1 Aq-u phao, Phaqliqsail juq khi mail aoldaoq kovqdaoq cavq nail cov nail juq, Yeiqlulsaqlaiq meenq nee mail Yeiqsul jaol nail bha lee khi, niailhai ge bhiq-a nail ngaol: 2 “Khul khi mail naoq nail yaqlaol juq, aqphiq aqbhal juq-i mail thaoq khal leevq-a nail aolsaolkovq bhai maq naldaiq dai, nl bheeq-a nail-aiq. Aqyu juq aolsaolkovq jiav nail khe-ai aqlavq maq tsiq mail, aoq jaq il thoq” dai, ge bhiq-a nail ngaol.

3 Yeiqsul aqyu juq bhai ge bhiq-a nail: “Khul khi mail nuljuq yovqgavq-i mail thaoq khal leevq-a nail aolsaolkovq bhai thaoq kivq dai, Miqyail-i mail bivq-ai thaq nail daoq bhai nl bheeq nail-aiq. 4 Khul khi mail dai ngal-aq, Miqyail neq, ‘Naoq nail aqbhu aqma bhai ev yaoq. Yovqgavq nail aqbhu aqma bhai iqkhail yavq nail gaq neq, heivq nail bhai ya daq naol’ dai, ge-ai thaq nail ngaol. 5 Thailhai ngaol-aoq, nuljuq niailhai cavq nail cov nail ngaol: Khul gaq maqkhaiq, yovqgavq nail aqbhu aqma bhai, ‘Ngaq-i mail khal jiav nail, naoq bhai bivq heeq phaq-ail tsaq nail juq, Miqyail bhai danq bhiq-a nail ngaol’ dai, ge gaq haq neq, 6 yovqgavq nail aqbhu aqma bhai ev nail maq loq-ail dai, nuljuq cavq bhiq cov bhiq nail ngaol. Alhai cavq bhiq cov bhiq nail lavqkhoel nee, nuljuq neq, nuljuq nail aolsaolkovq bhai thaoq nia dai, Miqyail nail daoq bhai aqdeq bhi deq ail-a nail ngaol.

7 Goiqbhaoq bhaoq nail tsaol-aq juq-ol, Ilsaqyal-i mail nuljuq nail ganl Miqyail nail haqbhoil gedan-ai thaq nail neq, tsaq deedee-ail nial. Aivq ge nail:

Ilsaqyal ge-ai thaq nail ngaol.”

10 A bhai nee ngal-aq, Yeiqsul tsaol-aq munl munl ma bhai gaoq khul jil khi ge bhiq-a nail: “Nuljuq iqsanl mail aqmeeq-ai naldaiq khi, niilniai heeq kivq thaq-ai yaoq. 11 Moeqthaoq lavqkhoel nee aol ail nail phaq neq, tsaol-aq bhai bhi jiivq bhi cavq lal nail maq ngel-ail. Moeqthaoq lavqkhoel nee dov lal nail phaq neq, tsaol-aq yaq bhai bhi jiivq bhi cavq lal nail ngaol” dai, ge bhiq-a nail ngaol.

12 Aq-u phao, Yeiqsul nail yaqlaol juq aivq jaol nail bha lal khi, “Naoq-i mail ge-a nail daoq al juq Phaqliqsail juq ya gaiq-u phao, neema phail nail bhai, naol heeq kivq naol laiq” dai, ge bhiq-a nail ngaol.

13 Yeiqsul ge kovq bhiq-a nail: “Nqtavq kovtavq bhai jaol nail ngaq nail Aqbhu-i mail maq kha-ai thaq nail aqbhaol yaoq bhaol yaoq-ao nee mail, gaol ha nail bhai ya daq nail ngaol. 14 Phaqliqsail juq nail haqbhoil khaoq thaq laol. Aqyu juq neq, maivpeivq peivq khi ngaol-aoq, gailkhaol hevq daiq bhiq nail tsaol-aq jiovq nail ngaol. Maivpeivq peivq nail tsaol-aq-i mail maivpeivq peivq nail tsaol-aq bhai gailkhaol hevq daiq bhiq haq neq, nvq gaq nvq gaq-ail khaqduq bhai ga bhoel-ail nail ngaol” dai, ge bhiq-a nail ngaol.

15 Aq-u phao, Bheiqtuvluv neq, “Daoqma uqhuq daoq al daoq nail daoqceevq nvjuq bhai ge lavq-o” dai, hal bhiq-a nail ngaol.

16 Yeiqsul aqyu juq bhai ge bhiq-a nail: “Niil aq-il kev dai, nuljuq maq gov heeq haq-al laiq. 17 Moeqthaoq lavqkhoel nee khal aol ail nail yaoq phaq yaoq-ao nee, ovqmav lavqkhoel bhai aol kev ail khi, lavqniil dov ha gil nail ngaol dai, nuljuq maq heeq kivq-ail laiq. 18 Thailhai ngaol-aoq, moeqthaoq lavqkhoel nee dov lal nail phaq neq, neema lavqkhoel nee dov lal nail ngaol. Al juq neq, tsaol-aq bhai bhi jiivq bhi cavq lal nail phaq ngaol. 19 Khul khi mail dai ngal-aq neq, haqeiv nail phaq saol-nvq nail, tsaol-aq bhai heivq nail, yu nail miqyaq yovyaq bhai bheeq nail, khaqmiq sev nail, yu nail yalkav bhai khoiq nail, maq tsaq nail salkhil khanq nail khi mail yu bhai ge doil nail niil juq neq, neema lavqkhoel nee dov lal nail ngaol. 20 Niil juq neq, tsaol-aq yaq bhai bhi jiivq bhi cavq lal nail phaq ngaol. Aqlavq maq tsiq dai aoq jaq nail neq, tsaol-aq yaq bhai bhi jiivq bhi cavq lal nail phaq maq ngel-ail” dai, ge bhiq-a nail ngaol.

21 Yeiqsul a bhai nee dov ail khi, Dullu meenq khi Sildoq meenq phao ail-a nail ngaol. 22 Aq-u phao, milkhaoq al khaoq bhai jaol nail, Khaqnaq nail jeq-e jaq-a yaqmai-aq teevq gaq dov lal khi, “Daqbhil nail Yaqyov Heeqphaq-ol, ngaq bhai gaoqhaq lavq yaoq. Ngaq nail yaqmiq neivq aol lai khi ya daq deedee nail ngaol” dai, mailma-ail gul nail ngaol. 23 Thailhai ngaol-aoq, Yeiqsul daoq teevq daoq iqsanl maq ge kovq bhiq-al.

Aivq nail yaqlaol juq aivq jaol nail bha lal khi, “Yaqmai-aq al gaq, ngadao nail haoqnao tsaothe tsaothe-ail gul thailthaiq nail ngel-i mail, aivq bhai bhi kovq ail yaoq” dai, ge bhiq-a nail ngaol.

24 Aq-u phao, Yeiqsul ge nail: “Ilsaqleiqlal nail jeq-e jaq-a nail lavqkhoel khe peivq ail-a nail yaol juq jaol nail bha taivq-ail, ngaq bhai khoel-ai leevq-a nail ngaol” dai, ge kovq bhiq-a nail ngaol.

25 Yaqmai-aq al gaq lal khi, aivq bhai peevqceevq kovdoiq doiq khi uqhuq thaoq thaoq-ail, “Heeqphaq-ol, ngaq bhai tsaojao-ai lavq yaoq” dai, ge bhiq-a nail ngaol.

26 Yeiqsul neq, “Yaq nail aoq tsiq khi, kheeq bhai bhi jaq nail maq tsaq-ail” dai, ge kovq bhiq-a nail ngaol.

27 “Heeqphaq-ol, naol ge nail tsaq nail ngaol. Thailhai ngaol-aoq, kheeq neq, ilheel gaq-i mail kovqkhail kov-uvq bhai jaq khal-ai thaq nail juq bhai, mevq jaq nail ngaol” dai, yaqmai-aq al gaq ge kovq bhiq-a nail ngaol.

28 Aq-u phao, “Yaqmiq-ol, naol neema thaqtsaol deedee-ail nial. Naol bhi pevq lal movq nail khe-ai, naoq nail haqbhoil pevq lal dei-eiq” dai, ge bhiq-u phao, teevq pov taivq-ail aivq nail yaqmiq meeq lai-a nail ngaol.

29 Yeiqsul jaol duq al dao nee dov ail khi, Gaqliqlail ngaqkha bhai ail-a nail ngaol. Aq-u phao, aivq gaoqjaoq bha dav lai khi, jaoldeel-a nail ngaol. 30 Tsaol-aq munl munl ma juq Yeiqsul jaol nail bha lal-a nail ngaol. Aqyu juq lal-u phao, khil khoi lavq khoi khoi nail tsaol-aq, aqkhil maq meeq nail tsaol-aq, maivpeivq peivq nail tsaol-aq, yaqjaoq juq khi mail, nal nail tsaol-aq yaoq juq yaoq bhai iqsanl, Yeiqsul nail aqkhil daoqthaoq bhai hevq thaq, bavq thaq, lal-a nail ngaol. Aq-u phao, Yeiqsul aqyu juq bhai bhi meeq lai-a nail ngaol. 31 Alheel ngel-i mail, yaqjaoq juq daoq ge nia lal-a nail ngaol. Aqkhil maq meeq nail juq, meeq lai-a nail ngaol. Khil khoi lavq khoi khoi nail juq, gailkhaol tsao nia lal-a nail ngaol. Maivpeivq juq maivneev moel nia lal-a nail ngaol. Tsaol-aq munl munl ma juq al bhai ya moel-u phao, aqyu juq noeq-u maq dov dai pevq ail khi, Ilsaqleiqlal nail Miqyail bhai tsiqeeq-a nail ngaol.

32 Yeiqsul aivq nail yaqlaol juq bhai khul khi ge bhiq-a nail: “Tsaol-aq niil juq bhai ngal gaoqhaq-ail nial. Aqyu juq ngaq-ai nee mail jaol-a nail hail n bhee lal khi, khul teevq phaq iqsanl jaq nail maq jiav-aoq nail ngaol. Aqyu juq bhai khul teevq phaq iqsanl maq bhi jaq dai, ngal maq bhi kovq ail movq-il. Bhi kovq ail haq neq, gailphail lail ma bhai aqyu juq gaq juq lal nail ngaol” dai, ge bhiq-a nail ngaol.

33 “Niilniai neq, tsaol-aq maq jaol nail haqtsoiq haqyal ngaol. Tsaol-aq niidai mao nail bhai bhi jaq bhi daol nail haqbhoil jaqjaq daoldaol khaq bha halpov ya ail heeq” dai, yaqlaol juq Yeiqsul bhai ge kovq bhiq-a nail ngaol.

34 “Nuljuq khaqmul khadai heeq aol nail-aiq” dai, Yeiqsul naldaiq-u phao, “Khaqmul sivq heeq khi mail delgil micil aol naol” dai, ge kovq bhiq-a nail ngaol.

35 Aq-u phao, “Miltsaq bhai jaoldeel yaoq” dai, Yeiqsul tsaol-aq munl munl ma al juq bhai daoq bivq-a nail ngaol. 36 A bhai nee ngal-aq, aivq khaqmul al sivq heeq khi mail delgil al oil khi Miqyail bhai tsiqeeq gaq al nee ngal-aq, ngaoqpav khi yaqlaol juq bhai tsiq bhiq-a nail ngaol. Yaqlaol juq iqsanl, tsaol-aq munl munl ma al juq bhai bhoil bhiq-a nail ngaol. 37 Tsaol-aq iqsanl mail teevq bov jaq-a nail nee ovqtavq, jaiq lal-a nail juq bhai gov kovq daiq-u phao, pheeqdeel nee mail sivq deel bhee nail ngaol. 38 Jaq-a nail tsaol-aq juq neq, yaqmai-aq khi mail yaqnoil juq maq saol-nvq mail liq hinl gaq bhee nail ngaol. 39 A bhai nee ngal-aq, Yeiqsul tsaol-aq munl munl ma juq bhai bhi kovq ail khi, aivq neq, laovq jeeq khi Maqgaqdaqlal meenq bhai ail-a nail ngaol.