1 ¡Tuke Pujuu see titajum!

¡Niina daaji pachisjum

aents aidau ujaktajum!

Dutikakjum nii takatji

tikich nugkanmaya aidaush ujaktajum.

2 Apajuí wainchatai aidaun

iwainajua nunú anentaimtusjum,

kantamtai kantamjuatajum.

3 Niina daaji pegkegma nunú

anentaimtusjum eme anenmamtajum.

¡Tuke Pujuun umijin aidautigmek,

shiig aneastajum!

4 Ashí tsawantai Tuke Pujuu egaktajum,

nuniakjum niina senchijiya nunú segatajum.

¡Tuké Apajuí egaktajum!

5-6 Apajuí ii aidautin, tuja niina inake Abraham, Jacob aajaku aina

nunú wegantu aidaun etegjauwa nuna,

ayamjak wainchatai ishamain aidaun

iwainajua nunú anentaimtustajum.

Tuja chicham umiktin agagbauwa

dushakam adeagtajum.

7 Niyai Tuke Pujuu, iina Apajuíjiya nunú;

niyai ashí aents aina nuna apujig.

8 Kuashat mijan nagkaemataish,

nuna dutikatjai tusa anagkagtuamujinak

Apajuík tuke kajimatkishtinai.

9 Nunak Abrahamjai umikua nuna,

Isaakjaishkam ataktu umikui.

10 Nuna Jacobjaishkam umikui,

tuja nunú tuke asatin

Israel aents aidaunum juwakui.

11 Nuadui Apajuí niina chichajak:

“Wi nugka Canaágnak amastajai,

aminu tuke atina nuna”, tiuwai.

12 Israel wegantu aidauk

ujumchik aajaku aina duwik

nugkenchau asag,

Canaán nugkanmak ijagjai betek

wainak yujajaku ainawai.

13 Nunidau asag,

tikich nugkanum shiyakag,

nuwi batsamas, nuna ukuinak

tikich apu aidau batsatbaunum jegawag,

nuwi ujumchik tsawan pujusag,

waja yujayanume.

14 Tujash Apajuík

waitkastinme tusag idaisachmayi,

nuadui ditan ayamjak

apu aidaun suwimkan susabi.

15 Nuadui apu aidaun chichajak:

“Mina aentsug wi etegjamu aina duka,

tuja mina chichamjun etsejin aidaushkam

makichkish waitkasaigpajum”, tiuwai.

16 Tuja Canaán nugkanum

Apajuí ajak aidaun ashí ijinabi,

dutikamu asa nujan tepeabi.

17 Tujash eke nujan tepeatsaig,

Apajuí Josén emtika Egipto nugkanum

awemauwai, dita yachi aidau

wainka inataijai betek sujukajua nuna.

18 Dutikam Egipto nugkanum jegamtai,

Josénak jijui dawenum jigkajag

jukiag aents achika egketainum

egkeawagmayi.

19 Tuja José kajamjamuji uminkati tusa,

Tuke Pujuu niina dekapeak

kuashat tsawan waitkastinme tiuwai.

20 Nunik waitu pujaun,

Egipto nugkan apuji José jiiktajum tusa

inamjamtai jiikiagmayi,

dutika agkanmitkabi.

21 Dutika jiiki niina jeen apuji ema,

nuigtu niinu aidau Egipto nugkanum ayaunak ashí diisti tusa niina idaitusui.

22 Tuja nuigtushkam apu atuwe aidaun,

tuja tikich apu aidaunashkam

nigki jintintua unuinakti tusa idaitusui.

23 Nunikbaunum Jacob Israel daagtin

aajakua nunú Egipto nugkanum jegauwai.

Nunik jegaa tikich nugkanmayayaitak

Cam nugkanum pujusui.

24 Nunik pujusmatai, Apajuí

nii aentsji aidaun kuashat uyujkauwai,

dutika niina shiwaaji aidaun

nagkaesau senchigtin emauwai.

25 Tujash egiptunmaya aidau

Israel aents aidaun kajejiagti,

dutikainak tsanujagtinme tusa

Apajuí tsagkamkauwai.

26 Tuja kuashat waitkagtai,

Apajuí niina inake etegkamujin Moisésan Aarógjai

Egipto nugkanum awemauwai.

27 Nuadui Apajuí senchijin

wainchatai ishamain aidaun Egipto nugkanum, Cam nugkanum iwainakajui.

28 Tuja Egipto nungkak ashí suwe wajasti tusa

Apajuí suwe emabi.

Nuna wainainayatak

egiptunmaya aents aidauk,

Apajuí chichamenak

antugkachaju ainawai.

29 Tuja yumi aidaunak ashí numpa awajtusui;

imanikmatai, namak aidaushkam jinawajui.

30 Takash aidaunashkam,

ashí yaaktanum piyakti,

nuniak apu pegajinish

tuja nii ekemtaijinish utsaniag

waitkasti tusa ishitkabi.

31 Apajuí nunikti timatai,

anchi teteejai pachimnag,

yujagkim wajukama imanik

Egipto nugkanak akijuawabi.

32 Tuja yumin yutumtiktsuk,

bicha kaya iman najaneaku

jiijai pachimag nayaimpinmayan

Egipto nugkanum yutumtikjabi.

33 Nunú yutak uva ajakbau aidaun,

higo aidaunash ijinabi.

Dutikak numi kanawe

aidaunashkam ashí kupijabi.

34 Tuja Apajuí ataktushkam nunikti tusa timatai,

manchi aidau shiig kuashat kaketukmayi.

¡Shiig kuashat asa dekapatash dekapamaichabi!

35 ¡Imaniau asa ajak ajanum ayaunak,

tuja dupa aidaunak ashí amukagmayi!

36 ¡Dutiksag egiptunmaya aents aidaun

uchiji iwai aidaunashkam ijituabi!

37 Dutika nuadui,

iina muunji aidaunak Apajuí

oro aidaun, tuja plata aidaun

aatus uyumitkak jiigmayi.

Nunik shimakush Israel aents aidauk

makichik kayanakesh tukumkachagmayi.

38 Nunik shimiagtai, egiptunmaya aidauk

ishamkagtu batsatu asag,

shiig aneasaju ainawai.

39 Dutika jiija yujagmin awetiuwai,

niina aentsji aidaun ejakti tusa;

tuja dutiksag kashi diisag

shiyaktinnashkam jii kegaun awetiuwai.

40 Tuja yumainji atsujam yapajuinak sumagtaish,

codornisan ishitkabi;

tuja nayaimpinmaya yutai susam

nuna yuwawag ejemajag

shiig aneasagmayi.

41 Tuja Moisés kayan awatmatai,

kayanmaya yumi jiinkibi,

nunik entsajai betek wajas

uwegshunum akaikibi.

42 Apajuí yaunchuk Abrahaman

anagkuamunak betek umikmayi.

43 Aatus Apajuí niina aentsji aidau

Egipto nugkanum batsatun jiigmayi.

Dutikam aents aidauk

shiig aneenak untsumiagmayi.

44 Dutika yajuak nugka

tikich aents aidau batsamtain susabi,

dutikak ajak tikich aents aidau

ajakbau aidaunashkam susabi.

45 Nunak Apajuí dutikauwai,

juwi batsamas chicham umiktin agagbauwa nuna umiktinme tau asa.

¡Yajauwajah! Apajuí emematiagmi.