1 Tuke Pujuuwah, jutiik eme anenkagtusaipa,

dekas ima amek eme anenmamta,

amina anenkagmin,

tuja dekaskegmijai eme anenmamta.

2 Wagkag aents pegkegchau aidaush

jutiin chichagtamainakush ¿tuwi pujawa

atumi Apajuígmesh, tusash tujamiajainta?

3 Iina Apajuíjig nayaimpinum pujawai,

tuja nii wakegamu aidaun ashí najankauwai.

4 Aents pegkegchau aidau

apajuímtaijig oro, plata ainawai.

Tuja duka aents najankamu ainawai.

5 Dita apajuímtaijig weni ajamaitak

chichachu ainawai;

jiishkam ajamaitak wainmachu ainawai.

6 Kuwishish ajuidau, tujash antuchu;

nujintin, tujash mayatchau;

7 uwegtin aidau, tujash achimchau;

nawentin aidau, tujash wekaechau;

¡makichik chichamujigkesh

antugchatai ainawai!

8 Nuniau asamtai aents nuna najanin,

tuja nunú dakumka najanamua

nuna emematin aina duka

dita apajuímtaijijai betek ainawai.

9 ¡Israel aents aidautigmek,

Tuke Pujuuwaig kajinmamsa anentaimsatajum!

Wagki nii jutiinak yaimpawai,

tuja nigki kuitamjamui.

10 Sacerdote aidautigmesh

ima Tuke Pujuuwaig kajinmamsa

anentaimtajum.

Wagki nii jutiinak yaimpawai,

tuja nigki kuitamjamui.

11 Ashí aents Tuke Pujuu umijin aidautigmek,

¡Tuke Pujuuwaig kajinmamsa anentaimsatajum!

Wagki nii jutiinak yaimpawai,

tuja nigki kuitamjamui.

12 ¡Tuke Pujuu iinak kajimatjamtsuk

pegkegnum yumigtamjatnai!

¡Israel aents aidaunashkam

pegkegnum yumigjatnai!

¡Sacerdote aidaunashkam

pegkegnum yumigjatnai!

13 Aents Tuke Pujuun eme anentus

umijin aidaun:

aents eme anentsa diishtai,

eme anentsa diitai aidaujai

Apajuí ashí ditanak pegkegnum yumigjatnai.

14 Tuke Pujuu atumi uchijum aidaunash,

tuja nuna uchiji aidaunash uyujtugmaktinai.

15 ¡Tuke Pujuu nayaimpin, nugkajai najanauwa nunú

aminak pegkegnum yumigtamsattawai!

16 Nayaimpia auk Tuke Pujuunui,

tuja nugka nuna aents aidaun susauwai.

17 Jakau aidauk chichamainchau asag,

Tuke Pujuunak emematmainchau ainawai.

18 Untsu ii iwaku aidautik

tuke ememattinaitji.

¡Yajauwajah!

Iina Apajuíji ememattai ati.