Tiltuv
Gevq-a nail gaq
Haoqgavq niil keiv iqmoeq ilmoeq bhai Gaqkhoel Paolluv aivq-i mail gevq-a nail ngaol dai, gevq-ai thaq nail ngaol. Al ovqtavq, milnee uqnee khe Khali yaq juq jemao iqsanl, Paolluv-i mail gevq-a nail ngaol dai, noeq nail ngaol.
Gevq-a nail aqyanq khi mail aqduq
Gevq-a nail aqyanq neq, A.D. 63-65 kovq bhai ngaol. Paolluv iqmoeq-u phao thaonq nee dov lee khi pultavq gevq-a nail ngaol. Gevq-a nail aqduq neq, Gaolliqthu meenq bhai pevq nia nail ngaol.
Khaq sil gaq bhai gevq bhiq-a nail
Haoqgavq niil keiv neq, Tiltuv bhai gevq bhiq-a nail ngaol. Tiltuv dai ge nail daoqceevq neq, “Aqphoiq” dai, ge movq nail ngaol. Tiltuv neq, Heiqlaqsal tsaol-aq ngaol. Tilmolseiq khe-ai, Gaqkhoel Paolluv lavqkhiq tsail nail geeqlaoq daoq cavq nail bhai ya gaiq khi, Khali yaq pevq lal-a nail ngaol. A bhai nee ngal-aq, Paolluv nail ganl nl tsaoq teevq gaq pevq lal-a nail ngaol.
Paolluv Lolmav nail thaonq bhai iqmoeq ilmoeq khe pov aol khi dov lal-al nee ngal-aq, Tiltuv nee mail Gaqlaqdeiq eeljaollaol-n bhai ganl teevq yanq nl tavq-a nail ngaol. A bhai nee ngal-aq, maq nl gil thaq nail ganl bhi nl gil nail dai khi, Tiltuv bhai neq, a bhai bhi jaol-ail ceevq-a nail ngaol.
Khul bhai noeqthunq khi gevq-a nail
Paolluv Tiltuv bhai Gaqlaqdeiq eeljaollaol-n khe Khali yaq munl bhai khalhai ya heldaiq phail nail dai, gaq bivq nail nee ovqtavq, maq nl gil thaq nail ganl juq nl gil yaoq dai, gevq bhiq-a nail ngaol.
Al taivq-ail maq ngel nail, Khali yaq munl bhai heldaiq phail nail neq, Khali yaq bhai maq ngel nail phaq cavq lal nail juq nail haoqnao maq bhi tsaothel-aivq dai, Khali yaq neema thaqtsaol nail maldil tsaq nail phaq bhai ya cavq ya cov bhiq naol dai, gaq bivq nail haqbhoil gevq-a nail ngaol.
Al ovqtavq, Gaqlaqdeiq eeljaollaol-n bhai jaol nail tsaol-aq neq, saljial maq ivq, maq meeq maq haol nail phaq nl nail, aqdoil doil nail ngel-i mail, cavq bheeq nail juq nail haoqnao maq bhi tsaothel-aivq nail haqbhoil, neema thaqtsaol nail phaq gaq kav lal dai, aqyu juq bhai mailma-ail cavq bhiq cov bhiq yaoq dai iqsanl, Tiltuv bhai gevq bhiq-a nail ngaol.
1
Iqmoeq ilmoeq khe daoq
1 Ngal neq, Miqyail nail yaqkav khi mail Yeiqsul Khali nail gaqkhoel pevq nail Paolluv ngaol. Miqyail-i mail tsel dov-ai thaq nail tsaol-aq nail neema thaqtsaol nail phaq gaq bhi kav lal nail nee ovqtavq, Miqyail bhai ev nail phaq bhi dov lal nail maldil tsaq nail phaq bhai aqyu juq heeq nia lal dai, ngal Yeiqsul Khali nail gaqkhoel jiovq thailthaiq nail ngaol. 2 Ngal bivq naol dai, goiqbhaoq maq bhaoq nail Miqyail aq-u nee mail ge-ai thaq nail nqmaq maqluv halyeel doevq nail phaq bhai, aqyu juq noeqthunq noeqthunq-ail jaol nia lal dai iqsanl, ngal gaqkhoel jiovq thailthaiq nail ngaol. 3 Aqyanq tsaq lal-u phao, nqmaq maqluv halyeel doevq nail ganl al, Miqyail ngadao juq bhai phaodaiq lavq-a nail ngaol. “Ganl al cavq bhiq dei-eiq” dai, ngadao nail Hevqkovq nail gaq pevq nail Miqyail ngaq bhai daoq bivq lavq khi, av lavq-a nail ngaol.
4 Neema thaqtsaol nail phaq ngaq-ai nee teevq daoq bhai tavq nail ngaq nail yaqyov khe-ai dul nail Tiltuv bhai haoqgavq niil gevq bhoel-ai leevq-a nail ngaol. Aqbhu Miqyail khi mail ngadao nail Hevqkovq nail gaq pevq nail Yeiqsul Khali nail geeqlaoq eeljaol khi mail neesal-ovq nail phaq, naoq nail kovtavq bhai jiav dei-eiq.
Gaqlaqdeiq eeljaol laol-n bhai Tiltuv-i mail ganl nl-a nail
5 Ngal naoq bhai ge thaq-ail ceevq-a nail khe-ai, maq nl gil-a nail juq bhi nl gil nail dai khi ovqtavq, yaoq meenq yaoq-ao nee mail jaol nail Khali yaq munl bhai heldaiq phail nail aqivq aqtsu juq bhi tsel dov nail dai khi mail, ngal naoq bhai Gaqlaqdeiq eeljaollaol-n bhai bhi jaol-ail ceevq-a nail ngaol. 6 Khali yaq munl bhai heldaiq phail nail aqivq gaq neq, oeqbal thaq duq maq jiav nail tsaol-aq khi mail, khaqma teevq gaq taivq-ail bhao nail tsaol-aq ya pevq nail ngaol. Aqyu juq nail yaq juq iqsanl Yeiqsul bhai neema thaqtsaol nail tsaol-aq ya pevq nail ngaol. Yu ge duq maq jiav dai, aqdoevq doevq nail yaq juq pevq nail nee ovqtavq, daoq naldaiq nail yaq juq ya pevq nail ngaol. 7 Khali yaq munl bhai heldaiq phail nail gaq neq, Miqyail nail nlmaoq bhai heldaiq phail nail gaq pevq nail ngel-i mail, oeqbal thaq duq maq jiav nail tsaol-aq ya pevq nail ngaol. Yovqgavq nail neenoeq taivq-ail oil nail tsaol-aq, neema davqnil nil nail tsaol-aq, jilpheeq daol bov nail tsaol-aq, yu nee deeq pheel deeq lul jaq nail tsaol-aq, phul heel ildaoq maoqgaiq bhai maivjeel jeel nail tsaol-aq maq ya pevq-ail. 8 Daq-i bhai hav nia nail tsaol-aq, aqmeeq phaq bhai gaiq-a nail tsaol-aq, neema ivqdao dai, thaq nia nail tsaol-aq, tsaq nail daol nail tsaol-aq, meeq nail haol nail tsaol-aq, yovqgavq nail neema bhai gaq lai nia nail tsaol-aq ya pevq nail ngaol. 9 Aqyu juq-i mail ya saol-a nail khe-ai, saljial ivq nail daoq bhai ivqdao dai nieivq thaiq-ai thaq nail gaq ya pevq nail ngaol. Alhai nieivq thaiq-ai thaq haq neq, maldil tsaq nail phaq bhai cavq bhiq nia khi, yu bhai gaq bivq nia nail nee ovqtavq, daoq maq naldaiq nail tsaol-aq juq bhai, aqyu juq-i mail laiq ail-a nail dao bhai moel nia dai, cavq naq bhiq nia nail tsaol-aq ya pevq nail ngaol.
10 Khul khi mail dai ngal-aq, daoq maq naldaiq nail tsaol-aq maodai jaol nail ngaol. Aqyu juq neq, ganl maq tsoiq nail daoq ge nail nee ovqtavq, yu bhai goiqbhaoq bhaoq bhaoq-ail hevq bheeq nail ngaol. Alhai nl nail tsaol-aq juq neq, yu nee maqtsil, Yuldav tsaol-aq nail aolsaolkovq nee Khali yaq phao phal lal khi ngaol-aoq aol al juq bhai gaoq thaoq movq nail juq nail lavqkhoel bhai jaol nail ngaol. 11 Naol aqyu juq bhai heeq tsul dai, bhi jaol yaoq. Khul khi mail dai ngal-aq, aqyu juq haqsil nail phaq maq bhao dai, phul heel halpov khi maq tsaq nail phaq cavq bhiq cov bhiq nail bhaqda nee, ildaoq daoq lao lao-ail lav luq lav seil bhiq nail ngaol. 12 Aqyu juq-i mail ge nail Miqyail nail haqbhoil gedan nail dai, noeq nail tsaol-aq teevq gaq-i mail ge-ai thaq nail daoq niailhai jiav nail ngaol. “Gaqlaqdeiq eeljaol laol-n bhai jaol nail tsaol-aq neq, goiqbhaoq bhaoq nail tsaol-aq, haqeiv nail jaiqyaq khe-ai aqdoevq doevq nail tsaol-aq, khul teevq phaq iqsanl maq nl nul dai, al jaiq jaq bov daol bov nail tsaol-aq teevq-eel ngaol” dai, ge-ai thaq nail ngaol. 13 Alhai ge-ai thaq nail daoq al daoq neq, tsaq nail ngaol. Alheel ngel-i mail, aqyu juq nail neema thaqtsaol nail phaq ivq lal nia dai, aqkav kav dai khaq khaq-ail cavq bhiq cov bhiq yaoq. 14 Yuldav tsaol-aq nail ganqje juq bhai khi mail, maldil tsaq nail phaq bhai khaonq ha-ail ceevq-a nail tsaol-aq juq nail aoldaoq kovqdaoq bhai maq ya nl dai, cavq bhiq cov bhiq yaoq.
15 Neema lavqkhoel bhai haol nail tsaol-aq nail haqbhoil neq, iqsanl mail aqhaol ngaol. Thailhai ngaol-aoq, neema lavqkhoel bhai maq haol nail tsaol-aq khi mail neema maq thaqtsaol nail tsaol-aq nail haqbhoil neq, aqhaol teevq phaq iqsanl maq jiav-ail. Khul khi mail dai ngal-aq, aqyu juq nail neenoeq khi mail, heeq nia nail neema neq, iqsanl mail aqjiivq aqcavq ngaol. 16 “Nvjuq Miqyail bhai heeq kivq naol” dai, aqyu juq ge khi ngaol-aoq, aqyu juq-i mail nl nail hal nail bhai heldaiq haq neq, Miqyail bhai teevq peivq iqsanl heeq nia nail tsaol-aq khe-ai, maq dul lal-ail. Aqyu juq neq, bhe lal heeq phaq-ail tsaq nail tsaol-aq, daoq maq naldaiq nail tsaol-aq pevq khi, aqmeeq phaq nl nail teevq peivq-ail maq geel-nvq-ail.