1 Aq-u phao jil lal-a nail juq aqtsi tsu dai pevq ail-u phao, Paolluv yaqlaol juq bhai khul jil khi, gaq bivq nail lavqkhoel nee geeqlaoq eeq daoq ge-ail ceevq khi, Maqgeiqdaolnil milkhaoq bha ail-a nail ngaol. 2 Aivq Maqgeiqdaolnil milkhaoq bhai ail pav-u phao, yaqlaol juq bhai gaq bivq-ail ceevq khi, Heiqlaqsal milkhaoq bha ail kev-a nail ngaol. 3 A bhai bhala hail heeq bhee dai aivq jaol-a nail ngaol. Sulliv milkhaoq bha kovq lai nail dai lainq thailthaiq-u phao, Yuldav nail tsaol-aq juq aivq bhai heivq nail dai khi, naoq jaoq nail ganl heeq nia khi, Maqgeiqdaolnil milkhaoq phao nee kovq lai nail dai, noeqceiv-a nail ngaol. 4 Aq-u phao, Bheiqlil meenq bhai jaol nail Bhulluv nail yaqyov Solbhaqdaqlul, Theilsaqlolni meenq bhai jaol nail Aqliqdaqgul khi Seiqguldul, Deiqbheiq meenq bhai jaol nail Gaqyul, Aqsil-aq milkhaoq bhai jaol nail Duljil khi Daqlolbheiq aqyu juq khi Tilmolseiq iqsanl, Paolluv nee mail ail-a nail ngaol. 5 Tsaol-aq al juq iqmoeq-u nee dov ail khi, nvjuq bhai Daqlol meenq bhai daonq nail ngaol. 6 Deqtsiq maq goe nail khaqmul jaq nail bhaoqaiq lav sav gaq khi pultavq, Pillilpiv meenq nee mail nvjuq laovq jeeq khi dov ail-a nail ngaol. Ngaq n bhee lal-u phao, Daqlol meenq bhai aqyu juq jaol nail bha kev ail khi, a bhai sivq n gaoq jaol-a nail ngaol.

7 Teevq jao nail lavqkhoel iqmoeq-u n-gaol, nvjuq jaq tavq daol tavq nail dai khi, jil lai-a nail ngaol. Niaohao neq dov ail naol dai, Paolluv noeq nail ngel-i mail, aivq aqyu juq bhai hul-iq tsil lai-u kev dai, cavq bhiq cov bhiq-a nail ngaol. 8 Nvjuq-i mail jil lai-a nail pultavq khe teiv-nvq bha, phalmanq maodai tovq bhaq-ai thaq nail ngaol. 9 Uldulkuv dai mil-ai thaq nail yaqyov-aq yaqnoil teevq gaq lolgov gov yaq bhai jaoldeel-nvq thaq nail ngaol. Paolluv cavq bhiq cov bhiq nail al maodai ma lai-a nail ngel-i mail, aivq iqthaiq kol laivq khi, ilkhaol al il nail hail teiv-nvq teevq teiv-nvq nee gaq kha ail-a nail ngaol. Aqyu juq aivq bhai tsiq ail-u phao, sil ceiv-aoq thaq nail ngaol. 10 Thailhai ngaol-aoq, Paolluv yavq kha ail khi, yaqyov-aq yaqnoil al gaq bhai tsiq khi, “Thaq noeq haq. Aivq doevq-ai haq nail ngaol” dai, ge bhiq-a nail ngaol. 11 A bhai nee ngal-aq, pultavq teiv-nvq bha aivq gaoq dav lai khi, khaqmul ngaoqpav khi jaq-a nail ngaol. Nqbhaq bhaq lal-u kev dai, aqyu juq nee mail aivq daoq ge tsaoq pheeljaq-a nail ngaol. A bhai nee ngal-aq, meenq al meenq nee aivq dov ail-a nail ngaol. 12 Aqyu juq yaqyov-aq yaqnoil al gaq bhai aqdoevq ya hevq kol-aivq-a nail ngel-i mail, gaq gaoq aol jaiq lal bhiq khi lavqkhiq tsail deedee nail ngaol.

13 Paolluv-i mail nvjuq bhai ge lavq-a nail khe-ai, nvjuq laovq jeeq khi Aqcovq meenq bha ail thailthaiq-a nail ngaol. Aivq gaq neq, a bhai kev dai gailkhaol tsao khi Aqcovq meenq bhai moel naol dai, lainq-ai thaq nail ngaol. 14 Aqcovq meenq bhai thaoqphuq-u phao, teevq gaq khe-ai laovq jeeq khi Meiqdulleiq meenq bha ail-a nail ngaol. 15 Nvjuq a bhai nee dov ail khi, niaohao n-gaol Tsil-ol eeljaol laol-n bhai ail kev-a nail ngaol. Halpha n-gaol Saqmol eeljaol laol-n bhai ail kev-a nail ngaol. Phaiqhal n-gaol Meiqleiqdul meenq bhai ail kev-a nail ngaol. 16 Aqsil-aq milkhaoq bhai aqyanq maq bhi gil nail haqbhoil, nii naq nii naq-ail maq jaol dai, Eilpheilsu meenq meenq jail nee laovq jeeq khi ail naol dai, Paolluv noeqceiv-ai thaq nail ngaol. Khul khi mail dai ngal-aq neq, Bheiqdeiqgoldeiq bhaoqaiq lav sav-u n-gaol, Yeiqlulsaqlaiq meenq bha ya jaol dai, aivq lavqtsail mail ail movq-ai bhiq nail ngaol.

17 Paolluv Meiqleiqdul meenq bhai jaol-u phao, Eilpheilsu Khali yaq munl nail aqivq aqtsu juq aivq bhai thaoqphuq lee nia dai, bhi khul lai-a nail ngaol. 18 Aqyu juq lal kev-u phao, Paolluv niailhai ge bhiq-a nail ngaol: “Aqsil-aq milkhaoq bha lal kev-u teevq n nee, nuljuq nee mail ngal khalhai doevq khalhai jaol-ail ceevq-a nail bhai, nuljuq heeq nia nail ngaol. 19 Yuldav nail tsaol-aq juq ngaq bhai nieivq nail dai, naoq jaoq nail ngel-i mail, haq deedee nail aqyanq al yanq bhai neema thaqtheq khi maivbhil dov nail lavqkhoel nee Miqyail nail ganl nl-ail ceevq-a nail ngaol. 20 Milkhaoq yaq nail sivtavq bhai maqkhaiq, ilkhaol jilkhaol nail lavqkhoel bhai maqkhaiq, nuljuq bhai ngal cavq bhiq cov bhiq-u phao, nuljuq nail haqbhoil ganl tsoiq nail phaq, teevq phaq iqsanl maq oil tsail dai, cavq bhiq cov bhiq-a nail bhai, nuljuq heeq nia nail ngaol. 21 Yovqgavq nail oeqbal noeq pov khi Miqyail jaol nail phao kovq lal nail lavqkhoel nee, ngadao nail Heeqphaq Yeiqsul bhai neema ya thaqtsaol nail ngaol dai, Yuldav nail tsaol-aq bhai maqkhaiq, Heiqlaqsal tsaol-aq bhai maqkhaiq, teevq gaq khe-ai ngal salkhil khanq-a nail ngaol.

22 Niil aq-il, ngal Meeqnail Haolnail Aqhaqlal-i mail hel-aivq lavq nail lavqkhoel nee Yeiqlulsaqlaiq meenq bha ail thailthaiq nail ngaol. A bhai, ngaq nail kovtavq bhai khalheel phaq kev lee nail dai, ngal maq heeq kivq-ail. 23 Meenq yaoq meenq yaoq-ao nee nail lavqkhoel bhai, thaonq bhai bhi nieivq bhoel nail phaq khi, ya haq ya aoq deedee nail phaq ngaq bhai lovq thailthaiq nail ngaol dai, Meeqnail Haolnail Aqhaqlal-i mail ngaq bhai ge lavq-a nail al maq ngel nail neq, yaoq phaq yaoq neq ngal maq heeq kivq-ail. 24 Ngal ya tsao nail gailkhaol niil dao loi loi lai-u kev dai, ngal tsao khi, Heeqphaq Yeiqsul-i mail ngaq bhai bhiq nl lavq-a nail khe-ai, Miqyail nail geeqlaoq eeljaol lavqkhiq tsail nail geeqlaoq daoq nail ganl, ya cavq ya cov gaq haq neq, ngaq nail aqmaol niil aqphoiq bhao nail ngaol dai, ngal maq saol-nvq-ail.

25 Nuljuq jaol nail bha ngal tsao doi khi, Miqyail Milkhaoq nail ganl cavq bhiq-ail ceevq-a nail ngaol. Yaqhao neq, nuljuq teevq gaq iqsanl ngaq nail maivphaoq bhai maq ya moel yaoq-aol dai, ngal heeq kivq nail ngaol. 26 Alheel ngel-i mail, nuljuq teevq gaq ganav doevq nail phaq sunq-ail haq neq, ngal bhaqda nee maq ngel-ail dai, yanqgaol ngal salkhil khanq nail ngaol. 27 Khul khi mail dai ngal-aq, Miqyail nail neema tsaq nail phaq iqsanl mail, nuljuq bhai ngal maq oil tsail dai, ge daiq bhiq gil-aoq nail ngaol. 28 Alheel ngel-i mail, nuljuq nail aqmaol aqmeeq-ai yaolphaol khi doevq nail nee ovqtavq, Meeqnail Haolnail Aqhaqlal-i mail nuljuq bhai av lavq khi bhi heldaiq phail lavq-a nail yaol mavqmav bhai aqmeeq-ai heldaiq khi lav sav yaoq. Miqyail aivq nail aqsivq-i mail ul kovq-ai thaq nail, aivq nail Khali yaq munl bhai, yaol bhai lovq nail khe-ai lovq yaoq. 29 Ngal dov ail jel haq neq, mao-ail haqeiv nail kheeqsiv juq lee khi, yaol mavqmav bhai maq gaoqhaq mail lav luq lav seil lee nail ngaol dai, ngal heeq kivq naol. 30 Al ovqtavq, nuljuq nail lavqkhoel khe tsaol-aq teevq pav ganav juq dov lal khi, yaqlaol juq bhai jalmul mul nail lavqkhoel nee aqyu juq nail haoqnao tsaothel lavq dai, tsaq nail daoq bhai lavqphal-a nail ngaol. 31 Alheel ngel-i mail, hail kovq bhee dai, nuljuq yaoq gaq yaoq-ao nee bhai ngal nqkiv n-gaol maqkhaiq, maivbhil dov nail lavqkhoel nee cavq bhiq cov bhiq-a nail bhai maq nioilpeivq dai, yaolphaol yaolphaol-ail doevq yaoq.

32 Niil aq-il, Miqyail nail aqlavq lavqkhoel khi aivq nail geeqlaoq eeljaol nail daoq nail lavqkhoel-ai nuljuq bhai ngal av bhiq-ail ceevq nail ngaol. Daoq al daoq neq, nuljuq bhai bhi eeq bhi heel lal nia khi, meeq nail haol nail tsaol-aq juq nee mail nuljuq jaiqbhoil jiav nail ngaol. 33 Yu nail phul heel bhai maqkhaiq, aqgaq aqdoi bhai maqkhaiq, maivjeel jeel nail neema, ngal maq aol-al. 34 Ngal khi ngaq nail aqtsaoq juq khal loq nail phaq ya kivq dai, ngaq nail aqlavq niil-i mail, ganl nl khi phul heel halpov-a nail bhai, nuljuq heeq nia nail ngaol. 35 ‘Ya nail nee maqtsil bivq nail neq, geeqlaoq eeq jaiq nail ngaol’ dai, Heeqphaq Yeiqsul-i mail ge-a nail daoq al daoq bhai, noeq kev nail lavqkhoel nee, ganl alhai nl khi gaq bhaq nail juq bhai ya tsaojao-ai nail ngaol dai, yaoq phaq yaoq-ao nee mail ngal nuljuq bhai nl daiq hal daiq bhiq-a nail ngaol” dai, ge bhiq-a nail ngaol.

36 Paolluv alhai ge gaq-u phao, aqyu juq nee mail peevqceevq kovdoiq doiq khi geeqlaoq hal-a nail ngaol. 37 Aqyu juq nioil nioil-ail khi, Paolluv bhai phalthaiq khi moeqsaol saol bhiq-a nail ngaol. 38 Aqyu juq aivq bhai maq ya moel yaoq-aol dai, Paolluv-i mail ge bhiq-a nail daoq al daoq bhaqda nee, aqyu juq noeqhaq deedee nail ngaol. A bhai nee ngal-aq, aqyu juq Paolluv bhai laovq naq duq bhai kev dai, hevq ha-ail bhiq-a nail ngaol.