1-2 ¡Sacerdote aidauwah, antugtuktajum!

¡Israel aents aidauwah, antugtuktajum!

Apu patayi aidauwah, shiig antuktajum.

Atum aidautijum mina aentsug aidau tsanuakjum,

wainka apajuímtai aidau ememattajum tusajum

dita dakituinaig, waitkasjum muja Tabornum, Mizpanum

awekasjum, Sitima pakajin yumigmat taimu

ukumkimujai betek awajsauwaitjum duwi

suwimkan amastatjime.

3 Efraín wegantu aidauwah,

Israel aents aidauwah,

wika atum wajuku ainagme nunak shiig dekajai.

Atumek nuwa akika dutiktaijai betek ainagme.

4 Nuadui ataktu Apajuí umigkatag tajuminish, atumi pegkegchau takataijum aina nunú

nunimainchau etamainawai.

Wainka apajuímtai aidau emematuidau asajum

minak iina Apajuíjiyapi tujuttsugme.

5 Atumek pegkegchau, emebau ainagme,

nunin asajum ijina utsam atatjume.

¡Judá wegantu aidaushkam dutiksaik ijinam agtatui!

6 Tuke Pujuu tsagkugtamjati anentag susami tusag,

uwig aidaun, baka aidaun yajuak shimiagtinai,

nuninakush Apajuí idaisamu asag, niinak wainkachagtinai.

7 Ditak Tuke Pujuunak umigchau ainawai,

dita uchiji aina duka mina uchigchau ainawai.

Ima Apajuínak umigchau aina duwi

dita nugkenak ditajai ijumag makichik nantuik

tsaika emegkam agtatui.

8 ¡Kachu Guibeánum umpuagtajum,

untsu uwija kachuji Ramánum umpuagtajum!

¡Adeagtinme tusa umputai Bet-avénnum umpuagtajum!

¡Benjamín wegantu aidau ujaktajum aneaku pujustinme!

9 Israel aents aidaun suwimkan susattajai tiuwaitag

duka imanisag uminkattawai tusan etsegjai.

Nuna dutika ai, Efraín wegantu aidaun nugkeg

yaakat aidaujaí tsaigkam bashiak asatnai.

10 Judá wegantu aidaun apuji aidauk

aents ajantsuk tikichi nugken kasajin aina

nujai betek asag Israel aents aidau nugken atantuinawai.

Nunin asagmatai wi kajekbaujui ditanak suwimkan susagtatjai.

11 Israel aents aidauk wainka apajuímtai aina nuninun

apajuíma yujau asagmatai,

tepejus chichajuinak ajantusash diitsuk

dushiki batsamtuinawai.

12 Nuadui Israel aents aidaunak,

Judá wegantu aidaujaí ijinattajai.

Mamuk numin amuwama numamtuk ashí amuktatjai.

13 Tuja Israel aents aidauk, Judá wegantu aidaujai

dita kuashat pegkegchau takamsamujin

mai suwimka jukiag waituinak,

asirianmaya apu yaimpakti tusag shimutkagtinai,

tujash niig makichkish yaigchatnai.

14 Israel aents aidaunak,

Judá wegantujai leónjai betek jetektatjai,

dutikan wiki achikan asaajan ukuktatjai,

nuna dutikai ditan ayamjumainuk

makichkish atsuttawai.

15 Dutikan ujumak tsawan pachitsuk idaisan

dakastinaitjai awake anentaimjatnume tusan,

dutika ai, dita pegkegchau takamsamujin

anentaimtusag buu buuttajai egatkagtinai,

tawai Apajuí tiuwai, Oseas.