Gaqlaqtil
Gevq-a nail gaq
Haoqgavq niil keiv iqmoeq ilmoeq bhai Gaqkhoel Paolluv aivq-i mail gevq-a nail ngaol dai, gevq-ai thaq nail ngaol. Milnee uqnee khe Khali yaq juq iqsanl, Paolluv-i mail gevq-a nail ngaol dai, noeq nail ngaol.
Gevq-a nail aqyanq khi mail aqduq
Gevq-a nail aqyanq neq, A.D. 48-49 kovq nail gaiqlaq bhai ngaol. Paolluv milkhaoq doi dai lavqkhiq tsail nail geeqlaoq daoq cavq ail-a nail iqmoeq ilmoeq dov-ail khi kovq lal-al nee ngal-aq, Sulliv milkhaoq bhai jiav nail Aqdil-aoq meenq bhai jaol khi gevq-a nail ngaol. Thailhai ngaol-aoq, teevq pav ganav juq neq, A.D. 51-53 kovq nail gaiqlaq bhai gevq-a nail ngaol dai, noeq nail ngaol. Gevq-a nail aqduq neq, Aqdil-aoq meenq maq ngel haq neq, Gaolliqthu meenq bhai dai, noeq nail ngaol.
Khaq sil gaq bhai gevq bhiq-a nail
Haoqgavq niil keiv neq, Gaqlaqtil milkhaoq bhai jaol nail Khali yaq munl bhai gevq bhiq-a nail ngaol. Gaqlaqtil milkhaoq bhai jaol nail tsaol-aq juq neq, Yuldav tsaol-aq maq ngel-ail. Paolluv milkhaoq doi dai lavqkhiq tsail nail geeqlaoq daoq iqmoeq ilmoeq cavq ail-u khe pov, Gaqlaqtil milkhaoq bhai jaol nail tsaol-aq juq, maodai Khali yaq pevq lal-a nail ngaol. Thailhai ngaol-aoq, Paolluv a bhai nee dov ail jel-u phao, Khali yaq pevq khi ngaol-aoq, Yuldav nail aol thaoq nail juq, Khali yaq pevq nail yu nail jeq-e jaq-a juq bhai, Yuldav nail aoldaoq kovqdaoq khal jiav nail khe-ai iqsanl ya nl nail ngaol dai, cavq lee-a nail ngaol. Alheel ngel-i mail, al juq nail haoqnao tsaothel-aivq-a nail juq jaol nail ngaol.
Khul bhai noeqthunq khi gevq-a nail
Haoqgavq niil keiv neq, Khali yaq juq hevqkovq nail phaq ya nail neq, aoldaoq kovqdaoq khal jiav nail khe-ai nl tsao nail ngel-i mail, maq ngel-ail. Miqyail nail geeqlaoq eeljaol khi neema thaqtsaol nail phaq bhaqda nee taivq-ail, tsaq nail daol nail tsaol-aq pevq lal khi hevqkovq nail phaq ya nail ngaol dai, cavq bhiq cov bhiq nail haoqgavq ngaol. Al ovqtavq, Khali yaq pevq lal gaq haq neq, aoldaoq kovqdaoq nail yaqkav maq ngel yaoq-aol. Alheel ngel-i mail, cavq bheeq nail juq nail haoqnao maq ya tsaothe dai, yaolphaol yaoq dai, cavq bhiq cov bhiq nail haqbhoil gevq-a nail haoqgavq ngaol.
1
Iqmoeq ilmoeq khe daoq
1 Gaqkhoel bhi jiovq nail haqbhoil tsaol-aq yaq-i mail khul-a nail maq ngel-ail, tsaol-aq yaq-i mail gaqkhoel kha lavq-a nail iqsanl maq ngel dai, Yeiqsul Khali khi aivq bhai bhi doevq kovq lal-a nail Aqbhu Miqyail-i mail khul-a nail gaq pevq nail, ngal Paolluv ngaol. 2 Ngaq-ai nee mail jaol nail aqivq jaqbheq iqsanl nee mail, Gaqlaqtil milkhaoq bhai jaol nail Khali yaq munl juq bhai haoqgavq gevq bhoel-ai lavq-a nail ngaol.
3 Ngadao nail Aqbhu Miqyail khi Heeqphaq Yeiqsul Khali nail geeqlaoq eeljaol khi neesal-ovq nail phaq, nuljuq nail kovtavq bhai jiav dei-eiq. 4 Yeiqsul Khali al gaq, ngadao nail Aqbhu Miqyail neema tsaq nail khe-ai, mao-ail haqeiv nail niil yeel nail lavqkhoel, ngadao bhai bhi jel-ail nail haqbhoil, ngadao nail oeqbal tsiqhaol nail khi, aivq nail aqmaol laol bhiq-a nail ngaol. 5 Miqyail bhai nqmaq maqluv halyeel tsiqeeq bhel. Aqmiq.
Lavqkhiq tsail nail geeqlaoq daoq neq, teevq phaq taivq-ail tsaq nail ngaol
6 Khali nail geeqlaoq eeljaol lavqkhoel, nuljuq bhai khul-a nail gaq bhai nuljuq lavqtsail mail khaonq khi, lavqkhiq tsail nail geeqlaoq daoq yaoq phaq yaoq-ao bhai, lavqtsail mail hav bhoel nail ngel-i mail, ngaq bhai noeq-u maq dov-ail pevq-il. 7 Maldil dai, ge haq neq, lavqkhiq tsail nail geeqlaoq daoq yaoq phaq yaoq maq jiav-ail. Thailhai ngaol-aoq, nuljuq bhai lav suqsaq khi Khali nail lavqkhiq tsail nail geeqlaoq daoq bhai oil phal movq nail tsaol-aq teevq juq jaol nail ngel-i mail, ngal niailhai ge nail ngaol. 8 Nvjuq maqkhaiq, nqtavq gaqkhoel maqkhaiq, nvjuq-i mail nuljuq bhai cavq bhiq-a nail lavqkhiq tsail nail geeqlaoq daoq niilniai nee bheeq-n nail, lavqkhiq tsail nail geeqlaoq daoq yaoq phaq yaoq cavq haq neq, khal cavq nail gaq nail kovtavq bhai iqkhail yavq nail phaq kev lee dei-eiq. 9 Iqmoeq-u phao nvjuq-i mail ge jel-a nail daoq bhai niil aq-il ngal teevq pov gaoq ge pov nail ngaol. Tsaol-aq teevq gaq ganav, nuljuq-i mail hav bhoel jel-ai thaq nail lavqkhiq tsail nail geeqlaoq daoq bhai maq dul lai nail lavqkhiq tsail nail geeqlaoq daoq yaoq phaq yaoq cavq lal haq neq, aivq nail kovtavq bhai iqkhail yavq nail phaq kev lee dei-eiq.
10 Tsaol-aq yaq neema tsaq dai, nl nail maq ngel. Miqyail neema tsaq nail phaq bhai ngal nl movq nail ngaol. Tsaol-aq yaq neekhaol sil nail phaq bhai ngal laijai khi nl nail ngel-ail laiq. Alhai gaoq nl haq neq, ngal Khali nail yaqkav maq ngel yaoq-aol.
Paolluv khalhai khi gaqkhoel pevq lal-a nail ganl
11 Aqivq jaqbheq juq-ol, ngaq-i mail cavq nail lavqkhiq tsail nail geeqlaoq daoq niil neq, tsaol-aq yaq jaol nail nee dov lee-a nail maq ngel-ail dai, nuljuq bhai bhi heeq kivq movq-ail nial. 12 Tsaol-aq yaq-i mail cavq lavq cov lavq-a nail iqsanl maq ngel-ail. Yeiqsul Khali-i mail ngaq bhai phaodaiq lavq-a nail ngaol.
13 Ngal Yuldav nail tsaol-aq nail aolsaolkovq thaoq-u phao, ngal aqdoevq khalhai doevq-a nail ganl, nuljuq ya gaiq daiq-a nail ngaol. Aq-u phao, ngal Miqyail nail Khali yaq munl bhai mailma-ail khoeq khi, lav luq lav seil nail dai khi, laijai-a nail ngaol. 14 Ngal ngaq nail aqphiq aqbhal-i mail thaoq khal leevq-a nail aolsaolkovq bhai, neema kev deedee nail ngel-i mail, ngaq nail jeq-e jaq-a nail lavqkhoel bhai, ngaq-ai khe-ai aqkovq jiav nail tsaol-aq nee maqtsil maodai, Yuldav nail tsaol-aq nail aolsaolkovq thaoq-a nail ngaol. 15-16 Thailhai ngaol-aoq, ngal maq doevq lee-u nee mail, ngaq bhai tsel dov khi, aivq nail geeqlaoq eeljaol nee mail ngaq bhai khul lavq-a nail Miqyail neq, aivq nail Yaqyov nail ganl lavqkhiq tsail nail geeqlaoq daoq niil yu nail jeq-e jaq-a bhai cavq bhiq ail dai, aivq neema tsaq nail khe-ai, aivq nail Yaqyov ngaq bhai bhi moel lavq-a nail ngaol. Bhi moel lavq gaq-al ngal-aq neq, ngal tsaol-aq yaq bhai maoqbhaoq nl-a nail maq ngel. 17 Ngal gaqkhoel maq pevq lal-u nee mail, gaqkhoel pevq thailthaiq nail, Yeiqlulsaqlaiq meenq bha jaol nail juq jaol nail bha ngal maq lai-al. Teevq pov taivq-ail Aqlal milkhaoq bhai ail-a nail ngaol. A bhai nee ngal-aq, Daqmaqsail meenq bhai kovq lai-a nail ngaol.
18 Hail kovq bhee lal-u phao, Geiqphal jaol nail bha nalga lai nail dai khi, Yeiqlulsaqlaiq meenq bha dav lai-a nail ngaol. Aivq nee mail tsel ngaq n jaol-a nail ngaol. 19 Yeiqsul nail jaqbheq Yaqkov maq ngel nail neq, ngal gaqkhoel teevq gaq bhai iqsanl maq moel-al. 20 Ngal nuljuq bhai niailhai gevq bhiq-a nail neq, goiqbhaoq bhaoq nail maq ngel-ail dai, Miqyail nail sivtavq bhai ngal ge nail ngaol. 21 A bhai nee ngal-aq, ngal Sulliv milkhaoq khi Gillilciv milkhaoq bhai ail-a nail ngaol. 22 Aq-u phao, Yuldav milkhaoq bhai jaol nail Khali yaq munl juq, ngaq bhai maq heeq nia-ail haq-al. 23 “Jel lal-u phao, ngadao bhai khoeq lavq-a nail al gaq, aq-u phao aivq-i mail lav luq lav seil-ail daiq-a nail, neema thaqtsaol nail geeqlaoq daoq al daoq, niil aq-il cavq bhiq thailthaiq nail ngaol” dai, ge nail bhai taivq-ail aqyu juq ya gaiq-a nail ngaol. 24 Ngal bhaqda nee aqyu juq Miqyail bhai tsiqeeq nail ngaol.