BAYA VAREN ORIN BANTA (Aposeri) KAYO MA YÓKEIN BAYA INO
(Aposeri)
Aposeri Vompon Ma Uvanteí Pákenai Afova Vaya Ino
Ma vompon ma uvantein banta ino.
Ena anan pintena ayofan banta ma Porin arona váken ma ena ena véin má nókan ma minó ano anunu iyá ein banta Ruku ano ino. (Korosi 4:14 fin ná onano).
Uvarein orana ino.
AD sikisti-tari (63) fin Porin ma Romu kamani ano ma karavusií ukharé in ma kíparí iyain oranafin mi ma vompon uvanten mino.
Ma vompon ma uvantein baru ino.
Romú barurá ifo mai vompon ma uvaran danasinta Sisareá barurái ovare evare uan átaru uádaren mi uvanten mino.
Ma vompon ma uvaman amikhein kéká ino.
Ída afová ukhé tiferuna vanta Tiofirasi maen Romu kamanini kákan doran banta váken monó tiyan mumunan iyá ein banta vá inká ena anan pinté ma monó tiyan mumunan ukhá ein kayo vá ino.
Nái ana vará ma vompon uvanten nafino.
AD teti (30) oranafin ma Porin karavusi fáken Romui varafá orein baya vá inká monó doran ma araí uren dorein baya vá afová ino van uvaren mi inká mepifin aníen ukhen mino.
1
Kantá Aunan Amin Nain Nan Ma Yisasi Siamein Baya Ino
1 * Ruk 1:3Tiofirasi oe, Yisasi ma araíen doriyáken monó baya minó nanin banta siamen eriyá ein bompon pefá uvaman amikhá uno. 2 * Mak 16:19; Ruk 24:49-51Doren eriyan mai ma vei yorarí ino van ma vaya varen orin kayo me Kantá Aunani ákonafó monó baya siamin doran aní uran mi Tiyarafenu ano véin aviren inarufá óden mino. 3 * Ruk 24:36-49; Apo 10:41Béi uman o varen púaren masí pinté e mantavin beni vaya ma varen orin kayo ano ódarákan béin nan pura sen aun manten mino sino van betin avorá foti (40) yamúpin kokhon dádasí iyáken betí baintá afoká uviyan Tiyarafenui Yafisin pintena vaya siamen mino. 4 * Ruk 24:49; Yon 14:16-17; Apo 2:33Maná damú ma Yisasi vetí ankan má duna niyáken máan mi sen tiamikharen mino, “Tiretí ankan ída vá Yerusaremí me ampire ena varufá orera iyákeya mai ma se Sifóe ano ameno van tianten mino séku ma inikhá eona yanasará ave ono. 5 * Mat 3:11Monó non máa fói Yoni monó non péanten mifo ída ayáká basin mi Kantá Aunampó tiretin monó non péantanten mino.”
6 * Ruk 24:21Máa sirákan maen bei eyo iyampon kayo e átaru uven béin inaemí, “Bafan noe, saréa Isareri vara evaráne maman ákona uantádesin ná mana kin mano yafisinten nafino áa ída fino.”
7 * Mak 13:32Máa síkan béi evaránen betí ankan tiamemí, “Mai áau fi yamu safi ída siretí ankan nina yaná banti ída kanaíe afová in nompo Tifóe veyákái aní uren maináká dafíken mino. 8 * Mat 28:19; Ruk 24:48Máan tukhein Kantá Aunan ma siretimpin erivinti mae ákona mamareya séin pákena vaya Yerusaremí barufin má minó Yudiá bara akhempá bá Sameriá barafá bá inká ma varai minó akhempá deren mo siamin nono.”
Yisasi Ma Inarufá Ódein Baya Ino
(Maki 16:19-20; Ruku 24:50-53)
9 Máa siran betí ankan avorá Tiyarafenu ano véin aviran inarufá ódiyain má mana konan mano véin iyádan ída onen mino.
10 Béi ódivíkan betí ankan ayompin kakhaken baré in efanten buí daná ukhein bantá kanan mano manádá betin ádé e manten mino. 11 * Mat 26:64; Ruk 21:27E mantaven máa semí, “Karirí banta kayo oe, pará tiretí ankan mará mantakheya ayompin kakhaké bara fono. Mai Yisasi ma Tiyarafenu ano saréa siretin pinte aviren inarufá ódi ma oneona avúaváká ten mi véi umbaránen eranten mino.”
Matiasin Avían Tiyan Míkan Mifo Sirantan Mana Orun Kádan (11) Baya Ma Varen Orin Kayofin* Baya ma varen orin kayo mai Aposeri en tiyan mino. Asotú Ein Baya Ino
12 * Ruk 24:50-53Máa siran mairá eyo iyampon kayo ano Orifí Anuyon ne ma siyain anu me ampiren Yerusaremí oren mino. Yerusaremíké ma Orifí Anuyontá oriyain mai mana kiromita ino. 13 * Mat 10:2-4Mai varufin oriven betí ankan ma fefá baré ein namumpin ódiven dan bain karafarampin un baren mino. Maifin ma un baré ein kéká mai Pita, Yoni, Yemisi, Enduru, Firipi, Tomasi, Batoromiu, Matiu, Arfiusin anin Yemisi inká Seroti kéká pintena vanta Saimoni, inká Yemisin anin Yudasi siren mino. 14 Mai vanta kéká bá anasi kayo vá inká Yisasin anóe Marian má be afá kayo vá e átaru uven ará manafiní uren amúkiyaren mino.
15 Maí damú kayofin ma Yisasintá mumunan iyá ein nanin banta maen mai mana antareti ifo tuenti (120) nanin bantan átaru ukhen bákan mai finte Pita e mantaven 16 * Íbo 41:9máa semí, “Mumunan tiyofi sifá tiváeyan noe, pefá Tiyarafenui vompompin Kantá Aunan mano Devitin oo ráké naren Yudasin nan Yisasin avían namuro ayampin kainten ne ma sikhá ein mano fura sen dákóen mino. 17 Pefá Yudasi setimpin báken monó doran manaíen tetin má doriyaren mino.”
18 * Mat 27:3-8Máan tukhan maen mai Yudasi ano vei namu avúavákáke miyampó mana vara o miyaní uren mai varafin beyantá ánon páké eraven ankamíkan ben amú pautivin ará kakhufen barará eraven mino. 19 Ínaimpáké Yerusaremí barufin ma vain nanin banta ano mai vaya iniren maen mai vara van betí avaya finté Akeradama e sen mino. Mai víi ana mai nare vanakhein bara en tikhen mino.
20 Máa siren Pita evaránen temí, “Ma vaya van Í Bompompin máa sikhen mino,
‘Béi ma varé ein afokhan áesin para vantin ná
mai afokhampin ída vá mana vanta ano vano.’ Íbo 69:25
Inká mai vompompin mana ena vaya máa sikhen mino,
‘Ena vanta áesin ná beni varu varano.’ Íbo 109:8
21 Máan tukhein nará minó banta kéká pinte mana vanta ano ma setí ankan má nókan Yisasi ma yoren non maen ontaré ein banta vá tetí avían kaékun ná beni varu varano. 22 * Mak 1:9; 16:19; Yon 15:27Yoni ma araíen monó non péantiyá ein táké ma eriaren ma Tiyarafenu ano Yisasin aviran inarufá ódein ma ontaré ein banta vá avían kaesin tetin tiyaen ná Yisasi ma fúaren e mantakhá ein baya vanasi siamino.
23 Pita máa sirákan kankánan banta avían kaen mino. Mana vanta maen kanú manaú bí ariyaren mino. Mai vanta van Yosepi ne sen ariyan inká Basabasin ne sen ariyan inká Yastasin ne sen ariyan mino. Ena vanta maen Matiasin ne sin avían kaen mino. 24 Mai vantá kanan avían kaúden máa sen amúkemí, “Bafan noe, eyaká anan minó nanin banta aúpin afová ukha ompo ma kanan pinte ma éi anunu ukhanona vanta vá tetin aní uresin ná 25 Yudasi vei yoran me ifá uren be nan ma vano sikhá ein barufá bano van oren mifo vékanan pinté iye anó Yudasini varu varen ná eni vaya varen orin doran bantaí inten nafino aní ono.” 26 Máa siren ayá danka vá asíka yanka vá punkikhaan ayampin pákaran Matiasi ayá danka yanúden e aní uvíkan béin avían tiyan míkan mifo sirantan mana orun kádan (11) baya ma varen orin kayofin asotú en mino.