1 Axwok intanum, xomenwok te wetz inchusu'n.

Bitwok cyakil yi mbi na wal.

2 Xconk cobox elsawutzil wa'n tan ichusle'n.

Swale' cobox xtxolbil tzitetz yi ewa'n cuntu' sajle'n, yi cya'l na bitan tetz.

3 Na cyakil yi e'chk xtxolbil yi nkubit, cho'n nkubit scye'j e' kataj katxu'.

4 Ncha'tz o' ketz, tajwe'n tan katxolil scyetz e' kanitxa'.

Tajwe'n tan kuk'ol kak'ajsbil tetz Ryos scyuch' kamamaj.

Tajwe'n tan katxolil scyetz cyakil yi mbi cu'n banak Ryos tan yi tetz porer.

5 Na tak'nak Ryos jun ca'wla'tz tetz Jacow.

Nin alijt cyen ta'n tan kaxome'n yi o' xonl Israel te'j.

Nin tal i' scyetz yi e' kamam kate', yi tajwe'n tan chichusul yi chinitxa' tu chimamaj sbne' opon tunintz.

6 Na yi tajbil Ryos i'tz, tan tele'n chitxum yi e' wunak yi xomche' tzaj, nin tan cyalol cyetz scyetz chinitxa'.

7 Bantz k'ukewe'n chic'u'l te Ryos, nin bantz qui tele'n te chic'u'l yi ẍe'n cu'n ban i' sajle'nix tunintz.

8 Ncha'tz tajwe'n tan chichusle'n, bantz quil tze'tzax yi cyajtza'kl, chi banake' yi chimam chite', yi quinin k'uke' chic'u'l te yi yol i', nin yi ja cabej chic'u'l te'j.

9 Na ya'stzun banake' yi e' xonl Efraín.

Wech, chin cham nin e' tan oyintzi'.

Wekij che' tan e'chk balaj ma'cl tetz oyintzi'.

Poro ja che'l ojk ẍchiwutz e' chicontr.

10 Quinin nchixom te yi chiyol yi e' suk tetz Ryos.

Quinin nchixom te yi tetz ẍchusu'n.

11 Ncha'tz el te chic'u'l yi porer Ryos.

El te chic'u'l yi e'chk takle'n yi bnixnak tan Ryos scye'j.

12 Na wi'nin e'chk milawr bnixnak tan Ryos,

ẍchiwutz chitaj chitxu', le ama'l Zoán cwent Egipto.

13 Na ja cu' jatxol i' yi mar. Cob cuntu' el ta'n.

Nin ja chicy' yi tetz tanum tc'u'l.

Na yi a', ja oc ta'n chi jun tapij ẍchixlaj, yi quicy'e'n tzaj.* Ex 14:21-22.

14 Nin yi chixone'n tbe', yi cyele'n tzaj Egipto, bajxij jun boc'oj sbak' ẍchiwutz chajk'ej.

Ma lak'bal, ja xcon yi sbak'a'tz tetz chitxekbil yi na chixon.

15 Nin te yi ate' le ama'l tz'inunin tu', ja el tzaj a' tan Ryos wutz c'ub. Nin ja chuc'a' te'j.

16 Na ja el tzaj jun chin wutzile'n tzanla' tan Ryos wutz yi jun c'uba'tz.† Ex 17:1-7.

17 Ja quil yi e'chk milawra'tz yi bnix tan Ryos.

Poro ilenin ja chijuch quil, na nin e' oc tan contri'n te yi Wi'tz Ryos.

18 Ja cho'c tan pile'n i'.

Na ja cho'c tan jakle'n chiwa', poro i yi cyetz cyajbil nchijak.‡ Ex 16:2-15; Nm 11:4-23, 31-35.

19 Ja cho'c tan telse'n k'ej Ryos.

Na nin cyaltz:

“Iẍkaj at tzunk rmeril yi nink tak' jun balaj kawa', tzone'j le ama'l tz'inunin tu'.

20 Bintzinin, ja xcye' Ryos tan telse'ne'l tzaj a' wutz c'ub, yi ja xcye' tan sijle'n wi'nin ama'l.

Poro ¿xcyek polo' i' tan tak'le'n kawa'?

Nin ¿xcyek polo' i' tan tak'le'n kachib, tzone'j le ama'l tz'inunin tu'?” che'ch bantz.

21 Yi tbital Ryos cyakil yi xtxolbila'tz, ja saj colp wi' i' scye'j.

Nin yi saje'n colp wi' i', cho'n cunin ban chi na ban jun k'ak'.

22 Ja chiquim tan paj yi quinin k'uke' chic'u'l te Ryos, nin ja chiquim tan paj yi quinin k'uke' chic'u'l te yi tetz porer.

23 Poro yi Kataj Ryos ilenin ja el k'ajab i' scye'j, na ja cawun i', nin ja jakxij yi tcya'j ta'n.

24 Nin saj tk'ol jun jilwutz ixi'n scyetz, yi maná bi', yi cho'n saje'n tcya'j, tan chiwane'n te'j.

25 Ja tzun chiwan te chiwa' yi e' ángel.

Ja tak' Ryos cyakil yi chiwa', yi tajwe'n scyetz.

26 Ncha'tz tan yi tetz porer ja saj jun chumam cyek'ek' ta'n.

Cho'n saje'n tele'n tzi'n tu cwe'n tzi'n.

27 Cy'a'n jun c'oloj tz'ichin tan yi cyek'ek'a'tz.

Nin cho'n chicyaje'n quen jicy ẍchixo'l.

28 Cho'n cunin ban yi tajlal chi yi samlicy' tzi mar.

Cho'n tpone'n tan Ryos xo'l chica'l yi mantial tu', nin solte'j cyakil yi ama'l kale ate't.

29 Ja baj cya'n jalen cu'n micy' chipaj te'j.

Na Ryos mmak'on cyakil cyajbil.

30-31 Poro tan paj yi chin xo'j nin e' tan wa'a'n, ja tak' Ryos chicaws.

Atit nin chichib le chitzi' yi tak'le'n chicaws.

Na ja chiquim yi e' yi mas cham yi ate' ẍchixo'l, yi e' balaj xicy cwent Israel.

32 Poro quinin chixob tetz Ryos.

Nin ilenin ja chijuch mas quil.

Wech quilnak e'chk milawr yi bnix tan Ryos, poro quinin k'uke' chic'u'l te'j.

33 Cha'stzun te e' cwe'n sotzal Ryos.

Qui'c ntak' cyakil yi q'uixc'uj nchimuc', na chin xo'wbil nin yi quimichil e' ban.

34 Ma yi toque'n Ryos tan chibiyle'n cobox, ilenin at e' yi ja cu'-t chiwutz tetz.

Nin ja cho'c tan joyle'n i' junt tir.

35 Nin ja ul tx'akx chic'u'l, yi i'tz Kataj Ryos yi colol cyetz.

Yi i' yi Wi'tz Ryos yi colpinl cyetz.

36 Poro yi e' cyetz, ilenin chiwutz tu' chiplaj tu' tu chiyol.

Na ja xcon e'chk balaj yol cya'n, poro nk'era'tz bintzi.

37 Nk'e'tz tz'aknak cu'n e' tu chijilon.

Na quinin nche'l cu'n te chiyol yi nchisuk tetz Ryos.

38 Ma Kataj Ryos, ilenin ja el k'ajab i' scye'j.

Ja cuy i' chipaj, nin quinin chiquim ta'n.

Quinin tak' ama'l tetz yi chi'ch c'u'lal yi ncyak' tetz i'.

Ma na ja cuy i' chipaj.

39 Na ja nachon i' te'j, yi e' tu' wunak, yi ni'cu'n e' tu cyek'ek' yi na icy', nin qui't na ul junt tir.

40 Jat lo' tir e' oc tan contri'n te Ryos le yi ama'l yi tz'inunin tu'.

Jat lo' tir cyak' ch'on tetz.

41 Ilenin e' oc tan pile'n Ryos.

Nin ja cyak' bis tetz, yi jun, yi chin xan nin i'.

42 Qui't na ul tx'akx yi porer i' ẍchic'u'l.

Wech na e' colpij ta'n ẍchik'ab yi e' buchul cyetz.

43 Qui't mmu'l tx'akx ẍchic'u'l yi e'chk techl, yi ẍchaj i' scyetz te yi ate' tzaj Egipto.

Qui't ul tx'akx ẍchic'u'l, yi e'chk milawr, yi bnix ta'n le ẍk'ajlaj Zoán cwent Egipto.

44 Wech ja oc cyakil yi tzanla' tetz chich'.

Nin cya'l nin jun aj Egipto uc'a' te'j.

45 Ej nin saj ẍchakol jun c'oloj ne'ẍ us tan chixuxe'n yi e' aj Egipto.

Nin e' saj ẍchakol jun c'oloj wo' tan po'tze'n chiluwar.

46 Nin tak' i' ama'l scyetz sac' tan bajse'n yi wutz yi cyujul, nin tan po'tze'n chitx'otx'.

47 Nin ja saj jun chin c'ub a'bal ta'n, tan puch'le'n cyakil yi e'chk wi' uva yi awij cya'n.

Ncha'tz ja tz'e' cyakil yi ibẍ tan k'ab che'w.

48 Nin ja chibaj quim cyakil cyawun.

Na ja chiquim chiwacẍ tan yi c'ub a'bal.

Ma chicne'r, ja chiquim tan k'ancyok.

49 Ja saj colp wi' Ryos scye'j yi e' aj Egiptoja'tz.

Ja chi'ch c'u'l, nin ja icy'an i' scye'j.

Cha'stzun te e' cwe'n xitu'n, cyak'un yi e' ángel.

50 Ja ticy'saj i' c'u'l scye'j, na quinin cuy i' chipaj.

Ja tzun chiquim wi'nin e' tan ya'bil.

51 Na e' baj quim len cyakil yi bajx chinitxajil yi e' aj Egiptoja'tz ta'n.§ Ex 12:29.

52 Poro tan yi banl talma' i', ja che'l tzaj tcy'al yi e' tetz tanum.

Cho'n cunin nche' tulej yi cyele'n tzaj chi na ban jun pstor scye'j cneru'.

Nin ja bajx cu'n i' ẍchiwutz le ama'l tz'inunin tu'.

53 Xomij nin i' tan chiq'uicy'le'n tan qui chixobe'n.

Ma yi chicontr, e' bek'xij cye'tz xe mar.

54 Nin ja chu'l tcy'al yi tetz tanum, le ama'l yi chin xan nin yi suki'nt ta'n scyetz.

Yi e'chk ama'la'tz, yi xcye' i' tan cambaje'n ẍchik'ab yi e' contr.

55 Nin ẍchiwutz cunin yi e' tetz tanum, ja che'l lajul yi e' mal naka'tz.

Ma yi chi'ama'l tu chica'l, nintzun cu' jatxol ẍchiwutz yi coblaj k'u'j xonl Israela'tz.

56 Poro yi e' tetz tanuma'tz, nintzun e' oc tan pile'n.

Wech i' yi Ryos yi cya'l na xcye' quen te'j.

I' yi Ryos yi wi'nin k'ej.

Poro ja cho'c tan contri'n te'j, nin tan pajle'n yi tetz ca'wl.

57 Ma yi e' yi nchopon Canaán, ni'cu'n nin nchiban chi banake' yi e' chimam chite', na ja cyaj cyen quilol Ryos, nin quinin k'uke' chic'u'l te'j.

Ja je' txalpuj yi cyajtza'kl chi tane'n jun wi' tze', yi chin ẍo'c nin te'j.

58 Nin ja cyak' chi'ch c'u'lal tetz Ryos, na ja cho'c tan c'u'laje'n e'chk muyc, nin ja cho'c tan c'u'laje'n e'chk ryos yi banij cuntu' quitane'n.

59 Yi tilol Ryos cyakil e'chk xtxolbila'tz yi na katzan yi o' xonl Israel tan banle'n, ja che'l lajul i' tcwent.

60 Nin ja cyaj cyen tilol i' yi tetz ca'l yi at le ama'l Siló.* Jos 18:1; Jer 7:12-14; 26:6.

Wech, na ya'stzun najbil i' ẍchixo'l kamam kate' tentz.

61 Ej nin ja tak' i' ama'l scyetz yi e' contr tan chicambal yi caẍa',† 1S 4:4-22.

nin ja el k'ej i' tan paj, na qui'ct ẍchamil i' tane'n.

62 Nin yi saje'n colpuj wi' i' scye'j yi e' tetz tanum, ja tak' i' ama'l tan chiquime'n ẍchik'ab yi e' chicontr.

63 Ja chiquim yi e' xicy tk'ak'.

Cha'stzun te wi'nin xun qui mo'c quichmil.

64 Ncha'tz yi e' pale', ja chiquim tan spar, nin quinin e' ok' yi quixkel nka chixonl scye'j.

Na qui'c chamo'n ib bajij scye'j yi chiquime'n.

65 Poro yi tele'n k'ajab Ryos scye'j, ja jal walor chi na jal kawalor yi na el kawatl.

Nka chi na ban jun yaj yi na mak'tij wankil tan win.

66 Na nin oc i' tan oyintzi' scyuch' chicontr.

Nin xcye' i' scye'j, na nin e' el ojk swutz i'.

Junawes tele'n chitx'ix ta'n.

67 Poro el chik'ej yi e' xonl Ẍep ta'n, na quinin e' je' xtxa'ol yi e' tu Efraín, yi xonl Ẍepa'tz.

68 Ma na i yi e' xonl Judá, e' je' xtxa'ol tan q'uicy'le'n yi caẍa' kale atit yi ca'wl Ryos.

Ncha'tz je' xtxa'ol Kataj yi wi'wtz Sión tan xcone'n tetz najbil i'.

Na ya'stzun yi jun ama'l yi wi'nin na pek' i' te'j.

69 Cho'n tzun bnixe'n yi tetz ca'ltz le jun ama'la'tz.

Chin wutz tkan nin ban.

Nin ja bixe' ta'n, chi tane'n yi wuxtx'otx' yi quil yucan.

70 Ncha'tz je' xtxa'ol i' yi Luwiy tetz ẍchakum.

Wech, na tal pstor cne'r tu' Luwiy.

71 Ja je' xtxa'ol, tan xcone'n tan chiq'uicy'le'n yi e' tetz tanum, nin tan xcone'n tetz chibajxom.

72 Tetz cu'n talma' Luwiy yi mo'c tan chiq'uicy'le'n.

Nin chin list nin ban i' tan chicawe'n.