1 Uwejush ajak ajakmamainchau

buku wajas awa duka

nugka pegkeg wajastatui,

nunik ajak aidau tsapatai, uwegshuk aents

shiig aneemaina numamtuk shiig aneastatui.

2 Nunik ajak aidau kuashat tsapakmatai,

uwegshuk shiig aneas senchi kantamtatui.

Tuke Pujuuwa nunú uwegshunak,

Líbano nugka, Carmelo nugka,

Sarón nugka pegkeg aina iman awajsattawai.

Dutikamtai ashí aents aidauk

iina Apajuíji imanjiya nuna niina senchijijai wainkagtinai.

3 Atum mina chichameg antautigmek,

Judá wegantu kakaakchau aina nunú ichichiagtajum,

dutikakjum pimpikiu aidaushkam yaigtajum.

4 Tuja sapig aidau chichagkujum:

“¡Ishamkagtutsuk, aishmag wajastajum!

¡Amina Apajuíjum juwi pujawai uwemtijamjagtatus,

tuja iina shiwaaji aina nunak nii suwimkan susattawai!” titajum.

5 Dutikamtai aents wainmachu aidau wainmakagtinai,

tuja empeku aidaushkam chichaman antukagtinai;

6 tuja aents shutuu aidaush

japajai betek tsekeniagtatui,

nuninai chichachu aidaushkam chichainak shiig aneasag untsumiagtinai.

Nuninai uwegshunmashkam

shiig kuashat yumi pukuni jiiniagtinai.

7 Imanidau asamtai,

uwegshuk yumi wajas asattawai,

tuja nugka bukunmashkam kuashat yumi pukuni jiiniagtatui.

Tuja lobo batsamtai aina nuwig

tagkan kajis aidaujai tsapaktatui.

8 Nuwi atinai makichik jinta.

Nuna daajig: “Jinta pegkejam” tutai atinai.

Aents pegkeechu aidauk

nunú jintanmak wechagtin ainawai;

tuja aents anentainkachu aidauk nunú jintanmak yujaschagtin ainawai.

9 Nuwig leónkak atsutnai,

tuja tikich kuntin yukagtin aidaukesh

nunak makichkish adijkachagtinai.

Tuja Tuke Pujuu uwemtikjamu aidauk nunú jinta nuni waketjagtinai.

10 Tuke Pujuu uwemtikjamu aidauk shiig aneas kantamkiag

Jerusalén utsanawagtinai.

Nunikag tuké shiig aneasag batsamsagtinai.

Ditaig ima shiig aneamua duke atinai.

Nuadui wake besemjak atsutnai,

tuja najaimamushkam atsutnai.