1 Yeiqsul aqyu juq bhai ge bhiq-a nail: “Nuljuq nail neema bhai haqaoq thaq nl. Miqyail bhai neema thaqtsaol yaoq, ngaq bhai iqsanl neema thaqtsaol yaoq. 2 Ngaq nail Aqbhu nail ilkhaol bhai jaol duq jiav gao nail ngaol. Ngal nuljuq nail haqbhoil jaol duq lav sav lai naol. Jaol duq maq jiav-ail nul neq, maq jiav-ail dai, ngal daolcoev dai, ge bhiq nail ngaol. 3 Ngal jaol duq lav sav gaq-u phao, nuljuq bhai gaoq hevq lee khi, ngaq-ai nee mail bhi jaol lal naol. 4 Ngal lai nail dai, lainq-ai thaq nail jaol duq al dao nail gailkhaol bhai, nuljuq heeq nia nail ngaol” dai, ge bhiq-a nail ngaol.

5 Tholmav ge nail: “Heeqphaq-ol, naol khaq bha lai nail-aiq dai, nvjuq maq heeq kivq-ail. Naol lai nail jaol duq al dao nail gailkhaol bhai, nvjuq khalhai khi ya heeq kivq nail-aiq” dai, naldaiq bhiq-a nail ngaol.

6 Yeiqsul aivq bhai ge bhiq-a nail: “Ngal neq, gailkhaol pevq naol. Maldil tsaq nail phaq pevq khi aqdoevq doevq nail phaq iqsanl, pevq nail ngaol. Ngaq bhai maq juq haq neq, tsaol-aq teevq gaq iqsanl, Aqbhu Miqyail jaol nail bha maq kev lai nia-ail. 7 Ngal khaq sil gaq dai, nuljuq heeq nia-ail nul neq, ngaq nail Aqbhu khaq sil gaq dai iqsanl, nuljuq heeq nia nail ngaol. Yanqgaol nee pultavq neq, nuljuq aivq bhai aqmeeq-ai ya heeq ya moel-aoq nail ngaol” dai, ge bhiq-a nail ngaol.

8 Pillilpuv ge nail: “Heeqphaq-ol, nvjuq bhai Aqbhu Miqyail bhi moel lavq yaoq. Aivq bhai ya moel haq neq, nvjuq neekhaol sil naol” dai, ge bhiq-a nail ngaol.

9 Yeiqsul ge nail: “Ngal nuljuq nee mail niidai jaol kel lavq khi ngaol-aoq, Pillilpuv, naol ngaq bhai maq heeq kivq-ai haq-al laiq. Ngaq bhai khal ya moel-a nail tsaol-aq, Aqbhu Miqyail bhai ya moel-a nail khe-ai dul nail ngaol. ‘Nvjuq bhai Aqbhu Miqyail bhi moel lavq yaoq’ dai, khul khi mail ge nail-aiq. 10 Aqbhu Miqyail nail lavqkhoel bhai ngal jaol khi, ngaq nail lavqkhoel bhai Aqbhu Miqyail jaol naol dai, Pillilpuv, naol neema maq thaqtsaol-ail laiq. Ngal nuljuq bhai ge bhiq nail daoq niil juq neq, ngaq nail neenoeq nee ge nail maq ngel-ail. Ngaq nail lavqkhoel bhai jaol nail Aqbhu Miqyail ganl nl nail phaq pevq nail ngaol. 11 Ngal Aqbhu Miqyail nail lavqkhoel bhai jaol khi, Aqbhu Miqyail ngaq nail lavqkhoel bhai jaol nail bhai, neema thaqtsaol yaoq. Maq ngel haq neq, ngaq-i mail nl-a nail juq bhaqda nee, ngaq bhai neema thaqtsaol yaoq. 12 Ngal nuljuq bhai maldil dai, ge lavq bhel. Ngaq bhai neema thaqtsaol nail tsaol-aq, ngaq-i mail nl-a nail ganl al juq nl nail ngaol. Ngal ngaq nail Aqbhu jaol nail bha kovq lai nail ngel-i mail, niidai nee maqtsil eeq nail juq iqsanl, aivq nl nail ngaol. 13 Aqbhu Miqyail neq, Yaqyov bhaqda nee seiqleiq khaoqsail ya dai, nuljuq ngaq nail aqmil bhai juq khi, khal hal nail iqsanl mail, ngal bhi pevq lal naol. 14 Nuljuq ngaq nail aqmil bhai juq khi teevq phaq ganav hal haq neq, nuljuq-i mail hal nail khe-ai, ngal bhi pevq lal naol” dai, ge bhiq-a nail ngaol.

15 Yeiqsul gaoq ge nail: “Nuljuq ngaq bhai gaiq-a haq neq, ngaq-i mail bivq-a nail daoq juq bhai, naldaiq nail ngaol. 16 Ngal Aqbhu Miqyail bhai hal nail khi ngaol, ngal hal nail khe-ai, khaq mao iqsanl, nuljuq nee mail bhi jaol nail dai khi, nuljuq bhai Tsaojao-ai nail gaq, Aqbhu Miqyail nuljuq bhai bivq lavq naol. 17 Aivq neq, Miqyail nail ganl maldil tsaq nail phaq phaodaiq bhiq nail gaq pevq nail, Aqhaqlal Miqyail ngaol. Miltsaq yaq juq aivq bhai neema lavqkhoel bhai maq hav bhoel nia-ail. Khul khi mail dai ngal-aq neq, aqyu juq aivq bhai maq heeq nia, maq moel daiq-al. Thailhai ngaol-aoq, nuljuq aivq bhai heeq nia nail ngaol. Khul khi mail dai ngaol-aoq neq, aivq nuljuq nee mail jaol khi, nuljuq nail neema lavqkhoel bhai aol nail ngaol. 18 Ngal nuljuq bhai aqbhu aqma maq bhao nail yaqtsiq khe-ai khaonq-ail ceevq nail maq ngel-ail. Ngal nuljuq jaol nail bha gaoq kovq lee naol. 19 Teevq yanq lal yanq nail lavqkhoel, Miltsaq yaq ngaq bhai maq ya moel yaoq-aol. Thailhai ngaol-aoq, nuljuq ngaq bhai ya moel nail ngaol. Ngal doevq nail bhaqda nee, nuljuq iqsanl ya doevq nail ngaol. 20 Aqn al n kev lee-u phao, ngal Aqbhu Miqyail nail lavqkhoel bhai jaol nail bhai maqkhaiq, ngal nuljuq nail lavqkhoel bhai jaol nail khe-ai, nuljuq iqsanl ngaq nail lavqkhoel bhai jaol nail bhai, nuljuq ya heeq kivq duq nail ngaol. 21 Ngaq-i mail bivq-ai thaq nail daoq bhai ya gaiq khi, naldaiq nail tsaol-aq, ngaq bhai gaiq-a nail tsaol-aq ngaol. Ngaq bhai khal gaiq-a nail tsaol-aq bhai, ngaq nail Aqbhu gaiq-a nail ngaol. Ngal iqsanl, aqyu juq bhai gaiq-a khi, ngaq nail aqmaol aqyu juq bhai bhaqlaoq kheq dai, bhi moel nail ngaol” dai, ge bhiq-a nail ngaol.

22 Yuldav Ilsaqgaqliqoq maq ngel nail, Yuldav dai mil-ai thaq nail gaq ge nail: “Heeqphaq-ol, naoq nail aqmaol nvjuq bhai ya bhi moel nail bhai, khul khi mail, miltsaq yaq juq bhai maq bhi moel kivq nail-aiq” dai, naldaiq-a nail ngaol.

23 Yeiqsul ge nail: “Ngaq bhai gaiq-a nail tsaol-aq, ngaq-i mail cavq bhiq cov bhiq nail daoq bhai naldaiq nail ngaol. Alhai naldaiq nail tsaol-aq bhai, ngaq nail Aqbhu gaiq-a khi, ngaq nail Aqbhu nv-nvq gaq aqyu juq nail neema lavqkhoel bhai jaol lee nail ngaol. 24 Ngaq bhai maq gaiq-a nail tsaol-aq, ngaq nail daoq bhai maq naldaiq-ail. Nuljuq-i mail ya gaiq thailthaiq nail daoq niil juq neq, ngaq nail daoq maq ngel-ail. Ngaq bhai khoel-ai leevq-a nail Aqbhu Miqyail nail daoq ngaol.

25 Niil aq-il ngal nuljuq nee mail jaol-u phao, daoq niil juq nuljuq bhai ge bhiq-ai thaq nail ngaol. 26 Nuljuq bhai tsaojao-ai nail gaq dai khul nail Aqhaqlal Miqyail neq, ngaq nail aqmil kov-uvq nee Aqbhu Miqyail bhi lee naol. Aqhaqlal Miqyail al gaq neq, nuljuq bhai yaoq phaq yaoq-ao nee cavq lavq cov lavq khi, ngaq-i mail ge-ail ceevq-a nail daoq niil juq bhai, nuljuq noeqmoel lal dai, tsaojao-ai lavq nail ngaol. 27 Ngal nuljuq bhai neesal-ovq nail phaq bivq-ail ceevq nail ngaol. Ngaq-i mail bivq nail neesal-ovq nail phaq neq, miltsaq yaq juq neesal-ovq nail phaq bivq nail khe-ai, maq dul-ail. Nuljuq neema haqaoq thaq nl. Gee iqsanl, thaq geesil.

28 Ngal nuljuq bhai teevq yanq khaonq-ail ceevq khi ngaol-aoq, teevq pov gaoq lee naol dai, nuljuq bhai ge bhiq gaq-ao nail ngaol. Nuljuq ngaq bhai gaiq-a haq neq, ngal Aqbhu Miqyail jaol nail bha kovq lai-u phao, nuljuq lavqkhiq tsail nail ngaol. Khul khi mail dai ngal-aq neq, aivq neq, ngaq-ai nee maqtsil eeq jaiq heel jaiq nail ngaol. 29 Ganl al juq pevq lal-u phao, nuljuq neema thaqtsaol dai, niil aq-il maq pevq lal-u phao nee mail, ngal nuljuq bhai ge bhiq nail ngaol. 30 Ngal nuljuq nee mail daoq ge tsaoq ge tsaoq-ail jaol nail aqyanq maq jiav yaoq-aol. Khul khi mail dai ngal-aq neq, miltsaq bhai uvthaiq nail gaq lee thailthaiq nail ngaol. Aivq neq, ngaq bhai gaq lal nia nail bhaqaoq maq jiav-ail. 31 Thailhai ngaol-aoq, ngal Aqbhu Miqyail bhai gaiq-a nail, niidai miltsaq yaq ya heeq ya moel dai, Aqbhu Miqyail ngaq bhai daoq bivq lavq-a nail khe-ai, ngal nl naol. Thul yaoq. Ail bhel” dai, ge bhiq-a nail ngaol.