1 Ngal nuljuq bhai gevq bhoel-ai leevq-a nail yaqjaoq khaqlal miqthoi nail daoq bhai nuljuq micil bhi ol movq-ail nial. Teevq pov ol lavq dei-eiq. 2 Miqyail nuljuq bhai gaiq-a deedee nail khe-ai, ngal iqsanl nuljuq bhai gaiq-a deedee-ail nial. Khul khi mail dai ngal-aq neq, meeq nail haol nail yaqmai-aq yaqnoil khe-ai pevq khi Khali bhai taivq-ail bhi maol ail nail dai khi, ngal nuljuq-ai aivq nail aqlavq lavqkhoel bhai av bhiq-a nail ngaol. 3 Eellel neq, Eilbav bhai goiqbhaoq bhaoq khi jalmul mul ya-a nail khe-ai, nuljuq Khali bhai meeq nail haol nail lavqkhoel nee maldil gaiq-a nail phaq neema lavqkhoel nee peivq-ail nail khul-il dai, ngal khaoqlaol nail ngaol. 4 Tsaol-aq teevq gaq ganav nuljuq jaol nail bha lal khi, ngaq-i mail cavq-a nail Yeiqsul al gaq nail ganl maq cavq mail, Yeiqsul yaoq gaq yaoq nail ganl cavq bhiq-u phao, nuljuq aqyu juq nail daoq bhai naldaiq nail ngaol. Al ovqtavq, nuljuq-i mail ya-a nail aqhaqlal maq ngel nail, aqhaqlal yaoq phaq yaoq bhai ya nail maqkhaiq, nuljuq-i mail hav bhoel-a nail lavqkhiq tsail nail geeqlaoq daoq maq ngel nail, geeqlaoq daoq yaoq daoq yaoq bhai nuljuq hav bhoel nail ngaol. 5 Eeq jaiq heel jaiq nail gaqkhoel juq dai, nuljuq-i mail khul nail gaqkhoel al juq nee maqtsil ngal teevq peivq-ail maq theq jaiq-ail dai, ngal noeq nail ngaol. 6 Ngal daoq ge nail maq nia khi ngaol-aoq, neenoeq neekha aol naol. Ngal niailhai aol nail ngaol dai, yaoq phaq yaoq-ao nee nail lavqkhoel nuljuq bhai bhaqlaoq kheq dai, phaodaiq bhiq-a nail ngaol.

7 Nuljuq bhai thaqeeq bhiq nail dai khi, ngaq nail aqmaol bhai thaqtheq khi, lavqkhiq tsail nail geeqlaoq daoq bhai aqphoiq maq oil dai, nuljuq bhai cavq bhiq-a nail ngel-i mail, ngal oeqbal nl-a nail laiq. 8 Ngal nuljuq nail haqbhoil ganl nl kivq dai, Khali yaq yaoq munl yaoq juq nail phul oil nail neq, aqyu juq nail nlmaoq bhai tsai dov jaq nail khe-ai dul nail ngaol. 9 Ngal nuljuq nee jaol-u phao, ngal teevq phaq ganav loq lal khi ngaol-aoq, nuljuq bhai teevq phaq iqsanl maq hal-al. Khul khi mail dai ngal-aq, Maqgeiqdaolnil milkhaoq nee lee-a nail aqivq jaqbheq Khali yaq juq ngal khal loq nail juq bhai bivq lavq-a nail ngaol. Nuljuq bhai khul teevq phaq gail maq bhi dal dai, ngal alhai nl-ai thaq nail khe-ai, iqmoeq phao iqsanl nl laivq nail ngaol. 10 Khali nail maldil tsaq nail phaq ngaq nail lavqkhoel bhai aol nail khe-ai, Aqgaqyal milkhaoq bhai jaol nail tsaol-aq teevq gaq-ail ngal neema eeq duq jiav nail niilniai maq lav tsoiq nia-ail. 11 Khul khi mail ngel-ail. Ngal nuljuq bhai maq gaiq-a nail ngel-i mail laiq. Ngal nuljuq bhai gaiq-a nail ngaol dai, Miqyail heeq nia nail ngaol. 12 Ngal neq, jel lal-u phao nl lavq-a nail khe-ai, iqmoeq phao iqsanl nl laivq nail ngaol. Khul khi mail dai ngal-aq neq, “Nvjuq iqsanl nuljuq khe-ai dul dai ganl nl nail ngaol” dai, gaqkhoel al juq teevq gaq-ail maq ge nia dai, ngal niailhai nl thailthaiq nail ngaol. 13 Al juq neq, maldil gaqkhoel maq ngel nail juq ngaol. Aqyu juq neq, Khali nail gaqkhoel juq khe-ai dul khi ngaol-aoq, goiqbhaoq bhaoq bhaoq-ail aqdoevq doevq nail juq ngaol. 14 Aqyu juq alhai nl nail bhai noeq-u maq dov dai pevq-ail duq maq jiav-ail. Khul khi mail dai ngal-aq neq, neivq Saqdaq iqsanl aqbhaq bhaq nail nqtavq gaqkhoel khe-ai, pevq nia nail ngaol. 15 Alhai dul dai, aivq nail ganl nl nail juq iqsanl, tsaq nail daol nail haqbhoil ganl nl nail juq khe-ai jiovq nail bhai, noeq-u maq dov dai, pevq-ail duq maq jiav-ail. Aqyu juq ganl nl nail khe-ai, haoqnao naosaq aqyu juq ya daq nail ngaol.

16 Ngal teevq pov gaoq ge la dei-eiq. Nuljuq teevq gaq iqsanl ngaq bhai yaqjaoq khaqlal miqthoi niil dai, thaq noeq. Nuljuq alhai noeq khi ngaol-aoq, neema eeq nail lavqkhoel nee ngal daoq micil ge kivq dai, ngaq bhai yaqjaoq khaqlal miqthoi niil dai, saol-nvq lavq yaoq. 17 Ngal niailhai ge haq neq, Yeiqsul-i mail bhi ge lavq nail ngel-i mail ge nail maq ngel-ail. Yaqjaoq khaqlal miqthoi khe-ai neema eeq eeq-ail neekhaol teevq sil ge nail ngaol. 18 Thailhai ngaol-aoq, tsaol-aq maodai gaq aqsivq haqjoil phao khe ganl nee neema eeq eeq-ail ge nail khe-ai, ngal iqsanl neema eeq eeq-ail ge lavq bhel. 19 Nuljuq neq, neenoeq neekha aol nail tsaol-aq ngel-i mail, yaqjaoq khaqlal miqthoi juq bhai lavqkhiq teevq tsail dai, ol bhiq nail nial thoq laq. 20 Khul khi mail dai ngal neq, tsaol-aq teevq gaq ganav nuljuq bhai yaqkav bhi jiovq lavq nail maqkhaiq, nuljuq nail nlmaoq bhai oil nail maqkhaiq, nuljuq bhai khoiqbhaoq goiqbhaoq bhaoq jaq lal nail maqkhaiq, aivq nail aqmaol bhai aivq tsiqeeq tsiq heel nail maqkhaiq, nuljuq bhai naqteiv teiv lal nail maqkhaiq, nuljuq ol ol-ail jaol-ail nial. 21 Nvjuq neq, alhai nl bhiq nail phao, gaq bhaq-ail nial dai, haqsil nail lavqkhoel nee ngal ya ge nail nial thoq. Thailhai ngaol-aoq, tsaol-aq teevq gaq ganav neema eeq eeq-ail ge tseq haq neq, ngal iqsanl neema eeq eeq-ail ge tseq nail ngaol. (Ngal niailhai ge nail neq, yaqjaoq khaqlal miqthoi khe-ai ge nail ngaol.) 22 Aqyu juq Heiqbhail nail tsaol-aq laiq. Ngal iqsanl Heiqbhail tsaol-aq ngaol. Aqyu juq Ilsaqleiqlal nail tsaol-aq laiq. Ngal iqsanl Ilsaqleiqlal nail tsaol-aq ngaol. Aqyu juq Aqbhaqlaqhaq nail jeq-e jaq-a laiq. Ngal iqsanl aivq nail jeq-e jaq-a ngaol. 23 Aqyu juq Khali nail yaqkav laiq. Aqyu juq nee maqtsil ngal Khali nail yaqkav ngaol. (Ngal niailhai ge nail neq, naiquq khe-ai, ge thailthaiq nail ngaol.) Aqyu juq nee maqtsil ngal ganl nl thailthaiq nail ngaol. Aqyu juq nee maqtsil ngal thaonq bhai aol daiq-a nail ngaol. Maq ge gil tsaol dai, khoeq lavq jiovq lavq nail bhai ngal ya daq-a nail ngaol. Sil heeq phaq-ail tsaq dai iqsanl, mee nia pov daq-a nail ngaol. 24 Yuldav nail tsaol-aq-i mail hail tsel goiq lavq bhee dai, jiivq lavq nail bhai, ngal ngaq pov ya daq-a nail ngaol. 25 Neeqtsaq-i mail jiivq lavq nail bhai hail pov bhee dai, ya daq khi, lovmav-i mail liv lavq nail bhai iqsanl teevq pov ya daq-a nail ngaol. Laovq cov-ail nail bhai hail pov bhee dai, ya daq-a nail ngaol. Teevq n teevq kivq iqyaq iqma nail lavqkhoel bhai ya jaol-a nail ngaol. 26 Ngal teevq yanq ngal-aq, teevq pov gailkhaol dov ail nail lavqkhoel nee, mee nia phaq bhai geesil duq jiav jiav-ail tsao-a nail ngaol. Laoljaol eeq lee nail bhai maqkhaiq, tsaol pheel deeq lal nail bhai maqkhaiq, Yuldav nail tsaol-aq khoeq lal nail bhai maqkhaiq, yu nail jeq-e jaq-a khoeq lal nail bhai maqkhaiq, geesil geesil-ail tsao-a nail ngaol. Meenq lavqkhoel bhai maqkhaiq, haqtsoiq haqyal bhai maqkhaiq, iqyaq iqma kovtavq bhai maqkhaiq, geesil lal nail phaq bhai ya thaoqphuq-a nail nee ovqtavq, maldil Khali yaq maq ngel nail juq-i mail khal nl movq-ail nl lal nail bhai geesil geesil-ail, haq daiq-a nail ngaol. 27 Ganl nl deedee khi haq deedee nail lavqkhoel nee, mee nia pov maq ya iqthaiq-al. Aoq iqsanl ulcuvq iqsanl moevq daiq-a nail ngaol. Aoq iqsanl mee nia pov jeeq daiq-a nail ngaol. Aqcoevq coevq nail khi aqgaq aqdoi maq jiav nail, niil juq bhai iqsanl ya daq-a nail ngaol. 28 Niil juq bhai ya daq nail nee ovqtavq, Khali yaq munl iqsanl nail haqbhoil khaoqlaol heeq phaq-ail tsaq nail juq iqsanl yaoq n yaoq n nee ngaq nail kovtavq bhai jiav nail ngaol. 29 Tsaol-aq teevq gaq ganav gaq bhaq haq neq, ngal iqsanl gaq maq bhaq-ail laiq. Tsaol-aq teevq gaq ganav bhai bhi laiq bhi tsa-ail haq neq, ngal maq noeqhaq-ail laiq.

30 Ngal neema eeq eeq-ail, maldil daoq ya ge haq neq, ngaq nail gaq bhaq nail ganl juq taivq-ail neema eeq eeq-ail ge nail ngaol. 31 Ngal goiqbhaoq bhaoq nail maq ngel-ail dai, nqmaq maqluv halyeel tsiqeeq heeq phaq-ail geel-nvq nail, Heeqphaq Yeiqsul nail Aqbhu Miqyail heeq nia nail ngaol. 32 Ngal Daqmaqsail meenq bhai jaol-u phao, ngaq bhai nieivq nail dai khi, heeqphaq Aqleiqdal nail pul-nvq khe jaol nail aqivq gaq bhai Daqmaqsail meenq bhai bhi lovq-a nail ngaol. 33 Thailhai ngaol-aoq, ngaq nail aqtsaoq ngaq bhai kavlaol nail lavqkhoel-ai bhi aol lai lavq khi, laolkhoeq bhai daol nail lolgov gov yaq nee phaiq kha gai-aivq lavq-a nail ngel-i mail, aqivq al gaq nail aqlavq lavqkhoel nee ya jel ail-a nail ngaol.