gee iqsanl geesil, lavqkhiq iqsanl tsail deedee nail lavqkhoel, yaqlaol juq bhai ge bhiq lai nail dai khi, teevq pov taivq-ail luqdaol nee mail tsaoq kol laivq-a nail ngaol. 9 Aq-u phao, thaiqphuq dai, Yeiqsul aqyu nvq gaq bhai thaoq phuq khi, “Neesal-ovq dei-eiq” dai, ge bhiq-a nail ngaol. Aqyu nvq gaq Yeiqsul nail aqkhil bhai phalthaiq khi, aivq bhai uqhuq thaoq-a nail ngaol. 10 Yeiqsul aqyu nvq gaq bhai ge bhiq-a nail: “Thaq geesil. Ngaq nail aqivq jaqbheq juq bhai, ‘Gaqliqlail milkhaoq bhai ail-oq geiq’ dai, ge bhiq lai yaoq. A bhai aqyu juq ngaq-ai ya moel nail ngaol” dai, ge bhiq-a nail ngaol.

11 Aqyu nvq gaq kovq lai thailthaiq-u phao, luqdaol bhai lovq nail genl dev nail tsaol-aq juq meenq bhai aol lai khi, khal pevq lal-a nail iqsanl mail Philma juq bhai ge bhiq lai-a nail ngaol. 12 Philma juq neq, aqivq aqtsu juq nee mail maoqbhaoq nl khi, aqyu juq genl dev nail juq bhai phul maodai bivq khi ge bhiq-a nail: 13 “Hul-iq tsil ma nvjuq iqthaiq kov-ai thaq-u phao, aivq nail yaqlaol juq aivq bhai bavq dov khoiq lal thaq nail ngaol dai, nuljuq yu bhai ge bhiq dei-eiq. 14 Ganl niil, Phillav ya gaiq haq neq, nuljuq bhai khul teevq phaq iqsanl maq ya khi dai, aivq neekhaol sil lal bhiq-u phao kev dai, nvjuq nl naol” dai, ge bhiq-a nail ngaol. 15 Alheel ngel-i mail, genl dev nail juq phul al oil khi, Philma juq-i mail aqyu juq bhai bhi ge nail khe-ai, ge-a nail ngaol. Daoq al daoq, Yuldav nail tsaol-aq nail lavqkhoel yanqgaol kev dai, gaiq doi ail-a nail ngaol.

16 Yaqlaol al tsel teevq gaq, Yeiqsul-i mail ge-ai thaq nail khe-ai, Gaqliqlail milkhaoq bhai jiav nail gaoqjaoq bhai lai-a nail ngaol. 17 Aqyu juq aivq bhai moel khi, uqhuq thaoq-a nail ngaol. Thailhai ngaol-aoq, teevq pav ganav juq neq, aqmeeq-ai neema maq thaqtsaol-ai haq-al. 18 Yeiqsul aqyu juq nail aqjail bhai jiil laivq khi ge bhiq-a nail: “Nqtavq kovtavq khi mail miltsaq kovtavq khe bhaqaoq iqsanl mail, ngaq bhai bivq lavq-a nail ngaol. 19 Nuljuq ail khi, jeq-e jaq-a iqsanl mail ngaq nail yaqlaol pevq lal dai, nl ail yaoq. Aqbhu, Yaqyov khi mail Meeqnail Haolnail Aqhaqlal nail aqmil kov-uvq nee, aqyu juq bhai ulcuvq saol bhiq yaoq. 20 Ngaq-i mail nuljuq bhai bivq-ai thaq nail daoq iqsanl bhai naldaiq dai, aqyu juq bhai cavq bhiq cov bhiq yaoq. Heldaiq dei-eiq. Miltsaq niil daoq loi loi lai-u n-gaol kev dai, ngal nuljuq nee mail khaq mao iqsanl jaol naol” dai, Yeiqsul aqyu juq bhai ge bhiq-a nail ngaol.