1 A bhai nee ngal-aq, Yeiqsul aivq nail laovq al laovq bhai gaoq jeeq khi, aivq jaol nail meenq bhai kovq ceiv ail-a nail ngaol. 2 Aq-u phao, iqjial bhai iqthaiq nail khil sil lavq sil sil nail teevq gaq bhai, yu aivq jaol nail bha bal lavq-a nail ngaol. Aqyu juq a dai dai-ail neema thaqtsaol nail bhai Yeiqsul ya moel-u phao, khil sil lavq sil sil nail al gaq bhai, “Yaqyov-ol, neema ivqdao dai, aol yaoq. Naoq nail oeqbal phaiq gaq-ao nail ngaol” dai, ge bhiq-a nail ngaol.

3 Yeiqsul alhai ge nail bhai, aoldaoq kovqdaoq cavq nail cov nail teevq pav ganav juq neq, “Tsaol-aq thoil gaq Miqyail bhai khal ge movq-ail ge nail niil” dai, yovqgavq nail neema lavqkhoel bhai saol-nvq thailthaiq nail ngaol.

4 Aqyu juq alhai saol-nvq thailthaiq nail bhai Yeiqsul heeq nia khi, niailhai ge bhiq-a nail ngaol: “Khul khi mail nuljuq nail neema lavqkhoel bhai maq meeq nail phaq noeq thailthaiq nail-aiq. 5 Daoq khul daoq ge bhiq nail ngaq-aiq jaiq nail-aiq. ‘Naoq nail oeqbal phaiq gaq-ao nail ngaol’ dai, ge bhiq nail, ngaq-aiq jaiq nail laiq. Maq ngel haq neq, ‘Thul khi tsaol-aivq yaoq’ dai, ge bhiq nail, ngaq-aiq jaiq nail laiq.” 6 Aq-u phao, “Tsaol-aq nail Yaqyov neq, miltsaq niil nail kovtavq bhai oeqbal phaiq nail bhaqaoq jiav nail ganl, ngal nuljuq bhai bhi heeq bhiq moel nail haqbhoil nl naol” dai, ge khi, khil sil lavq sil sil nail al gaq bhai: “Thul yaoq. Naoq nail iqjial bavq khi, ilkhaol bha kovq ail yaoq” dai, ge bhiq-a nail ngaol. 7 Aq-u phao, tsaol-aq al gaq tsaoq thul khi ilkhaol bha kovq ail-a nail ngaol. 8 Tsaol-aq munl munl ma al juq ganl al bhai ya moel-u phao, geesil lal bhiq khi, tsaol-aq yaq bhai eeq nail bhaqaoq bivq-a nail Miqyail bhai tsiqeeq-a nail ngaol.

9 Yeiqsul a bhai nee iqmoeq phao gaoq ail-u phao, khaon tavq nail ilkhaol bhai jaoldeel-nvq thaq nail Maqthaiq dai mil-ai thaq nail gaq bhai ya moel-a nail ngaol. “Ngaq nail haoqnao tsaothel lavq yaoq” dai, Yeiqsul aivq bhai ge bhiq-u phao, aivq tsaoq thul khi, Yeiqsul nail haoqnao tsaothel-aivq-a nail ngaol.

10 A bhai nee ngal-aq, Yeiqsul Maqthaiq nail ilkhaol lavqkhoel bhai aoq jaoq jaoq khi jaq thailthaiq-u phao, khaon tavq nail tsaol-aq juq khi mail, oeqbal yaq maodai lal khi, Yeiqsul khi mail aivq nail yaqlaol juq nee mail aoq jaoq jaoq khi aoq jaq-a nail ngaol. 11 Phaqliqsail juq al bhai ya moel-u phao, “Khul khi mail naoq nail saqlaq neq, khaon tavq nail tsaol-aq juq khi mail, oeqbal yaq juq nee mail jaol khi jaq tavq daol tavq nail-aiq” dai, Yeiqsul nail yaqlaol juq bhai naldaiq bhiq-a nail ngaol.

12 Yeiqsul daoq al daoq ya gaiq-u phao, aqyu juq bhai ge kovq bhiq-a nail: “Jaol hal dov nail tsaol-aq juq neq, jagaq coev nail saqlaq maq loq-ail. Nal nail tsaol-aq taivq-ail loq nail ngaol. 13 ‘Laol nail sail nail phaq bhai ngal oil movq nail maq ngel. Gaoq haq gaiq-a nail phaq bhai ngal oil movq nail ngaol’ dai, Miqyail-i mail ge-ai thaq nail daoq al daoq nail daoqceevq bhai nuljuq aqmeeq-ai saol duq ail yaoq. Khul khi mail dai ngal-aq neq, tsaq nail daol nail tsaol-aq bhai khul nail dai khi, ngal lee-a nail maq ngel. Oeqbal yaq bhai khul nail dai khi, ngal lee-a nail ngaol” dai, ge bhiq-a nail ngaol.

14 Aq-u phao, Yaolhaq nail yaqlaol juq Yeiqsul jaol nail bha lal khi, “Nvjuq khi mail Phaqliqsail juq neq, maq jaq nail aol nl khi ngaol-aoq, naoq nail yaqlaol juq neq, khul khi mail maq lav sav nail-aiq” dai, naldaiq bhiq-a nail ngaol.

15 Yeiqsul aqyu juq bhai ge kovq bhiq-a nail: “Khaqma hevq nail gaq* 9.15 Khaqma hevq nail gaq Yeiqsul bhai ge nail ngaol. aivq nail aqtsaoq juq nee mail jaol-u phao, aqyu juq noeqhaq nail ngaol laiq. Khaqma hevq nail gaq bhai aqyu juq nee mail hevq pal-aivq nail aqn kev lee nail ngaol. Aq-u phao, aqyu juq maq jaq nail aol nl nail ngaol.

16 Tsaol-aq teevq gaq iqsanl, aqgaq aqdoi aqkhail bhai haqphal aqsivq-i mail phaltsaol maq dovq-ail. Dovq haq neq, dovq thaq nail phaltsaol al tsaol, aqgaq aqdoi aqkhail bhai bhi pav-ail nail ngaol. Pav-ail nail al neq, iqmoeq-u nee maqtsil pav jaiq-ail nail ngaol. 17 Alhai dul dai, tsaol-aq teevq gaq iqsanl haqkov eelpheeq aqlil bhai aqheeq tsilju nail ullul aqsivq† 9.17 Maodai daol haq neq, bov lal nail ullul teevq phaq pevq nail ngaol. maq hoel bhoel daiq haq-al. Hoel bhoel haq neq, haqkov eelpheeq pav-ail nail ngel-i mail, aqheeq tsilju nail ullul khal-ail khi, haqkov eelpheeq iqsanl cov-ail nail ngaol. Aqheeq tsilju nail ullul aqsivq, haqkov eelpheeq aqsivq bhai hoel bhoel haq neq, nvq phaq nvq phaq-ail maq cov-ail nia-ail” dai, ge bhiq-a nail ngaol.

18 Yeiqsul aqyu juq bhai ganl al juq ge bhiq thailthaiq-u phao, uqhuq thaoq nail ilkhaol bhai heldaiq nail aqivq teevq gaq aivq jaol nail bha lal khi, aivq bhai uqhuq thaoq khi, “Niil aq-il bhai ngaq nail yaqmiq sil-aoq nail ngaol. Naol ngaq nail yaqmiq bhai aqlavq bavq dav lee lavq haq neq, aivq gaoq doevq kovq lal nail ngaol” dai, ge bhiq-a nail ngaol. 19 Yeiqsul thul khi, aivq nail yaqlaol juq nee mail tsaol-aq al gaq nail haoqnao tsaothel-aivq-a nail ngaol.

20 Aq-u phao, tsel-nvq kovq bhee dai, aqsivq dov dov-ail nal thailthaiq nail yaqmai-aq teevq gaq, Yeiqsul nail haoqnaol phao ail khi, aivq nail phailkhaoq phail daoq bhai thoiqtsi ail-a nail ngaol. 21 Khul khi mail dai ngal-aq neq, “Ngal aivq nail phailkhaoq phaildaoq bhai taivq-ail ya thoiqtsi khi ngaol-aoq, ngaq nail nalgoel niil meeq lai naol” dai, aivq bhai aivq ge nail ngaol. 22 Yeiqsul haoqnaol naolkovq kovq daiq-u phao, aivq bhai moel khi, “Yaqmiq-ol, neema ivqdao dai, aol yaoq. Naol ngaq bhai neema thaqtsaol nail ngel-i mail, meeq lai-aoq nail ngaol” dai, ge bhiq-a nail ngaol. Aq-u nee mail aivq meeq lai-a nail ngaol.

23 A bhai nee ngal-aq, Yeiqsul uqhuq thaoq nail ilkhaol bhai heldaiq nail aqivq gaq nail ilkhaol bhai ail kev-u phao, bhaoqlao jiiv nail tsaol-aq khi mail, tsaol-aq maodai suqsaq thailthaiq nail bhai ya moel-a nail ngaol. 24 Aq-u phao, Yeiqsul aqyu juq bhai ge bhiq-a nail: “Dov ail yaoq. Yaqmiq niil gaq sil-a nail maq ngel-ail. Iqthaiq kov-ai thaq nail niil” dai, ge bhiq-u phao, aqyu juq Yeiqsul bhai helsil nail ngaol. 25 Thailhai ngaol-aoq, tsaol-aq al juq bhai bhi dov ail gil khi, Yeiqsul aol lai-a nail ngaol. Aivq yaqmiq al gaq nail aqlavq bhai nieivq thaiq-u phao, yaqmiq al gaq thul lal-a nail ngaol. 26 Ganl al milkhaoq khaoq lao gaiq doi ail-a nail ngaol.

27 Yeiqsul jaol duq al dao nee iqmoeq phao gaoq ail-u phao, maivpeivq nvq gaq aivq nail haoqnao tsaothe tsaothe-ail, “Daqbhil nail Yaqyov-ol. Nv-nvq gaq bhai gaoqhaq gaiq-a lavq yaoq” dai, mailma-ail gul nail ngaol.

28 Yeiqsul ilkhaol lavqkhoel bhai aol lai-u phao, maivpeivq al nvq gaq Yeiqsul jaol nail bha lal-a nail ngaol. “Nul-nq nvq gaq bhai ngal lav meeq bhiq nia nail ngaol dai, nul-nq nvq gaq neema thaqtsaol naol laiq” dai, Yeiqsul aqyu nvq gaq bhai naldaiq-u phao, “Neema thaqtsaol naol, Heeqphaq-ol” dai, ge kovq bhiq-a nail ngaol.

29 Aq-u phao, Yeiqsul aqyu nvq gaq nail maivneev bhai thoiqtsi khi, “Nul-nq nvq gaq neema thaqtsaol nail khe-ai, nul-nq nvq gaq nail haqbhoil pevq lal dei-eiq” dai, ge bhiq-a nail ngaol. 30 A bhai nee ngal-aq, aqyu nvq gaq maivneev moel nia lal-a nail ngaol. “Ganl niil teevq gaq bhai iqsanl maq bhi heeq nia dai yaolphaol yaoq” dai, Yeiqsul aqyu nvq gaq bhai daoq bhiq-a nail ngaol. 31 Thailhai ngaol-aoq, aqyu nvq gaq dov ail khi, aqyu nvq gaq bhaqda nee, Yeiqsul nail ganl, milkhaoq khaoq lao gaiq doi ail-a nail ngaol.

32 Maivneev moel nia lal-a nail al nvq gaq dov ail teevq thaiq, neivq aol nail yaqjaoq teevq gaq bhai, yu Yeiqsul jaol nail bha hel lavq-a nail ngaol. 33 A bhai nee ngal-aq, Yeiqsul neivq al maol bhai the dov bhiq gaq-u phao, yaqjaoq al gaq teevq pov taivq-ail daoq ge nia lal-a nail ngaol. Aq-u phao, tsaol-aq munl munl ma al juq noeq-u maq dov dai, pevq-ail khi, “Ilsaqleiqlal nail tsaol-aq nail lavqkhoel niailhai nl nia nail phaq teevq thal-iq maq moel daiq haq-al” dai, ge nail ngaol.

34 Thailhai ngaol-aoq, “Yeiqsul neq, neivq heeqphaq nail bhaqaoq bhai juq juq-ail, neivq bhai the dov nail niil” dai, Phaqliqsail juq ge nail ngaol.

35 Aq-u phao, meenq doi julgu doi dai, Yeiqsul ail khi, uqhuq thaoq nail ilkhaol juq bhai daoq cavq daoq cov cov ail-a nail ngaol. Nqtavq Milkhaoq nail ganl lavqkhiq tsail nail geeqlaoq daoq cavq khi, nal nail goel nail yaoq phaq yaoq-ao nee bhai lav meeq bhiq-a nail ngaol. 36 Aivq tsaol-aq munl munl ma juq bhai ya moel-u phao, aqyu juq bhai gaoqhaq nail ngaol. Khul khi mail dai ngal-aq, aqyu juq neq, heldaiq phail nail gaq maq jaol nail yaol khe-ai, khaoqlaol nail lavqkhoel nee gaq bhaq deedee nail ngaol. 37 Aq-u phao, Yeiqsul aivq nail yaqlaol juq bhai ge bhiq-a nail: “Gov gaiq mao lal thaq nail maodai jiav khi ngaol-aoq, gaiq nail tsaol-aq micil teevq-eel ngaol. 38 Alheel ngel-i mail, ‘Naoq nail gov govyal bhai gov gaiq nail tsaol-aq maodai bhi lee yaoq’ dai, gov nail ilheel gaq bhai geeqlaoq hal yaoq” dai, ge bhiq-a nail ngaol.