Yaqkov
Gevq-a nail gaq
Haoqgavq niil keiv iqmoeq ilmoeq bhai, “Ngal neq, Miqyail khi mail Yeiqsul Khali nail yaqkav Yaqkov ngaol” dai, gevq-ai thaq nail ngaol. Yaqkov niil gaq neq, gaqkhoel 12 gaq nail lavqkhoel bhai aol nail Yaqkov al gaq maq ngel-ai. Khul khi mail dai ngal-aq, Yaqkov al gaq neq, bhi tsil heivq-a nail ngaol. Yaqkov niil gaq neq, Yeiqsul nail yaqkav dai gevq-ai thaq khi ngaol-aoq, maldil ge haq neq, Yeiqsul nail jaqbheq ngaol. Heeqphaq Yeiqsul miltsaq kovtavq bhai tsao-u phao, Yeiqsul neq, Hevqkovq nail gaq pevq nail Meiqsilya ngaol dai, Yaqkov neema maq thaqtsaol-ail. Thailhai ngaol-aoq, Yeiqsul sil khi gaoq doevq kovq lal khi aivq nail aqmaol bhi moel khi taivq-ail, neema thaqtsaol lal-a nail ngaol.
Yaqkov neq, Yeiqlulsaqlaiq meenq bhai yaqlaol teevq yal nvq tsel gaq jil lai-a nail bhai aol nail teevq gaq ngaol. Khali yaq munl bhai heldaiq phail nail aqivq teevq gaq pevq khi, yu ev nail teevq gaq pevq nail ngaol. Gaqkhoel Paolluv Yaqkov bhai neema ivqdao dai aol nail aqivq jiovq nail gaq dai, khul nail ngaol. Yaqkov neq, A.D. 60-65 kovq nail gaiqlaq bhai bhi deeq heivq-a nail ngaol.
Gevq-a nail aqyanq khi mail aqduq
Haoqgavq niil keiv neq, Jalliq aqsivq nail lavqkhoel bhai iqmoeq ilmoeq gevq-a nail haoqgavq ngaol. Gevq-a nail aqyanq neq, A.D. 49-60 kovq nail gaiqlaq bhai ngaol. Gevq-a nail aqduq neq, Yeiqlulsaqlaiq meenq bhai ngaol. Khaq mao gevq-a nail dai, aqduq aqtsil tsil dai maq ge kivq khi ngaol-aoq, Yuldav tsaol-aq maq ngel haq neq, yu nail jeq-e jaq-a Khali yaq jiovq nail maq mao lal-u nee mail gevq thaq nail jao-aq dai, moel lal nail ngaol. Khul khi mail dai ngal-aq, Yaqkov nail haoqgavq lavqkhoel bhai bavkov uqjaq oev nail ganl maq gevq bhoel-ai thaq-al.
Khaq sil gaq bhai gevq bhiq-a nail
Haoqgavq niil keiv neq, pav ail sav ail-a nail jeq-e tsel nvq jeq-e bhai gevq bhoel-ai leevq-a nail ngaol dai, gevq-ai thaq nail ngaol. Khali yaq pevq lal-a nail Yuldav tsaol-aq Saqteiqphaq lovmav-i mail bhi liv heivq al nee ngal-aq, teevq gaq teevq phao tsaoq pav tsaoq sav gil-a nail ngaol. Alheel ngel-i mail, Yaqkov aqyu juq bhai gaq bivq khi, cavq bhiq cov bhiq nail haqbhoil gevq-a nail ngaol.
Khul bhai noeqthunq khi gevq-a nail
Haoqgavq niil keiv neq, Miqyail nail yaq haq nail aoq nail phaq ya daq-u phao, neema maq cov-ail ivqdao dai, neema thaqtsaol khi daq tsaol dai, gaq bivq-a nail haoqgavq ngaol. Al ovqtavq, neema thaqtsaol nail khe-ai nl nail juq taivq-ail maldil neema thaqtsaol nail ngaol dai, ge kivq khi, neema thaqtsaol naol dai ge khi ngaol-aoq, maq nl tsao nail tsaol-aq neq, neema thaqtsaol nail phaq aqsil ngaol dai, ge noeq nail haqbhoil gevq-a nail ngaol.
1
Iqmoeq ilmoeq khe daoq
1 Ngal neq, Miqyail khi Heeqphaq Yeiqsul Khali nail yaqkav Yaqkov ngaol. Gaoq ail gail ail-a nail Miqyail nail tsaol-aq tsel-nvq jeq-e bhai haoqgavq niil gevq bhoel-ai leevq-a nail ngaol. Nuljuq iqsanl bhai daoq tsaoq phuq naol.
Miqyail bhai neenoeq neekha hal nail ganl
2 Ngaq nail aqivq jaqbheq juq-ol, haq nail aoq nail phaq khi laonqdaiq nail maodai phaq nuljuq nail kovtavq bhai kev lee-u phao, lavqkhiq tsail yaoq. 3 Khul khi mail dai ngal-aq, nuljuq nail neema thaqtsaol nail phaq bhai laonqdaiq nail phaq ya daq-u phao, gaq lai haq neq, ol nia jaiq lal nail ngaol dai, nuljuq heeq nia nail ngaol. 4 Nuljuq khul teevq phaq iqsanl ge duq maq jiav nail nee ovqtavq, khul teevq phaq iqsanl maq ya theq-ail mail, yaoq phaq yaoq-ao nee bhee dai, oltsaol nail neema bhi maoq jaiq lal khi bhi bhee lal yaoq. 5 Nuljuq nail lavqkhoel bhai teevq gaq ganav neenoeq neekha theq nail ngel haq neq, Miqyail bhai hal yaoq. Khul khi mail dai ngal-aq, Miqyail neq, tsaol-aq yaq iqsanl bhai, laoqniul maq niul dai, neema kev khi bivq nail ngaol. 6 Thailhai ngaol-aoq, nuljuq geeqlaoq hal-u phao, neema thaqtsaol khi hal yaoq. Neema pov pov lav lav dai, thaq jiav. Neema pov pov lav lav dai aol nail tsaol-aq neq, lilmoel khal bhoe nail phao ail nail, iqyaq iqma eelkhaol thaoq nail khe-ai, dul nail ngaol. 7 Alheel nail tsaol-aq bhai neq, “Miqyail ngaq bhai teevq phaq ganav bivq lavq nail ngaol” dai, thaq noeq. 8 Khul khi mail dai ngal-aq aivq neq, neenoeq nvq phaq noeq khi, nl nail hal nail yaoq phaq yaoq-ao nee nail lavqkhoel saljial maq ivq nail tsaol-aq ngaol.
9 Aqivq jaqbheq Khali yaq teevq gaq ganav, yu nail lavqovq theq khi ngaol-aoq, Miqyail nail sivtavq bhai neq, seiqleiq khaoqsail jiav nail ngel-i mail, lavqkhiq tsail heeq phaq-ail tsaq nail ngaol. 10 Aqivq jaqbheq Khali ya teevq gaq ganav, hulmeeq meeq khi ngaol-aoq, Miqyail nail sivtavq bhai neq, yu nail lavqovq theq nail tsaol-aq khe-ai dul nail ngel-i mail, lavqkhiq tsail heeq phaq-ail tsaq nail ngaol. Khul khi mail dai ngal-aq, miltsaq kovtavq khe hulmeeq meeq nail tsaol-aq juq neq, moeqgaq nail aqeiv khe-ai peivq-ail gil nail ngaol. 11 Nlma dov lal khi nltsal kav lal laol lal-u phao, moeqgaq neq, khuq-ail kov-ail nail ngaol. Aqeiv iqsanl ga-ail khi, heldaiq meeq nail phaq iqsanl peivq-ail gil nail ngaol. Alhai dul dai, hulmeeq meeq nail tsaol-aq juq iqsanl, yovqgavq nail ganl nl nl-ail jaol-u phao, luq-ail seil-ail gil nail ngaol. * 1.11 Moeqgaq aqeiv nail ganl, Ilsaqyal 40.6-7 bhai heldaiq yaoq.
Laonqdaiq nail phaq khi mail jalmul mul nail phaq
12 Haq nail aoq nail phaq khi laonqdaiq nail phaq bhai ya daq-u phao, oltsaol nail tsaol-aq neq, geeqlaoq eeq nail ngaol. Khul khi mail dai ngal-aq, laonqdaiq nail phaq bhai ya daq-u phao, gaq lai nail tsaol-aq neq, aqdoevq bhi doevq nail heel uqtsaoq kovpavq ya nail ngaol. Kovpavq al neq, “Ngaq bhai gaiq-a nail tsaol-aq bhai ngal bivq naol” dai, Miqyail-i mail saljial jaq-ai thaq nail heel uqtsaoq al tsaoq ngaol.
13 Tsaol-aq khul gaq maqkhaiq, jalmul mul nail phaq bhai ya daq-u phao, “Miqyail ngaq bhai jalmul mul nail niil” dai, teevq gaq iqsanl thaq ge. Khul khi mail dai ngal-aq, haqeiv nail phaq Miqyail bhai jalmul maq mul nia-ail. Alhai dul dai, Miqyail tsaol-aq teevq gaq bhai iqsanl, jalmul maq mul-ail. 14 Thailhai ngaol-aoq, tsaol-aq khul gaq maqkhaiq, yovqgavq nail lavqkhoel bhai aol nail maivjeel jeel nail neema al oeqbal nl yaoq dai, aivq bhai jalmul mul khi, hel-aivq bhiq nail ngaol. 15 A bhai nee ngal-aq, aivq nail lavqkhoel khe aol nail maivjeel jeel nail neema al, yaqbeiv uvq nail khe-ai uvq lai khi, oeqbal bhi doevq lee nail ngaol. Oeqbal iqsanl eeq lal khi, sil nail phaq bhi doevq lee nail ngaol.
16 Ngal mailma-ail gaiq-a nail aqivq jaqbheq juq-ol, thaq noeq bheeq dei-eiq. 17 Geeqlaoq aqmeeq iqsanl khi mail, bhee deedee nail kovpavq iqsanl mail, nqtavq kovtavq bhai jaol nail, aqbhaq nail Aqbhu nee mail dov lee nail ngaol. Aivq neq, teevq thal iqsanl maq pov maq phal lal-ail. Aivq nail aqbhaq lavqkhoel bhai bhi phaq lal nail aqhaiq maq aol-ail. 18 Khal teivq-ai thaq nail yaoq phaq yaoq-ao nee nail lavqkhoel ngadao neq, iqmoeq ilmoeq heeq lee-a nail aqheeq† 1.18 Iqmoeq ilmoeq heeq lee-a nail aqheeq dai ge nail neq, Miqyail bhai av bhiq-a nail tsaol-aq bhai ge nail ngaol. khe-ai pevq lal dai, Miqyail neema tsaq nail ngel-i mail, maldil tsaq nail daoq bhai juq khi, ngadao bhai bhi doevq lavq-a nail ngaol.
Miqyail nail daoq bhai naldaiq khi nl tsao nail ganl
19 Ngal mailma-ail gaiq-a nail aqivq jaqbheq juq-ol, nuljuq ganl niil juq bhai heeq kivq heeq phaq-ail tsaq nail ngaol. Yu daoq ge nail bhai aqmeeq-ai naldaiq yaoq. Daoq lavqtsail mail thaq ge. Neema lavqtsail mail thaq phail. 20 Khul khi mail dai ngal-aq, tsaol-aq yaq-i mail neema phail nail phaq neq, Miqyail nail tsaq nail daol nail phaq maq bhi dov lal nia-ail. 21 Alheel ngel-i mail, aqcavq phaq iqsanl khi mail, maq meeq maq jaq nail phaq iqsanl mail khaonq ha gil yaoq. Neenuq neebeiv aol nail lavqkhoel, nuljuq nail neema lavqkhoel bhai kha-ai thaq nail Miqyail nail daoq bhai hav bhoel yaoq. Daoq al neq, nuljuq bhai hevqkovq nia nail ngaol.
22 Nuljuq neq, Miqyail nail daoq bhai hav bhoel khi nl tsao nail tsaol-aq pevq yaoq. Naqkhaol bhai taivq-ail gaiq nail tsaol-aq thaq pevq. Naqkhaol taivq-ail gaiq nail tsaol-aq pevq haq neq, yovqgavq bhai yovqgavq goiqbhaoq bhaoq nail tsaol-aq ngaol. 23 Miqyail nail daoq bhai ya gaiq-a nail khe-ai, maq nl maq hal tsao nail tsaol-aq juq neq, phaoqdaiq bhai yovqgavq nail maivphaoq yovqgavq heldaiq nail tsaol-aq khe-ai dul nail ngaol. 24 Aivq phaoqdaiq bhai heldaiq khi ngaol-aoq, dov ail haq neq, aivq nail maivphaoq khal heel dai, teevq pov taivq-ail nioilpeivq-ail nail ngaol. 25 Thailhai ngaol-aoq, tsaol-aq yaq bhai bhi jel-ail nail bhee deedee nail aoldaoq kovqdaoq bhai khaq mao iqsanl heldaiq khi, khal ya gaiq-a nail phaq bhai maq nioilpeivq dai, aqmeeq-ai tsaothe khi nl tsao hal tsao nail tsaol-aq neq, aivq-i mail khal nl khal hal nail phaq bhai Miqyail geeqlaoq bivq nail ngaol.
26 “Ngal uqhuq thaoq nail aolsaolkovq aqmeeq-ai thaoq thailthaiq naol” dai, tsaol-aq teevq gaq ganav noeq khi ngaol-aoq, aivq nail moeqthaoq bhai aivq maq gaq lai haq neq, yovqgavq bhai yovqgavq goiqbhaoq bhaoq nail tsaol-aq khe-ai dul nail ngaol. Aivq-i mail uqhuq thaoq nail al neq, khul nail ganl maq tsoiq-ail. 27 Aqbhu Miqyail nail sivtavq bhai aqcavq phaq maq aol dai, haoltaiv deel uqhuq thaoq nail aolsaolkovq neq, niailhai ngaol. Aqbhu aqma maq jaol nail juq bhai khi mail miqtsiq miqma juq haq nail aoq nail juq bhai tsaojao-ai bhiq khi, miltsaq khe aqsivq haqjoil nail neekhaol-i mail maq bhi lav cov dai, yovqgavq bhai yovqgavq yaolphaol khi doevq nia nail juq pevq nail ngaol.