1 Aqivq jaqbheq juq-ol, aq-u khe ganl, ngal nuljuq bhai niailhai bhi heeq kivq movq-ail nial. Molseiq nail haoqnao tsaothe nail ngadao nail aqphiq aqbhal juq nqdil nail kov-uvq bhai jaol khi, iqyaq iqma bhai ceiv-a nail ngaol. 2 Molseiq nail yaqlaol jiovq nail haqbhoil aqyu juq iqsanl mail nqdil khi iqyaq iqma lavqkhoel bhai ulcuvq saol-a nail ngaol. 3 Aqyu juq iqsanl aqhaqlal phao jaq nail phaq teevq phaq taivq-ail jaq-a nail ngaol. 4 Aqyu juq aqhaqlal phao daol nail phaq teevq phaq taivq-ail daol-a nail ngaol. Khul khi mail dai ngal-aq neq, aqhaqlal nail lovphail aqyu juq nail haoqnao tsaothe khi, lovphail al nee dov lee-a nail ulcuvq aqyu juq daol-a nail ngaol. Lovphail al neq, Khali ngaol. 5 Thailhai ngaol-aoq, Miqyail aqyu juq jemao bhai neekhaol maq sil-ail. Aqyu juq haqaiq mildai haqtsoiq haqyal bhai ya sil-a nail ngaol.

6 Niil neq, aqyu juq khe-ai haqeiv nail phaq bhai ngadao maq nl mail yaolphaol nia lal dai, saol oil duq pevq lal-a nail ngaol. 7 Aqyu juq teevq pav ganav juq thaoqphaoq aqma maolkhoel bhai uqhuq thaoq nail tsaol-aq pevq nail khe-ai, nuljuq thaq pevq. Jalliq lavqkhoel-ai gevq-ai thaq nail khe-ai, “Tsaol-aq teevq pav ganav juq jaoldeel khi jaq tavq daol tavq nail ngaol. A bhai nee ngal-aq, thul khi bhoeloe nioi nioi-ail aoltavq tavq nail ngaol” dai, gevq-ai thaq nail ngaol. 8 Aqyu juq teevq pav ganav juq khaqmiq sev nail ngaol. Ngadao alhai maq ya nl-ail. Aqyu juq alhai nl-a nail ngel-i mail, teevq n taivq-ail aqyu juq nail lavqkhoel-ai nvq meel-nvq hail hinl gaq ya sil-a nail ngaol. 9 Aqyu juq teevq pav ganav juq Khali bhai laonqdaiq-a nail ngaol. Ngadao alhai maq ya nl-ail. Aqyu juq alhai nl-a nail ngel-i mail, eellel-i mail aqyu juq bhai tuv heivq-a nail ngaol. 10 Aqyu juq teevq pav ganav juq Miqyail bhai daoq govq dov-a nail ngaol. Ngadao alhai maq ya nl-ail. Aqyu juq alhai nl-a nail ngel-i mail, sil nail phaq nail nqtavq gaqkhoel nail aqlavq lavqkhoel nee, ya luq ya seil ail-a nail ngaol.

11 Yu yaolphaol nia lal dai, aqyu juq nail lavqkhoel bhai al juq pevq lal khi, haoqnao naosaq khe aqn aqyanq lavqkhoel bhai jaol nail, ngadao bhai cavq lavq cov lavq nail dai khi, Jalliq lavqkhoel-ai gevq-ai thaq nail ngaol. 12 “Ngal ivqdao dai thulphaol-nvq thaq nail ngaol” dai, tsaol-aq teevq gaq ganav noeq haq neq, aivq maq ya tsuq-ail dai, yaolphaol nail tsaq nail ngaol. 13 Tsaol-aq yaq-i mail ya daq daiq-a nail jalmul mul nail juq taivq-ail, nuljuq ya daq nail ngaol. Miqyail saljial ivq nail ngel-i mail, nuljuq maq daq tsaol nail jalmul mul nail phaq nuljuq ya daq dai, aivq maq bhi kev lee-ail. Jalmul mul nail phaq ya daq-u phao, nuljuq daq tsaol dai, nuljuq ya jel-ail nail gailkhaol Miqyail lav sav-ai thaq nail ngaol.

14 Alheel ngel-i mail, ngal mao-ail gaiq-a nail tsaol-aq juq-ol, thaoqphaoq aqma maolkhoel bhai teevq peivq-ail uqhuq thaq thaoq. 15 Nuljuq neenoeq neekha aol nail tsaol-aq ngaol dai, ngal saol-nvq khi ge bhiq nail ngaol. Ngaq-i mail ge nail tsaq maq tsaq dai, nuljuq saol-nvq daiq yaoq. 16 Aqheeq tsilju nail ullul deq nail, geeqlaoq eeq nail khaoqanq nail haqbhoil ngadao Miqyail bhai tsiqeeq-u phao, ngadao Khali nail aqsivq bhai tavq nail ngaol dai, ge movq nail, maq ngel-ail laiq. Ngadao-i mail ngaoqpav nail khaqmul neq, Khali nail aqmaol lavqkhoel bhai ngadao teevq gaq khe-ai tavq nail ngaol dai, ge movq nail, maq ngel-ail laiq. 17 Khaqmul teevq heeq taivq-ail jiav nail ngel-i mail, ngadao mee nia gaq bhee khi ngaol-aoq, aqmaol teevq maol taivq-ail pevq nail ngaol. Khul khi mail dai ngal-aq neq, ngadao yaoq gaq yaoq-ao nee khaqmul teevq heeq teevq-eel bhai teevq gaq khe-ai jaq nail ngaol.

18 Ilsaqleiqlal nail tsaol-aq bhai saol-nvq daiq yaoq. Laol bhiq nail phaq bhai jaq nail tsaol-aq, laol duq bhai tavq nail tsaol-aq ngaol laq. 19 Ngal khul dai ge movq nail dai ngal-aq neq, thaoqphaoq aqma maolkhoel bhai laol bhiq nail phaq khi mail thaoqphaoq aqma maolkhoel neq, khul nail ganl tsoiq nail-aiq. Khul nail ganl maq tsoiq-ail. 20 Thailhai ngaol-aoq, laolkivq yaq-i mail laol bhiq nail phaq neq, Miqyail bhai laol bhiq nail maq ngel-ail. Neivq bhai laol bhiq nail ngaol. Ngal nuljuq bhai neivq nee mail maq bhi tavq movq-ail. 21 Nuljuq Heeqphaq Yeiqsul nail khaoqanq bhai daol haq neq, neivq nail khaoqanq bhai maq daol kivq-ail. Yeiqsul nail kovqkhail bhai jaoldeel haq neq, neivq nail kovqkhail bhai maq jaol deeq kivq-ail. 22 Miqyail neema phail lal dai, ngadao nl naol laiq. Ngadao aivq nee maqtsil gaq kav nail laiq.

23 Nuljuq neq, “Ngadao yaoq phaq yaoq-ao nee nl kivq nail aqkhaoqanq jiav nail ngaol” dai, ge nail ngaol. Nl kivq khi ngaol-aoq, yaoq phaq yaoq-ao nee ganl tsoiq nail maq ngel-ail. “Ngadao yaoq phaq yaoq-ao nee nl kivq nail aqkhaoqanq jiav nail ngaol.” Thailhai ngaol-aoq, yaoq phaq yaoq-ao nee bhi eeq bhi heel lal nia nail maq ngel-ail. 24 Khaq sil gaq maqkhaiq, yovqgavq bhai tavq nail phaq bhai taivq-ail thaq saol-nvq. Yu bhai tavq nail juq bhai iqsanl saol-nvq yaoq.

25 Nuljuq leiv bhai lai-u phao, heeq kivq nail neema bhaqda nee, maq naldaiq dai, a bhai gaoq nail haqjoil ul jaq yaoq. 26 Khul khi mail dai ngal-aq neq, miltsaq khi miltsaq kovtavq-ai khal jaol khal jiav nail yaoq phaq yaoq-ao nee Heeqphaq Miqyail nail ngaol.

27 Yeiqsul bhai neema maq thaqtsaol nail tsaol-aq, aqbhee bhee nail lavqkhoel-ai naoq bhai khul lal-u phao, naol ail movq haq neq, khal tsiq dal lavq nail juq bhai jaq yaoq. Heeq kivq nail neema bhaqda nee khul teevq phaq-ail thaq naldaiq. 28 Thailhai ngaol-aoq, “Niil neq, thaoqphaoq aqma maolkhoel bhai laol bhiq-a nail ngaol” dai, teevq gaq ganav naoq bhai ge lal haq neq, naoq bhai ge lal nail al gaq bhaqda nee maqkhaiq, heeq kivq nail neema bhaqda nee maqkhaiq, thaq jaq. 29 Heeq kivq nail neema dai ge nail neq, naoq-i mail heeq kivq nail neema bhai ge movq nail maq ngel. Ge lal-a al gaq-i mail heeq nia nail neema bhai ge movq-ail nial. Ngal nl nail aqkhaoqanq jiav nail juq bhai yu-i mail heeq nia nail neema bhai khul khi mail lav tsoiq nail ngel-ail. 30 Ngal Miqyail nail geeqlaoq bhai noeq kev khi jaq haq neq, aivq bhai tsiqeeq tsiqeeq-ail jaq khi ngaol-aoq, khul khi mail yu ngaq bhai khal ge movq-ail ge lal nail ngel-ail.

31 Alheel ngel-i mail, nuljuq jaq nail maqkhaiq, daol nail maqkhaiq, khul nl nail maqkhaiq, yaoq phaq yaoq-ao nee nail lavqkhoel yu Miqyail bhai tsiqeeq dai, nl yaoq. 32 Yuldav nail tsaol-aq maqkhaiq, Heiqlaqsal tsaol-aq maqkhaiq, Miqyail nail Khali yaq munl maqkhaiq, nuljuq bhaqda nee phaqthiq thiq duq thaq bhi jiav. 33 Ngal iqsanl, tsaol-aq maodai hevqkovq nail phaq ya dai, ngaq nail neekhaol teevq sil maq nl mail, yaoq phaq yaoq-ao nee nail lavqkhoel yu neekhaol sil dai, ngal laijai nail ngaol.