1 Babilonia namak aidaunum

uwet pekaamsaja,

Jerusalén anentaimtusa buutiaji.

2 Nuwi numi ayaunum nuna kanawen

iina arpaji aidau nenayaji.

3 Nunika nuwi batsatjin

suntag iina achipag yajupaku aidau

chichagtamainak:

“¡Shiig aneasjum kantamatajum,

tuja atumi nugkem Sión pachisjumshakam

kantamatajum!” tusa waitkagmayanume.

4 Iik makichkish iina Apajuíji kantamjutaig

tikich nugkanmak kantamaitsuji, tuyaji.

5 ¡Jerusalégkah,

wi amina kajimatkin idaitaik,

mina uweg untsujua duka makichkish achika

takamainchau wajasti!

6 ¡Tuja wi amina eme anentsuk,

kajimatkin idaikun shiig aneasan pujutaik,

mina idaijuk kayakmataijui nujamak asati.

7 Tuke Pujuuwah,

babilonianmaya aents aidau

Jerusalégkan tsaikajua duwi,

Edom aents aidau chichainak:

“¡Ashí tsaiktajum!” tusa imatianum

nunú kajimatki idaisaipa!

8 ¡Babiloniah, ameshkam tsayam atatme!

¡Ame jutii aidauti waitkagkagtam

nuna iiktamainak tsaipaidauk

shiig aneasagtin atinme!

9 ¡Amina uchijum aidaun achika yajuakag

kayanum anugkag tsupig ijinawagtina nunak

Apajuí pegkegnum yumigjatin ati!