40
1 Nuigtushkam Tuke Pujuu Jopan chichajak:
2 “Witjai Apajuí ashí senchigtinun,
amek mina chicham patatjukume,
nuniakum umikchamna nunin diigsaume.
¿Dusha yamaish nunismekek anentaimam?
nunú yamai tujutta”, tiuwai.
3 Tuke Pujuu nuna tusa inagnakmatai, Job ayaak:
4 “¡Wisha wainkauchitag juninnush,
wajintuk aiktajame aminash!
Wi tumainuk makichkish atsugtawai.
5 Wika kuashat chichakjai,
nuigtu tikich tumainuk atsugtawai”, tiuwai.
Apajuí Jopan ataktu awagki tibau
6 Tusa tama Tuke Pujuu dase senchi dasenbaunmaya ataktu Jopan chichajak:
7 “¡Diik ibau wajiuwaitkumek,
sapigmatsuk wi amina
iniastatjam nunú aigkata!
8 ¡Ame pegkeg jumamkum
mina pegkegchauwa nunin jujukiume!
9 ¿Amekaitam mina nagkaetasu ima senchigtinum?
¿Ame chichamugmish
wi chichamu chaagpijai beteka ibaukai?
10 ¡Nunú dekasketkuig, amina imanjum
senchigmejai iwainmamkata!
11 Tuja imanika kajeakmek
katsuntu pujutsuk, aents
emebau aina nunú
suwimak susam inatsakta.
12 Kame ame ima pegkeg takau asam,
apu emebau aina duka diyamuik
dita inamtaiji aina nunú emegkatjata.
Tuja aents pegkegchau aina
duka tuwi ame waintatme,
dutikakum ijina utsagta.
13 Dutikam nugka taim ashí yutuata.
Dutikawamin magkagtin aidau
achikam chimpimama numamtuk,
aents jinau aidau
batsatbaunum batsamsatnume.
14 Nunú dutikawamin,
niina senchijiniap imanik depetmake titajai.
15 “Amesh kuntin múun
Behemot tutaiya nunú
anentaimtusa diista.
Wi nunú kuntinun najanauwaitag
dutiksanuk aminashkam najanawaitjame.
Nunú kuntinuk bueyejai betek dupan yuwai.
16 Niina senchiji aina duka
tuntupega nuwi ashí ajawai.
17 Untsu ujekeg setug katsugma imanai.
Tuja yaape nawen achitjau aidaushkam,
daek chapikmagbaujai
betek kampujam ainawai.
18 Tuja ukunchi aidauk,
tubo jiju bronce tutai najanamua imanai.
Untsu bakui aidauk jiju hierro tutai
katsugma iman ainawai.
19 Wi kuntin aidaun najankauwaitag
nujai ijumja diismash,
nunú kuntinun nagkaesauk
tikichik atsawai.
Nunú kuntinu maumainuk makichkish atsawai,
ima wiki maumainaitjai,
wagki wi niinak najadau asan.
20 Nunú kuntinuk chijichin yusa pujuuwai,
nuadui ibau múun senchigtin ataish,
tikich kuntin aina duka ishamainatsui.
Tuja nii chijichin yuwak tepetai,
tikich kuntin aidauk nuna tentea
batsamas wasugkamin ainawai.
21 Tuja ayamsatag takug
numi jagkigtin loto tutai aina
nuna wakentin tepenai,
nuniachkush kuchanum tagkan ayaunum
waigka uumak tepenai bichatjatatus.
22 Numi loto tutai aina
nuna kanawe bikintu emamunum,
tuja numi álamo tutai
entsa akaebaunum tsapaka bikintu emamunum nuwi waig tepenai.
23 Nujag senchi dujajutaish ishamchauwai.
Tuja nujag dujajua utugmashkam
ishamtsuk tepenai.
24 Nunú kuntinun makichik aentskesh achika,
jii ukuituk wainmachu emamainuk atsawai.
Nuigtush nujiin tigkajua daekai wegak anaa
emetmainuk atsawai.”