1 Miqyail-i mail saljial jaq-ai thaq nail naq duq bhai aol lai kivq nail aqyanq jiav-u phao, nuljuq nail lavqkhoel khe teevq gaq ganav maq ya aol lai nail khul-il dai, ngadao juq iqsanl khaoqlaol nail tsaq nail ngaol. 2 Khul khi mail dai ngal-aq neq, aqyu juq lavqkhiq tsail nail geeqlaoq daoq yaq gaiq-a nail khe-ai, ngadao juq iqsanl ya gaiq-a nail ngaol. Thailhai ngaol-aoq, aqyu juq-i mail ya gaiq-a nail daoq bhai aqyu juq neema maq thaqtsaol nail ngel-i mail, aqyu juq nail haqbhoil ganl maq tsoiq-ail. 3 Neema thaqtsaol nail ngadao juq neq, gaqnaq naq duq al bhai aol lai thailthaiq nail ngaol. Alhai dul dai, aivq ge nail:

ge-ai thaq nail ngaol. Miqyail neq, nqtavq miltsaq bhai teivq-u phao nee aivq nail ganl aivq nl gil-ai thaq khi ngaol-aoq, niailhai ge nail ngaol.

4 Khul khi mail dai ngal-aq neq, “Miqyail aivq nail ganl iqsanl nl gil khi, sivq n n-gaol gaqnaq naq-a nail ngaol” dai, sivq n nail ganl, Jalliq teevq dao bhai gevq-ai thaq nail ngaol. 5 “Aqyu juq ngaq nail naq duq bhai teevq thal-iq maq ya aol lal-ail” dai, teevq pov gaoq gevq-ai thaq nail ngaol.

6 Iqmoeq-u phao nee lavqkhiq tsail nail geeqlaoq daoq ya gaiq-a nail tsaol-aq maq naldaiq-a nail ngel-i mail, aqyu juq maq ya aol lai khi ngaol-aoq, ya aol lai nail tsaol-aq jaol nail ngaol. 7 Alheel ngel-i mail, Miqyail nv peiv peiv phal-a nail ngaol. Aqyanq maoq lal-u phao, Miqyail Daqbhil bhai juq khi, ge jel-ail ceevq-a nail khe-ai,

bhi ge-a nail ngaol. Aivq-i mail nv peiv peiv-a nail aqn al neq, yanqgaol ngaol.

8 Yaolsu aqyu juq bhai gaqnaq naq duq bhai hevq bhoel-aivq nail kheel nul neq, yaoq n yaoq nail ganl Miqyail maq ge yaoq-aol. 9 Alheel ngel-i mail, Miqyail nail yaq juq nail haqbhoil gaqnaq naq nail aqn jiav-ai haq nail ngaol. 10 Khul khi mail dai ngal-aq neq, Miqyail aivq ganl nl gil khi gaqnaq naq-a nail khe-ai, aivq nail naq duq bhai aol lai nail tsaol-aq iqsanl, yovqgavq nail ganl nl gil haq neq, gaqnaq naq nail ngaol. 11 Alheel ngel-i mail, gaqnaq naq duq al bhai ya aol lai dai, ngadao laijai bhel. Maq laijai haq neq, aqyu juq maq naldaiq dai, tsuq ail-a nail khe-ai, ngadao iqsanl teevq gaq ganav tsuq-ail nail ngaol.

12 Khul khi mail dai ngal-aq, Miqyail nail daoq neq, aqdoevq doevq khi bhaqaoq teevq bhee aol nail ngaol. Daoq al neq, nvq phao nvq phao-ail tav nail thaoma nee maqtsil tav khi, neema khi aqhaqlal bhai maqkhaiq, khil ceevq lavq ceevq khi haqeeq phulnaovq bhai maqkhaiq, coev pav khi bhoil pav nia nail ngaol. Neema lavqkhoel bhai saol-nvq nail juq khi oil movq nail juq bhai iqsanl tsel pav nia nail ngaol. 13 Khal teivq-ai thaq nail yaoq phaq yaoq-ao nee aivq nail sivtavq bhai oil tsail-ai thaq nail teevq phaq iqsanl maq jiav-ail. Ngadao juq yaqhao aivq bhai ya ge bhi nail ngaol. Aivq iqsanl mail bhaqlaoq khe dai, heeq nia moel nia nail ngaol.

14 Ngadao juq mao-ail eeq mao-ail meeq nail Philma teevq gaq jaol nail ngel-i mail, ngadao-i mail neema thaqtsaol naol dai, ge-ai thaq nail bhai ivqdao dai, nieivq thaiq thaq gai bhel. Philma al gaq nqtavq kovtavq bhai aol lai-a nail ngaol. Aivq neq, Miqyail nail Yaqyov Yeiqsul ngaol. 15 Ngadao gaq bhaq-u phao, maq gaoqhaq nia nail Philma ngadao jaol nail, maq ngel. Ngadao jalmul mul nail yaoq phaq yaoq-ao nee ya khanq-a nail khe-ai, aivq iqsanl ya khanq-a nail ngaol. Thailhai ngaol-aoq, aivq oeqbal maq nl daiq-al. 16 Alheel ngel-i mail, geeqlaoq eeljaol teevq bhee aol nail Miqyail nail doiqbev bev ma nail aqjail bhai, geesil nail neema maq aol nail lavqkhoel nee ngadao jil lai bhel. Ngadao aivq nail gaoqhaq gaiq-a nail geeqlaoq al, a bhai ya nail ngaol. Ngadao khal loq-u phao, aivq nail geeqlaoq eeljaol ya moel nail ngaol.