1 A bhai nee ngal-aq, Yeiqsul uqhuq thaoq nail ilkhaol bha lai-a nail ngaol. Aq-u phao, aqlavq teevq phao sil thaq nail tsaol-aq teevq gaq, a bhai jaol nail ngaol. 2 Jaol n n-gaol tsaol-aq al gaq bhai, Yeiqsul lav meeq bhiq-ail laiq dai, Yeiqsul nail kovtavq bhai oeqbal thaq kivq dai, heldaiq cov-ai thaq nail Phaqliqsail tsaol-aq teevq pav ganav juq iqsanl, a bhai jaol nail ngaol. 3 Yeiqsul aqlavq teevq phao sil thaq nail al gaq bhai, “Gaoltsi bhai thulphaol lal yaoq” dai, ge bhiq-a nail ngaol.

4 A bhai nee ngal-aq, Yeiqsul aqyu juq bhai ge bhiq-a nail: “Jaol n n-gaol aqmeeq phaq nl khaoq nail laiq. Maq ngel haq neq, maq meeq nail phaq nl khaoq nail laiq. Yu bhai lav doevq bhiq khaoq nail laiq. Maq ngel haq neq, lav heivq bhiq khaoq nail laiq” dai, naldaiq bhiq-a nail ngaol. Thailhai ngaol-aoq, Phaqliqsail al juq daoq maq ge dai, jaol nail ngaol.

5 Yeiqsul neema phail phail-ail, aqyu juq bhai heldaiq-a nail ngaol. Aqyu juq neema gaol nail ngel-i mail, Yeiqsul noeqhaq nail ngaol. A bhai nee ngal-aq, tsaol-aq al gaq bhai, “Naoq nail aqlavq gaoltsaoq yaoq” dai, ge bhiq-a nail ngaol. Aivq gaoltsaoq-u phao, meeq lai-a nail ngaol. 6 Aq-u phao, Phaqliqsail juq uqhuq thaoq nail ilkhaol nee dov ail khi, heeqphaq Heiqlol bhai tsaojao-ai nail tsaol-aq juq nee mail thaoqphuq-ail khi, khalhai khi Yeiqsul bhai ya heivq heeq dai, maoqbhaoq nl pheeljaq ail-a nail ngaol.

7 Yeiqsul aivq nail yaqlaol juq nee mail ngaqkha jiav nail phao gaoq ail-a nail ngaol. Aq-u phao, tsaol-aq munl munl ma aivq jaol nail bha jil lee-a nail ngaol. Tsaol-aq al juq neq, Gaqliqlail milkhaoq khi mail Yuldav milkhaoq nee lee-a nail ngaol. 8 Al ovqtavq, Yeiqlulsaqlaiq meenq, Ildulmail milkhaoq, Yaoldaq laoljaol nlma dov khoeq phao khe milkhaoq nee lee-a nail, Dullu meenq khi mail Sildoq meenq nee lee-a nail ngaol. Yeiqsul-i mail nl thailthaiq nail ganl ya gaiq-a nail ngel-i mail, munl munl ma ma khi, aivq jaol nail bha lee-a nail ngaol. 9 “Tsaol-aq munl munl ma ngaq bhai maq ya thaoqthaiq lal dai, laovq teevq laovq lainq-ai thaq yaoq” dai, Yeiqsul aivq nail yaqlaol juq bhai ge bhiq-a nail ngaol. 10 Khul khi mail dai ngal-aq neq, aivq nal nail goel nail tsaol-aq maodai gaq bhai lav meeq bhiq-a nail ngel-i mail, nal nail goel nail tsaol-aq iqsanl mail aivq bhai ya thoiqtsi dai, aivq jaol nail bha thaoq thaoq-ail lee thailthaiq nail ngaol. 11 Neivq aqcavq aol nail tsaol-aq juq aivq bhai khal ya moel-u phao, aivq nail sivtavq bhai peevqceevq kovdoiq doiq nail lavqkhoel nee gaolbeiv khi, “Naol neq, Miqyail nail Yaqyov ngaol” dai, gul gul-ail ge nail ngaol. 12 Thailhai ngaol-aoq, aivq khaq sil gaq pevq nail ganl, yu bhai maq bhi ge bhiq nail haqbhoil, neivq aqcavq al juq bhai Yeiqsul aqkav kav dai, daoq bivq-a nail ngaol.

13 A bhai nee ngal-aq, Yeiqsul gaoqjaoq bha dav lai khi, aivq neema khal tsaq nail juq bhai khul-u phao, aqyu juq aivq jaol nail bha lal-a nail ngaol. 14 Aivq nee mail bhi jaol khi, lavqkhiq tsail nail geeqlaoq daoq bhi cavq ail nail haqbhoil, Yeiqsul aqyu juq nail lavqkhoel khe, tsaol-aq tsel-nvq gaq bhai tsel dov khi, gaqkhoel dai, kha bhiq-a nail ngaol. 15 Neivq bhai the dov nia nail bhaqaoq iqsanl, Yeiqsul aqyu juq bhai bivq-a nail ngaol. 16 Yeiqsul-i mail tsel dov-a nail tsaol-aq al tsel-nvq gaq neq, niil juq ngaol: Aivq-i mail Bheiqtuvluv dai mil bhiq-a nail Silmoq, 17 Seiqbheiqdail nail yaqyov Yaqkov, Yaqkov nail jaqbheq Yaolhaq (Aqyu nvq mail bhai, Bhaolneiqgail dai iqsanl, yu khul nail ngaol. Daoqceevq neq, nqjaiq jaiq nail khe-ai dul nail yaq dai, ge nail ngaol.) 18 Aqdaiqlaiq, Pillilpuv, Bhaqthaollaqmail, Maqthaiq, Tholmav, Aqlaqphail nail yaqyov Yaqkov, Taqdail, Khaqnaqnil* 3.18 Maqthaiq 10.4 bhai heldaiq yaoq. nail munl bhai tavq nail Silmoq khi mail 19 Yeiqsul bhai yu nail aqlavq lavqkhoel bhai av bhiq-a nail Yuldav Ilsaqgaqliqoq, niil juq ngaol.

20 A bhai nee ngal-aq, Yeiqsul ilkhaol bhai kovq ail-a nail ngaol. Tsaol-aq munl munl ma gaoq jil lal-a nail ngel-i mail, aqyu juq aoq jaq nail iqsanl, maq dan-ail. 21 Yeiqsul nail aqma khi aivq nail jaqbheq juq ganl al ya gaiq-u phao, Yeiqsul bhai hevqkovq ail nail dai khi, ail-a nail ngaol. Khul khi mail dai ngal-aq neq, Yeiqsul naiquq uq ail-aoq thaq nail niil dai, aqyu juq noeq nail ngaol.

22 Yeiqlulsaqlaiq meenq nee lee-a nail aoldaoq kovqdaoq cavq nail cov nail teevq pav ganav juq ge nail: “Aivq neq, neivq heeqphaq Bheiqsaqbhullav aol nail tsaol-aq niil. Aivq neivq heeqphaq bhai juq juq-ail, neivq bhai the dov nail niil” dai, ge nail ngaol.

23 Alheel ngel-i mail, Yeiqsul aqyu juq bhai khul khi, daoqma uqhuq daoq nee mail niailhai cavq bhiq cov bhiq-a nail ngaol: “Neivq Saqdaq neq, yovqgavq bhai yovqgavq khalhai the dov nail-aiq. 24 Milkhaoq teevq khaoq neq, yovqgavq nail gaiqlaq bhai munl bhoilpav khi, maq tsaq maq jil lai haq neq, khalhai khi ivq nia nail-aiq. 25 Ildaoq teevq daoq iqsanl, aivq bhai aivq maq tsaq maq jil lai haq neq, ildaoq al daoq maq ivq nia-ail. 26 Alhai dul dai, neivq Saqdaq neq, aivq bhai aivq pheeq khi, maq tsaq maq jil lai haq neq, aivq iqsanl maq ivq-ail. Aivq luq-ail seil-ail khi peivq-ail boev-ail nail ngaol. 27 Gaq mao-ail kav nail gaq bhai iqmoeq maq pheethaiq haq neq, teevq gaq iqsanl, aivq nail ilkhaol bhai aol lai khi, aivq nail yalkav maq oil lai nia-ail. Gaq mao-ail kav nail al gaq bhai iqmoeq pheethaiq haq neq, aivq nail ilkhaol bhai aol lai khi, aivq nail yalkav oil lai kivq nail ngaol. 28 Ngal nuljuq bhai maldil dai, ge lavq bhel. Tsaol-aq yaq-i mail nl-a nail oeqbal iqsanl khi mail, khal ge movq-ail ge-a nail yaoq phaq yaoq-ao nee, Miqyail oeqbal phaiq bhiq nia nail ngaol. 29 Thailhai ngaol-aoq, Meeqnail Haolnail Aqhaqlal bhai khal ge movq-ail ge nail tsaol-aq khul gaq nail oeqbal bhai maqkhaiq, teevq thal-iq oeqbal maq phaiq bhiq-ail. Tsaol-aq al gaq nqmaq maqluv halyeel oeqbal aol nail tsaol-aq ngaol” dai, Yeiqsul ge bhiq-a nail ngaol.

30 Tsaol-aq teevq pav ganav juq, aivq bhai neivq aqcavq aol nail tsaol-aq niil dai, ge nail ngel-i mail, Yeiqsul aqyu juq bhai alhai ge bhiq-a nail ngaol.

31 Aq-u phao, Yeiqsul nail aqma khi aivq nail jaqbheq juq lee kev-a nail ngaol. Aqyu juq lavqniil phao thulphaol khi, Yeiqsul bhai bhi khul dov lai-a nail ngaol. 32 Tsaol-aq munl munl ma juq, aivq jaol nail teevq jaoq jaoldeel-nvq thaq nail ngaol. Aqyu juq aivq bhai ge bhiq-a nail: “Naoq nail aqma khi naoq nail jaqbheq juq naoq bhai halpov halpov-ail lavqniil phao jaol nail ngaol” dai, ge bhiq-a nail ngaol.

33 “Ngaq nail aqma khi mail ngaq nail jaqbheq juq neq, khaq sil gaq” dai, Yeiqsul naldaiq bhiq-a nail ngaol.

34 Aivq jaol nail teevq jaoq jaoldeel-nvq thaq nail tsaol-aq juq bhai, aivq heldaiq heldaiq-ail khi ge nail: “Niil juq neq, ngaq nail aqma khi mail ngaq nail jaqbheq juq ngaol. 35 Miqyail neema tsaq dai, khal nl nail tsaol-aq ngaq nail aqivq jaqbheq khi mail ngaq nail aqma ngaol” dai, Yeiqsul ge bhiq-a nail ngaol.