1 Aq-u n-gaol, Yeiqsul ilkhaol nee dov ail khi, ngaqkha daolbhaq bhai jaoldeel ail-a nail ngaol. 2 Aq-u phao, tsaol-aq munl munl ma juq Yeiqsul jaol nail bha maodai jil lal-a nail ngel-i mail, aivq laovq lavqkhoel bhai jaoldeel ail-a nail ngaol. Tsaol-aq munl munl ma juq neq, ngaqkha daolbhaq bhai thulphaol-nvq thaq nail ngaol. 3 Yeiqsul daoqma uqhuq daoq nee mail ganl mee nia phaq aqyu juq bhai cavq bhiq cov bhiq-a nail ngaol.

Aivq ge nail: “Aq-u phao, aqiq haiq nail teevq gaq jaol laoq thaq nail ngaol. Teevq n kev lee-u phao, aivq aqiq haiq ail-a nail ngaol. 4 Aivq haiq-u phao, aqiq teevq pav ganav juq neq, gailkhaol kovtavq bhai ga ail-a nail ngel-i mail, keivq-avq lee khi aqiq al juq bhai gov jaq gil-a nail ngaol. 5 Aqiq teevq pav ganav juq neq, miltsaq bhaq nail lovmav lovyal bhai ga ail-a nail ngaol. Miltsaq aqbhaq ngel-i mail, lavqtsail mail aqjiiv jiiv dol lavq-a nail ngaol. 6 Thailhai ngaol-aoq, daoqtsail maq kha navq ail-a nail ngel-i mail, nlma dov lal-u phao, nltsal mailma-ail kav nail bhaqda nee khuq-ail kov ail-a nail ngaol. 7 Aqiq teevq pav ganav juq neq, aqgoe goeyal bhai ga ail-a nail ngaol. Aqgoe jiavbuv eeq lal khi, aqjiiv al bhai uvthaiq-ai thaq nail ngaol. 8 Thailhai ngaol-aoq, aqiq teevq pav ganav juq neq, miltsaq mil meeq bhai ga ail khi aqheeq heeq lee-a nail ngaol. Teevq pav ganav juq neq, teevq yal bhoil, teevq pav ganav juq neq, kovq tsel bhoil, teevq pav ganav juq neq, hail tsel bhoil dai, heeq lee-a nail ngaol. 9 Naqkhaol khal covq nail tsaol-aq naldaiq yaoq” dai, ge bhiq-a nail ngaol.

10 A bhai nee ngal-aq, yaqlaol juq Yeiqsul jaol nail bha lal khi, “Naol khul khi mail tsaol-aq al juq bhai daoqma uqhuq daoq yuq yuq-ail cavq bhiq cov bhiq nail-aiq” dai, naldaiq bhiq-a nail ngaol. 11 Yeiqsul ge kovq bhiq-a nail: “Nqtavq Milkhaoq nail ganl oiltsail-ai thaq nail juq bhai nuljuq heeq nia lal-aoq nail ngaol. Thailhai ngaol-aoq, aqyu juq neq, maq heeq nia lal haq-al. 12 Khul khi mail dai ngal-aq neq, jiav nail tsaol-aq bhai gaoq bivq laoq khi, gaoq jiav jaiq lal nail ngaol. Maq jiav nail tsaol-aq bhai neq, aqyu juq-i mail khal jiav nail juq bhai, oil dov gil nail ngaol. 13 Alheel ngel-i mail, aqyu juq heldaiq khi ngaol-aoq, maq heldaiq moel nia, naldaiq khi ngaol-aoq, maq gaiq nia nail nee ovqtavq, maq gov heeq nia nail ngel-i mail, ngal aqyu juq bhai daoqma uqhuq daoq yuq yuq-ail, cavq bhiq cov bhiq nail ngaol.

14 Miqyail nail haqbhoil gedan nail Ilsaqyal-i mail ge-ai thaq nail daoq, aqyu juq nail lavqkhoel bhai bhee lal-a nail ngaol.

Aivq ge nail:

ge-ai thaq nail ngaol.

16 Thailhai ngaol-aoq nuljuq neq, maivneev moel nia khi, naqkhaol gaiq nia nail ngel-i mail, geeqlaoq eeq nail ngaol. 17 Ngal nuljuq bhai maldil dai, ge lavq bhel. Nuljuq-i mail ya moel-a nail juq, Miqyail nail haqbhoil gedan nail juq khi mail aq-u khe Miqyail nail tsaol-aq maodai moel movq deedee khi ngaol-aoq, maq ya moel-al. Nuljuq-i mail ya gaiq-a nail phaq gaiq movq deedee khi ngaol-aoq, maq ya gaiq-al” dai, ge bhiq-a nail ngaol.

18 Yeiqsul gaoq ge nail: “Aqiq haiq nail ganl daoqma uqhuq daoq nail daoqceevq bhai naldaiq yaoq. 19 Gailkhaol kovtavq bhai ga-ai thaq nail aqiq dai ge nail neq, tsaol-aq teevq gaq Miqyail Milkhaoq nail ganl ya gaiq khi maq gov heeq nia haq neq, haqeiv nail gaq lal khi aivq nail neema lavqkhoel bhai haiq-ai thaq nail aqiq bhai gov ha gil nail bhai ge movq nail ngaol. 20 Lovmav lovyal bhai ga ail-a nail aqiq dai, ge nail neq, Miqyail nail daoq ya gaiq-u phao, teevq pov taivq-ail lavqkhiq tsail nail lavqkhoel nee hav bhoel-a nail tsaol-aq bhai ge movq nail ngaol. 21 Thailhai ngaol-aoq, daoqtsail maq kha ivq ail-a nail ngel-i mail, teevq yanq maq ngel nail neq, maq doevq nia-ail. Daoq al daoq bhaqda nee, haq nail aoq nail phaq khi mail khoeq nail jiovq nail phaq kev lee-u phao, teevq pov taivq-ail khaonq ha gai-aivq nail ngaol. 22 Aqgoe goeyal bhai ga ail-a nail aqiq dai ge nail neq, Miqyail nail daoq ya gaiq khi ngaol-aoq, miltsaq kovtavq bhai jaol-u phao, khaoqlaol nail phaq khi mail, phul heel ildaoq maoqgaiq bhai lavqkhiq tsail nail phaq neq, daoq al daoq bhai uvthaiq-ai thaq nail ngel-i mail, aqheeq maq heeq lee nia nail tsaol-aq bhai, ge movq nail ngaol. 23 Miltsaq mil meeq bhai ga ail-a nail aqiq dai ge nail neq, Miqyail nail daoq ya gaiq-u phao, gov heeq nia nail tsaol-aq bhai ge nail ngaol. Alheel nail tsaol-aq neq, aqheeq maldil heeq lee nail ngaol. Teevq pav ganav juq neq, teevq yal bhoil, teevq pav ganav juq neq, kovq tsel bhoil, teevq pav ganav juq neq, hail tsel bhoil dai, heeq lee nail ngaol” dai, ge bhiq-a nail ngaol.

24 Yeiqsul aqyu juq bhai daoqma uqhuq daoq yaoq daoq yaoq nee mail Nqtavq Milkhaoq nail ganl niailhai gaoq cavq gaoq cov bhiq-a nail ngaol: “Aq-u phao, tsaol-aq teevq gaq aivq nail gov gov yal bhai gov gov iq aqmeeq haiq-ai thaq nail ngaol. 25 Thailhai ngaol-aoq, tsaol-aq iqthaiq nail yanq bhai aivq bhai neejiav jiav nail gaq lal khi, gov haiq-ai thaq nail bhai hubhil haiq khoiq-ail ceevq khi kovq-ai thaq nail ngaol. 26 Gov meeq lal khi gov bhoiq gov dov dov lal-u phao, hubhil iqsanl doevq lal thaq nail bhai ya moel-a nail ngaol.

27 Aq-u phao, ilheel gaq nail yaqkav juq ilheel gaq bhai niailhai ge bhiq lai-a nail ngaol: ‘Naoq nail gov gov yal bhai aqiq aqmeeq haiq-a nail maq ngel laiq. Khul khi mail hubhil doevq lal-a nail-aiq’ dai, naldaiq bhiq-a nail ngaol.

28 ‘Ngaq bhai neejiav jiav nail gaq-i mail haiq khoiq lal thaq nail niil’ dai, ilheel gaq ge kovq bhiq-a nail ngaol. ‘Nvjuq bhai hubhil al juq bhai bhi gaol ha-ail movq-ail laiq’ dai, yaqkav al juq gaoq naldaiq bhiq-a nail ngaol.

29 Thailhai ngaol-aoq, aivq ge bhiq-a nail: ‘Alhai thaq khi-ail. Nuljuq hubhil gaol ha-u phao, gov iqsanl gaol ha nail bhao nail ngaol. 30 Gov gaiq nail yanq kev lal-u phao kev dai, nvq phaq nvq phaq-ail bhi eeq lal yaoq. Gov gaiq nail yanq kev lal haq neq, hubhil bhai iqmoeq gaiq khi miqjaq bhai bavq poiv kivq dai, aqjeeq jeeq thaq-ai yaoq. Gov bhai neq, ngaq nail govjil bhai phi bhoel thaq-ai yaoq dai, gov gaiq nail juq bhai ge bhiq naol’ dai, ilheel gaq ge nail ngaol” dai, Yeiqsul aqyu juq bhai ge bhiq-a nail ngaol.

31 Yeiqsul aqyu juq bhai daoqma uqhuq daoq yaoq daoq yaoq nee gaoq cavq gaoq cov bhiq-a nail: “Nqtavq Milkhaoq neq, tsaol-aq teevq gaq aivq nail yalgaol bhai haiq-ai thaq nail gaoqpavq aqneev khe-ai, dul nail ngaol. 32 Gaoqpavq aqneev al neq, aqneev iqsanl nee maqtsil nil khi ngaol-aoq, eeq lal-u phao, heeqlaoq gaoqjal iqsanl nee maqtsil eeq lal khi, aqbhaol bhaol ma ma lal nail ngaol. Alheel ngel-i mail, nqtavq phao bhail nail keivq-avq juq lavqmeiv bhai deivq lee khi aqkheel kheel lee nail ngaol” dai, ge bhiq-a nail ngaol.

33 Yeiqsul aqyu juq bhai daoqma uqhuq daoq yaoq daoq yaoq nee gaoq cavq gaoq cov bhiq-a nail: “Nqtavq Milkhaoq neq, deqtsiq khe-ai dul nail ngaol. Yaqmai-aq teevq gaq deqtsiq oil khi, khaqmul lav sav nail tsoelthoel hail deel bhai oil kheq khi mail, iqsanl bhai bhi bhaonq lal nail ngaol” dai, ge bhiq-a nail ngaol.

34 Ganl al juq iqsanl mail, Yeiqsul daoqma uqhuq daoq yuq yuq-ail tsaol-aq munl munl ma juq bhai cavq bhiq cov bhiq-a nail ngaol. Daoqma uqhuq daoq nee maq ngel nail neq, aivq aqyu juq bhai maq cavq maq cov bhiq-al. 35 Aivq alhai cavq bhiq cov bhiq-a nail neq, Miqyail nail haqbhoil gedan nail gaq-i mail ge-ai thaq nail daoq bhi bhee lal-a nail ngaol. Daoq al daoq neq,

ge nail ngaol.

36 A bhai nee ngal-aq, Yeiqsul tsaol-aq munl munl ma jaol nail nee dov ail khi ilkhaol bha aol lai-a nail ngaol. Aq-u phao, aivq nail yaqlaol juq aivq jaol nail bha lal khi, “Gov gov yal bhai haiq khoiq-a nail hubhil nail ganl daoqma uqhuq daoq nail daoqceevq ge lavq-o” dai, ge bhiq-a nail ngaol.

37 Yeiqsul ge nail: “Gov gov iq aqmeeq haiq-a nail gaq neq, Tsaol-aq nail Yaqyov bhai ge nail ngaol. 38 Gov gov yal neq, miltsaq niil heeq ngaol. Gov gov iq aqmeeq neq, Miqyail Milkhaoq lavqkhoel bhai jaol nail tsaol-aq juq bhai ge nail ngaol. Hubhil neq, haqeiv nail gaq nail kov-uvq bhai jaol nail tsaol-aq juq bhai ge nail ngaol. 39 Hubhil haiq khoiq-a nail neejiav jiav nail al gaq neq, neivq heeqphaq ngaol. Gov gaiq nail aqn neq, miltsaq niil haoqnao naosaq khe yanq bhai ge nail ngaol. Gov gaiq nail juq neq, nqtavq gaqkhoel juq ngaol.

40 Hubhil bhai gaiq khi miqjaq-i mail kheq ha nail khe-ai, miltsaq niil haoqnao naosaq nail yanq bhai, alhai pevq lal nail ngaol. 41 Tsaol-aq nail Yaqyov aivq nail nqtavq gaqkhoel juq bhai khoel-ai leevq khi, yu bhai bhi nl bheeq nail yaoq phaq yaoq-ao nee khi mail, haqeiv nail phaq nl nail tsaol-aq iqsanl bhai aivq nail milkhaoq lavqkhoel nee, bhi hevq dov nail ngaol. 42 A bhai nee ngal-aq, aqyu juq bhai miqjaq jaibhoil lavqkhoel bhai bavq poiv nail ngaol. A bhai khal jaol nail tsaol-aq iqsanl mail, noeqhaq deedee nail lavqkhoel, nioil khi haoqgil keivq nail ngaol. 43 Aq-u phao, Miqyail nail tsaol-aq juq neq, aqyu juq nail Aqbhu Miqyail Milkhaoq bhai, nlma khe-ai aqbhaq bhaq nail ngaol. Naqkhaol khal covq nail tsaol-aq naldaiq yaoq” dai, ge bhiq-a nail ngaol.

44 Yeiqsul gaoq ge nail: “Nqtavq Milkhaoq neq, daiyal bhai duq pheeq-ai thaq nail aqphoiq mao-ail kav nail phul phul duq khe-ai dul nail ngaol. Phul phul duq bhai moel-a nail gaq gaoq duq pheeq-ail ceevq khi lavqkhiq tsail deedee nail lavqkhoel, aivq khal jiav nail iqsanl gaoq ha khi, daiyal al khoeq bhai ul nail ngaol” dai, ge bhiq-a nail ngaol.

45 Yeiqsul gaoq ge nail: “Al ovqtavq, Nqtavq Milkhaoq neq, mailma-ail meeq nail laoqpav laolpav nail sainl bhai halpov thailthaiq nail jaiqgaiq gaiq nail teevq gaq khe-ai dul nail ngaol. 46 Aivq mao-ail phoiq nail laoqpav laolpav nail sainl teevq heeq bhai halpov moel-u phao, kovq ail khi aivq khal jiav nail phaq iqsanl mail gaoq ha gil khi, sainl al heeq bhai ul nail ngaol” dai, ge bhiq-a nail ngaol.

47 Yeiqsul gaoq ge nail: “Al ovqtavq, Nqtavq Milkhaoq neq, iqyaq iqma bhai joe puvq gai-aivq-u phao, delgil yaoq phaq yaoq-ao nee bhai phee lai nail ovjeel khe-ai, dul nail ngaol. 48 Delgil maodai joe ya-u phao, delgil nieivq nail tsaol-aq juq neq, ovjeel bhai iqyaq iqma daolbhaq bhai he dol lavq nail ngaol. A bhai nee ngal-aq, jaoldeel khi delgil aqmeeq juq bhai neq, pheeqdeel lavqkhoel bhai tsel bhoel khi ganl maq tsoiq nail delgil juq bhai neq, tsel ha nail ngaol. 49 Miltsaq niil haoqnao naosaq nail yanq, alhai pevq lal nail ngaol. Nqtavq gaqkhoel juq dov lee khi, tsaq nail daol nail tsaol-aq khi haqeiv nail tsaol-aq bhai tselpav nail ngaol. 50 A bhai nee ngal-aq, haqeiv nail tsaol-aq bhai neq, miqjaq jaibhoil lavqkhoel bhai bavq poiv nail ngaol. A bhai khal jaol nail tsaol-aq, noeqhaq deedee nail lavqkhoel nioil khi haoqgil keivq nail ngaol” dai, ge bhiq-a nail ngaol.

51 “Ganl niil juq iqsanl mail nuljuq gov heeq-ao naol laiq” dai, Yeiqsul naldaiq-u phao, “Gov heeq-ao naol” dai, yaqlaol juq ge kovq bhiq-a nail ngaol. 52 “Alheel ngel-i mail, Nqtavq Milkhaoq khe yaqlaol pevq lal-a nail aoldaoq kovqdaoq cavq nail cov nail yaoq gaq yaoq-ao nee mail, ilheel gaq aivq nail nlmaoq oil thaq duq nee mail, nlmaoq aqsivq khi mail aqlil oil dov nail khe-ai dul nail ngaol” dai, Yeiqsul aqyu juq bhai ge bhiq-a nail ngaol.

53 Yeiqsul daoqma uqhuq daoq al daoq cavq bhiq cov bhiq gaq-u phao, a bhai nee dov ail-a nail ngaol. 54 Yeiqsul aivq nail jaolkhaoq jaollaoq bha kovq ail khi, aqyu juq nail uqhuq thaoq nail ilkhaol lavqkhoel bhai cavq bhiq cov bhiq-a nail ngaol. Ya gaiq-a nail tsaol-aq juq noeq-u maq dov dai, pevq ail khi ge nail: “Tsaol-aq niil gaq niilheel nail neenoeq neekha khi mail bhaqaoq eeq deedee nail juq khaq bha khe ya thaq nail ngel-aiq. 55 Aivq neq, aqbhaol thoiq nia nail al gaq nail yaqyov maq ngel-ail laiq. Aivq nail aqma neq, Maqlil dai khul nail maq ngel-ail laiq. Yaqkov, Yaolsai, Silmoq khi mail Yuldav neq, aivq nail jaqbheq juq maq ngel-ail laiq. 56 Aivq nail nailma juq iqsanl, ngadao juq nee jaol nail maq ngel-ail laiq. Thailhai phal-iq, tsaol-aq niil gaq niilheel nail bhaqaoq khaq bha khe ya thaq nail meeq” dai, ge nail ngaol. 57 Alheel ngel-i mail, aqyu juq Yeiqsul bhaqda nee, neema cov nail ngaol.

Aq-u phao, Yeiqsul aqyu juq bhai ge bhiq-a nail: “Miqyail nail haqbhoil gedan nail tsaol-aq bhai, yaoq gaq yaoq-ao nee mail thaqeeq nail ngaol. Thailhai ngaol-aoq, aivq nail jaolkhaoq jaollaoq khi mail ilkhaol khe juq neq, aivq bhai maq thaqeeq-ail” dai, ge bhiq-a nail ngaol.

58 Aqyu juq Yeiqsul bhai neema maq thaqtsaol nail ngel-i mail, a bhai neq, bhaqaoq eeq nail phaq micil taivq-ail nl bhiq-a nail ngaol.