1 Nuljuq Miqyail nail daoq maq naldaiq mail oeqbal nail lavqkhoel bhai sil-u phao, Miqyail nuljuq bhai bhi doevq kovq lal-a nail ngaol. 2 Jel lal-u phao, nuljuq niil yeel nail aol haqeiv nail haoqnao tsaothe-a nail ngaol. Aq-u phao, nqtavq khi miltsaq nail gaiqlaq bhai jaol nail juq bhai uvthaiq nail neivq Saqdaq nail haoqnao iqsanl, tsaothe-a nail ngaol. Aivq neq, Miqyail nail daoq maq naldaiq nail tsaol-aq juq nail neema lavqkhoel bhai ganl nl nail aqheel ngaol. 3 Jel lal-u phao, ngadao juq iqsanl Miqyail nail daoq maq naldaiq nail tsaol-aq al juq nail lavqkhoel bhai aol-a nail ngaol. Aq-u phao, ngadao juq aqsivq haqjoil nail neekhaol nl movq nail ngel-i mail, aqsivq haqjoil phao nl movq nail khe-ai maqkhaiq, neenoeq neelov nl movq hal movq nail khe-ai maqkhaiq, nl-a hal-a nail ngaol. Alheel ngel-i mail, ngadao juq iqsanl, yu khe-ai dul dai, Miqyail neema phail nail phaq bhai daq heeq phaq-ail tsaq nail tsaol-aq ngaol.

4-5 Thailhai ngaol-aoq, gaoqhaq gaiq-a nia deedee nail Miqyail neq, aivq nail goil nail gaiq-a nail phaq ngadao nail kovtavq bhai eeq deedee nail ngel-i mail, ngadao oeqbal lavqkhoel bhai sil-ai thaq khi ngaol-aoq, aivq ngadao bhai Khali nee mail aqdoevq bhi doevq lal-a nail ngaol. Miqyail nail geeqlaoq eeljaol bhaqda nee nuljuq hevqkovq nail phaq ya-a nail ngaol. 6 Miqyail neq, ngadao bhai Yeiqsul Khali nee mail teevq gaq khe-ai bhi doevq kovq lal khi, aivq nee mail teevq gaq khe-ai, nqtavq kovtavq khe jaol duq lavqkhoel bhai bhi jaol lavq-a nail ngaol. 7 Khul khi mail dai ngal-aq neq, Miqyail nail aqmeeq phaq ngadao bhai, Yeiqsul Khali nail lavqkhoel bhai bhi moel lavq khi, aivq nail geeqlaoq eeljaol khadai eeq nail ngel-ail dai, yaqhao khe aqyanq lavqkhoel bhai phaodaiq lavq nail dai khi, aivq alhai nl lavq-a nail ngaol. 8 Nuljuq neema thaqtsaol nail lavqkhoel Miqyail nail geeqlaoq eeljaol bhaqda nee, hevqkovq nail phaq ya-a nail ngaol. Yovqgavq bhai yovqgavq nl-a hal-a nail bhaqda nee ya-a nail maq ngel-ail. Miqyail-i mail bivq lavq-a nail kovpavq ngaol. 9 Nl nail hal nail bhaqda nee ya-a nail maq ngel-ail. Alheel ngel-i mail, tsaol-aq teevq gaq iqsanl neema eeq duq maq jiav-ail. 10 Khul khi mail dai ngal-aq neq, Miqyail ngadao bhai teivq-ai thaq nail ngaol. Ngadao aqmeeq phaq nl dai, aivq Yeiqsul Khali nail lavqkhoel-ai ngadao bhai teivq-ai thaq nail ngaol. Miqyail iqmoeq-u nee mail lainq-ai thaq nail khe-ai, ngadao aqmeeq al juq nl dai, bhi doevq bhi jaol lavq-a nail ngaol.

11 Jel lal-u phao, nuljuq aqsivq haqjoil phao yu nail jeq-e jaq-a pevq nail bhai, thaq nioilpeivq dei-eiq. Aq-u phao, bavkov uqjaq oev nail yuldav tsaol-aq juq nuljuq bhai, bavkov uqjaq maq oev nail tsaol-aq dai, khul-a nail ngaol. Thailhai ngaol-aoq, bavkov uqjaq oev-a nail al neq, aqsivq haqjoil phao oev-a nail teevq-eel ngaol. 12 Nuljuq neq, aqyanq al yanq lavqkhoel, Khali nee mail teevq peivq-ail maq jil lai nia-ail. Ilsaqleiqlal munl lavqkhoel bhai iqsanl, maq aol-ail. Geeqlaoq ya naol dai, ge-ai thaq nail daoqma saljial juq bhai iqsanl, maq tavq-ail. Nuljuq neq, miltsaq kovtavq bhai jaol-u phao, noeqthunq duq maq jiav nail nee ovqtavq, Miqyail maq bhao nail bhai iqsanl, thaq nioilpeivq dei-eiq. 13 Jel lal-u phao, nuljuq eqyal bha jaol khi ngaol-aoq, Yeiqsul Khali nail lavqkhoel-ai, aivq nail aqsivq bhaqda nee, Miqyail niil aq-il aqjail bhi jail lal-aoq nail ngaol.

14 Khul khi mail dai ngal-aq neq, Khali bhaqda nee ngadao juq nail gaiqlaq bhai tsaq lai jil lai-a nail ngaol. Aivq neq, ngadao tsaoljeq-e nvq jeq-e bhai teevq jeq-e taivq-ail bhi pevq lal khi, tsaol jeq-e al nvq jeq-e nail gaiqlaq bhai thao pav-ai thaq nail ilphail khe-ai dul nail neejiav jiav nail phaq bhai peiv ha-a nail ngaol. 15 Aivq nail aqmaol laol bhiq-a nail lavqkhoel nee, aoldaoq kovqdaoq nail aol juq khi bivq-ai thaq nail daoq al juq bhai, aivq phi ha-a nail ngaol. Aivq alhai nl-a nail neq, tsaol jeq-e nvq jeq-e pevq nail bhai aivq nail lavqkhoel nee tsaol jeq-e aqsivq teevq jeq-e taivq-ail bhi pevq lal khi, bhi tsaq bhi jil lai nail dai, nl lavq-a nail ngaol. 16 Yeiqsul lavqyavq kovtavq bhai sildan-a nail bhaqda nee, ngadao tsaol jeq-e nvq jeq-e bhai teevq jeq-e taivq-ail bhi pevq lal-a nail nee ovqtavq, Miqyail bhai tsaq lai jil lai dai iqsanl, aivq nl lavq-a nail ngaol. Lavqyavq bhaqda nee, teevq gaq nee teevq gaq neejiav jiav nail phaq bhai bhi peivq ail-a nail ngaol. 17 Khali lee khi, eqyal bhai jaol nail nuljuq bhai maqkhaiq, aqjail bhai jaol nail nvjuq bhai maqkhaiq, neesal-ovq dei-eiq dai, Khali lavqkhiq tsail nail geeqlaoq daoq cavq lavq-a nail ngaol. 18 Aivq bhaqda nee ngadao tsaol jeq-e nvq jeq-e nvq jeq-e-ail, Aqhaqlal Miqyail teevq gaq teevq-eel nail lavqkhoel nee, Aqbhu Miqyail jaol nail bha lai nail gailkhaol daol lal-a nail ngaol.

19 Alheel ngel-i mail, nuljuq yaoq khaoq yaoq mil yaoq khe tsaol-aq maq ngel-ail. Daq-i iqsanl maq ngel-ail. Meeq nail haol nail tsaol-aq juq nee milkhaoq teevq khaoq bhai jaol khi, Miqyail nail ilkhaol lavqkhoel khe yaq juq ngaol. 20 Ilkhaol al il bhai iqmoeq ilmoeq kaovq-ai thaq nail phaq neq, gaqkhoel juq khi Miqyail nail haqbhoil gedan nail juq ngaol. Miqyail nuljuq bhai al nail kovtavq bhai kaovq-ai thaq nail ngaol. Yeiqsul Khali neq, ilkhaol nail jioivqloiv bhai kaovq-ai thaq nail lovmav heeq ma ngaol. 21 Aivq nail lavqkhoel nee ilkhaol il lao lao-ail teevq phaq nee teevq phaq tsaq lai thailthaiq nail ngaol. Yeiqsul nail lavqkhoel meeq nail haol nail uqhuq thaoq nail ilkhaol il ma pevq lal dai, ilkhaol al il eeq lal thailthaiq nail ngaol. 22 Miqyail jaol nail ilkhaol pevq lal dai, aivq neq, Aqhaqlal Miqyail bhai juq juq-ail nuljuq bhai iqsanl ilkhaol al il nail lavqkhoel bhai kaovq bhoel thailthaiq nail ngaol.