5
देय्यम पीतोन बेस कियमळ
(मत्तयाल 8:28-34; लूकाल 8:26-39)
1 अस्के येसु आनि ओना सिस्युल्कु सेर्वुना हब्बेटा बाजुंक मनना गिरासेन इनना एरियक एवतुर. 2 येसु डोंगाताल रेयतोर अस्के वरोर देय्यम पीता मनकल तापळनगाटाल पेय्सि येसुंक कलियालय वातोर. 3-4 ओन बच्चुंगो मल्कां बेडिने, गोल्सुकुने दोहचि वाटतुर, गानि ओर बेडिन उराहचि पोहतोर, गोल्सुकुन नेम्हाचि पोहतोर. ओन बोरे आपा परा हिल्लुर. ओर तापळनेन मनुंदुर, ओन बोरे गोल्सुकुने दोहा पराकोंदुर. 5 ओर नर्का-पिय्यल तापळने, गुट्टाने तिरियसेक वरगेयसेक मनुंदुर. ओनद ओरे बंडाने कोह्कुंचि नोप्पिं कीकुंदुर.
6 ओर येसुन लक्कुटाले हूळतोर आनि विच्चि वासि ओना काल्कुना पोर्रो अर्सि मोळ्कतोर. 7-8 मोळ्कीसि ओर येसुन, “ए अन्निटकन्ना पेद्दा पेनदा मर्रि येसु, नावातोनि नीकु बतल गावाले? निमे नाकुन तकलिप किय्योन इंचि पेनदा ओट्टु तिंचि वेहा,” इंचि जोरसे वरगेयसि इत्तोर. बारित्ते येसु आ मनकन पीता देय्यमतुन, “ओनगाटाल पलाते पेय्सा,” इंचि हुकुम हीसि मत्तोर. 9 मर्रा दान, “नीवा पोर्रोल बतल वेहा?” इंचि येसु पूसकीतोर. अस्के ओना लोप्पो मत्ता देय्यम, “नावा पोर्रोल ‘मंदा’ आंद. बारित्ते मोमोट वेल्लेने मंदा आसि मंतोम,” इंचि ओन जवाब हीता. 10 ओना लोप्पो मत्ता देय्याल्कु, “माकुन इद एरियाताल पलाते गेदुममा,” इंचि येसुन उंदेतीर बत्मिलाळतां. 11 अद वेलाते गुट्टा पक्काते पद्दिना पेद्दा मंदा मेयसेक मत्ता. 12 अस्के अव देय्याल्कु येसुन, “माकुन आ पद्दिना लोप्पो नेंगालय लोहचिम,” इंचि बत्मिलाळतां. 13 सरे कानि इंचि ओप्कुत्तोर. अस्के अव देय्याल्कु ओनगाटाल पेय्सि पद्दिना लोप्पो होंचि होळियतां. अव पद्दिं रोंडु वेय्कुन दाका मत्तां. अव पद्दिं गुट्टातगाटाल जोरसे हिळु विच्चि सेर्वुने अर्सि मुळगिस हातां.
14 अद हूळसि पद्दिं मेहानुर वित्सि होंचि, सहरते, पक्का पीसि मत्ता नाह्कुने अगा जर्गतद वेहतुर. अस्के बल्हा-बतल आता इंचि लोकुल्क हूळालय अगा वातुर. 15 अगा वासि हूळतुर अय्ते, देय्याल्कु पीसि मत्ता मनकल पुरागा बेस आतोर आनि कपडिं केर्सि उद्दिस मत्तद ओर्क दिसतोर. अल्हा मत्तद हूळसि ओर्क वेर्रे दल्गता. 16 देय्याल्कु पीसि मत्ता मनकल बल्हा बेस आतोर, पद्दिंक बल्हा-बतल आता इवन्नि पोल्लें अगा मत्तोर, हूळालय वातोर्कुंक वेहतुर. 17 इवन्नि पोल्लें केंजसि लोकुल्क, “निमे मा एरियाताल पेय्सि होन,” इंचि येसुन विनंति कियालय दल्गतुर.
18 अस्के येसु होनालय डोंगाते उदसेके मनानेंके, देय्याल्कुनगाटाल बेस आता मनकल वासि, “नाकुनगुडा नीवातोनि वाया हीम,” इंचि येसुन विनंति कीतोर. 19 गानि येसु ओपकुन्ना हिल्लोर, “निमे लोन होंचि नीवा लोतोर्कुंक बेस आतन इंचि वेहा,” इंचि इत्तोर. 20 अय्ते ओर मनकल अगटाल देकपोलि एरियाते होंचि, येसु ओन बल्हा बेस कीतोर, इवन्नि पोल्लें वेहालय दल्गतोर. अद केंजसि अंटुर इचंत्रम आतुर.
उंदि मुर्तटुन बेस कियमळ
(मत्तयाल 9:18-26; लूकाल 8:40-56)
21 येसु डोंगाते उद्दिस सेर्वुना हब्बेटा ओड्डुंक मर्रा मल्सि होत्तोर. ओन हूळसि वेल्लेने मंदि ओनगा जमा आतुर. ओर सेर्वुना ओड्डुनगा मत्तोर. 22 अस्के दर्मसास्त्रम कराहना लोता वरोर यायिर पोर्रोलतोर अदिकारि येसुनगा वातोर आनि ओना काल्कुनपोर्रो अर्सि, 23 “नावा सिन्न मिय्यळ बेस हिलाका हायनाल आसि मंता. निमे वासि दानपोर्रो कय इर्ते, अद बेस आसि दाना जीवा पिस्संता,” इंचि विनंति कीतोर. 24 येसु आ अदिकारिनातोनि होत्तोर. येसुना पज्जो वेल्लेन मंदि पेय्सि ओना सुट्टु वेल्ले गर्दि कीसि पोर्रो-पोर्रो अरालय आयुंदुर. 25 आ मंदिते पन्नेंड वर्सानाल उंदेतीर कपडि आयानद उंदि मुर्तळ मत्ता. 26 अद वेल्लेटुर वैदकुल्कुंक हूपिस्ता. दानगा मत्ता कोत्तांता मार्तां गानि दाना बीमार बेस आयाका एक्कोने आसेके होत्ता. इल्हा अद वेल्लेने तकलिपने बोगांचता. 27-28 अद मुर्तळ येसुना बारेमते केंजसि मत्ता. दाना मनसुने, “नना येसुना कपडितुन कमसेकम इटते बेस आंतन,” इंचि अद इनकुत्ता. अदुनहाटीं गर्दिते येसुना पज्जो वासि ओना कपडितुन इटता. 29 इटता इटुळे दाना कपडि आयमळ बंद आता आनि बीमार बेस आता इंचि दानकु अनपिस्ता.
30 अदे वेलाते येसुंक ओना लोप्पोटाल ताकत पेय्सता इंचि अनपिस्ता. अस्के येसु पज्जो मल्सि, “नावा कपडितुन बोर इटतुर?” इंचि अगा गर्दि कीतोर्कुन पूसकीतोर. 31 ओना सिस्युल्कु ओन, “गर्दिते लोकुल्क वरोनपोर्रो- वरोर अर्रानद निमे हूळसेक मंचिगुडा, नावा कपडितुन बोर इटतुर? इंचि पूसकीसेके मंतिन,” इंचि इत्तुर. 32 गानि, “नाकुन बोरन्ना इटसि मंदगोम,” इंचि येसु अंटुरेके हूळसेक मत्तोर. 33 अस्के अद मुरतळकु, बेस आतद तेळियताहाटीं वेरियसेके, गजागजा वन्कुसेके येसुनगा वासि ओना काल्कुना पोर्रो अर्ता आनि अगा जर्गतद सत्तेम-सत्तेम वेहता. 34 अस्के येसु आ मुर्ताटुन, “मियाटुना, नीवा विस्वासमे नीकुन बेस कीता. इसोंटा बीमार मर्रा बस्केने वायो, सांतिते होन,” इंचि इत्तोर.
येसु हाता पेगिटुन जीवा अराहमळ
35 येसु इल्हा वळ्कसेक मनानेंके, आ अदिकारिना लोताल इच्चुर लोकुल्क वासि, “नीवा मिय्यळ हाता, इंदके गुरुन तकलिप कियमा,” इंचि वेहतुर. 36 ओर वेहतद येसु केंजसि दर्मसास्त्रम कराहना लोता अदिकारिनतोनि, “निमे वेरियमा, विस्वासम इर्रा,” इंचि इत्तोर. 37 आनि येसु अगटाल पेय्सानेंके पत्रुन, याकोबुन आनि याकोबुना तम्मुर योहानुन ओनातोनि पीकुत्तोर. ओर्क तप्पा बोने ओना पज्जो वाया हिया हिल्लोर. 38 ओर दर्मसास्त्रम कराहना लोता अदिकारिना लोन वातुर, अगा लोकुल्क बागा अळानद, मोत्कुनानद येसु हूळतोर. 39 अस्के येसु लोप्पो होळियसि ओरतोनि, “मिमेट अडमळ-मोत्कुनमळ बारि कीसेक मंतिर? अद पेगिळ हाया हिल्ले, मींडसि मंता,” इंचि इत्तोर. 40 अल्हा इत्तद केंजसि ओर येसुन कव्तुर. गानि येसु ओर अंटुर्कुन पलाते लोहतोर आनि पेगिटा यावन-बान, ओनतोनि बोरय्ते मत्तुर ओर्कुन पीकुंचि पेगिळ मींडसि मत्ता अर्राते होत्तोर. 41 होंचि अद पेगिटा कयदुन पीसि, “तलिता कुम” इंचि इत्तोर. इत्ते, “सिन्ना पेगिटना, निमे तेदा!” इंचि अर्तम. 42 अल्हा इत्तारितेने अद पन्नेंड वर्साना पेगिळ ताकालय दल्गता. अदुन हूळसि, अगा मत्तोर वेल्लेन इचंत्रम आतुर. 43 “इगे जर्गतद बोर्के तेळिया मनि” इंचि ओर्कु गट्टिगा हुकुम हीतोर, आनि “अद पेगिळ्क बतलन्ना तिनालय हीम्टु,” इंचि वेहतोर.