1 Maqlaqkhilsaqdaiv al gaq, Saqleiq* 7.1 Saqleiq dai ge nail neq, neesal bhi ovq nail phaq bhai ge movq nail ngaol. meenq nail heeqphaq ngaol. Eeq nail heel nail Miqyail nail Philma iqsanl ngel nail ngaol. Aqbhaqlaqhaq heeqphaq juq bhai genl dev gaq khi kovq lal thailthaiq-u phao, Maqlaqkhilsaqdaiv aivq bhai hav-ail khi, geeqlaoq bivq-a nail ngaol. 2 Aqbhaqlaqhaq aivq-i mail genl khal dev ya-a nail juq iqsanl nail lavqkhoel khe tsel bhoil teevq bhoil aivq bhai bivq-a nail ngaol. Maqlaqkhilsaqdaiv dai, ge nail aqmil al neq, tsaq nail daol nail heeqphaq bhai ge nail ngaol. Al ovqtavq, Saqleiq nail heeqphaq dai, ge nail neq, neesal bhi ovq nail heeqphaq ngaol dai, ge movq nail ngaol. 3 Aivq neq, Aqbhu aqma maq bhao-ail. Jeq-e jaq-a iqsanl maq bhao-ail. Aivq nail doevq yeel neq, iqmoeq ilmoeq khi, haoqnao naosaq iqsanl maq bhao-ail. Aivq neq, Miqyail nail Yaqyov khe-ai khaq mao kev dai, Philma ngaol.

4 Aivq khadai eeq nail ngel-ail dai, saol-nvq daiq. Ngadao nail aqbhu Aqbhaqlaqhaq-i mail genl dev ya-a nail nlmaoq juq nail lavqkhoel khe, tsel bhoil teevq bhoil aivq bhai bivq-a nail ngaol. 5 Leiqbhil nail jeq-e jaq-a lavqkhoel Philma nail alyaq ya-a nail juq bhai, aqyu juq nail aqivq jaqbheq pevq nail Ilsaqleiqlal tsaol-aq juq, heeqlaoq gaoqjal, tsel bhoil teevq bhoil danq bhiq yaoq dai, aoldaoq kovqdaoq aqyu juq bhai daoq bivq-ai thaq nail ngaol. Aqyu juq, Aqbhaqlaqhaq nail jeq-e jaq-a pevq khi ngaol-aoq, Philma bhai danq bhiq-a nail ngaol. 6 Maqlaqkhilsaqdaiv neq, Leiqbhil nail jeq-e jaq-a maq ngel khi ngaol-aoq, Aqbhaqlaqhaq-i mail bivq-a nail tsel bhoil teevq bhoil oil khi, saljial ya-a nail Aqbhaqlaqhaq bhai geeqlaoq bivq-a nail ngaol. 7 Geeqlaoq bivq nail gaq neq, geeqlaoq ya nail gaq nee maqtsil eeq jaiq nail ngaol. Ganl niil khul dai jil nail maq jiav-ail. 8 Leiqbhil nail tsaol-aq bhai tsel bhoil teevq bhoil danq bhiq-a nail neq, sil nia nail tsaol-aq bhai danq bhiq-a nail ngaol. Thailhai ngaol-aoq, Maqlaqkhilsaqdaiv bhai danq bhiq-a nail al neq, Jalliq lavqkhoel bhai salkhil khanq-ai thaq nail khe-ai, teevq thal-iq maq sil nail gaq bhai danq bhiq-a nail phaq pevq nail ngaol. 9 Yu bhai tsel bhoil teevq bhoil oil nail Leiqbhil iqsanl, Aqbhaqlaqhaq nee mail tsel bhoil teevq bhoil bivq-a nail ngaol dai, ge kivq nail ngaol. 10 Khul khi mail dai ngal-aq neq, Maqlaqkhilsaqdaiv Aqbhaqlaqhaq bhai hav ail-u phao, Leiqbhil aivq nail aqbhal Aqbhaqlaqhaq nail lavqkhoel bhai jaol-ai haq nail ngaol.

11 Ilsaqleiqlal tsaol-aq juq bhai bivq-a nail aoldaoq kovqdaoq neq, Leiqbhil nail jeq-e Philma jiovq nail bhai tavq lai khi, bivq-a nail aoldaoq kovqdaoq pevq nail ngaol. Leiqbhil tsaol-aq Philma jiovq thailthaiq-u phao, Ilsaqleiqlal tsaol-aq bhee lal nia-ail nul neq, khul khi mail Philma yaoq gaq yaoq gaoq dov lal nail loq nail-aiq. Philma al gaq, Aqloq Philma jiovq nail joiqjaq khe-ai maq dul lai-ail. Maqlaqkhilsaqdaiv Philma jiovq khi joiqjaq ovq nail khe-ai dul nail ngaol. 12 Philma jiovq nail joiqjaq lav phal-u phao, aoldaoq kovqdaoq iqsanl ya lav phal nail ngaol. 13 Ngadao-i mail ge jel-ail ceevq-a nail al gaq, Leiqbhil nail jeq-e jaq-a maq ngel-ail. Aivq nail jeq-e jaq-a nail lavqkhoel, teevq gaq iqsanl laol duq bhai ganl maq nl daiq-al. 14 Khul khi mail dai ngal-aq neq, ngadao nail Heeqphaq Yeiqsul neq, Yuldav nail jeq-e jaq-a ngaol dai, ngadao aqduq duq dai, heeq kivq nail ngaol. Jeq-e jaq-a al Philma jiovq-a nail ganl Molseiq khul teevq phaq iqsanl maq ge-ail.

15 Maqlaqkhilsaqdaiv Philma jiovq nail joiqjaq ovq nail khe-ai, Philma nail joiqjaq ovq nail nvq gaq teevq gaq dov lal-a nail ngel-i mail, Philma joiqjaq phal-a nail ngaol dai, aqmeeq-ai ya heeq kivq-a nail ngaol. 16 Tsaol-aq yaq nail aolsaolkovq-i mail aivq bhai Philma bhi jiovq-a nail maq ngel-ail. Teevq thal-iq maq cov-ai nia nail aqdoevq doevq nail phaq nail bhaqaoq bhaqda nee pevq lal-a nail ngaol. 17 Aivq nail ganl Miqyail salkhil niailhai khanq-ai thaq nail ngaol:

khanq-ai thaq nail ngaol.

18 Milnee uqnee khe bivq-ai thaq nail daoq al neq, gaq maq aol-ail, khul teevq phaq iqsanl ganl maq tsoiq nail ngel-i mail, Miqyail daoq al daoq bhai khaonq ha-a nail ngaol. 19 Khul khi mail dai ngal-aq neq, aoldaoq kovqdaoq neq, khul teevq phaq bhai iqsanl maq bhi bhee lal nia-ail. Al heel ngel-i mail, a dai nee maqtsil meeq nail noeqthunq nail phaq Miqyail gaoq bivq-ai leevq-a nail ngaol. Noeqthunq nail al phaq bhaqda nee ngadao Miqyail jaol nail bha jiil laivq kivq nail ngaol.

20 Al ovqtavq, Miqyail-i mail khanq-ai thaq nail daoq iqsanl jiav nail ngaol. Philma al juq bhai Philma kha bhiq-u phao, Miqyail-i mail khanq-ai thaq nail daoq maq jiav-ail. 21 Thailhai ngaol-aoq, Yeiqsul Philma nail alyaq al ya-a nail neq, khanq-ai thaq nail daoq al daoq jiav khi ya-a nail ngaol.

aivq bhai ge bhiq khi khanq-ai thaq nail ngaol.

22 Alheel ngel-i mail, meeq jaiq nail daoqma saljial al bhai ivq dai, Yeiqsul nl thailthaiq nail ngaol.

23 Aq-u phao neq, Philma maodai gaq jaol khal lee-a nail ngaol. Khul khi mail dai ngal-aq neq, sil nail phaq bhaqda nee aqyu juq khaq mao iqsanl ganl maq nl nia-ail. 24 Yeiqsul neq, khaq mao iqsanl Philma jiovq nail ngaol. Khul khi mail dai ngal-aq neq, aivq neq nqmaq maqluv halyeel doevq nail ngaol. 25 Alheel ngel-i mail, aivq bhai juq khi Miqyail jaol nail bha khal lal nail tsaol-aq bhai Yeiqsul khaq mao iqsanl hevqkovq nia nail ngaol. Khul khi mail dai ngal-aq neq, aqyu juq nail haqbhoil geeqlaoq hal nail dai khi, aivq khaq mao iqsanl aqdoevq doevq nail ngaol.

26 Alheel nail Philma ngadao juq loq-ail nial. Aivq neq aqmeeq aqhaol ngaol. Oeqbal khi aqcavq phaq maq aol-ail. Oeqbal yaq bhai gaoq ceiv ceiv-a nail ngaol. Miqyail aivq bhai nqtavq nee maqtsil moe nail dao bhai tsiq dav-ai thaq nail ngaol. 27 Aivq neq, Philma yaoq juq yaoq khe-ai, iqmoeq yovqgavq nail oeqbal nail haqbhoil, haoqnao tsaol-aq nail oeqbal nail haqbhoil yaoq n yaoq n nee ya laol bhiq nail maq ngel-ail. Teevq pov taivq-ail aivq nail aqmaol laol bhiq-a nail ngaol. Yaqhao teevq pov iqsanl gaoq laol bhiq nail maq loq yaoq-aol. 28 Tsaol-aq yaq gaq bhaq khi ngaol-aoq, Philma ya jiovq dai, aoldaoq kovqdaoq aqyu juq bhai alyaq bivq-a nail ngaol. Thailhai ngaol-aoq, khanq-ai thaq nail daoq al daoq neq, aoldaoq kovqdaoq nail haoqnao lee khi, nqmaq maqluv halyeel bhee lovq nail Yaqyov bhai alyaq bivq-a nail ngaol.