1 Teevq n neq, geeqlaoq hal nail yanq pevq nail kivq hail lail ma phao, naqli hail lavq bhai, Bheiqtuvluv khi mail Yaolhaq aqyu nvq gaq uqhuq thaoq nail ilkhaol il ma bhai lai-a nail ngaol. 2 Aq-u phao, a bhai doevq lee-u nee mail aqkhil khil khoi khoi nail teevq gaq jaol nail ngaol. Uqhuq thaoq nail ilkhaol il ma bhai aol lai nail juq bhai bhi hal jaq nail dai khi, yaoq n yaoq n nee yu aivq bhai bal lavq bhiq nail ngaol. Uqhuq thaoq nail ilkhaol il ma bhai jiav nail, mao-ail heldaiq meeq nail govkhoiq dai khul nail aqjail bhai, aivq bhai bhi jaol-a nail ngaol. 3 Aivq Bheiqtuvluv khi mail Yaolhaq uqhuq thaoq nail ilkhaol il ma bhai aol lai nail bhai ya moel-u phao, aqyu nvq gaq bhai hal-a nail ngaol. 4 Aq-u phao, Bheiqtuvluv khi mail Yaolhaq aivq bhai heldaiq khi, “Nv-nvq gaq bhai heldaiq yaoq” dai, Bheiqtuvluv aivq bhai ge bhiq-a nail ngaol. 5 Aqyu nvq gaq ngaq bhai teevq phaq ganav bivq lavq nail jaol-aq dai, noeq khi, aivq aqyu nvq gaq bhai aqmeeq-ai heldaiq-a nail ngaol.

6 Aq-u phao, Bheiqtuvluv ge nail: “Ngal phul heel maq aol. Thailhai ngaol-aoq, ngal aol nail phaq naoq bhai bivq naol. Naqsaqlail meenq yaq Yeiqsul Khali nail aqmil kov-uvq nee thul khi, gailkhaol tsaol-aivq yaoq” dai, ge bhiq-a nail ngaol. 7 A bhai nee ngal-aq, Bheiqtuvluv tsaol-aq al gaq nail lavqmal lavq nee mail he thul bhiq-a nail ngaol. Aq-u phao, teevq pov taivq-ail aivq nail aqkhil pavq-uvq khi mail cilmeiv phuqlul gaq aol lal-a nail ngaol. 8 Aivq tsaoq thul lal khi, gailkhaol tsaol-aivq-a nail ngaol. A bhai nee ngal-aq, aivq tsaoq tsaoq-ail tsao khi, Miqyail bhai tsiqeeq nail lavqkhoel, aqyu nvq gaq nee mail, uqhuq thaoq nail ilkhaol il ma bhai aol lai-a nail ngaol. 9 Aivq gailkhaol tsao tsao-ail Miqyail bhai tsiqeeq nail bhai, a bhai jaol nail tsaol-aq juq ya moel-a nail ngaol. 10 Aivq neq, mao-ail heldaiq meeq nail govkhoiq bhai jaoldeel khi hal jaq hal daol nail al gaq pevq nail bhai, aqyu juq heldaiq heeq-u phao, aivq alhai pevq lal-a nail bhai noeq-u maq dov dai, pevq ail-a nail ngaol.

11 Tsaol-aq al gaq, Bheiqtuvluv khi mail Yaolhaq bhai nieivq thaiq-ai thaq-u phao, tsaol-aq iqsanl mail noeq-u maq dov dai pevq-ail khi, aqyu nvq gaq jaol nail, Saollavmoq nail gaqnaq yavqtsoel tsoel ma dai khul nail dao bhai tsaol-aivq-a nail ngaol. 12 Aqyu juq tsaol lavq nail bhai Bheiqtuvluv ya moel-u phao, tsaol-aq al juq bhai ge bhiq-a nail: “Ilsaqleiqlal nail tsaol-aq juq-ol, nuljuq khul khi mail ganl niil ganl bhai noeq-u maq dov dai pevq nail-aiq. Nv-nvq gaq neq, nv-nvq gaq nail bhaqaoq khi mail nv-nvq gaq meeq nail haol nail bhaqda nee, tsaol-aq niil gaq bhai gailkhaol bhi tsao nia lal-a nail dai, nuljuq noeq khi, nv-nvq gaq bhai taivq-ail heldaiq nail laiq. 13 Aqbhaqlaqhaq, Ilcav, Yaqkov, aqyu juq nail Miqyail pevq khi, ngadao nail aqphiq aqbhal nail Miqyail neq, aivq nail Yaqkav Yeiqsul bhai seiqleiq khaoqsail bivq-a nail ngaol. Thailhai ngaol-aoq, nuljuq aivq bhai yu nail aqlavq lavqkhoel bhai av bhiq khi, heeqphaq Phillav aivq bhai phaiq naol dai, noeqceiv-ai thaq khi ngaol-aoq, Phillav nail sivtavq bhai, nuljuq aivq bhai khaonq ha-a nail ngaol. 14 Nuljuq neq, meeq nail haol nail, tsaq nail daol nail gaq bhai khaonq ha khi, yu bhai heivq-a nail gaq bhai hal dov-a nail ngaol. 15 Nuljuq neq, aqdoevq bhi doevq lavq-a nail aqheel gaq bhai heivq-a nail ngaol. Thailhai ngaol-aoq, Miqyail aivq bhai gaoq bhi doevq kovq lal-a nail ngaol. Nv-nvq gaq neq, al nail ganl salkhil khanq nail ngaol. 16 Nuljuq-i mail ya heeq ya moel-a nail tsaol-aq niil gaq, gaq aol lal-a nail neq, aivq Yeiqsul nail aqmil bhai neema thaqtsaol-a nail ngel-i mail, aqmil al aivq bhai, gaq bhi aol lal-a nail ngaol. Yeiqsul bhaqda nee aivq neema thaqtsaol lal khi, nuljuq-i mail ya moel-a nail khe-ai, neema thaqtsaol nail al bhaqda nee, aivq meeq lai-a nail ngaol.

17 Aqivq jaqbheq juq-ol, nuljuq nail aqivq aqtsu juq maq heeq nia nail ngel-i mail nl-a nail khe-ai, nuljuq iqsanl maq heeq nia nail ngel-i mail, alhai nl-a nail ngaol dai, ngal heeq kivq naol. 18 ‘Khali neq, haq nail aoq nail phaq bhai ya daq khi ya sil naol’ dai, Miqyail aivq nail haqbhoil gedan nail juq bhai juq khi, iqmoeq-u nee ge-ai thaq nail khe-ai, Miqyail nl bhee-a nail ngaol. 19 Alheel ngel-i mail, Miqyail nuljuq nail oeqbal tsiqhaol lavq nia dai, oeqbal noeq pov khi, aivq jaol nail bhai kovq lal yaoq. 20 Alhai nl haq neq, Miqyail nuljuq bhai neesal bhi ya khi, gaq teevq bhee bivq lavq nail ngaol. Al ovqtavq, nuljuq nail haqbhoil tsel dov-ai thaq nail Yeiqsul dai mil-ai thaq nail Khali, aivq khoel-ai leevq nail ngaol. 21 Miqyail neq, aq-u nee mail aivq nail haqbhoil gedan nail meeq nail haol nail juq bhai juq khi ge-ai thaq nail khe-ai, yaoq phaq yaoq-ao nee mail aqsivq lav phal nail yanq maq kev lal-u kev dai, Yeiqsul neq, nqtavq kovtavq bhai ya jaol nail ngaol. 22 Molseiq-i mail ge-ai thaq nail: ‘Nuljuq nail Heeqphaq Miqyail ngaq bhai khoel-ai leevq-a nail khe-ai, nuljuq nail jeq-e jaq-a nail lavqkhoel, aivq nail haqbhoil gedan nail teevq gaq, nuljuq nail haqbhoil khoel-ai leevq naol. Al gaq, khal ge nail daoq nuljuq ya naldaiq naol. 23 Miqyail nail haqbhoil gedan nail al gaq nail daoq maq naldaiq nail tsaol-aq khul gaq maqkhaiq, aivq nail jeq-e jaq-a lavqkhoel nee ya the ha naol’ dai, aivq ge-ai thaq nail ngaol.

24 Saqmeqlal nail yeel nee mail haoqnao khal dov lee-a nail Miqyail nail haqbhoil gedan nail tsaol-aq iqsanl mail, yanq niil nail ganl ge-ai thaq nail ngaol. 25 Nuljuq neq, Miqyail nail haqbhoil gedan nail juq nail aqjievq lilheel ngaol. ‘Naoq nail aqjievq lilheel bhaqda nee jeq-e jaq-a iqsanl mail, geeqlaoq ya naol’ dai, Miqyail Aqbhaqlaqhaq bhai ge bhiq-ai thaq nail ngaol. Nuljuq nail aqphiq aqbhal bhai ge bhiq-ai thaq nail daoqma saljial al daoq nail lavqkhoel, nuljuq iqsanl aol nail ngaol. 26 Miqyail aivq nail Yaqkav* 3.26 Niil daoq khe Yaqkav neq, Meiqsilya bhai ge nail ngaol. Yeiqsul bhai khoel-ai leevq khi, nuljuq jaol nail bha iqmoeq bhi lee-a nail ngaol. Khul khi mail dai ngal-aq neq, nuljuq nail lavqkhoel, yaoq gaq yaoq-ao nee yovqgavq nail haqeiv nail phaq bhai khaonq ha dai, aivq nail Yaqkav bhai alhai khoel-ai leevq-a nail ngaol. Nuljuq haqeiv nail phaq khaonq ha haq neq, Miqyail nuljuq bhai geeqlaoq bivq lavq naol” dai, Bheiqtuvluv aqyu juq bhai ge bhiq-a nail ngaol.