1 Aqivq jaqbheq juq-ol, ngadao nail Heeqphaq Yeiqsul Khali yavq kha lee nail ganl bhai maqkhaiq, ngadao aivq jaol nail bha ya jil lai nail ganl bhai maqkhaiq, nvjuq nuljuq bhai niailhai hal nail ngaol. 2 “Heeqphaq Yeiqsul nail aqn kev lee-aoq naol” dai, aqhaqlal lavqkhoel nee maqkhaiq, daoq ge daiq lavq nail lavqkhoel nee maqkhaiq, nvjuq nail haoqgavq khe-ai, gevq lavq nail lavqkhoel nee maqkhaiq, yu nuljuq bhai ge lal khi ngaol-aoq, niil juq bhaqda nee, nuljuq nail neema lavqtsail mail thaq suqsaq thaq geesil. 3 Tsaol-aq teevq gaq gail nuljuq bhai khul phaq nail ganl nee maqkhaiq, jalmul maq ya mul ya dai, yaolphaol yaoq. Khul khi mail dai ngal-aq neq, aqn al n maq kev lee-u nee mail, miltsaq kovtavq bhai Miqyail nail daoq maq naldaiq nail nee ovqtavq aivq bhai genl dev nail phaq pevq lal nail ngaol. Aq-u phao, haqeiv deedee nail gaq dov lal nail ngaol. Thailhai ngaol-aoq, haoqnao naosaq n-gaol, aivq neq, ya luq ya seil-ail nail ngaol. 4 Tsaol-aq al gaq Miqyail bhai maqkhaiq, Miqyail dai, yu khal khul nail juq bhai maqkhaiq, uqhuq thaoq nail yaoq phaq yaoq-ao nee bhai maqkhaiq, genl dev khi, al juq nee maqtsil aivq nail aqmaol bhai aivq thaqeeq nail ngaol. Aivq Miqyail nail uqhuq thaoq nail ilkhaol il ma nail lavqkhoel bhai jaoldeel khi, “Ngal neq Miqyail ngaol” dai, mailma-ail ge nail ngaol.

5 Ngal nuljuq nee mail jaol-u phao, ganl niil juq nuljuq bhai ge daiq bhiq-a nail bhai, nuljuq nioilpeivq ail-aoq nail laiq. 6 Niil aq-il nee mail haqeiv deedee nail al gaq maq dov lal nail neq, ganl teevq phaq jiav nail bhaqda nee mail ngaol. Ganl al phaq bhai nuljuq heeq nia nail ngaol. Aqyanq tsaq lal-u phao, alhai pevq lal nail ngaol.

7 Miqyail nail daoq bhai maq naldaiq nail phaq neq, niil aq-il iqsanl aqnav nail lavqkhoel bhai ganl nl thailthaiq nail ngaol. Thailhai ngaol-aoq, daoq maq naldaiq nail al phaq bhai maq bhi dov lal dai, lav tsoiq nail gaq jaol nail ngaol. Lav tsoiq nail gaq dov ail haq neq, ganl al juq pevq lal nail ngaol. 8 Aq-u phao, haqeiv deedee nail al gaq bhaqlaoq kheq dai dov lal nail ngaol. Thailhai ngaol-aoq, Heeqphaq Yeiqsul tsaol-aq al gaq bhai aivq nail aqhaq-i mail jiiv heivq nail ngaol. Aivq nail seiqleiq khaoqsail lavqkhoel nee yavq kha lee nail ngel-i mail, tsaol-aq al gaq luq-ail seil-ail nail ngaol. 9 Haqeiv nail tsaol-aq al gaq, neivq Saqdaq bhaqda nee dov lal-a nail ngaol. Aivq dov lal-u phao, yu bhai goiqbhaoq bhaoq ya nia dai, neivq Saqdaq nail bhaqaoq yuq nail lavqkhoel nee bhi heeq bhiq moel nail juq khi noeq-u maq dov nail phaq nl nail ngaol. 10 Luq-ail seil-ail thailthaiq nail tsaol-aq juq bhai goiqbhaoq bhaoq khi jalmul mul ya nia dai, aivq haqeiv nail yaoq phaq yaoq-ao nee bhai juq khi nl nail ngaol. Luq-ail seil-ail thailthaiq nail tsaol-aq, hevqkovq nail phaq bhai ya dai, maldil tsaq nail phaq bhai gaiq-a nail neema maq aol nail ngel-i mail, luq-ail seil-ail nail ngaol. 11-12 Alheel ngel-i mail, haqeiv nail phaq bhai lavqkhiq tsail khi, maldil tsaq nail phaq bhai neema maq thaqtsaol nail tsaol-aq iqsanl bhai yalkhaq dal dai, maq ngel nail phaq bhai neema bhi thaqtsaol dai, noeq bheeq noeq leel nail phaq Miqyail aqyu juq bhai bhi kev bhi thel lee-a nail ngaol.

13 Heeqphaq Yeiqsul mao-ail gaiq-a nail aqivq jaqbheq juq-ol, nuljuq nail haqbhoil khaq mao iqsanl Miqyail bhai tsiqeeq nail tsaq nail ngaol. Khul khi mail dai ngal-aq neq, Aqhaqlal Miqyail nuljuq bhai bhi haol lal nail nee ovqtavq, nuljuq maldil tsaq nail phaq bhai neema thaqtsaol-a nail bhaqda nee, hevqkovq nail phaq ya dai, iqmoeq-u phao nee Miqyail nuljuq bhai tsel dov-ai thaq nail ngaol. 14 Alhai pevq lal dai, Miqyail nvjuq-i mail cavq-a nail lavqkhiq tsail nail geeqlaoq daoq bhai juq khi nuljuq bhai khul-a nail ngaol. Nuljuq ngadao nail Heeqphaq Yeiqsul Khali nail seiqleiq khaoqsail bhai ya dai, aivq alhai khul-a nail ngaol. 15 Alheel ngel-i mail, aqivq jaqbheq juq-ol, ivqdao dai doevq yaoq. Nvjuq-i mail nuljuq bhai moeqthaoq-i mail cavq bhiq-a nail juq bhai maqkhaiq, haoqgavq gevq khi cavq bhiq-a nail juq bhai maqkhaiq, alhai cavq bhiq cov bhiq-a nail iqsanl bhai ivqdao dai, nieivq thaiq-ai thaq yaoq.

16 Ngadao nail Heeqphaq Yeiqsul Khali khi mail ngadao nail Aqbhu Miqyail ngadao bhai gaiq-a khi aivq nail geeqlaoq eeljaol bhaqda nee nqmaq maqluv halyeel neesal ya nail phaq maqkhaiq, ivqdao dai noeqthunq nail phaq maqkhaiq, ngadao bhai bivq lavq-a nail ngaol. 17 Heeqphaq Yeiqsul Khali khi ngadao nail Aqbhu Miqyail neq, nuljuq khaq mao iqsanl, aqmeeq phaq nl nia nail nee ovqtavq, daoq aqmeeq phaq ge nia dai, gaq bivq khi bhi ivq lal dei-eiq.