1 A bhai nee ngal-aq, Yaolyaq neq, junq deeq-ai thaq nail al sivq laiq nail lavqkhoel khe teevq laiq bhai phao nail bhai, ngal ya moel-a nail ngaol. Aqdoevq phaq al liq maol nail lavqkhoel khe teevq maol nqjaiq jaiq nail aqthel khe-ai, “Lal yaoq” dai, mailma-ail khul nail bhai, ngal ya gaiq-a nail ngaol. 2 Ngal heldaiq gai-aivq-u phao, moeqphaq aqphul teevq maol bhai, ya moel-a nail ngaol. Moeqphaq al maol bhai jeeq-nq thaq nail gaq, heeqnav teevq khaoq bavq-nvq thaq nail ngaol. Aivq bhai heel uqtsaoq bhi tsaoq khi, aivq neq, gaq lai-a nail gaq bhi pevq-a nail khe-ai, neejiav jiav nail juq bhai gaq lai dai, dov ail-a nail ngaol.

3 Yaolyaq neq, junq deeq-ai thaq nail nvq laiq teevq laiq bhai phao-u phao, aqdoevq phaq nvq maol teevq maol, “Lal yaoq” dai, khul nail bhai, ngal ya gaiq-a nail ngaol. 4 Aq-u phao, moeqphaq aqnel teevq maol dov lee-a nail ngaol. Moeqphaq al maol bhai jeeq-nq thaq nail gaq, miltsaq kovtavq bhai tsaol-aq yaq nail gaiqlaq bhai, tsaq lai jil lai nail phaq bhai oil dov khi, aqyu juq teevq gaq nee teevq gaq bhi deeq heivq nia nail aqkhaoqanq bivq-a nail ngaol. Al ovqtavq, aivq bhai thaoma keiv ma teevq keiv bivq-a nail ngaol.

5 Yaolyaq junq deeq-ai thaq nail hail laiq teevq laiq bhai phao-u phao, aqdoevq phaq hail maol teevq maol, “Lal yaoq” dai, khul nail bhai ngal ya gaiq-a nail ngaol. Ngal heldaiq gai-aivq-u phao, moeqphaq aqnav teevq maol bhai ya moel-a nail ngaol. Moeqphaq al maol bhai jeeq-nq thaq nail gaq, jaluq teevq laiq oil-nq thaq nail ngaol. 6 Aqdoevq phaq al liq maol nail gaoltsi bhai, daoq ge nail khe-ai dul nail aqthel bhai ngal ya gaiq-a nail ngaol. Aqthel al neq, niailhai ge nail ngaol: “Moevq nail sivq nail phaq kev lee khi, gov teevq bhanq bhai teevq bavq ngaol. Laoqloil hail bhanq bhai teevq bavq ngaol. Aqtseel khi aqheeq tsilju nail ullul thaq bhi cov-ail” dai, ge nail gaol.

7 Yaolyaq neq, junq deeq-ai thaq nail liq laiq teevq laiq bhai phao-u phao, aqdoevq phaq liq maol teevq maol, “Lal yaoq” dai, khul nail bhai, ngal ya gaiq-a nail ngaol. 8 Ngal heldaiq gai-aivq-u phao, aqheel heel nav nav nail moeqphaq teevq maol bhai ya moel-a nail ngaol. Moeqphaq al maol bhai jeeq-nq thaq nail gaq bhai, sil nail heeqphaq dai khul nail ngaol. Sil nail milkhaoq nail heeqphaq aivq nail haoqnao tsaothe jaol nail ngaol. Aqyu nvq gaq bhai miltsaq niil liq bhoil teevq bhoil bhai uvthaiq nail aqkhaoqanq bivq-a nail ngaol. Thaoma, moevq nail sivq nail, nal nail goel nail khi, haqeiv nail jaiqyaq juq, niil juq bhai juq juq-ail yu bhai lav heivq dai iqsanl, aqyu nvq gaq aqkhaoqanq ya-a nail ngaol.

9 Yaolyaq neq, junq deeq-ai thaq nail ngaq laiq teevq laiq bhai phao-u phao, laol duq nail kov-uvq bhai aqhaqlal juq jaol nail bhai ngal ya moel-a nail ngaol. Aqhaqlal al juq neq, Miqyail nail daoq cavq-a nail bhaqda nee maqkhaiq, salkhil khanq-a nail bhaqda nee maqkhaiq, deeq heivq nail bhai ya daq-a nail tsaol-aq nail aqhaqlal ngaol. 10 Aqyu juq aqthel aqkav kav dai, gul nail: “Tsaq nail phaq aol khi meeq nail haol nail, bhaqaoq eeq nail Heeqphaq-ol, nvjuq nail aqsivq bhai bhi il dov gil lavq-a nail miltsaq kovtavq bhai jaol nail tsaol-aq bhai, yalkhaq dal khi khoeq bhiq jiovq bhiq nail, khaq mao kev dai, jiav-ai haq nail-aiq” dai, gul nail ngaol. 11 Aq-u phao, aqyu juq yaoq gaq yaoq-ao nee bhai phulleq deel phailkhaoq heelma teevq gaq bhai teevq keiv bivq-a nail ngaol. “Nuljuq khe-ai deeq heivq-a nail bhai ya daq-a nail, nuljuq khe-ai Khali nail yaqkav jiovq khi nuljuq nail aqivq jaqbheq pevq nail, nuljuq iqsanl nail munl bhee lal dai neq, teevq yanq daonq haq lao” dai, aqyu juq bhai ge bhiq-a nail ngaol.

12 Yaolyaq junq deeq-ai thaq nail kovq laiq teevq laiq bhai phao nail bhai ngal heldaiq gai-aivq-u phao, milluv luv deedee nail bhai ya gaiq, ya moel-a nail ngaol. Nlma navtsee deel jinq daqiq khe-ai pevq-ail khi, bhala iqsanl aqsivq khe-ai, pevq ail-a nail ngaol. 13 Lilmoel lil ma bhoe lal khi, heeqguq aqheeq aqjiq ga nail khe-ai, nqtavq bha jiav nail aqgil juq miltsaq kovtavq bhai ga lee-a nail ngaol. 14 Haoqgavq aqpavq laiqyov nail khe-ai, nqtavq peivq ail-a nail ngaol. Gaoqjaoq iqsanl khi, eeljaol laol-n iqsanl yovqgavq nail jaol duq nee jiiv dov ail-a nail ngaol.

15 A bhai nee ngal-aq, milkhaoq khe heeqphaq juq maqkhaiq, eeq nail heel nail juq maqkhaiq, genl dev nail kovtavq bhai uvthaiq nail aqivq juq maqkhaiq, hulmeeq meeq khi bhaqaoq jiav nail juq maqkhaiq, yaoq juq yaoq maqkhaiq, yaqkav juq khi yaqkav maq ngel nail juq maqkhaiq, lovphail khaoqbhaoq lavqkhoel khi gaoqjaoq bhai jiav nail lovmav juq nail gaiqlaq bhai tsaoq uvq-ai thaq nail ngaol. 16 Aqyu juq gaoqjaoq juq khi lovmav juq bhai khul khul-ail khi, “Doiqbev bev ma bhai jaoldeel-nvq thaq nail gaq, nvjuq bhai maq ya moel dai maqkhaiq, Yaolyaq neema phail nail bhai, nvjuq ya jel-ail dai maqkhaiq, nvjuq bhai uvthaiq lee lavq yaoq. 17 Khul khi mail dai ngal-aq neq, geesil deedee lal heeq phaq-ail pevq nail aqyu nvq gaq neema phail nail aqn kev lee-aoq thaq nail bhai, khaq sil gaq khanq tsaol heeq” dai, gul nail ngaol.