MAKINI KAMA VAYA INO
(Maki)
Makini Kama Vaya Ma Uvanteí Pákenai Afova Vaya Ino
Ma vompon ma uvantein banta ino.
Yerusaremíke nanin Marian anin Yon Maki Banabasin afóna anon uvanten mino. Porin nú Banabasin nú bá béin esé araíen monó baya varen orin dorarí ukharen mino. Oo siádan baya ano siyáken béi anon Pitan oo vantaí ukhen beni vaya o vaéan banasi amiyaren mino. Máan tiyákan Pita anon ma vompon ma uvaran danasinta véin amikhen minon ten manáa ano inikhen mino.
Uvarein orana ino.
AD sikisti-fo (64) ráké sikisti-faipi (65) fin mi uvanten minon ten kokhon afova vanta kayo ano inikhen mino.
Ma vompon ma uvantein baru ino.
Kákan baru Romú ino.
Ma vompon ma uvaman amikhein kéká ino.
Romu kamani ano ma yafíkein baru kayofin má ena anan kéká pinté ma monó tiyain kayon uvaman amikhen mino. Peyante monó dóki fintena vaya ma sakhanampaí uádan ma varé ein baya kayo ída kokhon mafin ban maen inká Yutan kékái anafu aráoni avúavá bá inan tian dákó en ukhen mino.
Nái ana vará ma vompon uvanten nafino.
Yisas Karaisi maen minó ákona vain Tiyarafenu Anin mifo ume nanin bantai miyan ída van doran bantaí uven ma ume fintena aya uren ma miyaní ukhein mi aní ukhen mino.
1
Mónó Non Péantan Banta Yoni Ano Ma Aa Uvisein Baya Ino
(Matiu 3:1-12; Ruku 3:1-9, 15-17; Yoni 1:19-28)
1 Yisas Karaisi Tiyarafenu Anini kama vaya araí in máan mi ukhen mino. 2 Sakhanampa vanta Aisaiyani vompon dókifin Tiyarafenu ano máa sen uvantaren mino,
“Ineno! Téi vaya varen orin banta siantékun éin an uanten oren
eni aa mo uvisinten mino!” Mar 3:1
3 “Kámá barafá mana vanta ano oovaren máa siyan mino,
‘Bafani aa uvíde vá beni aa funtarano.’ ” Ais 40:3
4 * Apo 13:24; 19:4Aisaiya máa sikáin monó non péantan banta Yoni ano kámá barafá afoká uven temí, “Ará baéde non baresin ná Tiyarafenu ano siretíi ume ampiantano.” 5 Máa síkan Yerusaremí baru fáké bá Yudiá bara fáke nanin banta kayo vá ano Yoni vaintá eriven betíi ume sian páman urákan béi Yodení nompin monó non péanten mino. 6 * 2Ki 1:8; Mat 11:8Béi kameri ayo fóké uvaran au anamun uren kao au fóké amú anan uren báken panon má bonkampun anu vá niyaren mino. 7 * Apo 13:25Niyáken béi máan mi siyaremí, “Ten toyampá ma eriyaini ákona ano senti ákona moéken esantakhen mino. Téi ída funtákeruna ída kanaí é matimé beni arantan anamun anan útufonté uno. 8 Téi non pokéi féantiyá umpo véi Kantá Aunan pokéi féantanten mino.
Yoni Ma Yisasin Monó Non Péantein Baya Ino
(Matiu 3:13-17; Ruku 3:21-22)
9 Maí damú Yisasi Kariri varafá Nasaretí baru fáké eríkan Yoni ano Yodení nompin béin monó non péanten mino. 10 Péantádan Yisasi non pinté e ayoren édiyan onákan inaru ona yivin kukhofá avúaváká ten Kantá Aunan mano véin ánontá eren mino. 11 * Íbo 2:7; Ais 42:1; Mat 12:18; Mak 9:7Erákan inaru fáké mana oova ano máa semí, “Éi sen tanin uron mono. Éin nan moeké tinunu ukheruna iyampon mi van ná timusin iyá uno.”
Ban Anon Mano Ma Yisasin Akhenóka Ein Baya Ino
(Matiu 4:1-11; Ruku 4:1-13)
12 Máa siyain má Kantá Aunan mano Yisasin ainen tiantan banta ída van kámá barafá oren mino. 13 * Íbo 91:11-13Maifá foti (40) yamú o vákan Ban Anon mano Yisasi eraven ankan mino van akhenóka uan onen mino. Béi kámá barafá afá uraran kayo vá ana vákan enisori kayo ano ventá dafíkaren mino.
Yisasi Ma Karirifá Monó Doran Mo Araí Ein Baya Ino
(Matiu 4:12-17; Ruku 4:14-15)
14 * Mak 6:17Eroti ma Yonin karavusifin pákaan kaúdan maen ínaimpáké Yisasi Karirí barafá Tiyarafenui kama vaya siamen oren mino. 15 * Mat 3:2Oriyáken temí, “Damú inka afoká íkan Tiyarafenui Yafisin inka ádé e van mino. Ará baéde vá Kama Vayará mumunan ono.”
Yisasi Ma Araí En Bei Eyo Iyampon Kayo Avirein Baya Ino
(Matiu 4:18-22)
16 Maná damú Yisasi Kariri non akhempá oriyaren onákan Saimonin má be afá Endurun má noyana van baseí iyaren mino. Mai fara va ino. Betí ankan noyana arin kékái váken baseí iyaren mino. 17 Máan tiyaré íkan Yisasi vetin araren temí, “Ten má eresí aní ékuya noyana ma vaseí iyaonaí ureya vanasi avirano.” 18 Máa síkan békanan manádá base kayo me ampiyan béin bákuren oren mino.
19 Yisasi ma non akhempá manáa oriyan onákan Sebetin anin kanan Yemisin nú Yonin nú botifin base kayo yókiyan baren mino. 20 Dókiyaré íkan békan nan ariyain má betí afóe Sebetin má doran banta kayo vá me ampiren Yisasin bákuren oren mino.
Yisasi Ma Namu Aunan Do Siantein Baya Ino
(Ruku 4:31-37)
21 Betí ankan Kapeniamú barurá o varé íkan Sabati yamú ma afoká íkan maen Yutan nanin bantai monó átaru namumpin Yisasi ódiven monó baya siamen mino. 22 * Mat 7:28-29Tiamíkan banasi ano iniren takhaen orera iyan temí, “Beni vaya ano Yutan kayoi man baya ma afová uhein banta kéká ano ma vaya seinisa iyan naino. Ída ino. Pura sikhein ákona vá ma vain banta ano ma seiníi iyan mino.”
23 Máa siyákan namu aunan ma vain banta ano mai monó átaru namumpin baren mino. 24 * Mak 5:7Mai vanta ano vádiyan temi, “Nasaretíke vanta Yisasi oe, éi setin namu ono vará ere fono. Tetí ankan éin afová ukhékuya éi Tiyarafenui Mana Kantasí ukhaona uron mono!”
25 Máa síkan Yisasi mai namu aunan nan arankaan táden temí, “E avaya fákare véin pinté entavono!” 26 * Mak 9:26Máa siyain má namu aunan mano mai vanta máden dómeron uren me ampiren bádiyan oren mino.
27 Máan tiyain má mai ma iyukhen oniyaré ein nanin banta ano sakha iyáken betiyan inain maran en temí, “Ma naísá iyan nafino. Ma auyen afovan bákan mai ákona fókéi namu aunan kayo yo siantiyan mai kéká ano véin oo yaiyiyan mino!” 28 * Mat 4:24Máan turákan Yisasi ma varein avúavá baya ano ainen Kariri varafá oreraen mino.
Yisasi Ma Pitan Aná Anóen Ayofein Baya Ino
(Matiu 8:14-15; Ruku 4:38-39)
29 Yisasi ma mai monó átaru namun me ampiren Saimonin nú Enduru nú amapin orin maen Yemisin nú Yonin nú bá béin bákuren oren mino. 30 Oríkan betí ankan temí, “Saimonin aná anóen aí iyáken aufá ira kharo iyan bakhen mino” sen Yisasin tiamen mino. 31 Máa síkan mai nanin ma vakhein ádé ódiven ayan bana fákaaren avían mantiyain má manádá aí kípavin mai nanin mano vetíi yunan taren mino.
Yisasi Ma Kokhon Nanin Banta Ayofein Baya Ino
(Matiu 8:16-17; Ruku 4:40-41)
32 Mai inúpá áau ma orun periyain má kokhon aí nanin banta vá namu aunan mano ma fákakhein kéká bá ina Yisasi vaintá aviren ere ere en mino. 33 Máan tiyákan Kapeniamú baru ráke nanin banta ano o vúten Yisasi ma varan nain avúavá onano van onará e átaru en mino. 34 * Mak 3:10-12Máan tuvin ara ara aí ma váein kayo ayofiyáken namu aunan ma fákakhá ein kéká pinte ina yo sianten mino. Máan ten mifo namu aunan kayo ano Yisasi iyé ban nafi mai véin afová ukhan pasen ída áíkan manáa vaya sen mino.
Yisasi Ma Karirí Akhempá Monó Dorarí Ein Baya Ino
(Ruku 4:42-44)
35 * Mat 14:23; Mak 6:46Ená damú ída kakhakhan Yisasi fe ákura suron e mantaaren amúkono van banta i van kámá barafá beyaká oren mino. 36 Orivíkan ínaimpáké Saimonin má manáa kéká bá Yisasin doseno van oren mino. 37 Oren ma o oman afoká uren maen temí, “Éin nan minó ano yosiyan mino.”
38 Máa síkan Yisasi evaránen betin tiamemí, “Monó baya siameno van mi erikhé umpo erítifé ena varu kayo fimpá orivé maifá ina mo siameno.” 39 * Mat 4:23; 9:35Máa siren Kapeniamú me ampíren Karirí barafá ma vain baru kayo fimpá oriven Yutan nanin bantai monó átaru namun kayofin monó baya siamiyáken kokhon nanin banta fintena yere namu aunan kayo yo sianten mino.
Amon Dana Aí Bain Banta Ma Yisasi Ayofein Baya Ino
(Matiu 8:1-4; Ruku 5:12-16)
40 Maná damú amon dana aí bain banta ano véin ayofano van Yisasin arantampin me aron kan durafúden temí, “Éi ma anunu iyanteya senti sí daná tiyofasintan nono.”
41 Máa síkan Yisasi arunan máden ayan dan orin au aruviyan temí, “Eyo, ayofé umpo aí daná kípano.” 42 Máa siyain má anan mai amon dana aí manádá kípen mino. 43 Kípavin Yisasi mai vanta siantan oriyan ákona vaya siamemí, 44 * Riv 14:1-32“Ída vá ena nanin banta ma vaya siamiyáke funtáde ore vá monó doran banta aufasá mo aní ono. Máan ture fefá ma Mosesi sikhan amon dana aí ma vá ein kéká ano ma variyá ein avúavasí eya vá manáa yanasinta vare mo ákonte esin ná banasi ano mai ma aí kípein ná onano.”
45 Máa síkan mifo mai vanta ano oriven banasi avorá Yisasi ma véin aí ayofein baya mo siamin iniren minó nanin banta ano Yisasi vaintá eren mino. Máan tiyaimpin Yisasi ma minó baru kayo fimpá orono sikhá ein me ifá uren banta ída vain akhempá o vákan minó akhen páke nanin banta ano kasaen be vaintá oren mino.