1 येसु आनि ओना सिस्युल्कु येरुसलेम होननेंके, येरुसलेमकु दग्गेरे जय्तुन मराकुना गुट्‍टातगा मंदनव बेत्‍पागे आनि बेतनिया इनना नाह्कुंक दग्गेरे एवतुर. अस्के ओना इव्वुर सिस्युल्कुन केय्‍सि, 2 “मिमेट मुन्‍ने दिस्सना नाटे होंट. अद नाटे होळियतारित्‍तेने, बस्केने बोर दानपोर्रो उद्‍दुवद उंदि गाळ्‍दि पोरि दोहाचि मत्‍तद मीक दिसंता, दान लेहाकुंचि पीसि वटु. 3 अदुन लेहानेंके, ‘इल्हा बारि कीसंतिर? इंचि बोरन्‍ना इत्‍ते, इद सामिंक अव्‍सरम मंता, कबळ आता पजा ओर बिराने वापस लोहानुर’ इंचि वेहाट,” इल्हा वेहचि ओर्कुन लोहचितोर.

4 येसु वेहतापे ओर अद नाटे होत्‍तुर. अगा हर्दा पक्‍काते उंदि लोता तल्‍पुना दग्गेरे गाळ्‍दि पोरि दोहचि मत्‍तद दिसता. अस्के अदुन लेहातुर. 5 अगा नित्‍तिसि मत्‍तुर इच्‍चुर लोकुल्क हूळसि, “मिमेट बतल कीसेक मंतिट? अदुन बारि लेहासेक मंतिट?” इंचि पूसकीतुर. 6 पूसकीतारिते, येसु वेहतापे ओर्क वेहतुर. अस्के अगा मत्‍ता लोकुल्क ओर्कुन होना हीतुर. 7 ओर अद गाळ्‍दि पोरिन येसुनगा तच्‍चि, दानपोर्रो ओरा कपडिं वाटतुर. अस्के येसु दानपोर्रो उद्तोर. 8 उद्‍दिस हर्रि पीसि होननेंके वेल्‍लेटुर लोकुल्क येसुंक कदर हियालय, ओर केर्ता अंगिन तेंडिस होनना हर्दे तारतुर. इंका इच्‍चुर लोकुल्क बारे नेलिने मत्‍ता मराकुनव कोम्मां नर्किस तच्‍चि हर्दे तारतुर. 9-10 आनि येसुना पज्जो-मुन्‍ने ताकाना लोकुल्क वरगेयसेके इल्हा इनुंदुर,

11 इल्हा येसु येरुसलेम सहरते वासि गुळितगा होत्‍तोर. अगा होंचि अन्‍नि वस्तुल्कुन तिरियसि हूळतोर. पजा पोळ्‍दु होत्‍ता इंचि ओना पन्‍नेंड सिस्युल्कुन पीसि बेतनिया नाटे होत्‍तोर.

12 इंकुंदि रोजु बेतनिया नाटेनाल मल्सि वायानेंके येसुंक कर्वेस्ता. 13 हर्दुक इच्‍चुर लक्‍कु उंदि पच्‍चटा अंजिर मरा दिसता. दानकु इच्‍चुं पंडिं मंतां बारे इंचि अद मरातगा होंचि हूळतोर. गानि दानकु वट्‍टि आकिंगे दिसतां. बारित्‍ते अद पंडिं हादाना वेला आयो. 14 अस्के येसु अद मरातुन, “इंदकेटाल नीवा पंडिं बस्केने बोरे तिन्‍नुर,” इंचि इत्‍तोर. अद पोल्‍लेतुन ओना सिस्युल्कु केंजतुर.

15 ओर येरुसलेम एव्ता पजा येसु गुळिते होत्‍तोर. अगा गुळिते बोरय्ते अम्मुमळ-अस्सुमळ कीसेक मत्‍तुर, ओर्कुन पलाते गेदमिस हीतोर. अल्हेने कोत्‍तां अदला-बदला कियानोरा बल्‍लन आनि मोक्‍कु हियालय पावरेम पिट्‍टें अम्मानोर्कुना कुर्सिन मिळ्हाचि वाटतोर. 16 अल्हा कीसि गुळिताल बोने बदे वस्तु पीसि होनुळ-वायुळ किया हिया हिल्‍लोर. 17 पजा ओर्क पेनदा पोल्‍लें वेहमळ सुरु कीतोर, “नावा लोतुन अंटुर लोकुल्क पारतना कियाना जागा इंदनुर इंचि पेन इत्‍ता इंचि, इल्हा दर्मसास्त्रमते रासि हिल्‍लेना? गानि मिमेट अदुन दोंगाल्क मक्‍कना लोतालेसिं कीतिर,” इंचि इत्‍तोर. 18 इल्हा इत्‍तद केंजसि पेर्मालोर, दर्मसास्त्रम कराहना गुरुल्क येसुन हव्कना पिलन सुरु कीतुर. गानि ओन अल्हा बतलन्‍ना कियालय वेरियुंदुर. बारित्‍ते अंटुर लोकुल्क ओर वेहना पोल्‍लें केंजसि इचंत्रम आयुंदुर. 19 पजा येसु आनि ओना सिस्युल्कु पोळ्‍दु होत्‍तारिते येरुसलेमताल पेय्सि होत्‍तुर.

20 इंकुंदि रोजु हक्‍केरेने मर्रा येरुसलेमतेके वायानेंके ओर अद अंजिर मरातुन हूळतुर, अस्के अद मरा हिह्कुनाल अय्ते कोस्सादाका पूरा वत्सि होंचि मत्‍ता. 21 येसु मुन्‍ने अद मरातुन इत्‍ता पोल्‍ले पत्रुंक मति वाता. अस्के ओर येसुन, “रबि† रबि इत्‍ते गुरु आंदुर. अद हूळा! निमे सापनेम हीता अंजिर मरा वत्सि होत्‍ता,” इंचि इत्‍तोर. 22-23 इत्‍तस्के येसु ओन, “मिमेट पेनदापोर्रो विस्वासम इर्राट. नना निजम वेहासेक मंतन, बोरन्‍ना इद गुट्‍टातुन, ‘इगेटाल तेदसि होंचि समुद्रमते अर्रा’ इंचि बतले अनमानम हिलाकुंटा विस्वासमते इत्‍ते, अद होंचि अर्रार. 24 अदुनहाटीं नना मीक वेहासेक मंतन, मिमेट पेनदुन पारतना कीसि बतलय्ते तल्कंतिर, अद माक दोर्कता इंचि विस्वासम कीम्टु, अस्के अद मीवादे आंता. 25 अल्हेने मीवा मनसुने गिंटा बोना पोर्रोनना पगा मत्‍ते, मिमेट पारतना कियालय निततस्के मुन्‍ने ओन मापि कीम्टु. अस्के स्वर्गमते मंदना पेन बाबाल मीवा तप्पुकुनगुडा मापि कींतोर. 26 मिमेट गिंटा इंका वरोना तप्पुकुन मापि कियाकुंटे, स्वर्गमते मंदना पेनबाबालगुडा मीवा तप्पुकुन मापि किय्योर,” इंचि वेहतोर.‡ इद वचन कोन्‍नि पुस्तकाल्कुने हिल्‍ले.

27 ओर येरुसलेम सहरते मर्रा वातुर. वासि येसु गुळिते तिरियसेक मत्‍तोर. अस्के पेर्मालोर, दर्मसास्त्रम कराहना गुरुल्क, यहुदि पेद्‍दाल्क येसुनगा वासि, 28 “निमे बोना अदिकारमते इव कबाह्क कीसेक मंतिन? इव कबाह्क कियाना अदिकारम नीकु बोर हीतोर?” इंचि पूसकीतुर. 29 अस्के येसु ओर्कुन, “ननागुडा मीकुन उंदि पोल्‍ले पूसकींतन. मिमेट अदुन जवाब हियानय्ते, नना बोना अदिकारमते इव कबाह्क कीसेक मंतन वेहंतन. 30 अय्ते, योहानुंक बापतिस्मा हीयाना अदिकारम पेनदाहेंदाल वाताना, हिलाकुंटे मनकलोराहेंदाल वाताना? नाक जवाब हीम्टु,” इंचि पूसकीतोर. 31-32 अस्के ओर, ओर-ओरे वळ्ककुनालय दल्‍गतुर, “मनम पेनदाहेंदाल वाता इनानय्ते, ‘मिमेट योहानुन बारि विस्वासम कियिर’ इंचि इनानुर. मनमगिंटा लोकुल्कुनहेंदाल वाता इनानय्ते, ‘लोकुल्कुंक होंग वायार,’ बारित्‍ते योहान निजमे पेनदा कबुरतोर इंचि अंटुर नम्मंतुर,” इंचि इनकुत्‍तुर. 33 अदुनहाटीं ओर येसुन, “अद माक एर्का हिल्‍ले,” इंचि इत्‍तुर. अस्के येसु ओर्कुन, “अल्हा अय्ते, ननागुडा इव कबाह्क बोना अदिकारमते कींतनो मीक वेहोन,” इंचि इत्‍तोर.